PWÓRÓUS LÚKÚNPÉÉN | KA TONGENI WEWEITI EWE PAIPEL
Pwata Kopwe Achocho le Weweiti ewe Paipel?
“Ewe Paipel, ina eú puken lamalam mi iteféúló. Nge ám chón China ause sissilei ena puk me ese pwal lamot ngenikem.”—LIN, CHINA.
“Use mwo nge weweiti ekkewe puk mi pin ám chón Hindu aua néúnéú. Iwe, ifa usun upwe pwal weweiti ewe Paipel?”—AMIT, INDIA.
“Ua súféliti ewe Paipel pwe ina eú puk minen lóóm me ua pwal rongorong pwe chómmóng aramas ra néúni. Nge pwisin ngang usaamwo kúna eú Paipel.”—YUMIKO, JAPAN.
Chómmóng aramas wóón unusen fénúfan ra fókkun súféliti ewe Paipel. Nge neman ra silei ekis chék masouan are rese fen silei. Ina usun ren fite million aramas mi nónnóm Asia, nge a pwal ina usun lón ekkewe chómmóng fénú ikewe ewe Paipel a chéú ie.
Iwe nge, eli kopwe eis, ‘Pwata upwe mochen weweiti masouen ewe Paipel?’ Óm weweiti weween masouen ena puk mi pin epwe tongeni álisuk lón ekkeei mettóch:
-
Kúna pwapwa me menemenéch
-
Pwákini osukosuk lón famili
-
Likiitú fán aúrek
-
Ámúrinnééló óm riri ngeni aramas
-
Néúnéúéchú moni
Áwewe chék ren Yoshiko lón Japan. I a ekieki ika met ena puk, Paipel, a pwóróus usun, iwe a filatá an epwele pwisin álleani. Met mwirilóón? Iei met a erá: “Ewe Paipel a álisiei ai upwe kúna lamoten manawei me ngeniei ápilúkúlúk fán iten mwachkkan.” A pwal erá pwe a meefi aúchean manawan iei. Amit, ewe sia aloni alon me mwan a pwal filatá an epwe etittina ewe Paipel. A erá: “Ua máirú. Ewe Paipel a masou ren pwóróus mi álilliséch fán iten meinisin aramas.”
Ewe Paipel a fen wesewesen álisi fite million aramas. Pwata kese pwisin etittina ewe Paipel me ppii ifa usun a tongeni álisuk?
