PARTI 5
Sa gran Deliz—Lekel ki ti ekoute? Lekel ki pa ti ekoute?
Laplipar dimoun dan letan Noe ti fer sa ki mal. Zenez 6:5
Adan ek Ev ti annan zanfan, e i ti konmans annan bokou dimoun lo later. Avek letan, serten lanz ti zwenn ansanm avek Satan pour dezobeir Bondye.
Zot ti vin lo later e pran lekor imen pour ki zot kapab marye avek bann madanm. Bann zanfan ki sa bann madanm ti gannyen ti vin bann zonm vyolan e vreman for.
Later ti ranpli avek bann dimoun ki ti fer sa ki mal. Labib i dir: “Kantite mesanste ki zonm ti pe fer lo later e tou sa ki i ti panse dan son leker ti toultan move.”
Noe ti ekout Bondye e konstrir en lars. Zenez 6:13, 14, 18, 19, 22
Noe ti en bon dimoun. Zeova ti dir Noe ki I ti pou anmenn en deliz ki ti pou detrir bann move dimoun.
Bondye ti osi demann Noe pour konstrir en gro bato, ki ti apel en lars, pour met tou son fanmir ek tou sort kalite zannimo ladan.
Noe ti averti bann dimoun konsernan sa Deliz ki ti pe vini, me zot pa ti ekoute. Serten ti riy Noe e lezot ti ay li.
Kan lars ti fini ganny konstrir, Noe ti met bann zannimo ladan.
Ou pou kapab kontan sa osi
LABIB—KI SON MESAZ?
Limanite i sirviv Deliz
Ki mannyer bann move dimoun ti propaze lo later? Ki mannyer Noe ti demontre ki i ti en zonm fidel?
