NOU BEZWEN GIDANS SORTI KOT BONDYE

Dan Labib, Zeova a Bondye i dir ki bann imen i bezwen son led e ki zot pa kapab fer tou keksoz lo zot menm. (Zeremi 10:23) Sa i rezon akoz i’n donn bann gidans moral ki dan Labib. I kontan bann imen e i pa anvi ki nou fer bann move desizyon ki pou fer nou soufer e ki pou fer nou lavi difisil. (Deterononm 5:29; 1 Zan 4:8) An plis ki sa, konman nou Kreater, i annan lasazes ek konnesans ki nou bezwen pour donn nou sa pli bon konsey konsernan sa ki byen ek sa ki mal. (Psonm 100:3; 104:24) Me Bondye pa zanmen fors personn pour viv dapre son bann standar.

 Zeova ti donn sa premye zonm ek fanm, Adan ek Ev, tou sa ki zot ti bezwen pour fer zot vreman ere. (Zenez 1:28, 29; 2:8, 15) I ti osi donn zot bann lenstriksyon senp ki i ti ekspekte zot obeir. Par kont, i ti les zot swazir pour zot menm si zot ti pou obei sa bann lenstriksyon oubyen non. (Zenez 2:9, 16, 17) Malerezman, Adan ek Ev ti swazir pour viv dapre zot prop standar olye viv dapre bann standar Bondye. (Zenez 3:6) Ki rezilta sa ti anmennen? Eski imen i pli byen ler zot deside pour zot menm kwa ki byen e kwa ki mal? Non. Pandan bann lannen ki’n pase, nou’n aprann ki ler nou inyor bann standar Bondye, sa pa anmenn vre lape ek lazwa.—Eklezyast 8:9.

Dan Labib i annan bann bon konsey ki nou bezwen pour ed nou fer bann bon desizyon lo kwa ki byen oubyen kwa ki mal nenport landrwa kot nou reste ouswa nenport kiltir ki nou annan. (2 Timote 3:16, 17; vwar sa bwat “ En liv pour tou dimoun.”) Annou vwar ki mannyer Labib i fer sa.

 LABIB I DIR NOU SA KI BONDYE I ANVI NOU FER

Labib i donn bann lenformasyon egzakt lo relasyon ki Bondye ti annan avek bann imen depi o konmansman. Sa ki i annan dan Labib i ed nou konpran pwennvi Bondye konsernan sa ki byen ek sa ki mal, sa ki anmenn byenfe e sa ki anmenn soufrans. (Psonm 19:7, 11) Sa ki nou aprann dan Labib i toultan vre e i pou ed nou fer bann desizyon ki saz konsernan sa ki byen ek sa ki mal dan nou lavi toulezour.

Par egzanp, annou vwar sa konsey ki trouve dan Proverb 13:20: “En dimoun ki mars avek en dimoun ki saz pou vin saz, me en dimoun ki frekant en dimoun ki bet pou ganny problenm.” Sa prensip i ankor aplikab dan nou letan zis parey i ti ete dan lepase. Dan Labib i annan bokou prensip ki kapab ed nou.—Vwar sa bwat “ Bann konsey Labib i ankor kapab ed nou.”

Petet ou kapab demann ou lekor, ‘Ki mannyer mon kapab asire ki bann konsey dan Labib i kapab ed mwan?’ Dan sa lot lartik nou pou vwar serten leksperyans.