Me ren Luk 1:1-80
1 Chómmóng aramas ra achocho le etittina meinisin mettóch ra fen fis me ra makkeetiw, sia pwal fókkun lúkú ekkeei mettóch.
2 Ekkewe pwal ekkóch mi pwisin kúna me esilefeili pwóróus seni Kot ra erenikem ekkeei mettóch.
3 Iei minne, en ámmáfel Teofilus, úa etittina ekkeei mettóch meinisin, me úa pwal filaatá le makkeretiw lón en me tettelin.
4 Úa féri ei pwe kopwe tongeni lúkúlúk pwe ekkeei mettóch ka fen káé ussun, iir mi enlet.
5 Lemwúún Erot,* ewe kingen Jutia, a wor emén souasor itan Sekaraia lón ewe mwichen souasor itan Apia. A pwúlúweni emén fefin itan Elisapet seni familien Aaron.
6 Iir me rúúemén ra pwúng mwen mesen Kot, ese wor mwáállir lón ar feffetál lón meinisin ekkewe allúk me meinisin minne Jiowa* a apasa epwe fis.
7 Nge ese wor néúr, pún Elisapet a riit, me iir me rúúemén ra chinnap.
8 Iei a féri angangen souasor mwen Kot pokiten a tori wisen an we mwichen souasor le angang lón ewe imwenfel.
9 Me ren éérenien ekkewe souasor, a tori an fansoun le tolong lón án Jiowa* we imwenfel pwe epwe eáni ewe asoren appach mi pwokkus.
10 Nge unusen ewe mwichemmóngun aramas ra iótek lúkún lón ewe fansoun asoren appach mi pwokkus.
11 Néún Jiowa* we chónláng a pwá ngeni, a útá peliefichin ewe róngen asoren appach mi pwokkus.
12 Nge Sekaraia a osukosuk ren met a kúna, me a fókkun niwokkus.
13 Iwe nge, ewe chónláng a ereni: “Kosap niwokkus, Sekaraia, pún óm tingormaw a ketiw, me pwúlúwom we Elisapet epwe néúni emén át, me kopwe eita ngeni Jon.
14 Epwe wor óm pwapwa me mwánek chapur, me chómmóng repwe pwapwa ren an uputiw,
15 pún i epwe lapalap mwen mesen Jiowa.* Nge i esap ún wain are sókkun sakaw meinisin, me i epwe ur ren ngún mi fel pwal mwo nge me mwen an uputiw,*
16 me epwe okullu chómmóng me lein néún Israel kewe ngeni Jiowa* ar we Kot.
17 Pwal och, i epwe akkomwoló mwen Kot fiti ewe letip* me péchékkúl ussun án Elias, pwe epwe okullu letipen ekkewe sam ngeni ekkewe naw me álisi ekkewe mi álleasolap le eáni féffér mi tipáchem ussun ekkewe mi pwúng pwe epwe ammólnatá fán iten Jiowa* aramas mi mmólnetá.”
18 Sekaraia a ereni ewe chónláng: “Ifa ussun úpwe tongeni lúkú ei? Pún ngang úa chinnap, me a luló ierin pwúlúwei we.”
19 Ewe chónláng a ereni: “Ngang Kapriel, ewe mi úkkúútá mwen mesen Kot, me úa tiitiito pwe úpwe kapas ngonuk me esile ngonuk ei kapas allim.
20 Nge nengeni! kosap chúen tongeni kapas tori ewe rán ekkeei mettóch repwe pwénútá, pún kese lúkú ái keei kapas, ekkewe repwe pwénútá lón ewe fansoun mi kefililó.”
21 Nge ekkewe aramas ra sópweeló le witiwiti Sekaraia, me ra máirú ren mmangan me lón ewe imwenfel.
22 Lupwen a towu, ese tongeni kapas ngeniir, me ra meefi pwe a kerán kúna eú lángipwi me lón ewe imwenfel. Nge pokiten a awemwéch, a chék pomwe ngeniir.
23 Lupwen a wesiló an kewe ránin angang mi pin, iwe a ló ngeni imwan we.
24 Mwirin fitu rán, pwúlúwan we Elisapet a pwopwo, me a chék nónnóm lón imwan úkúúkún nimu maram, a apasa:
25 “Iei met Jiowa* a féri fán itei lón ekkeei rán. A chechchemeniei pwe epwe angei seniei ássáwei me lein aramas.”
26 Lón awonuen an maram, Kot a tiinaaló ewe chónláng Kapriel ngeni eú telinimwen Kalili itan Nasaret,
27 ngeni emén fépwúl esaamwo tori mwán mi pwonen apwúpwúlú* ngeni emén mwán itan Josef seni leimwen Tafit, nge iten ena fépwúl esaamwo tori mwán, Meri.
28 Iwe, ewe chónláng a tolong, a ereni neminnewe: “Rán allim, en mi kúna chen me ren Kot. Jiowa* a nónnóm reom.”
29 Nge a fókkun osukosuk ren an kewe kapas me a poputá le ekieki iká met sókkun kapwong ei.
30 Iwe, ewe chónláng a ereni: “Meri, kosap niwokkus, pún ka kúna chen me ren Kot.
31 Me nengeni! kopwele pwopwo me néúnatiw emén át, nge kopwe eita ngeni Jises.
32 Ei emén epwe lapalap me epwe iteni Néún ewe mi Unusen Tekia Seni Meinisin, me Jiowa* Kot epwe ngeni án seman we Tafit leenien móótun king,
33 me epwe nemenem ussun King wóón mwirimwirin Jekop kewe tori feilfeiló, me esap wor sópwólóón Mwúún we.”
34 Nge Meri a ereni ewe chónláng: “Ifa ussun epwe fis ei, nge úse mwo méúr ren* emén mwán?”
35 Ewe chónláng a ereni neminnewe: “Ewe ngún mi fel epwe feitiw wóóm me manamanen ewe mi Unusen Tekia Seni Meinisin epwe pwélukoló. Iwe, ren ena popun, ewe emén epwe uputiw epwe pin me epwe iteni Néún Kot.
36 Me nengeni! aramasom we Elisapet a pwal pwopwoásini emén át me a iei awonuen an maram inaamwo iká a chinnap me aramas ra apasa pwe i mi riit,
37 pún ese wor met esap tufich ngeni Kot.”
38 Mwirin, Meri a apasa: “Nengeni! ngang néún Jiowa* slave! Epwe fis ngeniei minne ka apasa.” Iwe, ewe chónláng a ló seni.
39 Iwe, lón ekkena rán, Meri a sái fán atapwalapwal ngeni ewe fénú mi chómmóng chukun, ngeni eú telinimwen Juta,
40 me a tolong lón imwen Sekaraia me kapwong ngeni Elisapet.
41 Iwe, atun Elisapet a rong án Meri kapwong, ewe ménúkol lón lukan a mwékút, me Elisapet a ur ren ngún mi fel
42 me a léúwommóng le kékkéwu: “Ka feiéch me lein fefin, me a feiéch ewe ménúkol lón lukom!
43 Ifa ussun úa angei ei feiéch, ren án inen ái Samol a feito rei?
44 Pún nengeni! atun ngingiin óm kapwong a tori selingei, ewe ménúkol lón lukei a mwékút ren pwapwa.
45 Mi pwal pwapwa neminnewe mi lúkú, pún epwe unusen pwénúetá ekkena mettóch Jiowa* a pwonei fán itan.”
46 Iwe, Meri a erá: “Úa mwareiti Jiowa,*
47 me úse tongeni amwéchú ái pwapwa chapur ren Kot ái Chón Amanaw,
48 pún a chechchemeni néún ei slave mi tekisosson. Pún nengeni! seni iei, meinisin táppin aramas repwe apasa pwe ngang mi feiéch,
49 pún ewe Emén mi manaman a féri féffér mi lap fán itei, me itan na mi pin,
50 me seni táppin me táppin aramas an we úméúméch a nóm wóón chókkewe mi niwokkusiti i.
51 A pwáári an manaman ren péún, a atoropasa chókkewe letiper mi lamalamtekia.
52 A asapwilatiw aramas mi wor maner seni leenien móótun nemenem me átekiatáái ekkewe mi tekisosson,
53 a unusen amétaaló ekkewe mi echik ren mettóch mi múrinné me tiinaaló ekkewe mi pisekisek fán ar aséúnapé.
54 A álisi Israel, néún chón angang, a chechchemeni an úméúméch,
55 ussun chék met a fen ereni semelapach kewe, ngeni Eperiam me ngeni mwirimwirin, feilfeiló.”
56 Meri a nóm ren úkúúkún úlúngát maram, iwe, mwirin a liwiniti pwisin imwan.
57 Iei a tori án Elisapet epwe néúnéú, me a néúnatiw emén át.
58 Iwe, chón órun kewe me aramasan kewe ra rong pwe Jiowa* a pwáári watteen úméúméch ngeni neminna, iwe ra fiti i le pwapwa.
59 Lón ewe awanúen rán ra feito pwe repwe sirikomsaisini ewe kúkkún semirit, me repwe eita seni iten seman we, Sekaraia.
60 Nge inan we a pélúweni: “Aapw! I epwe iteni Jon.”
61 Ren ei, ra ereni: “Ese wor emén aramasom a iteni ei it.”
62 Mwirin, ra pomwe ngeni seman we iká met a mochen epwe iteni.
63 Iwe, a tingor och mettóch epwe mak wóón* me a makkeei: “Itan Jon.” Ren ei, iir meinisin ra máirú.
64 Lón na chék atun a suuk awan me chénawan a pichiló me a poputá le kapas, a mwareiti Kot.
65 Me niwokkus a tori meinisin chókkewe mi nóm lón leenier we, me lón unusen ewe leeni mi chómmóng chukun, lón Jutia, ra poputá le fós ussun meinisin ekkeei mettóch.
66 Iwe, iir meinisin mi rongorong ena ra isenalong lón letiper, me apasa: “Epwe met ei kúkkún semirit epwe wiliiti?” Pún péún Jiowa* a wesewesen nóm ren.
67 Iwe, Sekaraia seman we a ur ren ngún mi fel, me i a osuni, a erá:
68 “Mwareiti Jiowa,* ewe Koten Israel, pún i a kulluiti néún kewe aramas me awora ngeniir ngaseló.
69 Me i a ngenikich emén chón amanaw* mi manaman seni lón imwen Tafit, néún we chón angang.
70 Iei met a eáni pwon me ren néún kewe soufós mi pin me lóóm.
71 A pwon pwe epwe selánikich seni chón koputach me meinisin chókkewe mi oputakich.
72 I epwe úméúméch ngenikich ussun met a eáni pwon ngeni semelapach kewe me epwe chechchemeni an we pwonen etipeeú mi pin.
73 Iei ewe pwon a ereni semelapach we Eperiam.
74 Mwirin án Kot selánikich seni chón koputach, i epwe mut ngenikich ach sipwe fel ngeni nge esap wor niwokkusun,
75 pwe sipwe túppwél me féfféri minne mi pwúng lón ánein manawach.
76 Nge en nei, kopwe iteni emén soufós néún ewe mi Unusen Tekia Seni Meinisin, pún kopwe akkomwoló mwen Jiowa* pwe kopwe ammólnatá alan kewe,
77 pwe kopwe esile ngeni néún kewe aramas ewe pwóróusen amanaw ren omusomusen ar kewe tipis,
78 pokiten án ach we Kot tong. Ei kirekiréch me tong seni láng epwe ussun ewe saram mi ttin atun tétáán akkar,
79 pwe epwe asarama chókkewe mi mómmóót lón kiroch me fán núrún máló me epwe emmweni pechech lón ewe alen kinamwe.”
80 Iwe, ewe kúkkún semirit a mááritá lón pekin inis me pekin lúkú,* me a chék nónnóm lón ewe fénúapé tori ewe rán a pwáraaló pwisin i ngeni Israel.
Footnote
^ Are “seni lón luken inan we.”
^ Krik, “ngún.”
^ Are “kófót.”
^ Are “lisowu ngeni.”
^ Ina, eché kúkkún paap.
^ Krik, “mecháán amanaw.” Mecháán man, lón Paipel lape ngeni a néúnéú pwe epwe liosuetá péchékkúl, manaman, are nemenem. Ppii ewe Glossary, “Mecháán man.”
^ Krik, “péchékkúleló lón ngún.”
