LESON 31
Kisisa Rwayonm Bondye?
Mesaz pli enportan ki annan dan Labib i konsernan Rwayonm Bondye. Zeova pou servi sa Rwayonm pour fer sa later vin parey i ti anvi depi o konmansman. Kisisa sa Rwayonm? Ki mannyer nou konnen ki i pe dirize la konmela? Ki i’n deza fini akonpli? Ki i pou fer dan lavenir? Sa leson ek sa de ki swiv pou reponn sa bann kestyon.
1. Kisisa Rwayonm Bondye e lekel son Lerwa?
Rwayonm Bondye i en gouvernman ki’n ganny etablir par Bondye Zeova. Son Lerwa i Zezi Kri e i dirize depi dan lesyel. (Matye 4:17; Zan 18:36) Labib i dir sa lo Zezi: “I pou Lerwa . . . pour touzour.” (Lik 1:32, 33) Konman Lerwa dan Rwayonm Bondye, Zezi pou diriz tou dimoun ki lo later.
2. Lekel ki pou dirize ansanm avek Zezi?
Zezi pa diriz li tousel. I pou annan dimoun sorti dan “tou tribi, langaz, pep ek nasyon . . . [ki] pou diriz lo later antye konman lerwa.” (Revelasyon 5:9, 10) Ki kantite zot ki pou diriz ansanm avek Kris? Depi ki Zezi ti vin lo later, en kantite Kretyen in vin son disip. Me zis 144,000 zot ki al dan lesyel pour dirize avek Zezi. (Lir Revelasyon 14:1-4.) Tou lezot Kretyen lo later pou vin bann sitwayen sa Rwayonm.—Psonm 37:29.
3. Akoz Rwayonm Bondye i pli bon ki bann gouvernman imen?
Menm si bann imen ki pe dirize i esey fer bann bon keksoz, zot napa sa pouvwar pour fer tou sa ki zot anvi. Avek letan zot ganny ranplase par lezot dirizan ki petet napa lentere zot sitwayen aker. Me personn pa pou zanmen ranplas Zezi konman Dirizan Rwayonm Bondye. Bondye in “etabli en rwayonm ki pa pou zanmen ganny detrir.” (Danyel 2:44) Zezi pou diriz lo later antye e i pa pou fer lapreferans. I kontan dimoun, i bon e zis. Koumsanmenm ki i pou ansenny dimoun pour tret kanmarad, setadir pour kontan lezot e tret zot dan en fason zis e bon.—Lir Izai 11:9.
AL PLI O PROFON
Vwar akoz Rwayonm Bondye i pli bon ki okenn gouvernman imen.
4. En gouvernman ki annan bokou pouvwar pou diriz lo later antye
Zezi i annan plis pouvwar pour dirize ki okenn dirizan dan listwar imen. Lir Matye 28:18 e apre reponn sa kestyon:
-
Akoz lotorite ki Zezi i annan i pli siperyer ki okenn lotorite ki en dirizan imen i annan?
Bann gouvernman imen i sanze tanzantan e sak sa bann dirizan i diriz zis en pti parti lemonn. Me eski i leka avek Rwayonm Bondye? Lir Danyel 7:14 e apre reponn sa bann kestyon:
-
Akoz i byen ki Rwayonm Bondye “pa pou ganny detrir”?
-
Akoz i byen ki i diriz later antye?
5. Gouvernman imen i bezwen ganny ranplase
Akoz Rwayonm Bondye i bezwen ranplas bann gouvernman imen? Zwe sa VIDEO e apre reponn sa kestyon.
-
Ki bann gouvernman imen in fer?
Lir Eklezyas 8:9 e apre reponn sa bann kestyon:
-
Ou krwar Rwayonm Bondye i devret ranplas bann gouvernman imen? Akoz?
6. Rwayonm Bondye i annan bann dirizan ki konpran nou
Vi ki nou Lerwa Zezi in deza viv konman en imen, i kapab “konpran nou febles.” (Ebre 4:15) Sa 144,000 zonm ek fanm fidel ki Zeova in swazir pour diriz ansanm avek Zezi i “sorti dan tou tribi, langaz, pep ek nasyon.”—Revelasyon 5:9.
-
Zezi ek bann ki pou diriz avek li i konnen ki savedir viv konman en imen. Eski sa i rekonfort ou? Akoz?
Zeova in swazir diferan kalite dimoun pour diriz avek Zezi
7. Rwayonm Bondye i annan bann pli bon lalwa
Gouvernman i fer lalwa ki sipoze benefisye e protez zot sitwayen. Rwayonm Bondye osi i annan bann lalwa ki son bann sitwayen i bezwen swiv. Lir 1 Korentyen 6:9-11 e apre reponn sa bann kestyon:
-
Ki mannyer ou krwar lemonn pou ete ler tou dimoun pou swiv lalwa Bondye? a
-
Eski ou krwar i fer sans ki Zeova i ekspekte bann sitwayen Rwayonm Bondye pour respekte son bann lalwa? Akoz?
-
Kwa ki montre ki dimoun ki pa pe obei sa bann lalwa i kapab sanze?—Vwar verse 11.
Gouvernman i fer bann lalwa pour protez e benefisye zot sitwayen. Rwayonm Bondye i annan bann pli bon lalwa pour protez e benefisye son bann sitwayen
SI EN DIMOUN I DEMANDE: “Kisisa Rwayonm Bondye?”
-
Ki mannyer ou ti pou reponn li?
REZIMEN
Rwayonm Bondye i en vre gouvernman dan lesyel ki pou diriz later antye.
Revizyon
-
Lekel ki pou dirize dan Rwayonm Bondye?
-
Akoz Rwayonm Bondye i pli bon ki okenn gouvernman imen?
-
Ki serten keksoz ki Zeova i ekspekte bann sitwayen Rwayonm Bondye pour fer?
FER PLIS RESERS
Gete ki Zezi ti dir konsernan kote Rwayonm Bondye i ete.
Akoz Temwen Zeova i reste fidel anver Rwayonm Bondye plito ki gouvernman imen?
Vwar ki Labib i dir lo sa 144,000 dimoun ki Zeova in swazir pour diriz avek Zezi.
Gete kwa ki ti konvenk en madanm dan prizon ki zis Bondye ki kapab anmenn en lemonn zis.
“How I Found the Answer to Injustice” (Veye! Novanm 2011 an Angle)
Ou pou kapab kontan sa osi
BANN KESTYON KI DIMOUN I SOUVAN DEMANDE LO TEMWEN ZEOVA
Ki sa letid Labib ki Temwen Zeova i ofer?
Ou kapab servi nenport tradiksyon Labib avek sa progranm Labib enteraktif gratwit ki Temwen Zeova i ofer. Santi ou alez pour envit ou fanmir antye oubyen nenport zanmi pour asiste ou letid.
