Wi, bann move lanz i egziste. Kote zot sorti? Rapel byen ki Bondye ti kree bann lanz avek sa liberte pour swazir. Pa tro bokou letan apre ki Bondye ti’n kree Adan ek Ev, en lanz parfe ti mal servi son liberte pour swazir e i ti konmans en rebelyon lo later. I ti reisi fer Adan ek Ev rebel kont Bondye. (Zenez 3:1-7; Revelasyon 12:9) Labib pa dir ki mannyer sa lanz ti apele e ki pozisyon i ti annan dan lesyel avan ki i ti rebel. Me apre ki i ti’n rebel, Labib i apel li Satan, ki vedir “Opozan” ek Dyab ki vedir “sa Enn ki fer kalonmni.”​—Matye 4:8-11.

Malerezman, sa rebelyon kont Bondye pa ti fini la. Dan letan Noe, serten lanz dan fanmir Bondye ti “abandonn zot landrwa reste dan lesyel.” Zot ti vin lo later, pran laform imen pour zot kapab fer bann keksoz degoutan e imoral, bann keksoz ki zot pa ti’n ganny kree pour fer.​—Zid 6; Zenez 6:1-4; 1 Pyer 3:19, 20.

Ki ti arive avek sa bann move lanz? Ler Bondye ti anmenn deliz lo later antye, sa bann lanz ti revin envizib e retourn dan lesyel. Par kont, Bondye pa ti permet sa bann lanz dezobeisan pour retourn dan “pozisyon ki zot ti annan” avan. O kontrer, i ti met zot dan en “gran fernwanr [spirityel]” ki osi apel Tartar. (Zid 6; 2 Pyer 2:4) Sa bann move lanz oubyen demon in swazir pour ganny kontrole par Satan, “sef demon” ki “kontinyen degiz son lekor konman en lanz lalimyer.”​—Matye 12:24; 2 Korentyen 11:14.

Labib i dir ki Rwayonm Bondye, en gouvernman dan lesyel, ti ganny etabli an 1914. a Apre sa levennman enportan, Satan ek son bann demon ti ganny pouse dan lesyel e zete lo later. Bann move keksoz ki i annan lo later i levidans ki sa bann demon pe fer en kantite dega e pe enfliyans dimoun.​—Revelasyon 12:9-12.

Par kont, sa kantite move keksoz ki nou vwar dan sa lemonn, i montre ki byento, Satan ek son bann demon pou ganny retire. Apre ki Rwayonm Bondye pou’n dirize pour 1,000 an, sa bann move lanz pou ganny en pti gin letan pour teste bann imen. Apre sa, zot pou ganny detrir pour touzour.​—Matye 25:41; Revelasyon 20:1-3, 7-10.