Ewe Oruuen Taropwe Ngeni Chón Korint 4:1-18
4 Ina minne, pokiten Kot a úméúméch ngenikem a wor rem ei angang, iwe áúsapw fangetá.
2 Nge ám áúa fen péútaaló ekkewe mettóch mi fis lemonomon mi ássáw, áúse otuputup are ámwááli ewe kapasen Kot. Nge ren ám áúpwe pwáraaló ewe enlet, áúa eú leenien áppirú mi múrinné ngeni iteiten mwelien letipen aramas mwen mesen Kot.
3 Ren enletin, iká ewe kapas allim áúa arongafeili a pwélúló, iwe a pwélúló lein ekkewe mi péútmwááliló,
4 lein ekkewe rese lúkú, chókkewe ewe koten ei ótóten fénúfan* a ochunaaló ekiekiir, pwe esap ttinewu wóór saramen lingen ewe kapas allim ussun ewe Kraist, ewe mi napanapeni napanapen Kot.
5 Pún ám áúse afalafala ussun pwisin ám, nge ussun Jises Kraist pwe i ewe Samol, me áúa afalafala pwe ám néúmi chón angang fán ásengesin Jises.
6 Pún Kot i ewe emén mi apasa: “Saram epwe ttinewu seni rochopwak,” me ren wóón mesen ewe Kraist i a asarama lón letipach ren ewe sile mi amwarar ussun Kot.
7 Iwe nge, a nóm rem ei wéú lón sepi mi ffér seni pwúl, pwe ewe tufich mi somwoló a pop seni Kot nge esap senikich.
8 A chómmóng met a chounikem, nge áúse sapoló. Áúa tipemwárámwár, nge a wor ám alen ngaseló,*
9 áúa kúna riáfféúmwáál, nge Kot ese likitikemiló. Aramas ra awatakem me áúa turuló lepwúl, nge áúse máló.
10 Ese lifilifil ia áúa ló ie áúa nóm lón feiengawen máló ussun chék Jises, ena a pwáári ngeni aramas pwe áúa riáfféú ussun chék Jises a riáfféú.
11 Áúa manaw, nge manawem a chék nónnóm lón efeiengaw pokiten áúa tapweló mwirin Jises. A ina ussun pwe epwe pwáári ngeni aramas pwe áúa riáfféú ussun chék Jises a riáfféú.
12 Iwe, inaamwo iká áúa nóm lón feiengawen máló, nge mwirilóón, manaw fán itemi.
13 Iei met a makketiw: “Úa lúkú, iei minne úa kapas.” Pwal ám, áúa pwáári pwe áúa eáni pwal ena lúkú, iei popun áúa kapas.
14 Pún áúa silei pwe ewe Emén mi amanawaatá Jises epwe pwal amanawakichetá, me i epwe pwal uweikichetá mwen mesen Jises.
15 Ekkeei mettóch meinisin fán ásengesimi, pwe án Kot we kirekiréch mi somwoló epwe fókkun lapóló. A lapóló atun chómmóng aramas ra mwareiti Kot ren ar kilisou ngeni.
16 Ina minne, sisap fangetá. Inaamwo iká inisich a apwangapwangoló, nge letipach me ekiekich ra sésséféló rán me rán.
17 Pún inaamwo iká ewe riáfféú epwe nóm lón chék fansoun mwochomwoch me a ppán, nge a atoto eú ling ngenikich ese wor táppin me ese wor lemuchún.
18 Ina popun, sia afóta mesach wóón ekkewe mettóch sise tongeni kúna, nge esap wóón ekkewe mettóch sia tongeni kúna. Pún ekkewe mettóch sise tongeni kúna repwe nóm tori feilfeiló chék, nge ekkewe mettóch sia tongeni kúna resap nómottam.
