LARTIK LETID 6
KANTIK 18 Nou dir ou mersi pour sa ranson
Akoz nou rekonesan ki Zeova i pardonn nou?
“Bondye in telman kontan lemonn ki i’n donn son sel Garson.”—ZAN 3:16.
TOPIK
Nou anvi demontre lapresyasyon pour lefet ki Zeova i pardonn nou. Pour ed nou fer sa, nou pou vwar ki Zeova in fer pour nou pese ganny pardonnen.
1-2. Dan ki fason nou sityasyon i parey pour sa garson ki ganny mansyonnen dan paragraf 1?
IMAZIN en zenn garson ki son paran i ris. En zour, son paran i mor dan en aksidan. Ler sa garson i tann sa, i vreman sagren. Me sa garson i ganny ankor en move nouvel. I aprann ki son paran in depans plis larzan ki zot ti annan e zot annan en gro det. Aprezan olye erit zot larzan, i pou bezwen pey sa gro det ki son paran in annan e sa bann dimoun ki son paran i drwa pe met presyon pour li pey zot deswit. Me i pa pou zanmen kapab pey tou sa det.
2 Dan serten fason, nou sityasyon i parey pour sa garson. Nou premye paran, Adan ek Ev, ti parfe e zot ti viv dan en zoli paradi. (Zen. 1:27; 2:7-9) Zot ti pou’n kapab viv ere pour touzour me tou keksoz ti sanze. Adan ek Ev ti fer pese. Sa ti fer ki Zeova ti retir zot dan sa paradi e zot ti nepli kapab viv pour touzour. Ki zot zanfan in erite avek zot? Labib i dir: “Atraver en sel zonm [Adan] pese in antre dan lemonn e pese in anmenn lanmor, alor tou dimoun i mor parski tou dimoun in fer pese.” (Rom. 5:12) Nou’n erit pese avek Adan e sa i fer ki nou mor. Sa pese ki nou’n erite i parey en gro det ki ni enn ant nou pa kapab peye.—Ps. 49:8.
3. Akoz pese i ganny konpare avek “det”?
3 Dan Labib, pese i ganny konpare avek “det.” (Mat. 6:12, not.; Lik 11:4) Ler nou fer pese, i konmsi nou annan en det anver Zeova. Lo nou menm, nou pa kapab pey sa det e sel fason ki sa det ti pou ganny kennsel i ler nou mor.—Rom. 6:7, 23.
4. (a) Vi ki nou fer pese, ki ti pou arive avek nou si nou pa ti ganny led? (Psonm 49:7-9) (b) Ki sa mo “pese” ki dan Labib pe refer avek? (Vwar bwat “ Pese.”)
4 Lo nou menm, i enposib pour nou reganny tou sa ki Adan ek Ev in perdi. (Lir Psonm 49:7-9.) San led, nou ti pou napa lespwar pour lavenir oubyen pour ganny resisite. Nou ti pou mor e pa zanmen viv ankor zis parey ler bann zannimo i mor.—Ekle. 3:19; 2 Pyer 2:12.
5. Ki mannyer nou Papa ki kontan nou in ed nou pour pey sa det ki nou’n erite avek Adan? (Vwar portre.)
5 Annou reflesir lo legzanp sa garson ki nou’n vwar o konmansman sa lartik. Ki mannyer sa garson ti pou santi si en msye ki ris ti ofer pour pey tou son det? Nou kapab asire ki sa garson ti pou vreman rekonesan e i ti pou aksepte sa kado. Dan en fason en pe parey, Zeova, nou Papa ki kontan nou in donn nou en kado e sa kado i pey sa det setadir sa pese ki nou’n erite avek Adan. Zezi i eksplik sa laranzman dan sa fason. I ti dir: “Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.” (Zan 3:16) Sa kado i osi fer li posib pour nou annan en bon lanmitye avek Zeova.
Zezi ti anons sa bon nouvel konsernan lefet ki Zeova i pardonn nou gras a sa ranson. (Zan 3:16) Apre Zezi ti volonterman donn son lavi konman sa ranson (Vwar paragraf 5)
6. Ki nou pou vwar dan sa lartik e akoz?
6 Ki byenfe nou gannyen avek sa kado merveye ki fer li posib pour nou pese ganny pardonnen? Pour reponn sa kestyon, nou pou diskit lo diferan lekspresyon ki dan Labib ki annan pour fer avek sa laranzman ki Zeova in met an plas pour nou pese ganny pardonnen e nou pou vwar ki sa bann lekspresyon i vedir. Anmezir nou medit lo sa ki Zeova in fer pour pardonn nou, nou pou pli rekonesan anver li.
NOU BEZWEN REKONSILYE AVEK BONDYE
7. (a) Kwa ankor ki Adan ek Ev ti perdi? (b) Konman bann desandans Adan ek Ev, ki nou vreman bezwen? (Romen 5:10, 11)
7 Ler Adan ek Ev ti fer pese, zot ti nepli kapab viv pour touzour e zot ti perdi sa lanmitye ki zot ti annan avek zot Papa. Avan Adan ek Ev ti fer pese, zot ti form parti fanmir Bondye. (Lik 3:38) Ler zot ti dezobei Zeova, zot ti ganny pouse dan fanmir Bondye. Sa ti arive avan ki zot ti konmans fer zanfan. (Zen. 3:23, 24; 4:1) Alor vi ki nou zot bann desandans, nou bezwen rekonsilye avek Zeova. (Lir Romen 5:10, 11.) Sa i vedir ki nou bezwen devlop en bon lanmitye avek Zeova. Dapre en liv resers, sa mo Grek ki’n ganny servi e ki’n ganny tradwir “rekonsilye” i kapab vedir “fer en lennmi vin en zanmi.” Sa ki remarkab i ki Zeova i sa enn ki’n pran linisyativ pour fer sa posib. Ki mannyer in fer sa?
EN LARANZMAN I GANNY FER
8. Ki laranzman Zeova in fer e ki byenfe nou gannyen?
8 Zeova in fer laranzman pour ki bann imen i kapab revin son zanmi. I’n fer en fason pour nou reganny sa ki Adan in perdi. Ki Zeova in fer? Sa ki i’n fer i enplik donn en keksoz ki annan menm valer avek sa ki’n perdi. Sa i fer ki sa ki’n ganny detrir oubyen ki’n perdi i kapab ganny ranplase oubyen retrouve. Lekritir Grek Kretyen i koz lo sa mwayen ki Zeova in servi pour fer li posib pour en dimoun vin son zanmi.—Rom. 3:25.
9. Ki laranzman tanporer Zeova ti fer pour ki pese bann Izraelit i ganny pardonnen?
9 Zeova ti fer en laranzman tanporer pour ki pese bann Izraelit i ganny pardonnen e sa ti fer ki bann Izraelit ti kapab annan en bon lanmitye avek li. Bann Izraelit ti bezwen selebre en lafet spesyal enn fwa tou le lannen. Sa lafet ti apel Zour Rekonsilyasyon. Sa zour, granpret ti ofer sakrifis zannimo delapar bann dimoun. Byensir sakrifis zannimo pa ti pou kapab kouver pese bann Izraelit parski bann zannimo i enferyer konpare avek imen. Me tan ki bann Izraelit ki ti’n repantir ti ofer bann sakrifis ki Zeova ti’n demann zot pour fer, Zeova ti pare pour pardonn zot pese. (Ebr. 10:1-4) Bann sakrifis ki zot ti ofer Zour Rekonsilyasyon ek lezot sakrifis ti ed bann Izraelit pour realize ki zot ti fer pese e ki zot ti pou bezwen en lot laranzman kot zot pese ti pou kapab ganny pardonnen konpletman.
10. Ki laranzman permanan Zeova in fer pour ki pese bann imen i ganny pardonnen?
10 Zeova in fer en laranzman permanan pour ki pese bann imen i ganny pardonnen. I ti fer laranzman pour son Garson ki i kontan “ganny ofer enn fwa pour tou pour anmenn pese en kantite dimoun.” (Ebr. 9:28) Zezi ti “donn son lavi konman en ranson pour liber bokou dimoun.” (Mat. 20:28) Kisisa en ranson?
SA RANSON I GANNY DONNEN
11. (a) Dapre Labib, kisisa en ranson? (b) Lekel ki ti pou kapab pey sa ranson?
11 Dapre Labib, Zeova ti deside ki en ranson oubyen en pri ti bezwen ganny peye pour ki nou pese i kapab ganny pardonnen e pour ki nou kapab vin son zanmi. a Ki sa ranson ki ti bezwen ganny peye pour ki bann imen i reganny sa ki Adan in perdi? Rapel ki Adan ek Ev ti perdi zot lavi parfe e zot ti nepli kapab viv pour touzour. Alor sa ranson ti pou bezwen annan menm valer avek sa ki zot ti’n perdi. (1 Tim. 2:6) Sa ranson ti pou kapab ganny peye par en zonm ki (1) parfe, (2) ki ti kapab viv pour touzour lo later e (3) ki ti pare pour donn oubyen sakrifye son lavi pour nou. Zis en zonm ki ti ranpli sa bann kriter, ki ti kapab donn son lavi pour ranplas sa lavi ki nou’n perdi.
12. Akoz Zezi ti kapab pey sa ranson?
12 Annou vwar trwa rezon akoz Zezi ti kapab pey sa ranson. (1) I ti parfe setadir “i pa ti fer okenn pese.” (1 Pyer 2:22) (2) Sa ti fer ki i ti kapab viv pour touzour lo later. (3) I ti pare pour mor e donn son lavi pour nou. (Ebr. 10:9, 10) Zezi ti en zonm parfe zis parey sa premye zonm, Adan, ti ete avan i ti fer pese. (1 Kor. 15:45) Alor ler Zezi ti mor, i ti kapab kouver pese Adan setadir ranplas sa ki Adan ti’n perdi. (Rom. 5:19) Dan sa fason, Zezi ti vin “dernyen Adan.” Nou pa bezwen en lot dimoun parfe pour pey pour sa ki Adan in perdi parski Zezi in mor “enn fwa pour tou.”—Ebr. 7:27; 10:12.
13. Kwa ki fer li posib pour nou annan en bon lanmitye avek Zeova?
13 Kwa ki fer li posib pour nou annan en bon lanmitye avek Zeova? Zeova in fer laranzman pour nou pese ganny pardonnen. Ler Zezi ti sakrifye son lavi parfe, sa ti sa pri egzakt ki fer li posib pour nou pese ganny pardonnen.—Efe. 1:7; Ebr. 9:14.
NOU GANNY LIBERE E BONDYE I VWAR NOU KONMAN BANN DIMOUN KI FER SA KI BYEN
14. Ki nou pou vwar aprezan e akoz?
14 Ki byenfe nou gannyen avek sa ki Zeova in fer pour nou? Pour reponn sa kestyon, nou pou vwar de lekspresyon ki Labib i servi. Sa bann lekspresyon pour ed nou konpran ki byenfe nou gannyen avek lefet ki Zeova i pardonn nou.
15-16. (a) Ki byenfe nou gannyen akoz sa ranson? (b) Ki mannyer sa i fer nou santi?
15 Labib i dir ki gras a sa ranson ki’n ganny peye, nou ganny libere. Konsernan sa, zapot Pyer ti dir: “Zot konnen ki i pa avek bann keksoz ki kapab gate parey larzan oubyen lor ki zot in ganny libere [literalman, “libere gras a en ranson”] avek zot fason viv initil ki zot in erite avek zot zanset, me se avek disan presye, parey disan en pti mouton ki san defo e san okenn tas, setadir disan Kris.”—1 Pyer 1:18, 19, not.
16 Vi ki sa ranson in ganny peye, nou kapab ganny libere avek pese ek lanmor ki anmenn en kantite soufrans. (Rom. 5:21) Nou vreman rekonesan anver Zeova ek Zezi parski nou’n ganny libere gras a disan presye Zezi.—1 Kor. 15:22.
17-18. (a) Ler Zeova i konsider nou konman en dimoun ki fer sa ki byen, ki sa i vedir? (b) Ki byenfe nou gannyen lefet ki Zeova i vwar nou konman bann dimoun ki fer sa ki byen?
17 Labib i dir ki Zeova i vwar son bann serviter konman bann dimoun ki fer sa ki byen. Sa i vedir ki Zeova pa demann nou pour peye pour bann pese ki nou’n fer. Menm si Zeova i fer sa, sa pa vedir ki Zeova pa pe swiv son prop standar konsernan lazistis. I pa akoz nou merite ki Zeova i vwar nou konman bann dimoun ki fer sa ki byen e Zeova pa soutir nou bann pese. Me Zeova i pare pour pardonn nou pese parski nou demontre lafwa dan sa ki Zeova ek Zezi in fer pour pey sa ranson.—Rom. 3:24; Gal. 2:16.
18 Ki byenfe nou gannyen ler Zeova i vwar nou konman bann dimoun ki fer sa ki byen? Bann ki’n ganny swazir pour dirize ansanm avek Kris dan lesyel in fini ganny aprouve konman bann dimoun ki fer sa ki byen e zot in vin bann zanfan Bondye. (Tit 3:7; 1 Zan 3:1) Zot pese in ganny pardonnen. I konmsi zot pa’n zanmen fer sa bann pese e sa i fer ki zot in ganny aprouve pour antre dan Rwayonm Bondye. (Rom. 8:1, 2, 30) Bann ki annan lespwar pour viv pour touzour lo later i osi ganny konsidere konman bann dimoun ki fer sa ki byen. Zeova in pardonn zot pese e zot in vin son zanmi. (Zak 2:21-23) Sa gran lafoul ki pou sirviv Armagedon i annan sa posibilite pour pa zanmen mor. (Zan 11:26) “Bann ki’n fer sa ki byen” e “bann ki’n fer sa ki mal” ki’n mor pou ganny resisite. (Akt 24:15; Zan 5:28, 29) Avek letan, tou bann serviter Zeova ki lo later ki obeir Zeova pou “ganny laglwar ek laliberte bann zanfan Bondye.” (Rom. 8:21) Nou vreman anvi ariv sa letan kot nou pou kapab annan sa kalite lanmitye avek nou Papa, Zeova.
19. Ki mannyer sa ki Zeova ek Zezi in fer pour nou in amelyor nou sityasyon? (Vwar bwat “ Ki i vedir pour nou?”)
19 Nou sityasyon ti parey pour sa garson ki’n ganny mansyonnen pli boner ki ti perdi tou keksoz e erit en gro det ki i pa ti pou zanmen kapab peye. Me Zeova in ed nou. Nou sityasyon in sanze parski Zeova in fer laranzman pour nou pese ganny pardonnen e Zezi in pey sa ranson. Nou lafwa dan Zezi Kri i fer li posib pour nou ganny libere avek pese ek lanmor. Ler Zeova i pardonn nou pese, i konmsi sa pese pa’n zanmen arive. Me sa ki pli enportan i ki aprezan nou kapab annan en bon lanmitye avek Zeova, nou Papa ki kontan nou.
20. Ki nou pou vwar dan sa lartik ki swiv?
20 Ler nou medit lo tou sa ki Zeova ek Zezi in fer pour nou, nou vin pli rekonesan. (2 Kor. 5:15) San zot led, nou ti pou napa okenn lespwar. Me lefet ki Zeova i pardonn nou, ki sa i vedir pour nou endividyelman? I sanmenm ki nou pou vwar dan sa lartik ki swiv.
KANTIK 10 Loue Zeova nou Bondye!
a Dan serten langaz, sa mo “ranson” i ganny tradwir avek en lekspresyon ki literalman vedir “pri pour ganny lavi” oubyen “sa peyman ki’n ganny fer.”
