A C D E F I J K L M N O P R S T U W

A

• Áier.

  Lón Paipel, áier a wewe ngeni án emén ekkesiwili ekiekin, fengen me an enletin niamam ren met a féri lón manawan me lóóm, an féffér mi ngaw, are ese féri met a lamot epwe féri. Án emén unusen siwili féfférún, ina esissillen an enletin áier.—Mt 3:8; Féf 3:19; 2Pi 3:9.

• Akaia.

  Lón ewe Tesin Krik, ina iten ewe kinikin lón Kris me éér mwúún Rom a nemeni, nge ewe iolap lón, ina Korint.—Féf 18:12.

• Al.

  Ewe Paipel a néúnéú ei kapas pwe epwe áweweei eú féffér are napanap Jiowa a etiwa are ese etiwa. Lón ewe Paipel, chókkewe mi tapweló mwirin Jises Kraist, ra chóni “Ewe Al,” weween ewe napanapen manaw ra eáni a lóngólóng wóón ar lúkú Jises Kraist me áppirú i.—Féf 19:9.

• Alapaster.

  Iten eú kúkkún rumeen lémmis mi ffér seni eféú faw mi pwá arapakkan ngeni Alabastron, lón Isip. Ekkena esin rume, a kan éúkúkkún arap ngeni leawan pwe epwe tongeni núk éppwélún pwe esap nichiló ena lémmis mi fókkun aúchea.—Mr 14:3, ftn.

• Alen Salomon.

  Lón ewe imwenfel lón fansoun Jises we, ina eú leenien fetál mi wor imwan mi nóm lón kiánin ewe imwenfel me éétiw, chómmóng ra lúkú pwe ina kinikinin ewe imwenfel Salomon a féri. Jises a fetál lón ena kinikin “lón fansoun affééú,” me ina ewe leeni ekkewe Chón Kraist lóóm ra kochufengen lón pwe repwe féri ar fel ie.—Jo 10:22, 23; Féf 5:12.

• Alfa me Omeka.

  Iten ewe áeúin mesen mak me ewe sáingoon mesen mak lón kapasen Krik. Ra pwá fán úlúngát lón ewe puken Pwáraatá fán iten eú itelapen Kot. Lón ekkena epwipwiin wokisin, weween Alfa me Omeka ra léllé ngeni “ewe akkomwan me ewe amuchúlóón” me “ewe poputáán me ewe sópwólóón.”—Pwá 1:8; 21:6; 22:13.

• Allúk.

  Iká ei kapas a mesemmóng, a kan weneiti ewe Allúkún Moses are ekkewe nimu puk akkomw lón Paipel. Nge iká a mesekúkkún, eli epwe weneiti eú allúk lón ewe Allúkún Moses are eú kapasen emmwen mi lóngólóng wóón allúk.—Num 15:16; Tut 4:8; Mt 7:12; Kal 3:24.

• Allúkún Moses.

  Ina ewe Allúk Jiowa a néúnéú Moses le atoura ngeni ekkewe chón Israel lón ewe fénúpéén lón Sinai lón ewe ier 1513 mwen Kraist. Ekkewe nimu puk akkomw lón ewe Paipel, lape ngeni ra kan iteni ewe Allúk.—Mt 5:17; Lk 24:44.

• Amen.

  “Epwe ina ussun,” are “fókkun ina.” Ei kapas a pop seni ewe popun kapas lón fósun Ipru ʼa·manʹ, mi wewe ngeni “an epwe túppwél, alúkúlúk.” Ach apasa “amen” a affata ach tipeeú ngeni eú ékképél, iótek, are pwóróus. Puken Pwáraatá, a néúnéú ena kapas fán iten eú itelapen Jises.—Tut 27:26; 1Kr 16:36; Ro 1:25; Pwá 3:14.

• Ammólnatá.

  Iten ewe rán me mwen ewe Sapat, ewe atun ekkewe chón Jus ra ammólnatá ekkewe mettóch mi lamot fán iten ewe Sapat. A muchúló ena rán atun a tuputiw ewe akkar, ewe iei a iteni Enimu, iwe ewe Sapat a poputá. Án ekkewe chón Jus álleaan rán a poputá seni lepwin ngeni lepwin.—Mr 15:42; Lk 23:54.

• Án chón Jus we mwichen soukapwúng mi tekia.

  Lón fansoun Jises we, chóchóór 71, kapachelong ewe souasor mi lapalap me ekkewe pwal ekkóch mi piin wiseni ewe wis souasor mi lapalap, chón ar kewe famili, ekkewe néúwisin Jus, meilapen einang me mékúren famili, me ekkewe soumak.—Mr 15:1; Féf 5:34; 23:1, 6.

• Angang ngeni Kot.

  Angang mi pin, mi weneiti án emén fel ngeni Kot.—Ro 12:1; Pwá 7:15.

•  Angangen roong.

  Lón ewe Paipel ei itiitin kapas angangen roong, a weneiti chómmóng angang mi fis ren álillisin ekkewe timon. A pwal weneiti ewe lúkú pwe ngúnún ekkewe mi máló ra manaw mwirin málóón ewe inis me ra tongeni fós ngeni ekkewe mi manaw ren álillisin emén mi nóm fán nemenien ekkewe timon. Lón kapasen Krik, ina ewe kapas phar·ma·kiʹa, wesewesen weween áeáán sáfei are drugs. Ei itiitin kapas a riri ngeni angangen roong, pún me lóóm aramas ra áeá drugs atun ar fóffós ngeni ekkewe timon pwe repwe tingor manaman seniir.—Kal 5:20; Pwá 21:8.

• Angolossá.

  Seni ewe fósun Krik a·selʹgei·a, mi weneiti ekkewe féffér mi chou mi atai án Kot kewe allúk me pwáári eú napanap emén a féri ese meefi ássáwan. A ésúfélúngawa are pwal mwo nge turunufasa nemenem me allúk. Ena kapas ese weneiti ekkewe esin féffér mi mwáál ese kon chou.—Kal 5:19; 2Pi 2:7.

• Anúmamaw.

  Eú kapasen enniw are eú kapas mi ngaw emén a apasa ngeni emén are och mettóch. Iká Kot are emén mi wor an nemenem me ren Kot a apasa eú kapasen anúmamaw, ina eú oesini ren met epwe wesewesen fis.—Ken 12:3; Num 22:12; Mr 11:21; Ro 12:14; Kal 3:10.

• Apis.

  Ei kapas a feito seni ei kapasen Ipru aʹbys·sos, weween “fókkun alóllóól” are “sise tufichin aúkú alóllóólun, ese wor epin.” Lón ewe Tesin Krik, a weneiti nónnómun are leeni emén a mwéchúló ie. A tongeni weneiti peiás me pwal ekkóch mettóch.—Lk 8:31; Ro 10:7; Pwá 20:3.

• Aposel.

  Lón ewe Paipel, ei kapas a wewe ngeni “emén mi tiitiiló,” me a néúnéú fán iten Jises me chókkewe mi tiitiiló ar repwe angang fán iten ekkewe ekkóch. Fán chómmóng, a weneiti ekkewe 12 chón káé Jises a pwisin filiretá ar repwe tupuni i.—Mr 3:14; Féf 14:14.

• Appach mi pwokkus.

  Och mettóch mi nofit appach mi pwoéch me ekis me ekis a kan kareló, me étúétún a pwoéch. Ewe appach mi pwokkus mi wor rúáánú nofitin, ina ewe ra áeá lón ewe imwenfel mangaku me lón ewe imwenfel. A kan kek iteiten lesossor me lepwin wóón ewe róngen asoren étúét lón ewe Leeni mi Pin, nge lón ewe Ránin Asoren Omusomusen Tipis a kek me lón ewe Leeni mi Unusen Pin. Ena, a liosuetá ekkewe iótek mi ketiw me ren Kot, án néún kewe chón angang mi túppwél. Ese wor allúk fán iten Chón Kraist ar repwe áeá appach mi pwokkus.—Eks 30:34, 35; Lif 16:13; Pwá 5:8.

• Aramaik.

  Eú fós mi arap ngeni fósun Ipru, mi chék léllé ekkewe mesen mak ra néúnéú. Ekkewe aramasen Siria iir ra kan eáni ena fós, nge mwirin a wiliiti eú fós chómmóng fénú ra kan áeá fán iten pekin business me lón ar pwóppwóróusfengen fán nemenemen Asiria me Papilon. Pwal ina ewe fós néúwisin ewe mwúún Persia ra eáni lón ar angang. (Esr 4:7) Ekkóch kinikinin ekkewe puken Esra, Jeremaia, me Taniel ra mak lón fósun Aramaik. A wor ekkóch fósun Aramaik ewe Tesin Krik a néúnéú.—Esr 4:8–6:18; 7:12-26; Jer 10:11; Tan 2:4b–​7:28; Mr 14:36; Féf 9:36.

• Ariapakus.

  Eú ppan lón Aten, notouááfengin ewe Akropolis. Pwal ina iten ewe mwichen soukapwúng mi kan mwichfengen ikena. Ekkewe Stoik me Epikurean iir souáák, ra uwealó Paul lón ewe Ariapakus pwe epwe áweweei an lúkú.—Féf 17:19.

• Armaketon.

  A feito seni ewe kapasen Ipru Har Meghid·dohnʹ, weween “Chukun Mekito.” Ena kapas a riri ngeni “ewe rán mi lap án ewe Kot mi Unusen Manaman” ikewe “ekkewe kingen unusen fénúfan” repwe kochufengen ie pwe repwe maun ngeni Jiowa. (Pwá 16:14, 16; 19:11-21)—Ppii RIÁFFÉÚ MI LAPALAP.

• Asor.

  Eú asor ngeni Kot emén a eáni pwe epwe pwáári an kilisou, mengiringir, me an epwe ririéchsefál ngeni Kot. Poputá seni Epel, aramas ra pwisin filaatá ar repwe eáni sókkopaten asor, kapachelong ekkewe man, tori án ewe Allúkún Moses a awora allúk ar repwe eáni asor. Asor man ese chúen lamot mwirin án Jises fangoló pwisin manawan pwe eú asor mi unuséch. Inaamwo iká ina, nge ekkewe Chón Kraist ra sópweeló le asor ngeni Kot lón pekin ngún.—Ken 4:4; Ip 13:15, 16; 1Jo 4:10.

•  Asoren kek.

  Emén man a kek wóón róngen asor pwe eú asor ngeni Kot. Esap wor och kinikinin ewe man (átemwánnin kou, átemwánnin siip, átemwánnin siike, lisom, are appansúsún lisom) ekkewe chón fel repwe angei.—Eks 29:18; Lif 6:9; Mr 12:33; Ip 10:6.

• Asoren tipis.

  Eú asor fán iten eú tipis emén a féri pokiten an ese unuséch nge esap seni turun tipan. A tongeni eáni sókkopaten ménún asor, seni kou tori lisom me pwal ekkóch, alóngólóng wóón nónnómun ena emén mi féri ewe tipis.—Lif 4:27, 29; Ip 10:8.

• Asoren ún.

  Eú asor wain mi niniitá wóón ewe róngen asor me ewe souasor a asoratá fitifengen me ekkewe pwal ekkóch sókkun asor. Paul a néúnéú ei kapas asoren ún le áweweei an tipemecheres le pennúkúóló manawan fán iten chienan kewe Chón Kraist.—Num 15:5, 7; Fp 2:17.

• Aútúlap ngeni aútúkis.

  Eú kaúk mi léllé ngeni towauen ewe aútúlap ngeni aútúkis atun a meresiló eú paw. Pokiten ei minen aúkúk a wewe ngeni esopw sengen paw, nge eú sengen paw a kan 17.5 in. (44.5 cm) ttaman, iwe, ei minen aúkúk epwe 8.75 in. (22.2 cm) ttaman.—Eks 28:16; 1Sa 17:4.

C

• Chienen Erot.

  Ina eú pekin politics mi álisaatá met ekkewe Erot ra ekiekin achocho ngeni lón ar nemenem fán ewe mwúún Rom. Ese mwáál, ekkóch ekkewe Satusi ra pwal chóni ena pekin. Chienen Erot kana ra fiti ekkewe Farisi le ú ngeni Jises.—Mr 3:6.

• Chónálillisin mwichefel.

  Eú weween ei kapasen Krik di·aʹko·nos, ewe a kan afféú ngeni “chón angang” are “chón álillis.” “Chónálillisin mwichefel” a weneiti emén mi álisi ewe kúmiin mwán mi ásimaw lón ewe mwichefel. Mi lamot emén epwe eáni ekkewe napanap Paipel a apasa pwe epwe fichiiti ena wis.—1Ti 3:8-10, 12.

• Chónemmwen.

  Emén mi kewis ngeni an epwe mmasa me túmúnú mwichefel, ina ewe ákkáeúin wis epwe féri. Weween ei kapasen Krik e·piʹsko·pos, ina án emén túmúnú me emmweni aramas. Ekkeei kapas “chónemmwen” me “mwán mi ásimaw” (pre·sbyʹte·ros) ra weneiti eú chék wis lón ewe mwichefelin Chón Kraist. Ren ewe kapas “mwán mi ásimaw,” a menlapei ásimawún napanapen ewe emén mi wiseni ewe wis, nge “chónemmwen” a menlapei ekkewe angang ewe emén a kewis ngeni a eáni.—Féf 20:28; 1Ti 3:2-7; 1Pi 5:2.

• Chónláng.

  A pop seni ei kapasen Ipru mal·ʼakhʹ me ewe kapasen Krik agʹge·los. Wesewesen weween ekkena ruu kapas, a wewe ngeni “chón kúné,” nge ra afféú ngeni “chónláng” atun ra fós ussun ekkewe chón kúné iir ngún. (Ken 16:7; 32:3; Jem 2:25; Pwá 22:8) Ekkewe chónláng ra fókkun péchékkúl. Kot a fériiretá seni lóóm lóóm me mwen fférútáán aramas. Ewe Paipel a pwal eita ngeniir “engol ngeröün chon pin,” me “fün lesosor.” (Tut 33:2; Jop 38:7) Kot ese fériiretá fitifengen me ewe tufich ar repwe oupwatiw chónláng, nge a féraatá emén me emén iir. Chóchóór lap seni fitepúkú million. (Tan 7:10) Ewe Paipel a erá pwe a wor iter me a wor en me pwisin napanapan, iwe nge ra tipetekison ren ar rese etiwa án emén epwe fel ngeniir, me chómmóng me leir rese pwal mwo nge mochen pwáári iter. (Ken 32:29; Lk 1:26; Pwá 22:8, 9) A wor tettelin en me wisan me ra kewis ngeni sókkopaten angang, kapachelong ar angang mwen án Jiowa we leenien móótun king, esilefeili an pwóróus, angang fán ásengesin néún Jiowa kewe chón angang wóón fénúfan, féri án Kot angangen kapwúng, me álisaatá ewe angangen afalafala ewe kapas allim. (2Ki 19:35; Kf 34:7; Mt 4:11; Lk 1:30, 31; Pwá 5:11; 14:6) Lón mwachkkan repwe álisi Jises le maun lón ewe maunen Armaketon.—Pwá 19:14, 15.

• Chón affér.

  Emén mi wisen affér lefilen ruu pekin pwe epwe áchásefáliir. Lón Paipel, Moses i chón affér fán iten ewe pwonen etipeeú mi lóngólóng wóón ewe Allúk, nge Jises i chón affér fán iten ewe pwonen etipeeú mi fé.—Kal 3:19; 1Ti 2:5; Ip 12:24.

•  Chón ffér sepi pwúl.

  Ewe kapasen Ipru fán iten chón ffér sepi pwúl, a wesewesen wewe ngeni “chón anapanap.” Án ewe chón ffér sepi pwúl nemenem wóón ewe pwúl, a áweweei ussun án Jiowa pwúúng le nemenem wóón aramas.—Ais 64:8; Ro 9:21.

• Chón Kaltia.

  Ekkewe aramas mi nónnóm lefilen ewe chénúpupu Tikris me ewe chénúpupu Iufretis. Me lóóm, ewe telinimw mi fókkun aúchea lón fénúen chón Kaltia, ina ewe telinimw Ur, wesetáán leenien Eperiam we.—Féf 7:4.

• Chón Kraist.

  Eú it Kot a eita ngeni chókkewe mi tapweló mwirin Jises Kraist.—Féf 11:26; 26:28.

• Chón Jus.

  Eú it Paipel a néúnéú fán iten emén mi feito seni einangen Juta mwirin kkufulóón ekkewe engol einangen mwúún Israel. (2Ki 16:6) Mwirin án chón Israel ooló lón Papilon, Paipel a néúnéú ei kapas fán iten ekkewe chón Israel seni ekkewe sókkopaten einang mi liwiniti Israel. (Esr 4:12) Ló, ló, ló, wóón unusen fénúfan chón Israel ra iteni chón Jus pwe epwe asókkereló seni chón ekkewe pwal ekkóch mwú. (Est 3:6) Ewe aposel Paul a pwal néúnéú ena it atun a áweweei pwe lón ewe mwichefelin Chón Kraist ese lamot menni fénú emén a feito seni.—Ro 2:28, 29; Kal 3:28.

• Chón Metia.

  Iir mwirimwirin néún Jafet we itan Matai; ra nónnóm lón fénúen ekkewe chón Iran mi panapanetá, ewe a wiliiti fénúen chón Metia. Ekkewe chón Metia ra nóm Jerusalem lón ewe ránin Pentikos lón ewe ier 33.—Féf 2:9.

• Chón mmas.

  Emén mi mammasa ekkewe aramas me mettóchur, lape ngeni lepwin. Eménna a tongeni awora esilesil iká epwe wor feiengaw. Lape ngeni ekkewe chón mmas ra nóm wóón ttitin ewe telinimw me lón ekkewe leenien chón mmas pwe repwe kúna chókkewe mi pweppwereto me mwen repwe tori ewe telinimw. A wor ekkewe chón mmas lein ekkewe soufiu.—Mt 27:65; 28:4.

• Chón Nasaret.

  Eú it fán iten Jises, pún i a feito seni ewe leeni Nasaret. Eli a riri ngeni ewe kapasen Ipru Aisea 11:1 a néúnéú fán iten “fasar.” Ló, ló, ló, néún Jises kewe chón káé ra pwal iteni.—Mt 2:23; Féf 24:5.

• Chón Sameria.

  Akkomw, a weneiti ekkewe engol einangen mwúún Israel mi nóm ennefen, nge mwirin án ekkewe chón Asiria okkufu Sameria lón ewe ier 740 mwen Kraist, a pwal kapachelong ekkewe chón ekis chón Asiria ra uweiirelong lón Sameria. Lón fansoun Jises we, lap ngeni ena kapas chón Sameria, a weneiti chókkewe mi fiti ewe lamalam mi nóm lón kinikinin Sikem me Sameria lóóm. Chón ena lamalam ra eáni och sókkun lúkú mi fókkun sókko seni án ewe lamalamen Jus.—Jo 8:48.

• Chón ú ngeni Kraist.

  Lón ewe Paipel, a wewe ngeni chókkewe mi ú ngeni Kraist. A pwal tongeni wewe ngeni emén Kraist chofona, emén mi erá pwe i Kraist. Meinisin aramas, mwicheich, are kúmiin aramas mi erá pwe ra tupuni Kraist are erá pwe iir ewe Messaia are ú ngeni ewe Messaia me néún kewe chón káé, ra tongeni iteni chón ú ngeni Kraist.—1Jo 2:22.

• Chulapen Áchechchem.

  Eú rán mi fiffis iteiten ier pwe áchechchemen elimelimen ewe imwenfel mwirin an we limengawoló ren Antiochus Epiphanes. Ena áchechchem a poputá lón Kislef 25, me a fis lón úkúúkún wanú rán.—Jo 10:22.

• Chulapen Likachoch.

  A pwal iteni Chulapen Imw Mangaku, are Chulapen Ioifengen. A fis lón ewe maram me ren chón Ipru itan Etanim 15-21. Ina apwapwaan angangen ráás lemuchúlóón ewe sáingoon ierin fót án chón Israel me eú fansoun apwapwa me kilisou ren án Jiowa efeiéchú ar kewe atake. Lón ránin ena chulap, ekkewe aramas ra kan nóm lón ekkewe likachoch, are imwenpwúl, pwe epwe áchchema ngeniir ar towu seni Isip. Ina eú me lein ekkewe úlúngát chulap mi lamot án ekkewe mwán repwe ló ngeni Jerusalem pwe repwe fiti apwapwaan.—Lif 23:34; Esr 3:4; Jo 7:2.

• Chulapen Pilawa Ese Lefen.

  Ewe áeúin chulap me lein án chón Israel kewe úlúngát watteen chulap mi fiffis iteiten ier.  A poputá lón Nisan 15, ewe rán mwirin ewe Pasofer, me a sópwósópwoló lón úkúúkún fisu rán. Ekkewe aramas repwe chék mwéngé ewe pilawa ese lefen pwe áchechchemen ar we towu seni Isip.—Eks 23:15; Mr 14:1.

D

• Denarius.

  Eféú néún chón Rom féún moni silifer úkúúkún choun ina epwe 0.136 oz (3.85 g) me a wor liosun Sisar wóón epek. Iei peioffun emén chón angang lón eú rán me ina úkúúkún méén “takisesin pépéén mékúr” ekkewe chón Rom ra angei seni ekkewe chón Jus.—Mt 22:17; Lk 20:24.

• Drachma.

  Lón ewe Tesin Krik, ei kapas a weneiti eféú néún chón Krik féún moni silifer, lón ena atun úkúúkún choun 0.120 oz (3.4 g).—Mt 17:24.

E

• Echikefel.

  Emén esap fókkun áni och mwéngé ren úkúúkún och fansoun. Ekkewe chón Israel ra kan echikefel lón ewe Ránin Omusomusen Tipis, atun fansoun weires, me atun a lamot ngeniir án Kot kapasen emmwen. Ekkewe chón Jus ra apwúngaló rúáánú fansoun echikefel epwe fis iteiten ier pwe epwe áchchema ngeniir ekkewe fansoun lón uruwoon manawer iir mi nóm lón weires. Ese wor allúk mi kawor ngeni Chón Kraist ar repwe echikefel.—Esr 8:21; Ais 58:6; Mt 4:2; 9:14; Lk 18:12; Féf 13:2, 3; 27:9.

• Eisia.

  Lón ewe Tesin Krik, ina iten eú kinikinin fénú Rom a nemeni. A nóm notou lón kinikinin ewe leeni itan Turkey lón ei fansoun, me a pwal kapachelong ekkóch ekkewe kúkkún fénú únúkkún, áwewe chék ren Samos me Patmos. Nge ewe iolap lón, ina Efisus.—Féf 20:16; Pwá 1:4.

• Eitis.

  Eú kapasen Krik mi wewe ngeni ewe kapasen Ipru “Sheol.” A afféú ngeni “Peiás” (mesemmóng), pwe epwe affata pwe ina ewe leenien peiás fán iten aramas.—Ppii PEIÁS.

• Ékképél.

  Eú pwóróus emén a ékképélú pwe minen pwáraatá pwe mi enlet eú mettóch, are eú pwon emén a eáni pwe epwe féri och mettóch are esap féri. Lape ngeni, ékképél ina eú pwon emén a eáni ngeni emén mi tekia, ákkáeúin ngeni Kot. Jiowa a apéchékkúla an pwonen etipeeú ngeni Eperiam ren an ékképél ngeni.—Ken 14:22; Ip 6:16, 17.

• Emén mi ngaw.

  Eú itelap fán iten Setan ewe Tefil, ewe mi ú ngeni Kot me an kewe allúk mi pwúng.—Mt 6:13; 1Jo 5:19.

• Epikurean.

  Chón tapweló mwirin ewe chón Krik souáák itan Epikurus (341-270 B.C.E.). Ra lúkú pwe ewe mettóch mi kon aúchea seni meinisin, ina án emén epwe pwapwa lón manawan.—Féf 17:18.

• Éppwél.

  Éppwélún ewe pwórófel, ia ewe souasor mi lapalap a aparasa ie chchaan ewe ménún asoren tipis lón ewe Ránin Omusomusen Tipis. Ewe kapasen Ipru, a feito seni ewe kapas mi wewe ngeni “éppwélú (tipis)” are “télúoló (tipis).” Ewe éppwél a ffér seni kolt me a wor rúúemén kerop wóón, emén epek pwal emén epek.—Eks 25:17-22; 1Kr 28:11; Ip 9:5.

• Ermes.

  Emén koten Krik, i néún Seus. Ekkewe aramas lón Listra ra mwáálliló le kér ngeni Paul Ermes, pún me rer Ermes i néún ekkewe kot sou kúné me ewe koten sipeéch le fós.—Féf 14:12.

• Erot.

  Iten eú familien king mi kefilitá me ren chón Rom mi nemenem wóón ekkewe chón Jus. Erot mi Lapalap a iteféúló ren an aúsefálietá ewe imwenfel lón Jerusalem me awora allúk án ekkewe semirit repwe ninniiló pwe epwe nieló Jises. (Mt 2:16; Lk 1:5) Erot Arkelaus me Erot Antipas, néún Erot mi Lapalap kewe, ra kewis ar repwe nemeni ekkóch kinikinin leeni mi nóm fán nemenien semer we. (Mt 2:22) Antipas i emén sounemenem, nge aramas ra kan soun kér ngeni “king.” I a nemenem atun ekkewe úlúngát esopw ierin án Kraist angangen afalafal me tori an a fis met a mak lón Féffér sópwun 12. (Mr 6:14-17; Lk 3:1, 19, 20; 13:31, 32; 23:6-15; Féf 4:27; 13:1) Mwirin ena, néún Kot we chónláng a nieló Erot Akripa I, néún néún Erot mi Lapalap we, mwirin an nemenem ren ekis chék fansoun. (Féf 12:1-6, 18-23) Néún we itan Erot Akripa II, a wisen nemenem me a nemenem tori ewe atun ekkewe chón Jus ra ú ngeni Rom.—Féf 23:35; 25:13, 22-27; 26:1, 2, 19-32.

•  Ese lefen.

  A weneiti ekkewe pilawa mi ffér nge ese nofit ngeni iis.—Tut 16:3; Mr 14:12; 1Ko 5:8.

F

• Fááfen Ach Samol.

  Eú wesewesen fansoun mwéngé mi wor pilawa me wain mi liosuetá inisin Kraist me chchaan. Ina áchechchemen án Jises máló. Pokiten iei met Paipel a allúkú ngeni ekkewe Chón Kraist ar repwe féri, ina popun a fich an epwe iteni “ewe Áchechchem.”—1Ko 11:20, 23-26.

• Farao.

  Eú itelap fán iten ekkewe king lón Isip. Nimmén farao a mak iter lón Paipel (Sisak, So, Tiraka, Neko, me Ofra), nge ekkewe ekkóch ese pwal affata iter, kapachelong ekkewe farao lón fansoun Eperiam, Moses, me Josef.—Eks 15:4; Ro 9:17.

• Farisi.

  Eú kúkkún kúmi mi iteféúló lón ewe lamalamen Jus lón fansoun ekkewe aposel. Esap iir seni ewe einangen souasor, nge ra fókkun fitipachei ewe Allúk pwal mwo nge lón ákkáekisin mettóch, me ra ataitapa aúchean ewe Allúk me ekkewe ééreni. (Mt 23:23) Rese mochen fiti kókkótun ekkewe chón Krik, me pokiten a watte ar silei ewe Allúk me ekkewe ééreni, iwe a watte ar nemenem wóón ekkewe aramas. (Mt 23:2-6) Ekkóch me leir ra pwal chóni án chón Jus we mwichen soukapwúng mi tekia. Lape ngeniir, ra ú ngeni Jises pokiten a sókkofesen met ra eáni ekiek ussun ewe allúkún Sapat, ekkewe ééreni, me an chiechi ngeni chón tipis me chón angei takises. Ekkóch leir ra wiliiti Chón Kraist, kapachelong Saul seni Tarsus.—Mt 9:11; 12:14; Mr 7:5; Lk 6:2; Féf 26:5.

• Féún lepwokuku.

  Eféú faw mi kannopolong lepwokukuun eú imw ikewe ruu etiip ra kochufengen me ie. A lamot ena pwe epwe péchékkúl kochufengeniir. Ewe iolapen féún lepwokuku, ina ewe féún lóngólóngun lepwokuku, ewe faw mi fókkun péchékkúl mi kefil fán iten ekkewe imw mi tekia me ekkewe ttitin telinimw. Paipel a néúnéú ena kapas lón kapas áwewe fán iten fférútáán fénúfan, me a fós ussun Jises pwe i ‘ewe féún lepwokukuun’ mwichefelin Chón Kraist, ewe mi ussun eú imw lón pekin ngún.—Ef 2:20; Hp 38:6.

• Fin lisowu.

  Emén mi féri féfférún lisowu ngeni emén esap pwúlúwan, ákkáeúin fán iten moni. (Ewe kapasen Krik fán iten “fin lisowu,” porʹne, a feito seni ewe popun kapas mi wewe ngeni “epwe amémé.”) Fán ekkóch, ewe Paipel a pwal fósun ekkewe mwán mi eáni ena esin angang. Fán ewe Allúkún Moses, emén mi eáni ena esin angang epwe angei kapwúng, me ewe moni emén a angei seni ena angang, ese ketiw an epwe eáni asor lón án Jiowa we imwenfel. A fókkun sókkóló ena seni met ekkewe chón fel ngeni kot chofona ra féfféri, pún a wor fin lisowu lón ar kewe imwenfel pwe epwe wor ar moni tolong. (Tut 23:17, 18; 1Ki 14:24) Ewe Paipel a pwal néúnéú ena kapas fin lisowu lón kapas áwewe, a tongeni weneiti aramas, mwú, are mwicheich mi apasa pwe iir chón fel ngeni Kot nge ra féri angangen fel ngeni uluulun. Áwewe chék, ewe puken Pwáraatá a néúnéú ewe kapas fin lisowu fán iten “Papilon mi Lapalap,” ewe mi weneiti ekkewe lamalam chofona, pún a lisowu ngeni ekkewe sounemenemen mwúún fénúfan fán iten an epwe angei manan me wéún.—Pwá 17:1-5; 18:3; 1Kr 5:25.

• Fúú rán.

  Ina ewe sáingoon fúú mi tétá me éétiw mwen epwe pwá akkar, esissillen an epwele poputá ewe mineféén rán.—Pwá 22:16; 2Pi 1:19.

I

• Iis.

  Eú minen nofit epwe nofit ngeni pilawa mi ámás pwe epwe pwootá, are och mettóch mi lélé ussun konik are juice pwe epwe wiliiti sakaw. Lón ewe Paipel, fán chómmóng a weneiti och kinikinin pilawa ámás mi fen piin éúwéú me pwootá ren iis, nge aramas ra isoni pwe repwe nofiti ngeni och mineféén pilawa pwe epwe pwal poputá le pwootá. Fán chómmóng, Paipel a néúnéú ena kapas pwe epwe liosuetá tipis me pworoingaw, a pwal néúnéú le esissillatá mámmáárin och mettóch ese pwá ngeni aramas.—Eks 12:20; Mt 13:33; Kal 5:9.

• Illirikum.

  Eú leeni notouááfengin Kris mi nóm fán nemenien Rom. Paul a tikeri Illirikum  atun a sái lón an angangen afalafal, nge ese affat iká mi wesewesen afalafal lón Illirikum are a chék tikeri kinikinin kiánin.—Ro 15:19.

• Imwenfel.

  Ewe imw watte lón Jerusalem mi siwili ewe imwenfel mangaku, ina iolapen án chón Israel leenien fel. Ewe áeúin imwenfel, ina ewe Salomon a féraatá me chón Papilon ra ataieló. Ewe oruuen imwenfel, ina ewe Serupapel a féraatá mwirin án chón Jus liwin seni ar ooló lón Papilon, nge mwirin Erot mi Lapalap a férsefáli. Fán ekkóch, a pwal iteni “imw.”—Mt 21:13; Lk 11:51; 1Kr 29:1; 2Kr 2:4; Mt 24:1.

• Ipru.

  Eú itelap Paipel a akkomw néúnéú fán iten Apram (Eperiam), pwe epwe asokkaaló i seni chón órun kewe iir chón Amor. Mwirin a pwal néúnéú fán iten mwirimwirin Eperiam kewe tori néún néún we itan Jekop me a pwal weneiti ewe fós ra eáni. Lón fansoun Jises we, a kapachelong lón fósun Ipru chómmóng mwuten kapasen Aramaik me ina ewe fós Kraist me néún kewe chón káé ra eáni.—Ken 14:13; Eks 5:3; Féf 26:14.

• Irá; Iráán ninni.

  Efóch asira emén chón féfféringaw a eitiwetá wóón. Lón ekkóch fénú ra kan áeá le nieló emén wóón are eitiwaatá emén somá pwe epwe eú minen éúréúr ngeni aramas, are ásáwa mwen mesen aramas. Ekkewe chón Asiria ra men iteféúló ren kirikiringawer lón maun. Atun ra liapeni emén ra eitiwa inisin, ra purelong efóch sópwun émwúch seni lón lukan pwerewu me fán mwárin. Nge lón án chón Jus allúk, chókkewe mi féri tipis mi chou, áwewe chék ren chókkewe mi turunufasa Kot are fel ngeni uluulun repwe akkomw mamman ngeni faw are pwal ekkóch mettóch tori ar repwe máló, mwirin repwe eitiweretá wóón efóch sópwun émwúch are efóch irá pwe eú minen éúréúr ngeni aramas. (Tut 21:22, 23; 2Sa 21:6, 9) Fán ekkóch, ekkewe chón Rom ra féétaatá emén wóón efóch irá, ina minne a tongeni manaw ren fitu rán me mwen an epwe máló ren an metek, kaka, echik, me ren pwichikkaren ewe akkar. Nge fán ekkóch, ussun met ra fér ngeni Jises, ra chúfélúetá péún me pechen wóón efóch irá. (Lk 24:20; Jo 19:14-16; 20:25; Féf 2:23, 36) Ei kapasen Krik stau·ros′ mi afféú ngeni iráán ninni, a wewe ngeni efóch irá are asira, ussun chék ewe Jises a ninniiló wóón. Ese wor pisekin pwáraatá pwe ei kapas stau·ros′ a wewe ngeni efóch irápenges, ewe ekkewe chón fel ngeni kot chofona ra áeá pwe esissillen ar we lamalam ren fite fitepúkú ier mwen Kraist. A nóm unusen weween ei kapas stau·ros′ lón weween ei kapas “iráán ninni,” me pwal mwo nge néúnéún ena kapas a affata ewe weires, riáfféú, me ássáw néún Jises kewe chón káé repwe kúna.—Mt 16:24; Ip 12:2.

• Iráán manaw.

  Efóch irá lón ewe tánipiin Ichen. Ewe Paipel ese apasa pwe féún ena irá epwe awora manaw, nge a fen liosuetá án Kot alúkúlúkú ewe manaw esemuch ngeni chókkewe i a mut ngeniir ar repwe ocheei féún ena irá. Lón ewe puken Pwáraatá, ena irá a liosuetá met Kot a awora pwe epwe sópwósópwoló manaw.—Ken 2:9; 3:22; Pwá 2:7; 22:19.

• Isop.

  Efóch irá mi éúkúúkún palan me chékúkkún chéén, aramas ra áeá le aparasa chcha are konik lón ewe fansoun a fis angangen elimelim. Lón Paipel, ekkewe kapasen Krik me Ipru fán iten isop neman a pwal kapachelong fitu sókkun irá. Nge ewe “isop” Jon 19:29 a kapas ussun, neman ina ewe esin isop mi ttam palan, ina minne a tongeni tikeri awen Jises ewe ammat mi kotu lón ewe wain mi mwóón.—Ip 9:19.

• Israel.

  Ewe it Kot a eita ngeni Jekop. Ló, ló, ló, a weneiti meinisin mwirimwirin kewe. Lape ngeni mwirimwirin néún Jekop kewe 12 át ra kan iteni, néún Israel, chón leimwen Israel, aramasen Israel, are chón Israel. Paipel a pwal néúnéún ena kapas Israel fán iten ekkewe engol einangen mwúún Israel mi nóm ennefen mi imu seni ewe mwúún Juta mi nóm éér, nge mwirin a néúnéún ena kapas fán iten ekkewe Chón Kraist mi kepit, “ewe Israelin Kot.”—Kal 6:16; Ken 32:28; Féf 4:10; Ro 9:6.

• Itiopia.

  Eú fénú lóóm mi nóm éérún Isip. Éérún Isip me Sudan lón ei fansoun ra  kapachelong lón kinikinin Itiopia lóóm.—Féf 8:27.

• Iufretis.

  Ewe chénúpupu mi fókkun ttam me aúchea lón notouéérún Eisia, me ina eú me lein ekkewe ruu chénúpupu mi watte lón Mesopotamia. Keneses 2:14 a akkomw fós ussun pwe ina eú me lein ekkewe rúáánú chénúpupu lón Ichen. Ina kiánin kinikinin Israel me efeng.—Ken 15:18; Pwá 9:14; 16:12.

• Iunók.

  Wesewesen weween, emén mwán mi reirei. Ekkena esin mwán ra kan angang lón imwen king, ra kewis ar repwe chón álisi are chón túmúnú ewe kiwin me únúpwúlúwen ewe king kewe. Ena kapas a pwal weneiti emén mwán esap i wesewesen emén iunók, nge a eáni eú wis lón imwen king. Paipel a néúnéú ena kapas pwe epwe áweweei ussun emén ‘iunók fán ásengesin ewe Mwú,’ emén mi nemenifichi pwisin i pwe epwe áeá unusen manawan lón an angang ngeni Kot.—Mt 19:12; Est 2:15; Féf 8:27.

J

• Jekop.

  Néún Aisek me Repeka. Mwirin, Kot a eita ngeni Israel, me a wiliiti semelapen aramasen Israel (pwal iter chón Israel, nge mwirin chón Jus). I semen ekkewe 12 mwán, iir semelapen ekkewe 12 einangen mwúún Israel. Paipel a sópwósópwoló le néúnéú ei it Jekop fán iten ewe mwúún Israel are ekkewe aramasen Israel.—Ken 32:28; Mt 22:32.

• Jiowa.

  Lón ei afféún Paipel Kapasen Kot—Paipelin Ótót Séfé (Mattu-Pwáraatá) a pwá ei it “Jiowa” fán 241. Lón rúáánú wokisin lón ewe Tesin Krik a chék pwá itemwochen iten Jiowa we “Jah,” nge lón ei afféún Paipel sia néúnéú unusen itan, “Jiowa” (Pwá 19:1, 3, 4, 6). Ewe kefil an epwe kapachelong iten Kot we lón Paipel a lóngólóng wóón ekkeei popun:

  1. Ewe Tetragrammaton (ina, ewe it mi pin, ewe mi mak lón ekkewe rúáánú osopin lón mesen makken Ipru יהוה) a nóm lón unusen ekkewe kapiin Paipel lón Tesin Ipru aramas ra néúnéú lón fansoun Jises we me néún kewe aposel.

  2. Lón fansoun Jises we me néún kewe aposel, ewe Tetragrammaton a pwal pwá lón ewe Tesin Ipru mi afféú lón fósun Krik.

  3. Ewe Tesin Krik a pwisin affata pwe fán chómmóng Jises a fós ussun iten Kot we me a esilei ngeni ekkewe aramas.—Jo 17:6, 11, 12, 26.

  4. Pokiten ewe Tesin Krik a pwal mak fán emmwenien Kot fitifengen me ewe Tesin Ipru, iwe, ese fókkun fich kamólóón iten Jiowa we seni me lón.

  5. Ekkewe taropwe makkeien chón Jus lóóm, ra pwáári pwe ekkewe Chón Kraist chón Jus ra néúnéú ewe it mi pin lón minne ra makkeei.

  6. Ekkóch soukáé ussun Paipel ra tipeeú ngeni pwe lupwen chón makkeei ewe Tesin Krik ra kapiini masouen ekkóch wokisin seni ewe Tesin Ipru, ese mwáál ra pwal makkeelong ewe iten Kot ikewe a pwá me ie lón ekkena wokisin.

  7. Lón ekkewe afféún Paipel lón lap seni ipúkú fósun fénúfan, a nóm ewe it mi pin lón ewe Tesin Krik.

  Ese wor tipemwárámwár pwe a wor eú popun mi ffat pwe iten Kot we Jiowa epwe liwinlong lón ewe Tesin Krik. Ina met ekkewe chón afféúni ewe New World Translation ra wesewesen féri. A fókkun alóllóól ar súféliti iten Kot we me ra menniniiti ar repwe télawu met mi nóm lón ewe populapen kapi.—Pwá 22:18, 19.

• Juta.

  Aféménún néún Jekop kewe át me wóón Lea. Lón minne Jekop a oesini mwen an we epwele máló, a erá pwe emén sounemenem mi lap me nómoffóch an nemenem epwe feito seni familien Juta. Lón án Jises a wiliiti emén aramas, i a feito seni einangen Juta. Ewe it Juta a pwal weneiti ewe einang. Nge mwirin a pwal weneiti ewe mwú mi iteit seni Juta.—Ken 29:35; 49:10; Ip 7:14.

K

• Kaaten.

  Eché mangaku mi ling mi chúú liosun kerop wóón mi áimufeseni ewe Leeni mi Pin me ewe Leeni mi Unusen Pin lón ewe imwenfel mangaku me ewe imwenfel.—Eks 26:31; 2Kr 3:14; Mt 27:51; Ip 9:3.

• Kapas allim.

  Lón ewe Tesin Krik, a weneiti ekkewe mettóch mi múrinné ewe Mwúún  Kot epwe féri me ewe amanaw aramas repwe kúna pokiten ar lúkú Jises Kraist.—Lk 4:18, 43; Féf 5:42; Pwá 14:6.

• Kawet.

  Lón ewe Tesin Krik, a weneiti án emén awata emén ren an áeá efóch sáál mi féfé lesopwun are ririitá och mettóch mi kken lesopwun.—Jo 19:1.

• Keena.

  Eú it lón kapasen Krik fán iten ewe Lemoolun Hinom, éérún me notouéérún Jerusalem lóóm. (Jer 7:31) A wor eú oesini mi erá pwe ina eú leeni ikewe somáán ekkewe mi máló epwe kóturuló ie. (Jer 7:32; 19:6) Ese wor eú pisekin ánnet pwe a wor aramas are man ra kóturmanawolong lón Keena ar repwe kek ie me kúna riáfféú ie. Ina minne, ena leeni ese tongeni liosuetá eú leeni ikewe ngúnún aramas repwe riáfféú ie lón eú ekkei tori feilfeiló. Nge, Jises me néún kewe chón káé ra eáni kapas áwewe Keena pwe epwe liosuetá ewe kapwúng fóchófóch lón ewe “oruuen máló,” ina ewe taló fóchófóch are máló fóchófóch.—Pwá 20:14; Mt 5:22; 10:28.

• Keinepan.

  Eú semwenin únúch mi chou. Ekkóch Paipel ra néúnéú “rupun pwétúr.”—Lif 13:2, 3, ftn.; Lu 5:12.

• Kepit.

  Ewe kapasen Ipru a wesewesen wewe ngeni “tófaatá och mettóch mi lélé.” Emén a áeá lémmis le epiti emén are och mettóch pwe epwe pwáári pwe a káimuuló fán iten eú angang mi kkóló aúchean. Ewe Tesin Krik, a pwal néúnéú ena kapas ren ninitiwen ewe ngún mi fel wóón chókkewe mi kefilitá ar repwe eáni ewe ápilúkúlúkún manaw lón láng.—Eks 28:41; 1Sa 16:13; Lk 4:18; Féf 10:38; 2Ko 1:21.

• Kerop.

  Ekkewe chónláng mi wiseni wis mi tekia me eáni angang mi kkóló aúchean. Ra sókkóló seni ekkewe seraf.—Ken 3:24; Eks 25:20; Ais 37:16; Ip 9:5.

• Kirekiréch mi somwoló.

  Iká ewe kapasen Krik a weneiti Kot, a tongeni áweweei ussun ruu ekiek. Eú ekiek, a weneiti án Kot kisáséú kapachelong an fang nge ese ekieki pwe emén epwe eliwini ngeni met a fangoló. A féri ena pokiten i mi fókkun fangafangéch me kirekiréch. Ewe oruuen ekiek, a riri ngeni án Kot pwáári kirekiréch ngeni chókkewe ese pwal fich ngeniir an kirekiréch. Pokiten an kirekiréch, a tongeni musoló tipisin ekkewe chón tipis me suuk ngeniir ar repwe kúna manaw esemuch ren Kraist. (2Ko 6:1; Ef 1:7) Lón ekkóch wokisin, ewe kapasen Krik a pwal afféú ngeni “chen” are “asor.”—Lk 2:40; 1Ko 16:3.

• Kraist.

  Itelapen Jises, mi feito seni ei kapasen Krik Khri·stosʹ, mi léllé ngeni ewe kapasen Ipru mi afféú ngeni “Messaia,” are “Emén mi Kepit.”—Mt 1:16; Jo 1:41.

• Krik.

  Eú fós ekkewe aramasen Kris ra eáni, a pwal weneiti emén wesewesen chón Kris are emén an famili a feito seni Kris. Lón ewe Tesin Krik, ena kapas a pwal weneiti meinisin ekkewe aramas esap iir chón Jus are chókkewe ra eáni fósun Kris me éérenien chón Kris.—Sow 3:6; Jo 12:20.

L

• Leeni mi Pin.

  Ewe áeúin kinikin me watteen kinikin lón ewe imwenfel mangaku are lón ewe imwenfel, a sókko seni ewe leeni kukkulong, ewe mi Unusen Pin. Lón ewe Leeni mi Pin lón ewe imwenfel mangaku, a wor eú leenien lamp seni kolt, eú róngen asoren étúét, eú chepelin pilawa, me ekkewe pisek mi ffér seni kolt; lón ewe imwenfel, a wor eú róngen asor seni kolt, engol leenien lamp seni kolt, me engol chepelin pilawa.—Eks 26:33; Ip 9:2.

• Leeni mi Unusen Pin.

  Ewe ruumw kukkulong lón ewe imwenfel mangaku me ewe imwenfel, ikewe ewe pwonen etipeeú a nóm ie. Me ren ewe Allúkún Moses, a chék mumu ngeni ewe souasor mi lapalap an epwe tolong lón ewe Leeni mi Unusen Pin, me a chék tongeni tolong lón ewe Ránin Asoren Omusomusen Tipis mi fis iteiten ier.—Eks 26:33; Lif 16:2, 17; 1Ki 6:16; Ip 9:3.

• Leenien móótun apwúng.

  Lape ngeni ina eú stage mi ffér lúkún mi wor latéén, ikewe ekkewe néúwis ra mómmóót ie pwe repwe esilei ngeni ekkewe aramas met ra apwúngaló. Ekkeei itiitin kapas “án Kot we leenien apwúng” me “án ewe Kraist leenien apwúng” ra liosuetá án Jiowa kókkótun apwúngú chón fénúfan.—Ro 14:10; 2Ko 5:10; Jo 19:13.

•  Leengol.

  Eú leengol, are 10 percent, aramas ra watiw fán iten ekkewe angang mi riri ngeni angangen fel. (Mal 3:10; Tut 26:12; Mt 23:23; Ip 7:5) Fán ewe Allúkún Moses, eú leengolun uwaan ataken ewe fénú me eú leengol seni met mi lapóló wóón néúr kewe man epwe kawor ngeni ekkewe chón Lifai iteiten ier pwe álillisiir. Ekkewe chón Lifai repwe ngeni ekkewe souasor seni án Aaron we famili eú leengol seni ekkena mettóch pwe álillisiir. A pwal wor ekkóch sókkun leengol. Ese wor eú allúk ngeni Chón Kraist ar repwe watiw leengol.

• Lepton.

  Lón fansoun ewe Tesin Krik, ina néún chón Jus we féúkúkkúnúlóón moni kapa are piras. Lón ekkóch afféún Paipel a afféú ngeni “mite.”—Mr 12:42; Lk 21:2; ftn.

• Leunusen maram.

  Ewe áeúin rán lón iteiten maram lón néún chón Jus pwinin maram, lón ena atun ekkewe aramas ra kochufengen, mwéngéfengen, me eáni ekkewe asor mi kkóló aúchean. Ló, ló, ló, ena rán a wiliiti eú án ewe mwú ránin chulap mi aúchea, me aramas repwe asésé seni ar angang.—Num 10:10; 2Kr 8:13; Kol 2:16.

• Lifai; chón Lifai.

  Néún Jekop we aúlúménún át me wóón Lea; me ewe einang mi iteit seni. Ekkewe úlúngát kinikinin ewe einangen Lifai, ra pop seni néún kewe úlúmén át. Fán ekkóch, ewe itiitin “Chón Lifai” a weneiti unusen chón ewe einang, nge fán chómmóng ese kapachelong án Aaron we familien souasor. Ese wor inetin ewe einangen Lifai fénú seni lón ewe Fénúen Pwon, nge Kot a fang ngeniir ekkewe 48 telinimw mi nóm lón kiánin fénúen ekkewe ekkóch einang.—Tut 10:8; 1Kr 6:1; Ip 7:11.

• Liffangen úméúméch.

  Ekkewe liffang mi kawor pwe epwe álisi ekkewe mi osupwang. Ewe Tesin Ipru ese féúni ena kapas, nge ewe Allúk a awora ngeni ekkewe chón Israel emmwen mi tichik ren met wiser ngeni aramas mi osupwang.—Mt 6:2.

• Liméch.

  Lón Paipel, ei kapas ese chék weneiti liméch lón pekin inis, nge a pwal weneiti án emén akkamwéchú liméchún are eliméchúsefálli, ese wor tikitikipwúlún, are ese wor och mettóch mi elimengawa lón pekin manaw are pekin ngún. Fán ewe Allúkún Moses, ena kapas a weneiti liméch me ren ewe lamalamen chón Jus.—Lif 10:10; Kf 51:7; Mt 8:2; 1Ko 6:11.

• Lisowumwáál.

  Seni ewe kapasen Krik por·neiʹa, eú kapas Paipel a néúnéú fán iten ekkewe féfférún lisowu mi atai án Kot allúk. Kapachelong lisowu lúkún pwúpwúlú, án emén amémé inisin, féfférún lisowu lefilen ekkewe rese pwúpwúlú, lisowu lefilen mwán me mwán, fefin me fefin, me lisowu ngeni man. Ewe puken Pwáraatá a néúnéú lón kapas áwewe fán iten emén fin lisowu mi iteni “Papilon mi Lapalap,” ewe mi lisowu ngeni ekkewe sounemenemen mwúún fénúfan fán iten an epwe angei manan me wéún. (Pwá 14:8; 17:2; 18:3; Mt 5:32; Féf 15:29; Kal 5:19)—Ppii FIN LISOWU.

M

• Málapalap.

  Eú esin semmwen mi mwittir chéúló lón eú leeni me úri chómmóng aramas me efisi máló.—Lk 21:11.

• Mana.

  Ewe mwéngé ekkewe chón Israel ra mwéngé lón úkúúkún 40 ier atun ra nóm lón ewe fénúpéén. Jiowa a awora ngeniir ei mwéngé. Iteiten lesossor a kan pwá wóón ewe pwúl chilóón chék lón ewe ránin Sapat. Lón ewe áeúin atun ekkewe chón Israel ra kerán kúna, ra apasa, “Met ei?” are, lón kapasen Ipru, “man huʼ?” (Eks 16:13-15, 35) Jises a pwal néúnéú ei kapas mana lón an eáni kapas monomon.—Jo 6:49, 50.

• Manaw.

  A wor chómmóng kapas lón ekkewe popun kapas mi afféú ngeni ei kapas “manaw.” A kapachelong ei kapasen Ipru neʹphesh me ei kapasen Krik psy·kheʹ, lape ngeni ra afféú ngeni “manaw” lón ei afféún Paipel. Atun sia etittina néúnéún ekkeei kapas lón ewe Paipel, sia kúna pwe ra weneiti (1) aramas, (2) man, are (3) ewe manaw mi nóm ren emén aramas are emén man. (Ken 1:20; 2:7; 1Pi 3:20) Lón ei afféún Paipel, ekkeei popun kapas ra kan afféú me ren met a weneiti eú me eú pwóróus, a néúnéú ekkeei kapas “manaw,” “ménúmanaw,” “aramas,” are  ekkewe kapas esin “úa,” “a,” “ra,” me pwal ekkóch. Lón ekkóch wokisin, neʹphesh me psy·kheʹ, ra afféú ngeni “ren unusen manawom,” weween ka féri och mettóch seni unusen letipom. (Tut 6:5; Mt 22:37) Lón pwal ekkóch pwóróus, ei kapasen Ipru neʹphesh a tongeni weneiti emén mi máló are inisin emén somá.—Num 6:6; Ak 2:13.

• Manawsefál.

  Án emén pwáátá seni máló. Ewe kapasen Krik a·naʹsta·sis a wesewesen wewe ngeni “pwáátá; útá.” Ewe Paipel a fós ussun tiu manawsefál, kapachelong án Jiowa Kot amanawasefáli Jises. Inaamwo iká Elias, Elisa, Jises, Piter, me Paul ra wisen amanawaatá ekkewe pwal ekkóch, nge mi ffat pwe ar tufichin féri ena a feito seni án Kot manaman. A fókkun lamot ngeni pwénútáán letipen Kot manawsefálin “ekkewe mi pwúng me ekkewe rese pwúng” wóón fénúfan. (Féf 24:15) Ewe Paipel a pwal fós ussun eú manawsefál ngeni manaw lón láng, ewe mi iteni “akkomw manawsefál” are “áeúin manawsefál.” Ina ewe manawsefál pwiin Jises kewe mi kepit ra eáni.—Fp 3:11; Pwá 20:5, 6; Jo 5:28, 29; 11:25.

• Masetonia.

  Eú leeni mi nóm ennefenin Kris mi lapóló iteféúlóón atun fansoun Alexander mi Lap me a chék pwisin imuuló wóón an tori ewe atun a ooló ren chón Rom. Masetonia a nóm fán nemenemen Rom atun aposel Paul a áeúin ló Iurop. Paul a ló Masetonia fán úlúngát.—Féf 16:9.

• Mecháán man.

  Aramas ra áeá le ún konik, iseis lémmis lón, iseis ink me minen makeup lón, me néúni minen nikáttik are áeá fán iten minen esilesilen pwóróus. (1Sa 16:1, 13; 1Ki 1:39; Is 9:2) Paipel a kan néúnéú ei kapas “mecháán man” le áweweei péchékkúl, pwora, me win lón maun.—Tut 33:17; Mik 4:13; Lk 1:69.

• Méén kepich.

  Eú liiwin emén a méénatiw pwe epwe pichiló seni an ooló, an kapwúng, an riáfféú, an tipis, are wisan. Esap fansoun meinisin, epwe kamétiw ren moni. (Ais 43:3) A lamot eú méén kepich ren sókkopaten popun. Áwewe chék, meinisin mwánichi lón Israel iir néún Jiowa, ina minne ra káimuuló ar repwe angang lón án Jiowa we imwenfel. Nge ekkewe mwen néún man, ra néúnéú fán iten chék angang lón imwenfel. A lamot eú méén kepich are liiwin pwe repwe pichiló seni ena wis me ra tongeni néúnéú ekkena man lón pwal ekkóch angang. (Num 3:45, 46; 18:15, 16) Iká emén kou mi mwacho ese wor emén a túmúnú a nieló emén, ewe minne ká néún ewe kou epwe méénatiw eú méén kepich pwe epwe ngaseló seni an kapwúngún máló. (Eks 21:29, 30) Iwe nge, ese mumutá ngeni emén mi nieló emén seni turun tipan an epwe watiw eú méén kepich. (Num 35:31) Nge ewe méén kepich mi kon lamot, ussun met Paipel a menlapei, ina ewe Kraist a méénatiw ren an fangoló manawan pwe epwe angasaaló aramas mi álleasochis seni tipis me máló.—Kf 49:7, 8; Mt 20:28; Ef 1:7.

• Mér.

  Och sókkun appach mi pwokkus seni sókkopaten irá félúfél are och sókkun irá mi kúkkún mi feito seni Commiphora. Mér ina eú me lein nofitin ewe lémmis mi pin aramas ra áeá le epiti emén. Ra áeá le apwopwoona mettóch, áwewe chék ren úf are peet. A pwal nofit ngeni ewe lémmis fán iten rowa me kepiten inis. A nofit ngeni wain pwe epwe éúlúúnú emén. Aramas ra pwal áeá mér le ammólnatá somáán emén epwele peiás.—Eks 30:23; SF 7:17; Mr 15:23; Jo 19:39.

• Messaia.

  Eú kapas mi feito seni ewe kapasen Ipru fán iten “kepit” are “emén mi kepit.” Lón fósun Krik a wewe ngeni “Kraist.”—Tan 9:25; Jo 1:41.

• Mina.

  Lón ewe Tesin Krik, eféú mina a wewe ngeni 100 drachma. Úkúúkún choun 12.0 oz (340 g).—Lk 19:13.

• Minen kata féún kreip.

  Och pisek mi atai féún kreip me umutawu chénún pwe epwe wiliiti wain. Ewe Paipel a néúnéú ena kapas lón kapas áwewe fán iten án Kot kapwúng.—Pwá 19:15.

• Molok.

  Emén néún chón Amon kot; ese mwáál pwal i Malkam, Milkom, me Molek.—Féf 7:43.

• Monomonun Kot.

  Eú kinikinin án Kot kókkót mi pop seni i, ese pwáári tori ewe atun a fen filaatá, me a chék pwáári  ngeni chókkewe a filiretá ar repwe silei.—Mr 4:11; Kol 1:26.

• Mwail.

  Ewe popun kapas lón Tesin Krik, lón Mattu 5:41, ese mwáál Jises a fós ussun án Rom álleaan mwail mi wewe ngeni 4,854 ft (1,479.5 m).

• Mwán mi ásimaw; Mwán mi chinnap.

  Emén mwán mi watte ierin, nge lón ewe Paipel, i ewe mi watte an nemenem me wisan lón eú mwichen aramas are eú fénú. Ei kapasen Krik pre·sbyʹte·ros a afféú ngeni “mwán mi ásimaw” iká epwe weneiti chókkewe mi wisen emmweni ewe mwichefel, nge lón ewe puken Pwáraatá a afféú ngeni “souakkomw” atun a weneiti ekkewe ménúmanaw mi nóm láng.—Eks 4:29; SF 31:23; 1Ti 5:17; Pwá 4:4, ftn.

• Mwenuwa.

  Ekkewe uwaan irá akkomw lón fansoun ráás; akkomwen uwaan ese lifilifil met. Jiowa a allúkú ngeni ekkewe chón Israel ar repwe eáni asor ekkewe mwenuwa, ese lifilifil iká aramas, man, are uwaan ar atake. Ekkewe chón Israel ra eáni asor mwenuwa ngeni Kot atun ewe Chulapen Pilawa Ese Lefen me atun Pentikos. Ewe Paipel a pwal néúnéú ei kapas “mwenuwa” lón kapas áwewe fán iten Kraist me néún kewe chón káé mi kepit.—1Ko 15:23; Num 15:21; SF 3:9; Pwá 14:4.

• Mwichefel.

  Eú kúmiin aramas mi mwichfengen fán iten eú popun are eú angang. Lón ewe Tesin Ipru, lape ngeni a weneiti ewe mwúún Israel. Nge lón ewe Tesin Krik, a weneiti eú me eú mwichefelin Chón Kraist, nge fán chómmóng a weneiti unusen ewe mwichefelin Chón Kraist.—1Ki 8:22; Féf 9:31; Ro 16:5.

• Mwúún Kot.

  Ena kapas a chék weneiti ewe mwú mi liosuetá án Kot pwúúng le nemenem, ewe Néún we Kraist Jises a wisen king lón.—Mt 12:28; Lk 4:43; 1Ko 15:50.

N

• Nard.

  Och sókkun lémmis mi mémmóng mi énúpar mi feito seni ewe irá (Nardostachys jatamansi ). Pokiten a mémmóng, aramas ra nofiti ngeni och sókkun lémmis ese kon múrinné me fán ekkóch ra kan féri tipitipin chék. Nge me ren Mark me Jon, ewe nard emén a epiti ngeni Jises, ina ewe nard “ese nofit ngeni och mettóch.”—Mr 14:3; Jo 12:3.

• Néún aramas.

  Ei itiitin kapas a pwá fán 80 lón ekkewe Puken Kapas Allim. A weneiti Jises Kraist me a pwáári pwe ren an uputiw ussun emén aramas, i a wiliiti emén aramas nge esap chék emén ngún mi inisini inisin aramas. Ena itiitin kapas a pwal pwáári pwe i epwe apwénúetá ewe oesini mi mak lón Taniel 7:13, 14. Lón ewe Tesin Ipru, ena itiitin kapas a pwal weneiti Isikiel me Taniel, pwe epwe affata sókkofesenin ekkena aramas mi wisen aweni awen Kot me minne ra apasa a feito seni i.—Is 3:17; Tan 8:17; Mt 19:28; 20:28.

• Néún Tafit.

  Lape ngeni a weneiti Jises. A menlapei pwe i ewe Chón Álemwiri ewe pwonen etipeeú fán iten eú Mwú, ewe me ren oesini epwe feito seni einangen Tafit.—Mt 12:23; 21:9.

• Nifichifichimas.

  Och sókkun kúkkún man. Iir chómmóng atun ra changoló ngeni eú leeni. Fán ewe Allúkún Moses, ina och sókkun man mi liméch aramas ra tongeni mwéngé. Eú watteen mwichen nifichifichimas mi ánaaló meinisin met mi nóm ikewe ra changoló ie, a atoto watteen feiengaw, iwe ussun itá ina eú riáfféú.—Eks 10:14; Mt 3:4.

• Nisan.

  Mwirin án chón Jus ooló lón Papilon, ina ewe mineféén it fán iten Apip, ewe áeúin maram lón néún chón Jus we pwinin maram mi pin me ina ewe efisuen maram lón pwal eú pwinin maram. A poputá seni lukanapen March ngeni lukanapen April. (Ne 2:1) Ekkewe chón Jus ra féri ewe Pasofer lón Nisan 14, me Jises Kraist a poputááni ewe fááfen ach Samol lón ena rán. (Lk 22:15, 19, 20) I a pwal ninniiló wóón ewe iráán ninni lón ena rán.—Lk 23:44-46.

• Ngaf.

  Eú kaúk fán iten kaúkún alóllóólun konik, mi taitap ngeni 6 ft (1.8 m).—Féf 27:28, ftn.

• Ngún mi fel.

  Ewe manaman sise tongeni kúna Kot a áeá le apwénúetá letipan. A pin are fel pokiten a feito seni Jiowa, ewe ese wor táppin an limeliméch me pwúng, me pokiten ina met Kot a áeá le apwénúetá minne mi pin.—Lk 1:35; Féf 1:8.

•  Nómun ekkei.

  Eú leeni lón kapas monomon “mi ngetenget ren ekkei me primiston,” ewe a pwal wewe ngeni “oruuen máló.” Ekkewe chón tipis rese áier, ewe Tefil, me pwal mwo nge máló me Peiás (are, Eitis) repwe kóturulong lón ena nómun ekkei. An kapachelong emén ngún me pwal máló me Eitis, ekkewe rese tongeni kkar ren ekkei, a pwáári pwe ewe nómun ekkei ina chék eú kapas monomon mi wewe ngeni taló fóchófóch, nge esap riáfféú fóchófóch.—Pwá 19:20; 20:14, 15; 21:8.

• Nónnóm.

  Lón ekkóch wokisin lón ewe Tesin Krik, ei kapas a áweweei án Jises Kraist nónnóm lón wisan we Messaia ach King seni ewe fansoun a eáni ena wis tori sópwólóón ei ótóten fénúfan. Án Kraist nónnóm, ese weneiti an waroto me mwittir liwinsefál, nge a weneiti eú úkúúkún fansoun mi silleló ren ekkewe esissil.—Mt 24:3.

O

• Oesini.

  Eú pwóróus seni Kot, a tongeni eú minen pwáraatá ussun minne a tipeni are angangen esilei ussun minne a tipeni. Eú oesini a tongeni eú káit seni Kot, eú allúk are kapwúng seni Kot, are eú esilesil fán iten och mettóch epwe fis.—Mt 13:14; 2Pi 1:20, 21.

• Ótóten (ei) fénúfan.

  Afféún ei kapasen Krik ai·onʹ mi weneiti eú fansoun atun a fis eú mettóch mi watte weween ngeni aramas. A pwal tongeni esissillatá ekkewe napanap aramas lón eú fansoun ra pwáraaló are eáni. (2Ti 4:10) Ren ewe Pwonen etipeeú fán ewe Allúk, Kot a poputááni eú ótóten mettóch, ekkóch aramas ra eita ngeni fansoun chón Israel are fansoun chón Jus. Nge pokiten án Jises Kraist méén kepich, Kot a néúnéú i le poputááni eú mineféén ótót. Eú kinikin mi aúchea lón ena ótót, ina ewe emmwen mi kawor ngeni ewe mwichefelin Chón Kraist mi kepit. A poputá eú mineféén fansoun ikewe a fis ekkewe mettóch ewe pwonen etipeeú fán ewe Allúk a áweweei ussun lóóm.—Mt 24:3; Mr 4:19; Ro 12:2; 1Ko 10:11.

P

• Paal.

  Emén án chón Kenan kot, ewe ra lúkú pwe an fán láng me i chón apúngatiw púngún úút me chón efisi án emén epwe néúnéú. Ewe kapas “Paal” pwal ina itelapen án aramas kewe kot. Lón fósun Ipru, ena kapas a wewe ngeni “Minne Ká An [och mettóch]; Masta.”—1Ki 18:21; Ro 11:4.

• Papatais.

  Ei kapas a wewe ngeni “akokatiw,” are kokotiw fán konik. Jises a apasa pwe a lamot chókkewe mi tapweló mwirin repwe papatais. Ewe Paipel a pwal fós ussun án Jon we papatais, papatais ren ngún mi fel, papatais ren ekkei, me pwal ekkóch.—Mt 3:11, 16; 28:19; Jo 3:23; 1Pi 3:21.

• Paratis.

  Eú leeni mi lingéch. Ichen, ina ewe áeúin paratis Jiowa a féri fán iten ekkewe popun aramas. Lón ewe atun Jises a fós ngeni emén me lein ekkewe chón atai allúk mi eitiwetá wóón ewe iráán ninni únúkkún, a fós ussun án fénúfan epwe wiliiti eú paratis. Lón 2 Korint 12:4, ena kapas paratis a weneiti eú paratis lón mwachkkan, nge lón Pwáraatá 2:7, a weneiti eú paratis lón láng.—Lk 23:43.

• Pasofer.

  Eú ránin chulap mi kan fiffis iteiten ier lón engol me rúáánúún ránin ewe maram Apip (mwirin och fansoun a iteni Nisan) pwe epwe áchchema ngaselóón ekkewe chón Israel seni Isip. A fis ena ren ar nieló me umwuni emén nieniféén siip (are siike), me ocheei fiti ekkewe chéén irá mi kipwin me pilawa ese nofit ngeni iis.—Eks 12:27; Jo 6:4; 1Ko 5:7.

• Paw mi iseis wóón.

  Péún emén a watá wóón emén pwe epwe ewisa ngeni eú wis mi aúchea are awora ngeni eú feiéch, echikara seni an samaw, are fang ngeni ewe ngún mi fel.—Num 27:18; Féf 19:6; 1Ti 5:22.

• Peelsepul.

  Eú itelap mi weneiti Setan, ewe samolun, are sounemenemen ekkewe timon. Ena kapas neman a feito seni ewe it Paalsepup, ina i ewe Paal ekkewe chón Filistia ra fel ngeni me lón Ekron.—2Ki 1:3; Mt 12:24.

• Peiás.

  Iká a mesekúkkún, a weneiti peiásen emén; nge iká a mesemmóng, a weneiti ewe leenien peiás fán iten aramas, mi taitap ngeni ewe kapasen Ipru “Sheol” me ewe kapasen Krik “Eitis.” Lón  Paipel a weneiti eú leeni lón kapas áwewe ikewe ese wor angang are ekiek ie.—Ken 47:30; SA 9:10; Mt 27:61; Féf 2:31.

• Pentikos.

  Ewe oruuen chulap me lein ekkewe úlúngát watteen chulap. A lamot án meinisin ekkewe mwán chón Jus repwe ló fiti lón Jerusalem. Pentikos, a wewe ngeni “Enimeen (Rán).” Lón ewe Tesin Krik, a néúnéú Pentikos, nge lón ewe Tesin Ipru, Chulapen Fansoun Kinikin are Chulapen Wiik. A fis apwapwaan ena rán lón ewe enimeen rán, poputá álleaan seni Nisan 16.—Eks 23:16; 34:22; Féf 2:1.

• Pilawa fán iten asor.

  Engol me rúúeféú pilawa mi tettenitá lón ruu kinikin nge ákkáwonoféú wóón eú me eú me ra nóm lón ewe Leeni mi Pin lón ewe imwenfel mangaku me lón ewe imwenfel. Ei minen asor ngeni Kot a kan ekkesiwil ngeni mineféén pilawa iteiten ránin Sapat. Iwe, ekkewe pilawa ra angei, ekkewe chék souasor repwe wisen áni.—Eks 25:30; Lif 24:5-9; Mt 12:4; Ip 9:2.

• Pin; Fel.

  Eú napanap mi pwúkún nóm ren Jiowa; i a limeliméch me pin lón mettóch meinisin. (Eks 28:36; 1Sa 2:2; Jo 17:11) Atun Paipel a fós ussun aramas (Mr 6:20; Féf 3:21), mettóch (Ro 7:12; 11:16; 2Ti 3:15), leeni (Mt 4:5; Féf 7:33; Ip 9:1), me angang (Eks 36:4), ewe popun kapas lón Ipru me Krik fán iter, a wewe ngeni káimuuló are epinipiniló fán iten ewe Kot mi pin; káimuuló fán iten angang ngeni Jiowa. Ewe Tesin Krik a pwal néúnéú ekkeei kapas “pin” me “fel” fán iten liméchún féfférún emén.—2Ko 7:1; 1Pi 1:15, 16.

• Pisekin maun.

  Ekkewe pisek ekkewe soufiu ra pippisek pwe repwe túmún, áwewe chék akkaw, sekit seni silin man mi wor mechá wóón, penit, chechchen peche seni piras, me eppetin maun.—1Sa 31:9; Ef 6:13-17.

• Por·neiʹa.

  —Ppii LISOWUMWÁÁL.

• Pwon.

  Eú pwon emén a eáni ngeni Jiowa seni letipan. A pwonei pwe epwe féri och mettóch, eáni asor are fangoló och liffang, eáni och sókkun angang mi sókkóló, are tiiseni ekkóch mettóch ese pwal ú ngeni án Kot allúk. Choun eú pwon a taitap ngeni choun eú ékképél.—Mt 5:33.

• Pwonen etipeeú.

  Eú etipeeú lefilen Kot me aramas, are lefilen rúúemén aramas are mwichen aramas ar repwe féri och mettóch are resap féri. Fán ekkóch, eú chék pekin a wor wisan le apwénúetá masouen eú pwonen etipeeú (unilateral, ewe mi wewe ngeni eú pwon). Nge fán ekkóch wisen ekkewe ruu pekin ar repwe apwénúetá masouen eú pwonen etipeeú (bilateral). Me lúkún ekkewe pwonen etipeeú Kot a eáni lefiler me aramas, ewe Paipel a fós ussun ekkewe pwonen etipeeú lefilen aramas, einang, fénú, are kúmiin aramas. Ekkóch me lein ekkewe pwonen etipeeú mi weneiti fite fite pilóón aramas, ina án Kot kewe pwonen etipeeú ngeni Eperiam, Tafit, ewe mwúún Israel (pwonen etipeeú mi lóngólóng wóón ewe Allúk), me ewe Israelin Kot (pwonen etipeeú mi fé).—Ken 9:11; 15:18; 21:27; Eks 24:7; 2Kr 21:7; Lk 22:29; Féf 3:25; 2Ko 3:6; Ip 8:6.

• Pwórófel.

  Eú pwóór mi ffér seni ewe irá itan akasia me a finifin ngeni kolt. A nóm lón ewe Leeni mi Unusen Pin lón ewe imwenfel mangaku, nge mwirin lón ewe Leeni mi Unusen Pin lón ewe imwenfel Salomon a aúetá. Éppwélún we a ffér seni wesewesen kolt me a wor rúúemén kerop mi sápe fengen wóón. Ewe mettóch mi kon aúchea a nóm lón, ina ekkewe ruu faw mi chépéép mi mak wóór ewe Allúk Engol.—Tut 31:26; 1Ki 6:19; Ip 9:4.

• Pwúng.

  Lón ewe Paipel, a wewe ngeni met mi pwúng me ren án Kot kewe allúk ussun minne mi pwúng me mwáál.—Ken 15:6; Tut 6:25; Sef 2:3; Mt 6:33.

R

• Ránin Kapwúng.

  Eú rán are fansoun atun ekkewe mwicheichen aramas, mwú, are aramasen fénúfan repwe etittin me ren Kot. A tongeni weneiti eú kapwúng atun ekkewe mi fich ngeni máló repwe niniiló, are a tongeni weneiti eú kapwúng epwe suuki ngeni ekkewe ekkóch alen ar repwe kúna manaw. Jises Kraist me néún kewe aposel ra fós ussun ewe “Ránin Kapwúng” lón mwach, esap chék fán iten ekkewe mi manaw, nge pwal fán iten chókkewe ra fen máló.—Mt 12:36.

•  Ránin lesópwólóón.

  Paipel a néúnéú lón osuni ei itiitin kapas me pwal ekkóch mi taitap ngeni, áwewe chék ren “lon kan fansoun repwe feito,” pwe epwe weneiti ewe fansoun me ekkewe mettóch repwe fis me mwen eú oesini ussun án Kot kapwúng epwe pwénútá. (Is 38:16; Tan 10:14; Féf 2:17) Ei a tongeni fitu chék ier are fite fite ier, alóngólóng wóón ewe oesini. Án Paipel néúnéú ei itiitin kapas “ránin lesópwólóón” ei ótóten fénúfan, a ákkáeúin weneiti atun án Jises nónnóm.—2Ti 3:1; Jem 5:3; 2Pi 3:3.

• Ránin Omusomusen Tipis.

  Eú rán mi fókkun aúchea me pin me ren chón Israel, a pwal iteni Yom Kippur (seni ewe fósun Ipru yohm hak·kip·pu·rimʹ, “ránin ám pwélúoló” tipis), a kan fis lón Etanim 10. Ina chék ewe rán lón iteiten ier ewe souasor mi lapalap a tolong lón ewe Leeni mi Unusen Pin lón ewe imwenfel pwe epwe eáni asor chchaan ekkewe man fán iten an tipis, án ekkewe pwal ekkóch chón Lifai tipis, me án ekkewe aramas tipis. Ekkena asor ra áiti ngenikich án Jises asor, ewe a unusen omusaaló tipisin aramas fán eú chék fán iten fansoun meinisin, ewe mi suuki ngeni aramas alen ar repwe chásefál ngeni Jiowa. Ina ewe fansoun a fis mwichelap mi pin me echikefel, me pwal ina eú sapat, eú fansoun án aramas resap féri angang lón.—Lif 23:27, 28; Kol 1:20; Ip 9:12.

• Rappwa.

  Och pisekin nikáttik aramas ra kan usi mi ffér seni mechá, ra néúnéú lón ar kél me ar atowu minen esilesil. Iká Paipel a néúnéú fán iten kapas áwewe, lape ngeni epwe akkomw ttikin ewe rappwa, tapw esilesilen án Jiowa kapwúng are pwal ekkóch mettóch mi aúchea epwe fis.—1Ko 15:52; Pwá 8:7–11:15.

• Riáfféú mi lapalap.

  Jises a fós ussun eú “riáfféú mi lapalap” ese wor táppin epwe tori Jerusalem, nge ákkáeúin ewe epwap tori unusen chón fénúfan ren an ‘feffeito fán an ling.’ (Mt 24:21, 29-31) Paul a áweweei ena riáfféú pwe ina eú án Kot angang mi pwúng ngeni “chókkewe rese álleasochisi ewe kapas allim” ussun Jises Kraist. Pwáraatá sópwun 19 a pwáári pwe Jises ewe epwe emmweni ewe mwichen soufiun láng le maun ngeni “ewe manmwacho me ekkewe kingen fénúfan me ar kewe mwichen soufiu.” (2Te 1:6-8; Pwá 19:11-21) “Eú mwiich mi fókkun chóchó” epwe kúna manaw atun ena riáfféú. (Pwá 7:9, 14)—Ppii ARMAKETON.

• Róngen asor.

  Ina eú leenien asor mi ffér seni pwúl, faw, are irá me finifin ngeni mechá, ikewe a iseisetá ie ekkewe asor are appach mi pwokkus fán iten fel. Lón ewe áeúin ruumw lón ewe imwenfel mangaku me ewe imwenfel, a wor eú kúkkún “róngen asor mi ffér seni kolt” fán iten asoren appach mi pwokkus. A ffér seni irá me finifin ngeni kolt. Eú watteen “róngen asor mi ffér seni piras” fán iten asoren kek, a nóm lúkún lón kiánin ewe imwenfel. Chón fel mi chofona ra pwal áeá róngen asor lón ar fel.—Eks 39:38, 39; 1Ki 6:20; Mt 5:23, 24; Lk 1:11; Féf 17:23.

• Ruʹach; Pneuʹma.

  Lape ngeni ei kapasen Ipru ruʹach me ei kapasen Krik pneuʹma mi afféú ngeni “ngún,” a wor fitu weween. Iir meinisin ese pwá ngeni mesen aramas me iir meinisin a wor pisekin pwáraatá pwe mi wor manaman mi angang wóór. Ewe kapasen Ipru me ewe kapasen Krik, ra tongeni weneiti (1) ásepwál, (2) ewe manamanen manaw mi nóm ren aramas me man, (3) met mi amwékútú emén an epwe apasa och mettóch are féri och mettóch lón och sókkun napanap, (4) eú pwóróus mi pop seni emén sise tongeni kúna, (5) Kot, chónláng, me ngún mi ngaw, me (6) án Kot manaman, are ngún mi fel.—Eks 35:21; Kf 104:29; Mt 12:43; Lk 11:13.

S

• Sameria.

  Ewe iolapen telinimwen ekkewe engol einangen mwúún Israel mi nóm ennefen ren úkúúkún 200 ier, me pwal ina iten unusen kinikinin we. Ena telinimw a kaútá wóón eú chuuk pwal chék ina itan. Lón fansoun Jises we, Sameria ina iten eú leeni mi nóm lefilen éérún Kalili me ennefenin Jutia. Fán chómmóng Jises ese afalafal lón ena kinikin atun a kan sái, nge fán ekkóch a pássini ena leeni me fós ngeni aramasen lón.  Piter a áeá ewe oruuofóchun kiien ewe Mwú lón kapas áwewe atun ekkewe chón Sameria ra angei ewe ngún mi fel.—1Ki 16:24; Jo 4:7; Féf 8:14.

• Samol.

  A weneiti wisen Jises Kraist mi aúchea lón an angasaaló aramas mi túppwél seni ekkewe mettóch mi fis pokiten tipis, me emmweniir ngeni manaw esemuch.—Féf 3:15; 5:31; Ip 2:10; 12:2.

• Samolun chónláng.

  Paipel a néúnéú ei kapas samolun chónláng lón an fósun emén chék, a pwáári pwe a chék wor emén samolun chónláng. Paipel a affata iten ena samolun chónláng, i Mikael.—Tan 12:1; Jut 9; Pwá 12:7.

• Sapat.

  A pop seni ewe kapasen Ipru mi wewe ngeni “asésé; úkútiw.” Ina ewe efisuen rán lón án ekkewe chón Jus wiik (seni tuputiwen akkar lón Enimu tori tuputiwen akkar lón Ammól). Ekkewe pwal ekkóch ránin chulap lón ewe ier, me pwal ewe efisuen me enimeen ier, ra pwal iteni sapat. Lón ewe ránin Sapat, esap wor emén epwe angang me lúkún chék án ekkewe souasor féri ar angang lón ewe imwenfel. Lón ekkewe ierin Sapat, esap ammasou pwúlún ewe fénú, me esap wor emén chón Ipru epwe eriáni chienan kewe chón Ipru ar repwe omusa ar liwinimmang. Lón ewe Allúkún Moses, ekkewe allúkún Sapat ese áweiresi aramas, nge ekis me ekis ekkewe néúwisin lamalam ra pwal apachaatá ekkóch allúk, ina pwata lón fansoun Jises we, a weires ngeni aramas ar repwe apwénúetá ekkewe allúk.—Eks 20:8; Lif 25:4; Lk 13:14-16; Kol 2:16.

• Satusi.

  Eú kúkkún kúmi mi iteféúló lón ewe lamalamen Jus, iir mi wéúéch me iir souasor me a watte ar nemenem wóón ekkewe angang lón ewe imwenfel. Rese mochen etiwa éérenien ekkewe Farisi me ekkóch ar kewe lúkú. Rese lúkú ewe manawsefál are lúkú pwe mi wor chónláng. Ra ú ngeni Jises.—Mt 16:1; Féf 23:8.

• Scroll.

  Och taropwe mi ttam mi ffér seni únúchen man are ewe fetil itan papyrus. A chék mak wóón epek, me kefititá wóón efóch fóchun irá. Ewe Taropwe mi Pin a kan mak me kapiiwu lón scroll, ina ewe esin puk mi chéú ewe atun Paipel a mak.—Lk 4:17-20, ftn; 2Ti 4:13.

• Sengen paw.

  Eú kaúk ttaman seni lekupukupun paw me lukanapan tori mesen áchefen ewe aútúnuk. Ekkewe chón Israel ra kan áeá sengen paw úkúúkún ttaman ina epwe 17.5 in. (44.5 cm), nge ra pwal áeá eú sengen paw mi ttam seni ena wóón úkúúkún eú chélapen paw, ina epwe 20.4 in. (51.8 cm).—Ken 6:15; Mt 6:27; Lk 12:25; Pwá 21:17, ftn.

• Setan.

  A feito seni eú kapasen Ipru mi wewe ngeni “Chón ú ngeni.” Atun Paipel a néúnéú ena kapas, lape ngeni a weneiti Setan ewe Tefil, án Kot we féúnen oput.—Hp 1:6; Mt 4:10; Pwá 12:9.

• Seus.

  Ewe kot mi lap me lein án chón Kris kewe kot. Ekkewe aramas lón Listra ra mwáálliló le kér ngeni Parnapas Seus. Makken wóón och mettóch minen lóóm lóóm mi pwá órun Listra, a fósun “néún Seus kewe souasor” me “Seus ewe koten akkar.” Ewe siip Paul a fiti seni ewe fénú Malta a wor wóón liosun “Néún Seus Kewe Át,” iir, ekkewe nippwe iter Kastor me Polluk.—Féf 14:12; 28:11.

• Sinakok.

  Eú kapas mi wewe ngeni “kochufengen; mwichelap,” nge lón chómmóng wokisin, a weneiti ewe imw are leeni ikewe ekkewe chón Jus ra mwichfengen ie pwe repwe álleani ewe Taropwe mi pin, angei káit, eáni afalafal, me iótek. Lón fansoun Jises we, a wor eú sinakok lón iteiten eú me eú sóópw lón Israel, nge lón ekkewe telinimw mi watte a wor lap seni eú sinakok ie.—Lk 4:16; Féf 13:14, 15.

• Sion; Chuuk Sion.

  Iten án chón Jepus we telinimw mi péchékkúl lón Jepus mi nóm wóón eú ppan éétiwéér lón Jerusalem. Mwirin án Tafit liapeni ena telinimw, a aúetá imwan ikena ie, iwe a iteni “telinimwen Tafit.” (2Sa 5:7, 9) Sion a wiliiti eú chuuk mi pin me ren Jiowa atun Tafit a uwealó ewe Pwórófel ngeni ikena. Mwirin, kinikinin ewe imwenfel wóón ewe Chuuk Moria a pwal kapachelong lón ena it, me fán ekkóch a weneiti unusen ewe telinimw Jerusalem. Fán chómmóng, ewe Tesin Krik a néúnéú ena it lón kapas áwewe.—Kf 2:6; 1Pi 2:6; Pwá 14:1.

•  Siria; chón Siria.

  Lón ewe Tesin Krik, Siria ina eú leeni mwúún Rom a nemeni, nge ewe iolap lón, ina Antiok. Lape ngeni kinikinin ena leeni, a léllé ngeni ewe leeni Siria (a pwal iteni Aram) lón ewe Tesin Ipru. Ewe governor lón Siria a pwal wor an nemenem lón unusen Palestine.—Lk 2:2; Féf 18:18; Kal 1:21.

• Sirikomsais.

  Reireilóón únúchen mesen ewe kúkkún inis wóón ekkewe mwán. A kawor eú allúk ngeni Eperiam me mwirimwirin kewe ar repwe sirikomsais, nge ese pwal allúk ngeni Chón Kraist. Lón sókkopaten wokisin, ra pwal néúnéú ena kapas lón kapas áwewe.—Ken 17:10; 1Ko 7:19; Fp 3:3.

• Sirtis.

  Ruu watteen nóóm mi ápepeet mi nóm órun Lipia, Ennefenin Afrika, ekkewe sááló lóóm ra niwokkusiti pokiten ioien ppian a kan sissiwil leenier ren kkótotáán ewe mataw.—Féf 27:17.

• Sisar.

  Iten eú famili chón Rom nge a wiliiti eú itelap fán iten ekkewe sounemenem Rom. Ewe Paipel a féúni iten Aukustus, Tiperius, me Klautius, me inaamwo iká ese pwal mak iten Nero, nge ena itelap a pwal weneiti. Ewe Tesin Krik a pwal néúnéú ei itelap “Sisar” fán iten ekkóch néúwis, are néúwisin mwú.—Mr 12:17; Féf 25:12.

• Sópwólóón ótóten ei fénúfan.

  Ewe fansoun mi fetál ngeni sópwólóón ei ótóten fénúfan mi nóm fán emmwenien Setan. Án Kraist nónnóm a pwal fiffis lón ena fansoun. Fán án Jises emmwen, ekkewe chónláng repwe “áimuoló ekkewe mi fókkun ngaw seni me lein ekkewe mi pwúng” me nireló. (Mt 13:40-42, 49) Néún Jises kewe chón káé ra mochen silei ineet ena “sópwólóón.” (Mt 24:3) Iwe, me mwen an we epwele liwiniti láng, a pwon ngeniir pwe epwe nónnóm rer tori ena fansoun.—Mt 28:20.

• Souasor.

  Emén mwán mi kewis an epwe tupuni Kot ngeni ekkewe aramas i a angang fán iter, a áiti ngeniir ussun Kot me an kewe allúk. Ekkewe souasor ra pwal tupuni ekkewe aramas mwen mesen Kot, wisen eáni ekkewe asor, me pwal chón affér me tingor fán iten ekkewe aramas. Me mwen poputáán ewe Allúkún Moses, ekkewe mékúren famili ra wisen eáni angangen souasor fán iten ar kewe famili. Fán ewe Allúkún Moses, ekkewe mwán seni familien Aaron lón ewe einangen Lifai ra wisen souasor. Nge ekkewe lusun re Lifai, iir chón álillis ngeniir. Atun a poputá ewe pwonen etipeeú mi fé, ewe Israelin Kot a wiliiti eú mwúún souasor, me Jises Kraist i ewe Souasor mi Lapalap.—Eks 28:41; Ip 9:24; Pwá 5:10.

• Souasor mi lap.

  Lón ewe Tesin Krik, a ffat pwe ei kapas “souasor mi lap” a weneiti ekkewe mwán mi eáni angangen souasor, ese mwáál kapachelong chókkewe mi fen piin souasor mi lapalap, me ekkewe souemmwen lón ekkewe 24 kúmiin souasor.—2Kr 26:20; Esr 7:5; Mt 2:4; Mr 8:31.

• Souasor mi lapalap.

  Fán ewe Allúkún Moses, i ákkáeúin me lein ekkewe souasor epwe wisen tupuni aramas mwen mesen Kot me emmweni ekkewe pwal ekkóch souasor. I chék a mumu ngeni an epwe tolong lón ewe Leeni mi Unusen Pin, ewe leeni kukkulong lón ewe imwenfel mangaku nge mwirin lón ewe imwenfel. A féri ena lón ewe chék Ránin Asoren Omusomusen Tipis mi fis iteiten ier. Ei itiitin kapas “souasor mi lapalap” a pwal weneiti Jises Kraist.—Lif 16:2, 17; 21:10; Mt 26:3; Ip 4:14.

• Soufúú.

  Emén chón káé mwékútún ewe akkar, maram, me ekkewe fúú pwe epwe silei minne epwe fis lón ekkan fansoun epwe feito.—Mt 2:1.

• Soumak.

  Emén chón kapiini ewe Tesin Ipru. Atun Jises a nóm wóón fénúfan, a weneiti eú kúmiin mwán mi watte ar silei ewe Allúk. Ra ú ngeni Jises.—Esr 7:6; Mr 12:38, 39; 14:1.

• Sourong.

  Emén mi áeá manaman mi feito seni ekkewe ngún mi ngaw.—Féf 13:6.

• Stoik.

  Eú kúmiin chón Krik iir souáák mi lúkú pwe pwapwa a lóngólóng wóón án emén áeá an tufichin ekiek me eáni manaw mi lóngólóng wóón allúk fán iten mwékútúkútún ekkewe mettóch mi fférútá. Me rer pwe emén mi enletin tipáchem ese pwal áfánni metek are pwapwa.—Féf 17:18.

 T

• Talent.

  Eú kaúk fán iten choun mettóch me aúchean moni. Úkúúkún choun eféú néún chón Kris talent, ina epwe 44.8 lb; 720 oz (20.4 kg).—Mt 18:24.

• Taropwe mi Pin.

  A weneiti án Kot we Kapas. Ei itiitin kapas a chék nóm lón ewe Tesin Krik.—Lk 24:27; 2Ti 3:16.

• Tartarus.

  Lón ewe Tesin Krik, a weneiti nónnómun ekkewe chónláng mi álleasolap lón fansoun Noa we.—Ina nónnómur mi attong, ussun nge ra nóm lón kalapus. Án 2 Piter 2:4 néúnéú ei kapas tar·ta·roʹo (“kóturulong lón Tartarus”) ese wewe ngeni pwe “ekkewe chónláng mi tipis” ra kóturulong lón Tartarus, án ekkewe chón fel ngeni kot chofona we túttúlap (ina eú leenien kalapus fán pwúl mi rochopwak fán iten ekkewe kot rese kon aúchea). Nge Paipel a néúnéú ena kapas fán iten an epwe pwáári pwe Kot a fen átekisoneretiw seni leenier lón láng, me a angei seniir wiser kewe me a unusen eppeti ekiekiir pwe resap weweiti ekkewe mettóch mi múrinné I a tipeni. Rochopwak, a pwal esissillatá minne epwe fis ngeniir, pún ewe Taropwe mi Pin a apasa pwe repwe máló fóchófóch fitifengen me néúr we sounemenem Setan ewe Tefil. Ina minne, Tartarus a weneiti nónnómungawelóón ekkena chónláng mi álleasolap. Tartarus ese léllé ngeni “ewe apis” Pwáraatá 20:1-3 a fós ussun.

• Tefil.

  Itelapen Setan lón ewe Tesin Krik, weween “Chón Pweni.” Setan a iteni ewe it Tefil pokiten i ewe meilapen me áeménún chón pweni me tipimwáál ngeni Jiowa, an we kapas, me itan we mi pin.—Mt 4:1; Jo 8:44; Pwá 12:9.

• Tekapolis.

  Eú kúmiin telinimwen chón Krik, me lóóm ina ekkewe engol telinimw (seni ewe kapasen Krik deʹka, weween “engol,” me poʹlis, weween “telinimw”). Pwal ina iten ewe leeni mi nóm éétiwen ewe Setin Kalili me ewe Chénúpupu Jortan, ikewe lape ngeni ekkena telinimw ra nóm ie. Ina leenien án ekkewe chón Krik féri éérenier kewe me ar business. Jises a pwer lón ena leeni, nge ese wor och pwóróus mi affata pwe a ló ngeni eú me lein ekkena telinimw.—Mt 4:25; Mr 5:20.

• Timon.

  Iir ngún mi ngaw mi wor ar tufich mi lap seni án aramas. Lón Keneses 6:2 (Kapasen God) ra iteni “noun God kewe” me lón Juta 6, “chónláng.” Esap iir mi ngaw atun ra fférútá, iir chónláng mi pwisin fériir ar repwe chón oputa Kot ren ar álleasolapa lón fansoun Noa we me fiti Setan le ú ngeni Jiowa.—Tut 32:17; Lk 8:30; Féf 16:16; Jem 2:19.

U

• Úf seni tuuk.

  Och mangaku mi chemaw aramas ra áeá le ffér tuuk, are pwotou, áwewe chék ren ekkewe leenien féún wiich. Lape ngeni a ffér seni únen siike mi chól, me ina met aramas ra ééreni le foffout atun letipeta.—Ken 37:34; Lk 10:13.

• Uluulun; Fel ngeni uluulun.

  Uluulun, ina liosun och mettóch, och mi wesewesan are och aramas ra chék ekiekietá me ra néúnéú lón ar fel. Fel ngeni uluulun, a wewe ngeni án emén kon afona emén are och mettóch, tongei, fel ngeni, are luluuló an aúcheani.—Kf 115:4; Féf 17:16; 1Ko 10:14.

• Úúr, úrelap.

  A wor ekkewe úúr me úrelap lón ewe imwenfel me pwal ekkewe ekkóch imw férien Salomon. Ewe Tesin Krik a néúnéú ewe kapas úrelap pwe epwe liosuetá lóngólóngun (1Ti 3:15) are nómoffóchun eú wis (Pwá 3:12).—Sou 16:29; 1Ki 7:21.

W

• Waas.

  Efóch amúch emén a mwárei wóón afaran nge lesopwun me rúúepek a wor masouan. Are a tongeni weneiti och sópwun irá mi ririitá wóón popun úwen rúúemén man (lape ngeni kou) atun ar luki ekkewe pisekin atake are efóch woken. Pokiten fán chómmóng ekkewe slave ra áeá waas le uwei oser kewe mi chou, iwe Paipel a néúnéú “waas” lón kapas áwewe pwe epwe liosuetá án emén nóm fán nemenien emén, kapachelong an kúna weires me riáfféú. An ettititiw are kup efóch waas me wóón emén, a wewe ngeni an ngaseló seni an slave, an riáfféú, me an kúna kirikiringaw.—Lif 26:13; Mt 11:29, 30.

• Wokun nemenem.

  Efóch patong are wok emén sounemenem a kémwéch mi liosuetá an nemenem.—Ken 49:10; Ip 1:8.