Zeova ti dir bann Izraelit ki zot devret sen. Pour ed zot fer sa, i ti dir: “Ou pa devret fann rimer lo ou kanmarad parmi lepep. Ou pa devret fer okenn keksoz ki kapab met lavi ou kanmarad an danze. Mwan mon Zeova.”​—Lev. 19:2, 16, NWT.

Dan langaz Ebre, sa lekspresyon “fer okenn keksoz ki kapab met lavi ou kanmarad an danze” i literalman ganny ekri konman “debout kont.” Me ki sa lekspresyon i vedir? En liv Zwif konsernan Levitik i dir: “Sa bout dan sa verse i . . . difisil pour konpran parski i difisil pour konnen ki sinifikasyon sa lekspresyon Ebre ki literalman vedir ‘pa debout o bor.’”

Serten spesyalis Labib i krwar ki sa fraz dan verse 16 i annan pour fer avek verse 15, ki dir: “Zot pa devret enzis dan zot zizman. Zot pa devret fer lapreferans pour en dimoun pov ni pour en dimoun ris. Ou devret ziz ou prosen avek lazistis.” (Lev. 19:15, NWT) Si sa i leka, sa lord dan verse 16 ki dir ki bann Izraelit pa devret ‘fer okenn keksoz ki kapab met lavi en lot dimoun an danze,’ i kapab vedir ki bann Izraelit pa devret fer okenn keksoz ki enzis dan bann ka ankour, dan biznes oubyen dan fanmir. En Izraelit pa ti devret fer okenn keksoz ki pa onnet pour li ganny bann byenfe. I vre ki nou pa devret fer sa bann keksoz me i annan en lot fason ki nou kapab konpran sa bann parol dan verse 16.

Reflesir lo sa premye fraz dan sa verse. Bondye i donn lord bann Izraelit pour pa fann rimer lo kanmarad. Gard antet ki fann rimer i plis ki donn nouvel. Ler en dimoun i donn nouvel, sa i kapab kree problenm. Me fann rimer i pli pir ki sa. (Prov. 10:19; Ekle. 10:12-14, NWT; 1 Tim. 5:11-15; Zak 3:6) Souvandfwa, en dimoun ki fann rimer i dir en keksoz avek lentansyon pour sali repitasyon en lot dimoun. I kapab ki sa dimoun ki fann rimer i donn en fo temwannyaz lo en lot dimoun menm si sa i kapab met sa dimoun an danze. Rapel ki bann dimoun ti fann rimer lo Nabot e akoz sa, i ti ganny saboule avek ros. (1 Rwa. 21:8-13) Alor, parey i dir dan dezyenm fraz dan Levitik 19:16, en dimoun ki fann rimer i kapab met lavi en lot dimoun an danze.

En dimoun i osi kapab fann rimer lo en dimoun akoz i ay sa dimoun. Dan 1 Zan 3:15 i dir: “Tou sa ki ay son frer i en mertriye e zot konnen ki en mertriye pa ganny lavi eternel.” Remarke ki apre ki Bondye ti’n dir sa bann parol dan verse 16, i ti osi dir: “Ou pa devret annan okenn laenn dan ou leker pour ou frer.”​—Lev. 19:17, NWT.

Alor, sa lord dan Levitik 19:16 i en bon konsey pour bann Kretyen. Nou devret rezet okenn move panse e pa zanmen fann rimer lo en lot dimoun. Si nou “fer okenn keksoz ki kapab met lavi [en lot dimoun] an danze” setadir si nou fann rimer lo en dimoun akoz nou pa kontan sa dimoun ouswa nou zalou li, sa i kapab montre ki nou ay sa dimoun. Bann Kretyen pa devret ay personn.​—Mat. 12:36, 37.