SEKSYON 14
Bondye i koz atraver Son bann profet
Bann profet i ganny apwente par Zeova pour anons bann mesaz konsernan zizman, vre ladorasyon ek lespwar pour en Mesi
DAN lepok bann lerwa Izrael ek Zida ti annan en group zonm spesyal ki ti anons mesaz Bondye, sa ti bann profet. Sa bann zonm ti annan en lafwa ek kouraz ekstraordiner e zot ti anons bann mesaz Bondye. Egzamin kat topik enportan ki bann profet Bondye ti koz lo la.
1. Destriksyon Zerizalenm. Byen davans, bann profet Bondye parey Izai ek Zeremi ti konmans averti ki Zerizalenm ti pou ganny detrir e abandonnen. Par servi bann parol byen kler, zot ti montre akoz Bondye ti ankoler avek zot. Bann zabitan Zerizalenm ti pe pretann ki zot ti pe servi Bondye, me an realite sa ti fo akoz zot ti pe pratik fo larelizyon, koripsyon ek vyolans.—2 Lerwa 21:10-15; Izai 3:1-8, 16-26; Zeremi 2:1–3:13.
2. Restorasyon vre ladorasyon. Apre 70 lannen an egzil, pep Bondye ti pou ganny libere Babilonn. Zot ti pou retourn dan zot pei abandonnen e rebatir tanp Zeova Zerizalenm. (Zeremi 46:27; Amos 9:13-15) Apepre 200-z-an pli boner, Izai ti predir ki sennla ki ti pou defet Babilonn e permet pep Bondye ale pour reetablir vre ladorasyon. I ti pou apel Siris. Izai ti menm donn detay lo lafason ki Siris ti pou konkerir sa lavil.—Izai 44:24–45:3.
3. Larive Mesi e sa ki i ti pou pas atraver. Mesi ti pou ne dan lavil Betleenm. (Mika 5:2) I ti pou annan limilite e ariv Zerizalenm lo en bourik. (Zekarya 9:9) Menm si i ti dous e zantiy, i pa ti pou popiler, bokou pa ti pou kontan li. (Izai 42:1-3; 53:1, 3) I ti pou mor dan en fason kriyel. Eski i ti pou mor pour touzour? Non, akoz atraver son sakrifis bokou dimoun ti pou ganny pardonnen zot pese. (Izai 53:4, 5, 9-12) Zis son rezireksyon ki ti pou kapab akonplir sa.
4. Renny Mesi lo later antye. Bann imen enparfe pa vreman kapab diriz zot lekor dan en fason anpe, me Mesi ki ti pou plitar vin Lerwa ti pou ganny apele Prens Lape. (Izai 9:6, 7; Zeremi 10:23) Anba son renny, tou bann imen pou anpe avek kanmarad, menm avek bann zannimo. (Izai 11:3-7) Maladi pou disparet. (Izai 33:24) Menm lanmor pou ganny eliminen pour touzour. (Izai 25:8) Pandan renny sa Mesi, bann dimoun ki’n mor pou ganny resisite e viv lo later.—Danyel 12:13.
