Bann Zenn ki kontan Laverite

“PLIZYER milye lannen pase, en psalmis ti demande: ‘Konman en zennonm pou reste lo en bon semen?’ (Psonm 119:9) Ozordi sa kestyon i ankor byen enportan akoz bann zenn pe fer fas avek plizyer kalite problenm. Bokou zenn i met zot lekor dan risk pour ganny Sida par anmenn en lavi dezord. Apepre lanmwatye bann dimoun ki’n ganny enfekte avek sa maladi terib, i aze ant 15 a 24 an. Labi drog in osi anmenn bokou problenm, ki’n fer bokou dimoun mor avan ler. Lanmizik degradan, bann film vyolan e imoral, progranm televizyon ek video, ek pornografi lo Internet pe met en gro presyon lo bann zenn. Alor, bokou paran ek zenn i tre konsernen avek sa kestyon ki sa psalmis ti demande.

Sa menm psalmis ti reponn son prop kestyon, an dizan: “Par reste atantif anver ou parol.” Parol Bondye, Labib, i kontyen bann bon gidans pour bann zenn, e par swiv li, bokou zenn pe reisi dan lavi. (Psonm 119:105) Annou vwar serten legzanp bann zenn ki kontan Bondye e ki esey reste for spirityelman dan en lemonn kot dimoun i rod zis plezir ek keksoz materyel.

Zot apresye Gidans zot Paran

Avan ki i ti antre dan biro brans Temwen Zeova an Meksiko, Jacob Emmanuel ti fer pionye ordiner pour detrwa lannen. I rapel avek lapresyasyon ki mannyer son lanmour pour servis Bondye ti devlope: “Kantmenm serten frer eksperyanse ki mon ti byen avek ti ed mwan, mon pli gran lenfliyans ti mon paran. Zot ti motiv mwan pour kontan prese. Dousman dousman, zot ti gid mwan lo sa bon semen; mon pa ti zanmen santi ki zot ti met presyon lo mwan.”

David ki’n fer deza detrwa lannen dan servis aplentan, i rapel konman i ti enpresyonnen kan son paran ti vin pionye spesyal ler li ek son frer ti ankor pti. Ler son papa ti mor, son manman ti kontinyen dan servis pionye spesyal. Apard ki pres sa bon nouvel, i ti osi pran swen avek zot. David ti dir: “Zanmen mon paran ti met presyon lo mwan pour vin en pionye. Mwan ek mon fanmiy, nou ti telman kontan fer pionye, ki sa bann bon moman ansanm ek sa latmosfer ti pous mwan pour fer parey zot.” Konsernan bon gidans ek latansyon paran, David i dir: “Tou le swar, mon manman ti lir bann zistwar avek nou dan liv From Paradise Lost to Paradise Regained. * Lafason ki i ti rakont sa bann zistwar ti ed nou pour kontan pran nouritir spirityel.”

Lapresyasyon pour bann Renyon

Serten zenn i trouv li difisil pour zot apresye bann renyon Kretyen. Zot asiste bann renyon akoz zot paran i anmenn zot. Me selman si zot kontinyen asiste renyon, zot kapab arive kontan li. Konsider legzanp Alfredo, ki ti konmans fer servis aplentan ler i ti annan 11 an. I  admet ki ler i ti annan apepre 5 an, i ti esey evite asiste renyon akoz sa ti fer li an sonmey. Me son paran pa ti les li dormi pandan bann renyon. I dir: “Anmezir ki mon ti grandi, mon lentere dan bann renyon ti grandi ptit-a-pti. Sa ti sirtou apre ki mon ti’n konn lir e ekri, vi ki sa ti fer mwan kapab konmans fer komanter dan mon prop mo.”

Cintia, en fiy 17 an ki servi konman en pionye ordiner, i dir konman ki bon frekantasyon ti zwe en rol enportan pour li kapab devlop en lanmour pour servis Bondye. I dir: “En bon relasyon avek bann frer ek ser e asiste bann renyon regilyerman in ed mwan pour pa mank mon bann zanmi lemonn, e osi bann aktivite ki popiler parmi bann zenn, parey al disko. Ler mon ti ekout bann komanter ek leksperyans dan bann renyon, sa ti fer mwan anvi donn Zeova tou sa ki mon annan. E mon santi ki pli bon keksoz ki mon annan i mon zenes. Alor mon ti deside pour servi mon zenes dan son servis.”

Me i admet: “Avan ki mon ti batize, ti annan en moman kot mon ti vwar li fasil pour mank renyon. Mon ti servi travay lakour oubyen lezot aktivite lekol konman en leskiz. Mon ti mank detrwa renyon e sa ti konmans afekte mwan spirityelman. Mon ti konmans frekant en garson ki pa ti etidye Labib. Gran mersi Zeova, mon ti nobou koriz sa sitiasyon atan.”

En Desizyon personnel

Ler Pablo, en lot zenn ki pe servi Zeova aplentan, ti ganny demande kwa ki i konsider keksoz pli enportan pour devlop en lanmour pour laverite dan Parol Bondye, i ti dir: “Mon krwar i annan de keksoz: en letid personnel regilye e kontan prese. Mon remersi mon paran en kantite pour ansenny mwan laverite konsernan Zeova, e mon santi ki sa i pli bon keksoz ki zot ti kapab donn mwan. Me mwan, mon ti bezwen konnen akoz mon kontan Zeova. Pour arive fer sa, nou bezwen konn ‘larzer ek profonder’ laverite dan Labib. Se selman dan sa fason ki nou arive santi en profon dezir pour Parol Bondye. Se sa ki kree dan nou “en dife ki pe brile” ki fer nou anvi prese. Sa lanvi pour prese pou fer nou lapresyasyon pour laverite reste vivan.”—Efezyen 3:18; Zeremi 20:9.

Jacob Emmanuel, ki ti ganny mansyonnen pli boner, li osi i rapel lenportans pour fer en desizyon personnel pour servi Zeova. I dir ki son paran pa ti zanmen ensiste ki i batize. “Mon krwar ki sa ti pli bon fason akoz mon vwar bann bon rezilta. Par egzanp, serten zenn ki mon’n frekant en kantite ti deside pour batiz ansanm. Kantmenm ti napa nanryen mal avek sa, mon ti kapab vwar ki serten ti fer sa desizyon zis akoz zot santiman, e plitar zot devouman dan predikasyon ti diminyen. Dan mon ka, mon paran pa ti met presyon lo mwan pour fer sa  desizyon pour dedye mon lavi avek Zeova. I ti en desizyon personnel.”

Rol Kongregasyon

Serten zenn in aprann laverite lo zot menm, san okenn led avek zot paran. Dan en tel sitiasyon, definitivman i pa fasil pour fer sa ki byen e pour kontinyen fer li.

Noé i rapel konman i’n benefisye en kantite avek laverite. Depi byen zenn i ti kontan pran lakoler e i ti osi vyolan. Alaz 14 an ler i ti konmans etidye Labib, i ti konmans kapab kontrol son tanperaman. Sa i en keksoz ki son paran ti apresye kantmenm zot menm pa ti enterese avek Labib. Anmezir ki Noé ti progrese spirityelman, i ti anvi fer plis dan servis Bondye. Ozordi i dan servis aplentan.

Pareyman, Alejandro ti konmans enterese avek laverite ler i ti ankor byen zenn kantmenm son paran pa ti enterese avek Labib. I eksprim son lapresyasyon pour laverite, par sa parol: “Mon’n grandir dan en fanmiy Katolik. Vi ki legliz pa ti reponn bann kestyon ki’n fatig mwan depi byen zenn, mon ti ganny atire anver sa lansennyman kominis ki dir ki Bondye pa egziste. Lorganizasyon Zeova ti ed mwan ganny konnesans lo Bondye. An realite i’n sov mon lavi akoz si mon pa ti’n etidye Labib, probableman mon ti pou’n enplike dan imoralite, lalkol, oubyen drog. Menm petet mon ti pou’n form parti avek en group revolisyoner, ki ti pou anmenn bann move konsekans.”

Ki mannyer en zenn i kapab kontinyen rod laverite e reste atase avek laverite san sipor son paran? Evidaman, bann ansyen ek lezot dan kongregasyon i zwe en rol tre enportan. Noé i rapel: “Mon pa’n zanmen santi mwan tousel, akoz Zeova in toultan pros avek mwan. Osi, mon’n ganny sipor bann bon frer ek ser ki’n vin mon papa, manman, ek frer spirityel.” Aprezan i dan Betel e pe depans son lenerzi dan servis Bondye. Alejandro osi i rakonte: “En keksoz ki mon pou toultan apresye, se ki mon’n benefisye pour form parti en kongregasyon kot bann ansyen ti montre lentere personnel dan mwan. Mon remersye bann ansyen bokou, sirtou alaz 16 an ler mon ti konmans etidye Labib. Akoz parey lezot zenn mwan osi, mon lespri ti fatige. Bann fanmiy dan kongregasyon pa ti zanmen abandonn mwan. Toultan ti annan en dimoun ki ti envit mwan se li e partaz pa zis son lakour ek manze avek mwan me osi son lanmour.” Ozordi i fer plis ki 13 an depi ki Alejandro i dan servis aplentan.

Serten dimoun i krwar ki larelizyon i zis pour bann vye dimoun. Me i annan bokou zenn ki’n aprann laverite dan Labib depi byen zenn e zot in arive kontan Zeova e reste fidel avek li. Parol David dan Psonm 110:3 i aplik pour sa bann zenn: ‘Ou pep pou ofer zot lekor volonterman dan letan ou lafors militer. Parey laroze dan bomaten, ou annan ou latroup zenn zan dan sentete.’

I pa fasil pour bann zenn aprann laverite e reste dan laverite. Bokou zenn in reisi devlop en vre lanmour pour Parol Bondye e pour son servis. Sa i akoz zot in reste pros avek lorganizasyon Zeova, asiste renyon regilyerman, e etidye Labib oprofon. E i vreman fer plezir pour vwar sa!—Psonm 119:15, 16.

[Not anba lo paz]