Eski Ou Demande, “Oli Zeova?”
Eski Ou Demande, “Oli Zeova?”
“Zot elwannyen avek mwan . . . Zot pa’n dir, ‘Oli Zeova?’”—ZEREMI 2:5, 6.
1. Kan dimoun i demande, “Oli Bondye?,” ki zot oule konnen?
“OLI Bondye?” Bokou dimoun in demann sa kestyon. Serten zot in senpleman oule konpran en keksoz debaz lo Kreater: Kote i ete? Lezot in demann sa kestyon kan zot vwar sa kantite maler ki annan partou. Oubyen kan zot personnelman pas dan bokou difikilte e pa kapab konpran akoz Bondye pa’n ed zot. Tandis ki i annan serten ki pa zanmen demann sa kestyon akoz zot pa krwar ki Bondye i egziste.—Psonm 10:4.
2. Lekel ki’n rod Bondye e ki’n reisi trouv li?
2 Byensir, bokou dimoun i aksepte ki i annan en kantite laprev ki Bondye i egziste. (Psonm 19:1; 104:24) Serten sa bann dimoun i satisfe avek zot larelizyon. Me lanmour pour laverite in pous plizyer milyon lezot dimoun dan diferan pei pour rod sa vre Bondye. Zot zefor pa’n anven akoz Bondye “pa lwen avek sakenn parmi nou.”—Akt 17:26-28.
3. (a) Kote Bondye i reste? (b) Kwa ki enplike dan sa kestyon “Oli Zeova?”
3 Kan en dimoun i vreman trouv Zeova, i konpran ki “Bondye i Lespri,” setadir bann imen pa kapab vwar li. (Zan 4:24) Zezi ti refer avek sa vre Bondye konman “mon Papa ki dan lesyel.” Ki savedir sa? Savedir sa landrwa kot nou Papa seles i ete, i eleve dan en sans spirityel, zis parey sa lesyel ki nou vwar i byen o parlao later. (Matye 12:50; Izai 63:15) Kantmenm nou pa kapab vwar Bondye avek nou lizye, i fer nou konn li e ansenny nou bokou lo son bann plan. (Egzod 33:20; 34:6, 7) I reponn kestyon bann dimoun senser ki anvi konn bi lavi. Konsernan bann keksoz ki afekte nou lavi, Bondye i fourni en bon fondasyon pour nou arive konn son pwennvi. Setadir lafason i vwar serten keksoz e si sa ki nou anvi i an akor avek son plan. I oule ki nou rod lenformasyon konsernan sa bann keksoz e fer bokou zefor pour trouv larepons. Atraver profet Zeremi, Zeova ti reprimann lepep Izrael akoz zot pa ti pe fer sa. Zot ti konn non Bondye, me zot pa ti demande, “Oli Zeova?” (Zeremi 2:6) Zot pa ti fer plan Zeova pas premye. Zot pa ti pe rod son gidans. Kan ou annan en desizyon pour pran, ki swa i en gro desizyon oubyen en pti desizyon, eski ou demande, “Oli Zeova?”
Bann ki ti rod Gidans Bondye
4. Ki mannyer nou kapab benefisye atraver legzanp David ki ti rod gidans Zeova?
4 Kan David, garson Zese, ti ankor en zennonm, i ti devlop en lafwa solid dan Zeova. I ti konn Zeova konman sa “Bondye vivan.” David ti personnelman eksperyans proteksyon Zeova. Son lafwa ek lanmour pour “non Zeova” ti fer li touy Golyat, sa zean Filisten ki ti byen arme. (1 Samyel 17:26, 34-51) Toudmenm, David pa ti met konfyans dan son lekor akoz son sikse ki i ti gannyen. I pa ti konklir ki aprezan, nenport kwa ki i fer, Zeova ti pou beni li. Pandan bann lannen ki ti swiv, David ti kontinyen rod gidans Zeova kan i ti annan en desizyon pour fer. (1 Samyel 23:2; 30:8; 2 Samyel 2:1; 5:19) I ti kontinyen priye: “Fer mwan konn ou bann semen, O Zeova; Ansenny mwan ou bann santye. Fer mwan mars dan ou laverite e ansenny mwan, parski ou mon Bondye delivrans. Dan ou mon’n espere toudilon lazournen.” (Psonm 25:4, 5) Pa sa i en bon legzanp pour nou swiv!
5, 6. Ki mannyer Yeosafat ti rod Zeova dan diferan moman son lavi?
5 Dan letan Lerwa Yeosafat, senkyenm lerwa dan laliny rwayal desandans David, trwa nasyon ti zwenn ansanm pour lager avek Zida. Vi ki i ti bezwen fer fas avek sa kriz, Yeosafat ti determinen “pour rod Zeova.” (2 Kronik 20:1-3) Pa fer premye fwa ki Yeosafat ti rod Zeova. Yeosafat ti’n rezet ladorasyon Baal ki rwayonm nor Izrael ti’n anfonse ladan e i ti’n swazir pour mars dan semen Zeova. (2 Kronik 17:3, 4) Aprezan ki i ti pe fer fas avek en kriz, ki mannyer Yeosafat ti “rod Zeova”?
6 Dan en lapriyer ki i ti fer an piblik Zerizalenm pandan sa letan kritik, Yeosafat ti endike ki i rapel gran pwisans Zeova. I ti’n reflesir bokou lo plan Zeova, ki i ti revele kan i ti sas bann nasyon e donn Izrael serten pei konman en leritaz. I ti rekonnet ki i bezwen led Zeova. (2 Kronik 20:6-12) Eski Zeova ti les Yeosafat trouv li safwasi? Wi. Zeova ti donn en lenstriksyon spesifik atraver Yaazyel, e son lannmen I ti donn Son pep laviktwar. (2 Kronik 20:14-28) Ki mannyer ou kapab asire ki Zeova pou les ou trouv li letan ou tourn ver li pour rod son gidans?
7. Ki kalite dimoun ki Bondye i ekout zot lapriyer?
7 Zeova pa fer lapliferans. I envit tou dimoun dan tou nasyon pour rod li atraver lapriyer. (Psonm 65:2; Akt 10:34, 35) I konnen kwa ki dan leker bann ki priy li. I asir nou ki i ekout lapriyer bann dimoun ki drwat. (Proverb 15:29) Bann ki oparavan pa ti montre okenn lentere dan li me ki aprezan abes zot e rod son gidans, Zeova i les zot trouv li. (Izai 65:1) I menm ekout lapriyer bann ki’n arive kas son lalwa me ki aprezan repantir avek limilite. (Psonm 32:5, 6; Akt 3:19) Parkont, kan en dimoun pa oule soumet avek Bondye, son lapriyer i anven. (Mark 7:6, 7) Annou vwar detrwa legzanp.
Zot ti demande me zot pa ti resevwar
8. Kwa ki ti fer Zeova pa aksepte lapriyer Lerwa Sail?
8 Ler profet Samyel ti dir Lerwa Sail ki Bondye ti’n rezet li akoz son dezobeisans, Sail ti tonm devan Zeova. (1 Samyel 15:30, 31) Me sa ti zis pour fer krwar. Sail pa ti anvi obeir Bondye, me i ti anvi ganny onore devan lepep. Plitar, letan bann Filisten ti pe lager avek Izrael, Sail ti fer konmsi i rod gidans Zeova. Me letan i pa ti ganny okenn larepons, i ti al vwar en tantin ki devinen kantmenm i ti konnen ki i mal pour fer sa devan Zeova. (Deterononm 18:10-12; 1 Samyel 28:6, 7) An rezimen, 1 Kronik 10:14 i dir sa lo Sail: “I pa ti rod gidans Zeova.” Akoz? Parski lapriyer Sail pa ti baze lo lafwa. Alors, konmsi i pa ti’n priy ditou.
9. Ki ti annan mal avek siplikasyon Sidkya pour ganny gidans Zeova?
9 Pareyman, letan rwayonm Zida ti pe al ganny detrir, lapriyer ti ganny fer plis ki labitid e bann profet Zeova ti ganny demann konsey. Pourtan, bann dimoun ki ti dir zot annan respe pour Zeova ti pe osi pratik ladorasyon zidol. (Tsefanya 1:4-6) Kantmenm zot ti pretann rod Bondye, zot pa ti pare pour senserman soumet avek son lavolonte. Lerwa Sidkya ti sipliy Zeremi pour rod gidans avek Zeova pour li. Zeova ti’n fini dir Sidkya ki i devret fer. Me vi ki i ti mank lafwa e i ti les lafreyer pour zonm domin li, Sidkya pa ti obeir Zeova. Alors Zeova pa ti fer plis ki sa, pour donn li en larepons ki ti pou satisfer li.—Zeremi 21:1-12; 38:14-19.
10. Kwa ki ti mal avek fason ki Yoanann ti rod gidans Zeova, e ki nou kapab aprann par son fot?
10 Apre ki Zerizalenm ti’n ganny detrir e bann larme Babilonnyen ti’n pran bann Zwif pour anmenn an egzil, Yoanann ti aranze pour anmenn sa pti group Zwif ki ti’n reste Zida an Lezip. Zot ti’n fini fer zot plan. Me avan zot ti ale, zot ti demann Zeremi pour priy pour zot e rod gidans Zeova. Letan zot pa ti ganny sa larepons ki zot ti anvi tande, zot ti kanmenm pourswiv avek zot plan. (Zeremi 41:16–43:7) Eski ou kapab tir serten leson dan sa bann legzanp pour ki ler ou rod led Zeova, i les ou trouv li?
“Kontinyen fer sir”
11. Akoz nou bezwen met an pratik Efezyen 5:10?
11 Vre ladorasyon pa enplik zis senboliz nou dedikasyon par batenm, asiste bann renyon Kretyen, e partisip dan predikasyon. I osi enplik nou fason viv. Toulezour nou trouv nou anba presyon ki ti a kapab fer nou detourn kont sa semen ki an akor avek latasman pour Bondye. Serten sa bann presyon i evidan e serten pa sitan evidan. Konman nou pou reazir anver sa bann presyon? Letan i ti pe ekrir bann Kretyen fidel an Efez, zapot Pol ti donn zot sa konsey: “Kontinyen fer sir ki zot konnen kwa ki fer plezir Senyer.” (Efezyen 5:10, NW ) Plizyer sitiasyon ki’n ganny raporte dan Labib i montre lavantaz pour fer sa.
12. Akoz Zeova pa ti kontan letan David ti fer anmenn Lars lalyans Zerizalenm?
12 Apre ki lars lalyans ti’n retourn Izrael e ti’n ganny garde Kiryat-Yearim pour bokou lannen, Lerwa David ti oule transfer li Zerizalenm. I ti koz avek bann sef lepep e dir zot ki Lars ti pou ganny transporte ‘si i oke avek zot e si i akseptab devan Zeova.’ Me i pa ti resers ase pour konn pwennvi Zeova lo sa size. Si i ti’n fer sa, Lars pa ti pou’n ganny anmennen lo en saret. Okontrer, i ti pou’n ganny anmennen lo zepol bann Levit Keatit, parey Bondye ti’n klerman demande. Kantmenm David ti abitye rod gidans Zeova, i pa ti fer li dan en fason apropriye sa zour. Rezilta ti katastrofik. Plitar David ti admet: “Zeova nou Bondye in vir kont nou, akoz nou pa’n rod li dapre koutim.”—1 Kronik 13:1-3; 15:11-13; Nonm 4:4-6, 15; 7:1-9.
13. Kan lars ti reisi ganny transporte, ki rapel ki ti annan dan en sanson ki zot ti sante?
13 Kan Lars ti finalman ganny anmennen par bann Levit sorti dan lakaz Obed-edonm ziska Zerizalenm, en sanson konpoze par David ti ganny sante. I ti enkli sa rapel sorti ofon son leker: “Rod Zeova ek son lafors, kontinyen rod li. Mazin bann keksoz merveye ki i’n fer, son bann mirak ek bann zizman ki’n sorti dan son labous.”—1 Kronik 16:11, 12.
14. Ki mannyer nou kapab benefisye atraver bon legzanp Salomon e osi son bann fot ki i ti fer plitar?
14 Avan son lanmor, David ti donn son garson Salomon sa konsey: “Si ou resers [Zeova], i pou les ou trouv li.” (1 Kronik 28:9) Apre ki i ti vin lerwa, Salomon ti al Gibeonn, kot latant renyon ti ete, e ofer Zeova sakrifis. Laba Zeova ti ofer Salomon sa lenvitasyon: “Ki mon pou donn ou? Demande!” Parey Salomon ti demande, Zeova ti donn li lasazes ek konnesans pour ziz nasyon Izrael. Anplis ki sa, i ti donn li larises ek loner. (2 Kronik 1:3-12) Salomon ti servi sa plan ki Zeova ti donn David e batir en tanp manifik. Me an rapor avek son lavi maryaz, Salomon pa ti resers Zeova. I ti marye avek bann madanm ki pa ti ador Zeova. Plitar, zot ti fer li elwannyen avek Zeova. (1 Lerwa 11:1-10) Kantmenm nou kapab annan en bon repitasyon, en bon zizman, oubyen bokou konnesans, i enportan ki nou ‘kontinyen fer sir ki nou konnen kwa ki fer plezir Senyer’!
15. Kan Zera ti vin lager avek Zida, akoz Aza ti kapab priy avek konfyans ki Zeova ti pou sov Zida?
15 Lavi Aza ki ti en aryer pti zanfan Salomon, i met plis lanfaz lo sa nesesite pour fer sir nou konnen kwa ki fer plezir Zeova. Onz an apre ki Aza ti vin lerwa, Zera ki ti en Etyopyen ti diriz en group larme en milyon zonm kont Zida. Eski Zeova ti pou delivre Zida? Plis ki 500 an avan, Zeova ti dir klerman ki son pep i kapab ekspekte si zot ekout li e gard son komannman, e ki zot kapab ekspekte si zot pa fer li. (Deterononm 28:1, 7, 15, 25) Ler i ti konmans rennyen, Aza ti retir bann lotel ek poto ki ti ganny servi pour fo ladorasyon dan Zida. I ti sipliy bann dimoun pour “rod Zeova.” Aza pa ti esper maler arive pour li fer sa. Alors, avek lafwa dan Zeova, Aza ti kapab demann li pour azir dan zot faver. Avek ki rezilta? Zida ti ganny en laviktwar remarkab.—2 Kronik 14:2-12.
16, 17. (a) Kantmenm Aza ti ganny laviktwar, ki Zeova ti rapel li? (b) Kan Aza ti fer en desizyon bet, ki led ki i ti gannyen, me konman i ti reazir? (c) Letan nou reflesir lo kondwit Aza, konman nou kapab benefisye?
16 Toudmenm, kan Aza ti retournen apre ki i ti’n ganny laviktwar, Zeova ti anvoy Azarya zwenn li e dir: “Ekout mwan Aza, Zida antye, ek Benzamen! Zeova i avek zot osi lontan ki zot avek li. Si zot rod li, i pou les zot trouv li, me si zot kit li, i pou kit zot.” (2 Kronik 15:2) Avek plis devouman ankor, Aza ti promot vre ladorasyon. Me 24 an plitar, kan i ti bezwen al lager ankor, Aza pa ti rod Zeova. I pa ti rod konsey dan Parol Bondye, e i pa ti rapel sa ki Zeova ti fer kan larme Etyopyen ti atak Zida. I ti al fer son lenbesil, par fer en lalyans avek Siri.—2 Kronik 16:1-6.
17 Zeova ti fer Anani, en vizyoner, reprimann Aza pour sa. Menm apre ki Anani ti’n eksplik Aza pwennvi Zeova dan sa zafer, i pa ti tro tar pour li benefisye. Me i ti plito ofanse e met Anani dan prizon. (2 Kronik 16:7-10) Sa i vreman domaz! Eski nou rod Bondye, me apre sa nou refize aksepte konsey? Petet en ansyen ki pran nou lentere aker in servi Labib pour konsey nou akoz nou pe ganny antrennen dan lemonn. Eski nou apresye sa led ki i’n donn nou avek lanmour, pour nou konnen “kwa ki fer plezir Senyer”?
Pa oubliye demande oli Zeova
18. Ki mannyer nou kapab benefisye atraver sa ki Eliou ti dir Zob?
18 Menm en dimoun ki’n annan en bon repitasyon dan servis Zeova i kapab fer fot. Kan Zob ti ganny atake avek en maladi terib, perdi son bann zanfan ek son bann byen, e ganny akize par son bann konpanyon, i pa ti kapab tir son lespri lo son sitiasyon. Eliou ti rapel li: “Personn pa’n demande, ‘Oli Bondye, sa Enn ki’n fer mwan?’ ” (Zob 35:10) Zob ti bezwen konsantre lo Zeova e reflesir lo konman ki Li i vwar sa sitiasyon. Avek limilite, Zob ti aksepte sa rapel, e son legzanp i kapab ed nou pour fer parey.
19. Ki lepep Izrael pa ti fer souvannfwa?
19 Lepep Izrael ti konn tou sa ki Zeova ti fer pour zot dan lepase. Me souvannfwa ler zot ti bezwen fer fas avek bann sitiasyon spesifik dan zot lavi, zot ti oubliy sa ki Zeova ti fer dan lepase. (Zeremi 2:5, 6, 8) Kan zot ti annan bann desizyon pour pran, zot ti fer sa ki fer zot plezir olye demande, “Oli Zeova?”—Izai 5:11, 12.
Kontinyen demande, “Oli Zeova?”
20, 21. (a) Lekel ki’n montre menm leta lespri avek Elisa, par rod gidans Zeova? (b) Ki mannyer nou kapab imit e benefisye avek zot legzanp lafwa?
20 Kan minister piblik Eliya ti terminen, son serviter Elisa ti pran lenz ofisyel Eliya ki ti’n tonbe avek li. I ti al kot larivyer Zourden, tap delo e demande: “Oli Zeova Bondye Eliya, oli li?” (2 Lerwa 2:14) Zeova ti reponn Elisa par montre ki son lespri ti aprezan lo li. Ki nou kapab aprann atraver sa?
21 Dan nou letan, en keksoz parey ti arive. Serten Kretyen swazir ki ti pe diriz sa travay predikasyon ti termin zot lavi lo later. Bann ki ti ganny konfye avek responsabilite sirveyans ti egzamin Labib e priy pour gidans Zeova. Zot in toultan demande, “Oli Zeova?” Alors, Zeova in kontinyen gid son pep e fer zot reisi dan zot aktivite. Eski nou imit zot lafwa? (Ebre 13:7) Si wi, nou pou reste pros avek lorganizasyon Zeova, swiv son gidans, e partisip dan sa travay ki pe ganny fer anba direksyon Zezi Kri.—Zekarya 8:23.
Ki ou pou reponn?
• Avek ki bi nou devret demande, “Oli Zeova?”
• Konman nou kapab trouv larepons pour sa kestyon, “Oli Zeova?”
• Akoz menm si serten i priye pour ganny gidans Bondye, zot lapriyer pa ganny reponn?
• Ki legzanp dan Labib ki montre ki nou bezwen ‘kontinyen fer sir ki nou konnen kwa ki fer plezir Senyer’?
[Kestyon]
[Portre lo paz 18]
Akoz Sail ti al vwar en tantin ki devinen?
[Portre lo paz 20]
Priye, etidye, e reflesir pour konnen ‘oli Zeova’