1, 2. Ié kewe Jiowa a eita ngeni chiechian?

MET sókkun aramas kopwe filatá pwe kopwe chieneni? Neman ka mochen chieneni emén mi léllé ekiekimi, minne oua sani me aúcheani. Iwe, eli ka sani emén mi múrinné napanapan, áwewe chék, a wenechar me kirekiréch.

² Seni lóóm tori ikenái, Kot a filatá ekkóch aramas pwe repwe chiechian. Áwewe chék, a eita ngeni Apraham chiechian. (Álleani Aisea 41:8; James 2:23.) A pwal apasa pwe Tafit emén mwán mi ‘lelukeni lelukan,’ i ewe sókkun aramas Jiowa a tongei. (Föför 13:22) Iwe, ewe soufós Taniel a pwal “fokun chen me ren.”​—Taniel 9:23.

3. Pwata Jiowa a filatá ekkóch aramas pwe repwe chiechian?

³ Pwata Jiowa a chiechi ngeni Apraham, Tafit me Taniel? Iwe, iei alon ngeni Apraham: “Ka aleasochis  ngeni ai kapas.” (Keneses 22:18) Jiowa a chiechi ngeni chókkewe mi tipetekison le féri minne a ereniir. Iei alon usun chón Israel: “Üa allük ngeniir pwe repwe aleasochisiei, mürin ngang üpwe ar Kot, nge ir repwe nei aramas.” (Jeremaia 7:23) Ika ka álleasochisi Jiowa, en kopwe pwal tongeni wiliti emén chiechian!

4, 5. Ifa usun Jiowa a áeá an péchékkúl fán iten néún kewe aramas?

⁴ Ekieki mwo usun feiéchún án aramas chiechi ngeni Kot. Ewe Paipel a apasa pwe Jiowa a mochen “apöchöküla chokewe mi fang ngeni unusen letiper.” (2 Kronika 16:9) Ifa usun Jiowa epwe áeá an péchékkúl fán itom? Iei alon Kölfel 32:8: “[Ngang Jiowa] üpwe aiti ngonuk ewe al kopwe fetal won o emwenuk, üpwe öüröürok o mamasok.”

⁵ Alon Jiowa na a fókkun achchúngú letipach pún a pwáraatá an áfánnikich! Epwe awora ngonuk kapasen éúréúr iwe epwe mammasok atun ka apwénúretá. Kot a mochen álisuk le likiitú fán sóssótum kewe meinisin. (Álleani Kölfel 55:22.) Iwe, ika ka angang ngeni Jiowa ren unusen letipom, kopwe lúkúlúk usun chék ewe soumakken kélfel a apasa: “Iteiten fansoun üa mefi pwe ewe Samol mi Lapalap a nom rei. Pokiten i a arap ngeniei, üsap tongeni mwökütüküt.” (Kölfel 16:8; 63:8) Enlet, Jiowa a tongeni álisuk le manaweni ewe sókkun manaw mi apwapwaai i. Nge ka fen silei pwe a wor emén  chón oputa Kot, iwe i ese mochen óm kopwe féri ena.

6. Met Satan a erá usun aramas?

⁶ Sópwun 11 a áweweei ifa usun Satan ewe Tefil a ú ngeni án Kot pwúngún nemenem. Usun itá nge a erá pwe Kot a kapas chofona me ese pwúng án Kot ese mut ngeni Atam me Efa le pwisin apwúngaló met mi pwúng me mwáál. Iwe, mwirin án Atam me Efa ra tipis me atun mwirimwiriir kewe ra chómmóngóló wóón fénúfan, Satan a efisi tipemwaramwar usun ewe popun án aramas angang ngeni Kot. Usun itá nge a erá: ‘Aramas rese angang ngeni Kot pokiten ar tongei. Ua tufichin ásepa aramas meinisin seni Kot.’ A pwá pwe ina usun ekiekin Satan ren pwóróusen ewe mwán itan Hiop. Ié ena Hiop me ifa usun a kapachelong lón án Satan we ú ngeni Kot?

7, 8. (a) Met a asokkaaló Hiop seni pilóón kewe? (b) Ifa usun Satan a efisi tipemwaramwar usun ewe popun Hiop a angang ngeni Kot?

⁷ Hiop a manaw ina epwe 3,600 ier lóóm. I emén mi múrinné, pún iei alon Jiowa: “Esap wor eman aramas won fanüfan mi wewe ngeni, a pwüng o wenechar, a niuokusitiei o kul seni föför mi ngau.” (Hiop 1:8) Kot a pwapwaiti Hiop.

⁸ Satan a efisi tipemwaramwar usun ewe popun Hiop a angang ngeni Kot. Iei alon ewe Tefil ngeni Jiowa: “Ifa usun, kosap tiela inisin me chon leimwan, pwal meinisin mine a eäni seni feiengau? Ka afeiöchü angangen pöün pwe nöün pwiin sip  me kow ra chomongola won ewe fanü. Nge kopwe aitiela poum o atapa meinisin mine a eäni, mürin epwe fokun amamäsinuk.”​—Hiop 1:10, 11.

9. Met Jiowa a féri pwe epwe pélúweni án Satan kapasen ú ngeni, iwe met popun?

⁹ Satan a ánicho pwe Hiop a chék angang ngeni Kot fán iten epwe angei feiéchún. A pwal apasa pwe ika Hiop epwe kúna sóssót, iwe epwe kul seni Kot. Iwe, met Jiowa a féri? Iwe, pokiten ewe osukosuk a weneiti ewe popun Hiop a angang ngeni, a mut ngeni Satan an epwe sótuni Hiop. Epwe ina usun epwe ffatoló ika Hiop a wesewesen tongei Kot are ese.

10. Ikkefa ekkewe sóssót a tori Hiop? Iwe nge, met a féri?

¹⁰ Satan a sótuni Hiop lón sókkopaten napanap. Áeúin, aramas ra solááni are nieló néún Hiop kewe man me lap ngeni néún kewe chón angang ra ninniiló. Iwe, Hiop a osupwang. A lapóló an riáfféú lupwen néún kewe engol ra máló lón eú mélúmél. Iwe nge, inaamwo ika a fis ekkena mettóch mi fókkun ngaw nge “i esap tipis, esap pwal etipisi Kot ren an amwäli mine a föri.”​—Hiop 1:22.

11. (a) Ifa án Satan oruuen tipimwáál ngeni Hiop? Met Jiowa a féri? (b) Met Hiop a féri atun a úri semmwen mi fókkun metek?

¹¹ Satan ese fangetá. Eli a ekieki pwe inaamwo ika Hiop a likiitú lupwen a péút seni pisekin kewe, néún kewe chón angang me néún kewe nge epwe sápe seni Kot ika pwisin i epwe semmwen. Iwe, Jiowa a mut ngeni Satan an epwe esemweni Hiop ren och semmwen mi annou me fókkun metek.  Ena mettóch ese atai án Hiop lúkú Kot. Nge a fen erá: “Tori ai máló, usap fangetá ai tuppwél.”​—Hiop 27:5, NW.

12. Ifa usun Hiop a ánneta pwe a chofona án ewe Tefil tipimwáál?

¹² Hiop ese silei pwe Satan a wisen efisi an kewe riáfféú. Pokiten ese silei tichikin án Tefil ú ngeni án Jiowa pwúngún nemenem, iwe a lólilen ika Kot a efisi an kewe riáfféú. (Hiop 6:4; 16:11-14) Iwe nge, Hiop a chúen amwéchú pwúngún enletin an tuppwél ngeni Jiowa. Iwe, a ánneta pwe mi chofona alon Satan pwe Hiop a chék angang ngeni Kot fán iten epwe angei feiéch seni!

13. Án Hiop tuppwél ngeni Kot a awora met?

¹³ Án Hiop tuppwél a awora ngeni Jiowa pélúwen án Satan kapasen esiit. Hiop, i wesewesen chiechien Jiowa. Iwe, a liiwini ngeni an tuppwél.​—Hiop 42:12-17.

14, 15. Pwata án Satan kapasen esiita Hiop a pwal weneiti aramas meinisin?

¹⁴ Án Satan efisi tipemwaramwar usun pwúngún enletin án aramas tuppwél ngeni Kot ese chék weneiti Hiop nge a pwal weneituk. A ffat ena lón Än Salomon Fos 27:11, pwe iei alon Jiowa: “Nei, kopwe tipachem o apwapwai lelukei, pwe üpwe tongeni pälüeni ätewe mi aitengauaei.” Ena pwóróus a mak fitepúkú ier mwirin málóón Hiop, iwe a affata pwe Satan a chúen esiita Kot me néún kewe chón angang. Lupwen sia manaweni ewe manaw mi fich ngeni Kot, sia pélúweni án Satan kewe tipimwáál,  iwe a ina usun sipwe apwapwaai letipen Jiowa. Met meefiom usun ena? Kese pwapwa le pélúweni án Satan kewe tipimwáál inaamwo ika a wewe ngeni óm kopwe féri ekkesiwil lón manawom?

¹⁵ Nengeni mwo pwe iei alon Satan: “Eman aramas epwe fangala meinisin mine a eäni fän iten manauan.” (Hiop 2:4) Ren án Satan apasa “eman aramas,” a ffat pwe an kapasen esiit ese chék weneiti Hiop pwe pwal aramas meinisin. Ina eú pwóróus mi fókkun lamot. Satan a efisatá tipemwaramwar usun pwúngún enletin óm tuppwél ngeni Kot. Lupwen epwe toruk fansoun weires, Satan a mochen kopwe álleasolapa Kot me úkútiw seni óm féfféri minne mi pwúng. Ifa usun Satan epwe tongeni sótunuk?

16. (a) Ifa usun Satan a okullu aramas seni Kot? (b) Ifa usun ewe Tefil a tongeni ákkáeá ekkena mettóch le sótunuk?

¹⁶ Sia fen káé lón Sópwun 10 pwe Satan a áeá sókkopaten mettóch ren an epwe okullu aramas seni Kot. Fán ekkóch, a usun chék “eman laion mi wörüwör, nge a kütta iö epwe oromala.” (1 Petrus 5:8) Ina minne, a tongeni etipetipa chienom kewe, márárum kewe are ié kaan ar repwe sótun pinei óm kákkáé Paipel me apwénúetá minne ka káé. * (Johannes 15:19, 20) Iwe nge, fán ekkóch, Satan a “püsin siwili lapalapan usun itä nge i eman chon  längin saram.” (2 Korint 11:14) Ewe Tefil a tongeni áeá mettóch mi orukoruk pwe epwe otupuk me erikuk seni óm manaweni ewe manaw mi apwapwaai Kot. A pwal tongeni áeá letipengaw eli ren an ámmeef ngonuk pwe kese tufichin apwapwaai Kot. (Än Salomon Fos 24:10) Ese lifilifil ika Satan a usun “eman laion mi wörüwör” are “eman chon längin saram,” nge a chék iei usun an esiit, a apasa pwe kopwe úkútiw le angang ngeni Kot ika a toruk sóssót are weires. Ifa usun kopwe pélúweni an esiitok me ánneta pwúngún enletin óm tuppwél ngeni Kot usun chék Hiop?

17. Ifa populapen ach sipwe álleasochisi án Jiowa kewe allúk?

¹⁷ Ka tongeni pélúweni án Satan kapasen esiit ren óm manaweni ewe sókkun manaw mi apwapwaai Kot. Met weween ena? Iei alon Paipel: “Kopwe echeni ewe Samol mi Lapalap om Kot ren unusen lelukom, ren unusen ngünum, pwal ren unusen tufichum.” (Tuteronomi 6:5) Atun epwe lapóló óm tongei Kot epwe pwal lapóló óm mochen apwénúetá wisom ngeni. Ewe aposel Johannes a makkeei pwe “wewen ach echeni Kot pwe sia aleasochisi an kewe allük.” Iwe, “an kewe allük resap weires” ngonuk ika ka tongei Jiowa ren unusen letipom.​—1 Johannes 5:3.

18, 19. (a) Ikkefa ekkóch án Jiowa kewe allúk? (Nengeni ewe pwóór itelapan, “ Oput Minne Jiowa A Oput.”) (b) Pwata sia silei pwe minne Kot a allúk ngenikich esap lap seni ach tufich?

¹⁸ Ikkefa án Jiowa kewe allúk? Ekkóch leir ra áiti ngenikich met sisap fókkun féri. Áwewe chék,  nengeni mwo ewe pwóór itelapan, “ Oput Minne Jiowa A Oput.” Me ikena ie, a makketiw ekkóch féffér mi fókkun ngaw me ren ewe Paipel. Atun ka kerán álleaniir, usun itá nge ekkóch me leir rese kon lien ngaw. Nge mwirin óm ekilonei ekkena wokisin seni Paipel, neman kopwe kúna tipachemen án Jiowa kewe allúk. Eli epwe fókkun weires óm kopwe siwili féfférum. Iwe nge, óm manaweni ewe sókkun manaw mi apwapwaai Kot epwe atoto watteen  kinamwe me pwapwa. (Aisea 48:17, 18) Pwata sia silei pwe ka tufichin manaweni ena sókkun manaw?

¹⁹ Jiowa esap allúk ngenikich met mi lap seni ach tufich. (Álleani Tuteronomi 30:11-14.) A silei aúkúkún ach tufich lap senikich. (Kölfel 103:14) Jiowa epwe pwal ngenikich péchékkúl pwe sipwe tufichin álleasochisi i. Iei makkeien ewe aposel Paulus: “Kot a apwönüetä an pwon o esap mwütätä ngenikemi  pwe oupwe tolong lon sokun sosot mi lap seni ämi tufich. Nge lupwen oupwe tolong lon sosot, i epwe föri efoch alen towu, pwe oupwe tongeni pwora ngeni.” (1 Korint 10:13) Jiowa a pwal tongeni awora “tufich mi somwola” pwe epwe elikiitúkich. (2 Korint 4:7) Iei alon Paulus mwirin an likiitú fán chómmóng sóssót: “Ngang mi tufich ren mettoch meinisin lon ewe emon mi apochokkulaei.”​—Filipi 4:13, TF.

20. Met sókkun napanap mi éch kopwe achocho le ámááraatá, iwe pwata ra lamot?

²⁰ Ika ka mochen apwapwaai Jiowa, ese naf óm kopwe chék sú seni ekkewe mettóch a oput. Kopwe pwal tongei minne a tongei. (Rom 12:9) Kese efich chókkewe mi léllé ekiekimi, minne oua sani me aúcheani? A pwal ina usun Jiowa. Ina minne, kopwe achocho le tongei minne Jiowa a tongei. Kölfel 15 a áweweei met sókkun aramas Kot a chiechi ngeni. (Álleani Kölfel 15:1-5.) Ra mut ngeni án Kot manaman mi fel an epwe álisiir le ámááraatá napanap mi éch, usun choweán tong, “pwapwa, kinamwe, mosonotam, kirikiröch, aramasöch, allükülük, tipetekison” me nemeni mocheniir.​—Kalatia 5:22, 23.

21. Met epwe álisuk le ámááraatá ekkewe napanap mi apwapwaai Kot?

²¹ Óm ákkállea me kákkáé Paipel epwe álisuk le ámááraatá napanap mi éch mi apwapwaai Kot. Iwe, óm káé met Kot a mochen kopwe féri epwe álisuk  le eáni ekiekin Kot. (Aisea 30:20, 21) Lapólóón óm apéchékkúla óm tongei Jiowa pwal ina lapólóón óm mochen manaweni ewe manaw mi apwapwaai i.

22. Met mwirilóón óm manaweni ewe sókkun manaw mi apwapwaai Kot?

²² Ach manaweni ewe manaw mi apwapwaai Jiowa a alóngólóng wóón ach achocho. Ewe Paipel a aléllééi óm ekkesiwili manawom ngeni óm pwilitawu napanapom me lóóm me aúféúfa ngonuk manaw mi fé. (Kolose 3:9, 10) Ewe soumakken kélfel a erá, álleasochisin án Jiowa kewe allúk, ‘angei liwin mi lapalap.’ (Kölfel 19:11) Pwal en kopwe kúna liiwin mi lapalap lón óm manaweni eú manaw mi apwapwaai Kot. Ren óm féri ena, kopwe pélúweni án Satan kapasen esiit me apwapwaai letipen Jiowa!