1. Akoz nou tou nou bezwen lasazes ki sorti kot Zeova? (Proverb 4:7)

 ESKI ou’n deza fer en desizyon enportan? San dout, ou ti priy Zeova pour ganny lasazes parski ou ti konnen ki ou bezwen lasazes. (Zak 1:5) Lerwa Salomon ti ekri: “Lasazes i sa keksoz pli enportan.” (Lir Proverb 4:7.) Byensir, Salomon pa ti pe koz lo lasazes imen me lo lasazes ki sorti kot Zeova. (Prov. 2:6) Me eski lasazes ki sorti kot Zeova i kapab ed nou avek bann problenm ki nou annan ozordi? Parey nou pou vwar dan sa lartik, wi i kapab.

2. Ki en fason nou kapab vin vreman saz?

² En fason ki nou kapab vin vreman saz i par etidye e aplik lansennyman de zonm ki ti vreman saz. Premyerman, nou pou vwar konsernan Lerwa Salomon. Labib i dir ki “Bondye ti donn Salomon bokou lasazes ek disernman.” (1 Rwa. 4:29) Dezyenmman, nou pou vwar konsernan Zezi ki ti sa zonm pli saz ki’n deza viv lo later. (Mat. 12:42) Labib ti dir konsernan Zezi: “Lespri Zeova pou lo li, lespri lasazes ek lentelizans.”​—Iza. 11:2.

3. Ki nou pou vwar dan sa lartik?

³ Bondye ti donn Salomon ek Zezi en kantite lasazes. Alor zot ti kapab donn bon konsey konsernan bann keksoz ki enportan pour nou tou. Dan sa lartik, nou pou vwar akoz nou bezwen annan en bon pwennvi lo larzan, lo travay e lo nou lekor.

4. Ki mannyer lavi Salomon ek Zezi ti diferan?

⁴ Salomon ti vreman ris e i ti annan en zoli lakour ki ti konfortab. (1 Rwa. 10:7, 14, 15) De lot kote, Zezi ti napa bokou keksoz materyel e i ti napa son prop lakour. (Mat. 8:20) Me tou le de zonm ti annan en bon pwennvi lo keksoz materyel parski sa lasazes ki zot ti annan ti sorti kot Zeova.

5. Ki bon pwennvi Salomon ti annan lo larzan?

⁵ Salomon ti dir ki larzan i “en proteksyon.” (Ekle. 7:12) Larzan i kapab ed nou ganny sa ki nou bezwen e osi serten keksoz ki nou ti ava kontan gannyen. Menm si Salomon ti annan en kantite larzan, i ti konpran ki i annan keksoz ki pli enportan ki larzan. Par egzanp, i ti ekri: “Pli vomye en bon repitasyon ki bokou larises.” (Prov. 22:1) Salomon ti osi remarke ki bann dimoun ki kontan larzan pa toultan satisfe avek sa ki zot annan. (Ekle. 5:10, 12) I ti dir ki nou pa devret krwar ki larzan i sa keksoz pli enportan parski sa larzan ki nou annan i kapab disparet.​—Prov. 23:4, 5.

6. Ki bon pwennvi Zezi ti annan lo bann keksoz materyel? (Matye 6:31-33)

⁶ Zezi ti annan en bon pwennvi lo bann keksoz materyel. I ti apresye manze ek bwar. (Lik 19:2, 6, 7) En fwa, i ti fer en bon kalite diven. Sa ti premye mirak ki i ti fer. (Zan 2:10, 11) Ler i ti mor, i ti dan en lenz ser. (Zan 19:23, 24) Me Zezi pa ti fer bann keksoz materyel vin sa keksoz pli enportan dan son lavi. I ti dir avek son bann disip: “En lesklav pa kapab servi de met . . . Ou pa kapab lesklav Bondye e lesklav Larises an menm tan.” (Mat. 6:24) Zezi ti ansennyen ki si nou rod Rwayonm premye, Zeova pou fer sir ki nou annan sa ki nou bezwen.​—Lir Matye 6:31-33.

7. Ki byenfe en frer ti gannyen ler i ti annan en bon pwennvi lo larzan?

 ⁷ En kantite frer ek ser in ganny bann byenfe ler zot in aplik bann konsey saz sorti kot Zeova konsernan larzan. Annou vwar legzanp en frer selibater ki apel Daniel. I dir: “Ler mon ti en adolesan, mon ti deside pour fer bann aktivite spirityel vin sa keksoz pli enportan dan mon lavi.” Daniel ti viv en lavi senp e sa ti permet li pour servi son letan ek abilite pour servi dan Betel e ede dan travay led sekour. I dir: “Mon pa’n zanmen regret bann desizyon ki mon’n fer. Mon ti’n kapab ganny en kantite larzan si mon ti fer larzan vin sa keksoz pli enportan dan mon lavi. Me mon ti pou napa sa bann bon zanmi ki mon annan. Si mon pa ti’n met Rwayonm Bondye premye, mon pa ti pou zwaye parey mon ete la konmela. Zeova in donn mwan en kantite benediksyon. Larzan pa ti pou kapab donn mwan sa!” Alor i kler ki ler nou fer bann aktivite spirityel sa keksoz pli enportan dan nou lavi, nou pou ganny bann byenfe.

8. Ki mannyer nou konnen ki Salomon ti annan en bon pwennvi lo travay? (Eklezyast 5:18, 19)

⁸ Salomon ti dir ki sa lazwa ki en dimoun i gannyen ler i travay dir i en “kado sorti kot Bondye.” (Lir Eklezyast 5:18, 19.) I dir: “Tou sort kalite travay dir pou anmenn byenfe.” (Prov. 14:23) Salomon ti konnen ki i ti pe koz lo la. I ti travay dir! I konstri bann lakaz, plant bann plantasyon rezen, fer bann zarden e fouy bann basen. I ti osi konstri bann lavil. (1 Rwa. 9:19; Ekle. 2:4-6) Sa ti bann travay difisil ki ti fer Salomon zwaye. Me Salomon ti konnen ki i bezwen fer plis ki sa pour li vreman zwaye. I ti osi fer en kantite keksoz pour Zeova. Par egzanp, i ti diriz sa travay pour konstri en zoli tanp pour Zeova. Sa konstriksyon ti pran set an pour fini. (1 Rwa. 6:38; 9:1) Apre ki Salomon ti’n fer tou sort kalite keksoz, i ti realize ki sa keksoz pli enportan ki en dimoun i kapab fer, i pour servi Zeova. I ti dir: “La konklizyon apre ki tou keksoz in ganny tande, annan en gran respe pour sa vre Bondye e obei son bann komannman.”​—Ekle. 12:13.

9. Ki mannyer Zezi ti fer sir ki son travay pa ti vin sa keksoz pli enportan?

⁹ Zezi ti travay dir. Ler i ti zenn, i ti travay konman en sarpantye. (Mark 6:3) Nou kapab asire ki son paran ti apresye son led anmezir ki zot ti pran swen avek zot fanmir. Zezi ti parfe e i ti kapab fer bann travay sarpantye ki parfe. Alor i kapab ki en kantite dimoun ti anvi bann keksoz ki i ti fer. I tre probab ki Zezi ti kontan son travay. Menm si Zezi ti travay dir, i ti fer letan pour ador Zeova. (Zan 7:15) Pli tar, i ti servi tou son letan pour anons sa bon nouvel. I ti dir bann ki ti ekout li: “Pa travay pour manze ki gate, me travay pour manze ki pa gate e ki donn lavi eternel.” (Zan 6:27) Dan Sermon lo Montanny, Zezi ti dir: “Anmas pour zot menm bann trezor dan lesyel.”​—Mat. 6:20.

10. Kwa ki kapab vin en problenm si nou bann bon travayer?

¹⁰ Lasazes sorti kot Bondye i ed nou pour annan en bon pwennvi lo travay. Konman bann Kretyen, nou aprann  pour “travay dir e fer bann bon keksoz.” (Efe. 4:28) Souvandfwa bann anplwayer i remarke ki nou onnet e nou travay dir e zot kapab dir nou ki kantite zot apresye lafason ki nou travay. Sa i kapab fer nou travay plis parski nou anvi ki nou anplwayer i mazin an byen lo Temwen Zeova. Me petet pli tar, nou realize ki nou pa pe pas ase letan avek nou fanmir e nou pa pe fer nou bann aktivite spirityel. Alor nou pou bezwen fer bann sanzman pour nou kapab annan letan pour fer bann keksoz ki pli enportan.

11. Ki en frer ti aprann konsernan annan en bon pwennvi lo travay?

¹¹ En zenn frer ki apel William in vwar ki byenfe en dimoun i gannyen ler i annan en bon pwennvi lo travay. I ti vwar sa ler i ti travay avek en ansyen. William i dir: “Sa frer i en bon legzanp parski i annan en bon pwennvi lo travay. I travay dir e i annan en bon lanmitye avek son bann kliyan parski i travay byen. Me a lafen lazournen, i aret travay e i servi son letan ek lenerzi pou ador Zeova e pour pas letan avek son fanmir. Sa frer i enn bann dimoun pli ere ki mon konnen!” b

12. Ki mannyer Salomon ti montre ki i ti annan en bon pwennvi lo son lekor me ki ti arive apre?

¹² Ler Salomon ti fidel avek Zeova, i ti annan en bon pwennvi lo son lekor. Par egzanp, ler i ti ankor zenn, i ti admet ki i ti annan serten keksoz ki i pa ti kapab fer e i ti demann Zeova pour gid li. (1 Rwa. 3:7-9) Ler i ti vin lerwa, Salomon ti osi konnen ki i danzere pour vin orgeye. I ti dir: “Avan maler, i annan lorgey e avan en dimoun i tonbe, i annan larogans.” (Prov. 16:18) Malerezman, Salomon pa ti swiv son prop  konsey. Pli tar pandan son renny, i ti vin orgeye e i ti konmans dezobei bann lalwa Bondye. Par egzanp, Lalwa Moiz ti dir ki en lerwa pa devret “pran en kantite madanm pour li, pour ki i pa ganny antrennen.” (Det. 17:17) Me Salomon ti dezobei sa lalwa. I ti annan 700 madanm ek 300 lezot madanm e en kantite parmi zot pa ti ador Zeova. (1 Rwa. 11:1-3) Petet Salomon ti krwar ki sa pa ti pou en problenm. Me pli tar i ti ganny move konsekans parski i ti’n dezobei Zeova.​—1 Rwa. 11:9-13.

13. Ki nou kapab aprann ler nou medit lo lafason ki Zezi ti demontre limilite?

¹³ Zezi ti toultan annan limilite e i ti annan en bon pwennvi lo son lekor. Avan i ti vin lo later, i ti fer en kantite keksoz merveye pour Zeova. Atraver Zezi, “tou lezot keksoz dan lesyel e lo later in ganny kree.” (Kol. 1:16) Ler Zezi ti batize, i ti rapel bann keksoz ki i ti’n fer ler i ti avek son Papa. (Mat. 3:16; Zan 17:5) Me sa pa ti fer Zezi vin orgeye. O kontrer, i pa ti zanmen azir dan en fason ki ti fer li paret pli enportan ki lezot. I ti dir son bann disip ki i ti’n vin lo later “pa pour ganny servi, me pour servi e donn son lavi konman en ranson pour liber bokou dimoun.” (Mat. 20:28) I ti osi dir ki i pa kapab fer nanryen ki i’n deside lo li menm. (Zan 5:19) Zezi ti annan bokou limilite e i’n kit en bon legzanp pour nou swiv.

14. Ki nou kapab aprann avek sa ki Zezi ti dir konsernan annan en bon pwennvi lo nou lekor?

¹⁴ Zezi ti ansenny son bann disip pour annan en bon pwennvi lo zot lekor. En fwa i ti dir zot: “[Zeova] i menm konnen konbyen bren seve i annan lo zot latet.” (Mat. 10:30) Sa ki Zezi ti dir i montre ki nou Papa ki dan lesyel i enterese avek nou e i apresye nou. Sa i ankourazan, sirtou si nou annan en move pwennvi lo nou lekor. Par egzanp, si nou krwar ki nou pa merite ador Zeova e viv pour  touzour, i ti pou konmsi nou pe dir ki Zeova pa kapab ziz byen.

15. (a) Ki bon pwennvi Latour Veyer ti dir nou devret annan? (b) Parey nou vwar dan portre lo paz 24, si nou pe konsantre tro bokou lo nou lekor, ki benediksyon nou pa pou gannyen?

¹⁵ Apepre 15 an pase, en Latour Veyer ti dir ki nou devret annan en bon pwennvi lo nou lekor. Sa Latour Veyer ti dir: “Nou pa pou anvi mazin plis ki an fo lo nou menm ziska en pwen kot nou vin vantar; me nou pa anvi osi tonm dan lot ekstrenm e mazinen ki nou pa vo nanryen. O kontrer, nou devret devlop en pwennvi rezonnab lo nou menm, en pwennvi ki pran an konsiderasyon nou pwen for e osi nou limit. En ser Kretyen i dir: ‘Mon pa en move dimoun; mon pa ni pli siperyer ki lezot. Mon annan bann pwen for e osi bann pwen feb, zis parey tou lezot dimoun.’” c I kler ki nou ganny bann byenfe ler nou annan en bon pwennvi lo nou lekor.

16. Akoz Zeova i donn nou bann konsey saz?

¹⁶ Dan son Parol Zeova in donn nou bann konsey saz. Zeova i kontan nou e i anvi ki nou ere. (Iza. 48:17, 18) Sa pli bon desizyon ki nou kapab fer ki pou fer nou vreman ere, i pour met bann keksoz ki fer Zeova plezir premye dan nou lavi. Ler nou fer sa, nou pou evit en kantite problenm ki bann ki konsantre tro bokou lo larzan, travay ouswa lo zot lekor i gannyen. Alor nou tou nou bezwen determinen pour vin saz e fer Zeova zwaye!​—Prov. 23:15.