Isetiw met ka mochen achocho ngeni. Ppii ika met angangen óm we afalafal, epwe wisen esilei och pwóróus, alúkúlúkú och mettóch, are amwékútú letipen ekkewe chón aúseling? Iwe, anapanapa óm afalafal pwe epwe pwénútá ena. Túmúnú pwe meinisin ekkewe menlapen pwóróus epwe álisuk le tikeri met ka mochen achocho ngeni.

Menlapei itelapen óm afalafal. Lón óm eáni óm afalafal, kapas usun ewe itelap ren óm ekkenniwili ekkewe menlapen kapas lón are néúnéú ekkewe kapas mi pwal léllé ngeni weween.

Affataéchú me ámecheresi ekkewe menlapen pwóróus. Filatá ekkewe chék menlapen pwóróus mi riri ngeni óm we itelap me fili menni ekkewe menlapen pwóróus kopwe tongeni áweweéchú lón ewe úkúkún kulók mi kefililó. Aúkúkú fitu menlapen pwóróus kopwe áeá, affataéchú eú me eú leir, ekis kaúló lefiler, me emmweniéchú eú menlapen pwóróus ngeni pwal eú.