SI OU’N vizit en pti zil Lendonezi ki apel Sangir Besar detrwa lannen pase, petet ou’n zwenn trwa parmi nou bann ser Kretyen lo lans. Zot vreman popiler lo sa zil parski zot ed dimoun pour konpran Labib. Me sa zour, zot ti pe fer en keksoz en pe diferan.

Sa zour, zot ti pe al dan lanmer, kot zot ti pe rod bann gro ros e anmenn sa bann ros lo lans. Serten sa bann ros ti menm groser avek en boul foutbol. Apre ki zot ti’n anmas sa bann ros, zot ti asiz lo bann pti stoul an dibwa e zot ti servi en marto pour kas sa bann ros ziska ki zot ti ganny bann pti bout ros ki ti menm groser avek en dizef poul. Apre sa, zot ti met sa bann pti ros dan bann seo plastik e zot ti anmenn sa bann seo dan peron ziska kot zot ti reste. Pli tar, zot ti met sa bann ros dan bann gran sak ki ti ganny mete dan bann kanmiyon e ki ti ganny servi pour fer semen.

Enn parmi sa bann ser i apel Hulda. Vi ki son sirkonstans ti permet li, Hulda ti kapab pas plis letan pe fer sa travay. Normalman i ti servi sa larzan ki i ti gannyen pour rod sa ki son fanmir i bezwen. Me safwasi i ti osi anvi servi en pe sa larzan pour fer en lot keksoz. I ti anvi en tablet pour li kapab servi JW Library^® app. Hulda ti konnen ki bann video ek lezot keksoz dan sa app ti pou ed li dan predikasyon e pou ed li konpran Labib pli byen.

Pour en mwan edmi, Hulda ti travay pour de-z-erdtan tou le bomaten. I ti kas ase ros pour ranpli en pti kanmiyon. Finalman i ti ganny ase larzan pour aste en tablet.

Hulda ti dir: “Apre ki mon ti’n kas sa bann ros, mon ti fatige e mon lekor ti fermal. Me ler mon ti kapab servi mon tablet pour vin pli efikas dan predikasyon e pour prepar mon renyon pli byen, mon ti vitman oubliy sa bann douler.” Hulda i osi dir ki pandan pandemi, i ti kapab servi sa tablet pour asiste renyon e partisip dan predikasyon. Parey Hulda, nou vreman kontan ki i’n reisi atenn son lobzektif.