1. Ki desizyon enportan tou dimoun i bezwen fer?

 OZORDI, tou dimoun i annan en desizyon enportan pour fer. Zot bezwen deside si zot pou siport Zeova konman sa Enn ki annan sa drwa pour diriz liniver ouswa si zot pou siport Satan ki lennmi Bondye e ki kriyel. Zot bezwen fer en desizyon parski sa desizyon ki zot fer pou montre si zot pou viv pour touzour oubyen non. (Mat. 25:31-33, 46) Pandan “sa gran ladetres,” zot pou ganny marke e sa pou montre si zot pou ganny sove ouswa ganny detrir.​—Rev. 7:14; 14:9-11; Ezek. 9:4, 6.

2. (a) Ki Ebre 10:35-39 i ankouraz nou pour fer? (b) Ki mannyer liv Revelasyon i kapab ed nou?

² Lir Ebre 10:35-39. Si ou’n swazir pour siport drwa Zeova pour dirize, ou’n fer en bon desizyon. Aprezan, ou vreman anvi ed lezot pour fer sa bon desizyon. Pour ou fer sa, ou kapab servi bann lenformasyon ki dan liv Revelasyon. Sa liv i montre ki pou arive avek bann ki opoz Zeova me i osi montre ki mannyer Zeova pou beni bann ki siport son drwa pour dirize. I ti pou byen ki nou etidye sa bann laverite parski sa pou fer nou pli determinen pour kontinyen servi Zeova. An plis, nou kapab servi sa ki nou’n aprann pour ed lezot fer sa bon desizyon e pour zot kontinyen servi Zeova.

3. Ki nou pou vwar dan sa lartik?

³ Dan sa lartik, nou pou reponn sa de kestyon: Ki pou arive avek bann ki siport drwa Zeova pour dirize? Ki pou arive avek bann ki swazir pour siport sa bebet sovaz rouz ki ganny dekrir dan liv Revelasyon?

4. Ki group zapot Zan i vwar avek Zezi dan lesyel?

⁴ Dan en vizyon, zapot Zan i vwar de group dimoun ki siport drwa Zeova pour dirize e zot ganny donnen lavi eternel. Dan sa premye group i annan 144,000 dimoun. (Rev. 7:4) Zot ganny anmennen dan lesyel pour form parti en gouvernman oubyen Rwayonm. (Rev. 5:9, 10; 14:3, 4) Ansanm avek Zezi, zot diriz lo later antye. Dan sa vizyon, Zan i vwar zot dan lesyel e zot pe debout avek Zezi lo Montanny Siyon.​—Rev. 14:1.

5. Ki pou arive byento avek bann ki form parti sa 144,000 ki ankor lo later?

⁵ Depi letan bann zapot ziska ozordi, plizyer milye dimoun in ganny swazir pour form parti sa 144,000. (Lik 12:32; Rom. 8:17) Me Zan i ganny dir ki pandan bann dernyen zour, i pou annan en pti gin parmi sa 144,000 ki pou ankor lo later. Zis avan gran ladetres i konmanse, sa bann ‘ki ankor la’ pou ganny zot dernyen “sele” pour montre ki zot annan laprouvasyon Zeova. (Rev. 7:2, 3; 12:17) Pandan gran ladetres, sa bann ki ankor la lo later pou ganny anmennen dan lesyel pour zwenn avek lezot 144,000 ki’n fini mor e ki deza dan lesyel. Ansanm avek Zezi, zot pou dirize dan Rwayonm Bondye.​—Mat. 24:31; Rev. 5:9, 10.

6-7. (a) Ki en lot group Zan i vwar e ki nou aprann lo zot? (b) Akoz bann Kretyen swazir ki ankor lo later ek sa “gran lafoul” i devret enterese avek sa ki ganny dir dan Revelasyon sapit 7?

⁶ Apre ki Zan in vwar sa group dan lesyel, i vwar “en gran lafoul.” Sa enn group pa parey sa 144,000. Labib pa dir ki kantite dimoun i annan dan sa group. (Rev. 7:9, 10) Ki nou aprann konsernan sa bann dimoun? Zan i ganny dir: “Sa i bann dimoun ki’n pas atraver sa gran ladetres e zot in lav zot rob e fer zot rob vin blan dan disan Pti Mouton.” (Rev. 7:14) Apre ki sa “gran lafoul” pou’n pas atraver sa gran ladetres, zot pou viv lo later e zot pou ganny en kantite benediksyon.​—Ps. 37:9-11, 27-29; Prov. 2:21, 22; Rev. 7:16, 17.

⁷ Ki swa ou’n ganny swazir pour al dan lesyel ouswa ou pou reste lo later, eski ou krwar ki ou pou vwar lakonplisman sa ki ganny dir dan Revelasyon sapit 7? Wi, ou devret krwar. Sa pou en letan vreman eksitan pour tou le de group. Nou pou vreman kontan ki nou’n swazir pour siport drwa Zeova pour dirize. Ki lezot keksoz liv Revelasyon i dir nou konsernan gran ladetres?​—Mat. 24:21.

8. Ki mannyer gran ladetres pou konmanse e ki mannyer laplipar dimoun pou reazir?

⁸ Parey nou’n vwar dan sa lartik avan, byento bann gouvernman pou atak Gran Babilonn, ki reprezant tou fo larelizyon. (Rev. 17:16, 17) Sa pou konmans gran ladetres. Eski sa pou fer en kantite dimoun konmans servi Zeova? Non. O kontrer, Revelasyon sapit 6 i montre ki pandan sa letan difisil, bann ki pa pe servi Zeova pou rod proteksyon avek sistenm politik ek komers sa lemonn, ki ganny konpare avek bann montanny. Vi ki zot pa pou siport Rwayonm Bondye, Zeova pou vwar zot konman bann ki opoz li.​—Lik 11:23; Rev. 6:15-17.

9. Pandan gran ladetres, kwa ki pou montre ki pep Bondye i diferan e ki pou arive avek zot?

 ⁹ Pandan gran ladetres, lavi pou difisil. Me i pou kler ki bann serviter Zeova i diferan avek sa lemonn. Zot pou ankor sa sel group dimoun lo later ki pou pe servi Zeova e ki refize siport “sa bebet sovaz.” (Rev. 13:14-17) Sa pou fer bann ki opoz Zeova ankoler. Alor, bann nasyon pou zwenn ansanm pour atak pep Bondye ki partou lo later. Dan Labib, sa latak i apel latak Gog ki sorti Magog.​—Ezek. 38:14-16.

10. Dapre Revelasyon 19:19-21, ki mannyer Zeova pou reazir ler Gog ki sorti Magog pou atak son pep?

¹⁰ Ler Gog i atak pep Zeova, ki mannyer Zeova pou reazir? I dir nou: “Mon gran lakoler pou monte.” (Ezek. 38:18, 21-23) Revelasyon sapit 19 i dir nou sa ki pou arive apre. Zeova pou anvoy son Garson pour protez Son pep e detrir zot bann lennmi. Apre, “bann larme dan lesyel” setadir bann lanz ek sa 144,000 pou zwenn avek Zezi pour lager kont Gog ki sorti Magog. (Rev. 17:14; 19:11-15) Ki mannyer sa lager pou fini? Tou dimoun ek lorganizasyon ki opoz Zeova pou ganny detrir konpletman.​—Lir Revelasyon 19:19-21.

11. Ki sa levennman pli enportan dan liv Revelasyon?

¹¹ Zis mazinen ki mannyer bann serviter fidel lo later pou santi apre ki bann lennmi Bondye pou’n ganny detrir! Sa pou en letan kot tou dimoun pou zwaye. Menm si bann ki dan lesyel pou kontan ler Gran Babilonn i ganny detrir, i pou annan en lot keksoz ki pou fer zot pli zwaye. (Rev. 19:1-3) Anfet, sa i levennman pli enportan dan liv Revelasyon. Sa i “maryaz sa Pti Mouton.”​—Rev. 19:6-9.

12. Dapre Revelasyon 21:1, 2, kan ki maryaz sa Pti Mouton pou ganny fer?

¹² Kan ki sa maryaz pou ganny fer? Zis avan Armagedon i konmanse, sa 144,000 Kretyen swazir pou deza dan lesyel. Me i pa pou ankor ler pour fer maryaz sa Pti Mouton. (Lir Revelasyon 21:1, 2.) Sa maryaz pou ganny fer apre ki lager Armagedon in fini e tou bann lennmi Bondye in ganny detrir.​—Ps. 45:3, 4, 13-17.

13. Ki pou arive pandan maryaz sa Pti Mouton?

¹³ Ki pou arive pandan maryaz sa Pti Mouton? Zis parey en maryaz i ini en msye ek en madanm, maryaz sa Pti Mouton i ini sa Lerwa, setadir Zezi Kri, avek son “nouvel marye” ki sa 144,000. Sa levennman enportan pou etabli en nouvo gouvernman ki pou diriz later pour 1,000 an.​—Rev. 20:6.

14-15. Revelasyon sapit 21 i konpar sa 144,000 avek kwa? (Vwar portre lo kouvertir.)

¹⁴ Revelasyon sapit 21 i konpar sa 144,000 Kretyen swazir avek en zoli lavil ki ganny apele “Nouvo Zerizalenm.” (Rev. 21:2, 9) Sa lavil i annan 12 ros dan fondasyon miray e lo sa bann ros i annan “non sa 12 zapot sa Pti Mouton.” Akoz sa ti enteres Zan? Parski i ti’n vwar son non lo enn parmi sa bann ros. Sa ti en gran loner pour li.​—Rev. 21:10-14; Efe. 2:20.

¹⁵ Sa lavil pa parey okenn lezot lavil. I annan en gran semen ki ti annor pir, son  12 baro ti 12 perl, son bann miray ek fondasyon ti ganny dekore avek bann pyer presye e i ti dan laform en kib. (Rev. 21:15-21) Me i ti annan en keksoz ki ti manke. Zan i dir: “Mon pa ti vwar en tanp dan sa lavil parski Zeova, Bondye Tou Pwisan i son tanp e sa Pti Mouton osi. Sa lavil pa bezwen ni soley, ni lalin pour kler li parski laglwar Bondye ti kler li e sa Pti Mouton i son lalanp.” (Rev. 21:22, 23) Bann ki form parti sa Nouvo Zerizalenm pou avek Zeova. (Ebr. 7:27; Rev. 22:3, 4) Alor, Zeova ek Zezi i tanp dan sa lavil.

16. Ki pou arive avek bann imen pandan sa 1,000 an ki Rwayonm Bondye pou dirize?

¹⁶ Bann Kretyen swazir i vreman kontan pour reflesir lo sa lavil. Bann ki annan lespwar pour viv lo later i annan rezon pour fer sa zot osi. Pandan sa 1,000 an ki Rwayonm Bondye pou diriz lo later, Nouvo Zerizalenm pou anmenn en kantite benediksyon pour bann ki viv lo later. Zan ti vwar sa bann benediksyon pe koule parey “en larivyer delo lavi.” “Lo tou le de kote larivyer, i ti annan bann pye dibwa lavi . . . fey sa bann pye dibwa ti pour gerizon bann nasyon.” (Rev. 22:1, 2) Sa letan tou dimoun pou annan sa loportinite pour rezouir akoz sa bann benediksyon. Ptitapti, tou dimoun ki obei Zeova pou vin parfe. Dimoun pa pou plere akoz zot pe soufer, zot pa pou malad e zot pou napa douler.​—Rev. 21:3-5.

17. Dapre Revelasyon 20:11-13, lekel ki pou ganny bann byenfe pandan sa Renny Mil an?

¹⁷ Lekel ki pou rezouir sa bann benediksyon? Premyerman, sa gran lafoul ki’n pas atraver Armagedon e bann zanfan ki petet pou ne dan nouvo lemonn. Me Revelasyon sapit 20 i osi promet ki bann ki’n mor pou resisite. (Lir Revelasyon 20:11-13.) Bann “bon” dimoun, setadir bann serviter fidel Zeova ki’n mor ek bann “move” dimoun, setadir bann ki pa’n ganny loportinite pour aprann konn Zeova pou ganny resisite e zot pou viv lo later. (Akt 24:15; Zan 5:28, 29) Eski sa i vedir ki pandan sa Renny Mil an tou dimoun pou ganny resisite e viv lo later? Non. Bann ki ti refize  aksepte sa loportinite pour servi Zeova avan zot mor, pa pou ganny resisite. Zot ti annan sa loportinite. Me zot ti montre ki zot pa merite pour viv pour touzour dan Paradi lo later.​—Mat. 25:46; 2 Tesa. 1:9; Rev. 17:8; 20:15.

18. Ki mannyer i pou ete lo later a lafen sa 1,000 an?

¹⁸ A lafen sa Renny Mil an, tou dimoun pou’n vin parfe. Personn pa pou soufer akoz pese ki Adan in fer. (Rom. 5:12) Bann move konsekans ki pese in anmennen pou’n ganny tire. Alor, sa i vedir ki bann ki lo later pou “reganny lavi” parski a lafen sa 1,000 an, zot pou’n vin parfe.​—Rev. 20:5.

19. Akoz i bezwen annan en dernyen tes?

¹⁹ Nou konnen ki Zezi ti reste fidel avek Bondye menm ler Satan ti teste li. Me eski tou dimoun parfe pou reste fidel avek Zeova ler Satan pou teste zot? Ler Satan pou ganny large dan labim a lafen sa 1,000 an, nou tou nou pou kapab montre si nou pou reste fidel avek Zeova. (Rev. 20:7) Bann ki pou reste fidel pandan sa dernyen tes pou viv pour touzour e zot pou finalman annan sa vre laliberte. (Rom. 8:21) Me bann ki rebel kont Zeova pou ganny detrir pour touzour ansanm avek Satan ek bann demon.​—Rev. 20:8-10.

20. Ki mannyer ou santi konsernan sa bann profesi ki dan liv Revelasyon?

²⁰ Ki mannyer ou santi apre ki ou’n vwar sa bann lenformasyon dan liv Revelasyon? Eski ou eksite ler ou imazin ou pe vwar sa bann profesi pe ganny akonplir? Pa sa i fer ou vreman anvi envit lezot pour vin ador Zeova ansanm avek nou dan ladorasyon pir? (Rev. 22:17) Sa bann keksoz ki pou arive dan lavenir i fer nou eksite e parey zapot Zan nou anvi dir: “Amenn! Vini, Senyer Zezi.”​—Rev. 22:20.