Premye liv Kronik 12:1-40
-
Bann ki siport lerwa David (1-40)
12 Sa ti bann zonm ki ti al Ziklag kot David ler i ti pe kasyet akoz Sail garson Kis. Sa bann zonm ti parmi bann gerye ki for ki ti siport David dan lager.
2 Zot ti annan bann fles e zot ti kapab servi tou le de lanmen pour anvoy ros oubyen tir fles. Zot ti bann frer Sail dan tribi Benzamen.
3 Aiezer ti sef, ansanm avek Zoas, zot tou le de zot ti bann garson Semaa en Gibeatit. I ti osi annan Zezyel ek Pelet ki ti bann garson Azmavet, Beraka, Zeou en Anatotit,
4 Ismaya en Gibeonnit, en gerye ki for ki ti parmi sa trant e i ti ansarz sa trant. I ti osi annan Zeremi, Zaazyel, Zoanann, Zozabad en Gederatit,
5 Elouzay, Zerimot, Bealya, Semarya, Sefatya en Arifit,
6 Elkana, Isia, Azarel, Zoezer ek Zasobeam, bann Korait.
7 I ti osi annan Zoela ek Zebadya ki ti bann garson Zeroam ki sorti Gedor.
8 Serten bann Gadit ti al kot David ti ete dan landrwa proteksyon dan dezer. Zot ti bann gerye ki for, bann solda ki ti’n aprann lager, zot ti annan en gran boukliye ek lans e zot ti pare pour al lager. Zot figir ti parey figir lyon e zot ti vit parey bann gazel lo montanny.
9 Ezer ti sef, Obadya ti dezyenm, Eliab ti trwazyenm,
10 Mismana ti katriyenm, Zeremi ti senkyenm,
11 Atay ti sizyenm, Eliel ti setyenm,
12 Zoanann ti wityenm, Elzabad ti nevyenm,
13 Zeremi ti dizyenm, Makbanay ti onzyenm.
14 Sa ti bann Gadit, bann sef larme. Sa ki ti pli fay ti vo 100 solda e sa ki ti pli for ti vo 1,000 solda.
15 Sa ti bann zonm ki ti travers Larivyer Zourden dan premye mwan ler larivyer ti deborde. Zot ti fer tou bann dimoun ki ti reste dan bann laplenn sorti dan sa landrwa, dan les e dan was.
16 Serten zonm dan tribi Benzamen ek Zida ti osi vin kot David dan son landrwa proteksyon.
17 David ti al zwenn zot e i ti dir zot: “Si zot in vin anpe kot mwan pour ed mwan, nou pou vin zanmi. Me si zot in vini pour trai mwan avek mon bann lennmi menm si mon pa’n fer nanryen mal, Bondye nou bann zanset pou vwar e i pou zize.”
18 Alor, Bondye ti donn* Amasay, sef trant, son lespri sen e Amasay ti dir:
“Nou pour ou, David e nou avek ou, garson Zese.
Ki lape i avek ou e avek sa enn ki pe ed ou,Parski ou Bondye pe ed ou.”
Alor David ti akey zot e i ti fer zot vin bann sef dan larme.
19 Serten zonm dan tribi Manase ti kit larme Sail pour al ed David ler David ansanm avek bann Filisten ti al lager avek Sail. Me David pa ti ed bann Filisten, parski ler bann sef Filisten ti’n fini diskite antre zot, zot ti fer David ale. Zot ti dir: “I pou retourn kot son senyer Sail e sa pou kout nou nou lavi.”
20 Sa i bann zonm dan tribi Manase ki ti al ed David ler i ti al Ziklag: Adna, Zozabad, Zedyael, Mikael, Zozabad, Eliou ek Ziletay, bann sef mil dan tribi Manase.
21 Zot ti ed David pour lager avek sa group bandi parski zot tou zot ti bann zonm for e kouraze. Zot ti vin bann sef dan larme.
22 Toulezour bann dimoun ti kontinyen vin kot David pour ed li, ziska ki son kan ti vin sitan gran parey kan Bondye.
23 Sa i lakantite sef bann zonm ki ti byen ekipe pour lager ki ti vin Ebronn kot David pour fer li vin lerwa dan plas Sail parey Zeova ti’n donn lord.
24 Dan tribi Zida, i ti annan 6,800 zonm ki ti pe anmenn gran boukliye ek lans, zot ti ekipe pour lager.
25 Dan tribi Simeon, i ti annan 7,100 zonm for e kouraze dan larme.
26 Dan tribi Levi, i ti annan 4,600 zonm.
27 Zeoada ti sef bann garson Aaron e i ti annan 3,700 zonm avek li
28 e osi Zadok, en garson ki for e kouraze. I ti osi annan 22 sef dan son fanmir.*
29 Dan tribi Benzamen, i ti annan 3,000 zonm. Bann Benzamennit ti bann frer Sail. Avan sa, laplipar sa bann zonm ti pe siport fanmir* Sail.
30 Dan tribi Efraim, i ti annan 20,800 zonm for e kouraze, ki ti renonmen dan zot fanmir.*
31 Dan lanmwatye tribi Manase, i ti annan 18,000 zonm ki ti’n ganny swazir par zot non pour fer David vin lerwa.
32 Dan tribi Isakar, i ti annan 200 sef ki ti konpran sa ki Izrael ti devret fer dan diferan sirkonstans. Tou zot bann frer ti swiv zot bann lord.
33 Dan tribi Zeboulonn, i ti annan 50,000 zonm ki ti kapab al dan larme e ki ti’n organiz zot pour lager avek tou bann zarm lager. Zot ti zwenn avek David e zot ti vreman fidel avek li.*
34 Dan tribi Naftali, i ti annan 1,000 sef e zot ti annan 37,000 zonm ki ti annan bann gran boukliye ek lans.
35 Dan tribi Dann, i ti annan 28,600 zonm ki ti’n organiz zot pour lager.
36 Dan tribi Aser, i ti annan 40,000 zonm ki ti kapab al dan larme e organiz zot pour lager.
37 Lo lot kote Larivyer Zourden, dan tribi Ribenn, dan tribi Gad e dan lanmwatye tribi Manase, i ti annan 120,000 solda avek tou kalite zarm lager.
38 Zot tou zot ti bann solda e zot ti pare pour al lo fron batay. Zot ti al Ebronn e zot ti vreman determinen pour fer David vin lerwa lo Izrael antye. Larestan Izraelit osi ti anvi* ki David i vin lerwa.
39 Zot ti reste laba avek David pour trwa zour. Zot ti manze e bwar parski zot bann frer ti’n prepar bann keksoz pour zot.
40 Osi, bann dimoun ki ti reste pros avek zot e menm bann ki ti reste lwen ziska dan teritwar Isakar, Zeboulonn ek Naftali, ti anmenn manze lo bann bourik, samo, mile* ek bef. Zot ti anmenn en kantite lafarin, gato fig ek rezen, diven, delwil, bef ek mouton, parski i ti annan lafet dan Izrael.
Bann not
^ Literalman, “abiy.”
^ Literalman, “lakaz paternel.”
^ Literalman, “lakaz.”
^ Literalman, “lakaz paternel.”
^ Oubyen “Tou sa bann ki ti zwenn David pa ti fer li avek de leker.”
^ Literalman, “annan en sel leker.”
^ Piti en seval avek en bourik.
