PWÓRÓUS LÚKÚNPÉÉN | IFA USUN KOPWE LIKIITÚ FÁN AÚREK?
Aúrek A Nóm Ekis Meinisin!
Iei alon Paul seni Zimbabwe: “Ua ló kamé enem nge ese wor och me lúkún cookies nge a fókkun mémmóng! Sorotáán, ese chúen wor mwéngé lón ekkewe sitowa.”
Janet seni Merika a erá: “Pwúlúwei a ereniei pwe epwe sú senikem. Ifa usun upwe likiitú fán ena kirikiringaw? Epwele fet nei kewe?”
Alona seni Israel a erá: “Atun ekkewe sáireng ra ttik, ua sú ngeni eú leenien op me konoló atun ekkewe pakutang ra púng. Peei kewe ra chúen chchech mwirin fitu awa.”
Sia nónnóm lón “fansoun weires” a chómmóngóló aúrek. (2 Timoty 3:1) Chómmóng ra fókkun osukosuk ren moni, tatakkisin famili, maun, samau mi chéú me feiengaw watte. Kapachelong ach keei pwisin aúrek áwewe chék: ‘Ewe pwo ua meefi wóón inisi mi kanser?’ ‘Epwe ifa nónnómun fénúfan atun nei kewe ra wattetá?’
Esap meinisin aúrek ra ngaw. Sia meefi ekis aúrek mwen test, féri mettóch mwen mesen aramas are interview fán iten angang. Ach meefi aúrek pwe eú mettóch epwe efeiengawakich a eú minen túmún ngenikich. Nge aúrek mi kon ssenúk ina eú feiengaw. Eú repot usun lap seni 68,000 aramas a pwáraatá pwe pwal mwo nge ekis aúrek a tongeni efisi án emén epwe mwittir máló. Iwe Jesus a eis: “Iö leimi epwe tongeni atama manauan ren an öürek?” Ren enletin, aúrek ese tongeni attama manawach. Ina popun Jesus a éúréúra: ‘Ousap öürek.’ (Mateus 6:25, 27) Nge epwe ifa usun sisap aúrek?
Pélúwen ena kapas eis a wewe ngeni ach sipwe eáni tipachem, túmúnú ach lúkúlúk wóón Kot me ápilúkúlúkéch. Ikaamwo sise mwo kúna fansoun weires iei nge neman sipwe kúna. Sipwe ppii ifa usun án Paul, Janet me Alona apwénúetá ekkena mettóch a álisiir le likiitú.
