Ka fen piin ekieki óm kopwe álleani ewe Paipel nge kese chúen pokiten ka pwal meefi ekkena esin memmeef asan? Chómmóng aramas ra ekieki pwe a kon áweires ar repwe álleani Paipel. Nge epwe ifa ika ka silei pwe ewe Paipel a tongeni álisuk an epwe lapóló pwapwaan manawom? Are epwe ifa ika ka kúna pwe a wor ekkóch kókkótun állea epwe tongeni álisuk le pwapwaiti? Ika ina, ka mochen ppii met sókkun feiéch ewe Paipel a tongeni awora ngonuk?

Ppii ekkeei fitu memmeef seni ekkóch aramas mi kúna feiéch atun ra poputá le álleani Paipel.

Ezekiel, ierin lap seni 20, a apasa: “Me lóóm ua usun emén chón únteng tarakú ese silei ia epwe sássáán ie. Nge ai álleani ewe Paipel a álisiei pwe epwe wor aúchean manawei. A masou ren kapasen emmwen mi álilliséch ua tongeni áeá iteiten rán.”

Frieda, ierin pwal lap seni 20, a áweweei: “Me lóóm, ngang emén mi kan songokkái. Nge pokiten ai ákkálleani Paipel, ua káé ai upwe nemeni pwisin ai memmeef. Ei mettóch a ámecheresaaló án ekkewe ekkóch repwe chiechi ngeni, iwe iei a chómmóngóló chiechiei.”

Iei met emén fefin itan Eunice, ierin lap seni 50, a erá usun Paipel, “A álisiei ai upwe aéchúeló napanapei, ekkesiwili féfféri kewe ese kon éch.”

Chókkana me pwal fite million ra kúna pwe ach ákkálleani Paipel a tongeni álisikich le pwapwaiti manawach. (Aisea 48:17, 18) A tongeni álisuk le féri kefil mi múrinné, kúnékún chiechiom mi enlet, likiitú ngeni aúrek, me lap seni meinisin, silei ewe enlet usun Kot. Ekkewe kapasen emmwen lón Paipel ra pop seni Kot, ina minne, ika ka fiti, esap tongeni lusmwáál fán eú. Kot ese tongeni awora ngenikich kapasen emmwen epwe sópwongaw.

Ewe a lamot, kopwe chék poputá le álleani Paipel. Ikkefa ekkewe mettóch mi álilliséch ra tongeni ámecheresi óm kopwe poputá me pwapwaiti?