Let pour bann Ebre 3:1-19
3 Alor, mon bann frer ki sen, zot ki’n ganny swazir* pour al dan lesyel, reflesir byen lo legzanp Zezi, sa enn ki nou aksepte konman zapot ek granpret.
2 I ti fidel avek sa Enn ki ti swazir li, zis parey Moiz osi ti fidel ler i ti servi dan lakaz Bondye.
3 Parski Zezi i merit ganny plis laglwar ki Moiz, vi ki sa enn ki konstri en lakaz i annan plis loner ki sa lakaz li menm.
4 Byensir, tou lakaz i ganny konstrir par en dimoun, me sa enn ki’n konstri tou keksoz i Bondye.
5 Moiz ti en serviter fidel dan lakaz Bondye. Son servis ti montre bann keksoz ki Bondye ti pou koz lo la pli tar.
6 Me Kris konman garson met lakaz ti fidelman okip lakaz Bondye. Nou Son lakaz si vreman nou kontinyen koz avek lardyes* e kontinyen gard nou lespwar, ki fer nou fyer ziska lafen.
7 Alor, zis parey lespri sen in dir, “Ozordi, si zot ekout son lavwa,
8 pa les zot leker vin dir parey zot zanset ti fer ler zot ti fer mwan vreman ankoler e teste mwan dan dezer.
9 Zot ti teste mwan e met mwan o defi menm si zot ti’n vwar sa ki mon ti’n fer pour 40 an.
10 Se pour sa rezon ki mon ti degout sa zenerasyon e dir: ‘Dan zot leker zot touzour pe dezobei mwan e zot pa’n arive konn mwan.’
11 Alor, dan mon lakoler mon ti fer sa serman: ‘Zot pa pou antre dan mon repo.’”
12 Mon bann frer, fer byen atansyon ki zot pa zanmen devlop en move leker ki mank lafwa par elwanny zot avek sa Bondye vivan.
13 Me kontinyen ankouraz kanmarad sak zour, tan ki i ankor apel “Ozordi,” pour ki personn parmi zot pa les son leker vin dir avek pouvwar pese ki anbet dimoun.
14 Parski nou pou eksperyans menm keksoz ki Kris in eksperyanse si nou kontinyen gard sa konfyans ki nou ti annan depi o konmansman ziska lafen.
15 Parey i’n ganny dir, “Ozordi, si zot ekout son lavwa, pa les zot leker vin dir parey zot zanset ti fer ler zot ti fer mwan vreman ankoler.”
16 Parski lekel ki ti tande e pourtan ti fer Bondye ankoler? Anfet, pa i tou sa bann ki ti kit Lezip anba direksyon Moiz?
17 Deplis, Bondye ti degout lekel pandan 40 an? Pa i sa bann ki ti fer pese e mor dan dezer?
18 Avek lekel i ti fer serman ki zot pa ti pou antre dan son repo? Pa i sa bann ki ti dezobeisan?
19 Alor nou vwar ki zot pa ti kapab antre dan son repo akoz zot ti mank lafwa.
