Ewe Paipel a apwúngú pwe manaw “a uren weires.” (Hiop 14:1) Ikenái, emén me emén a pwisin wor en me an osukosuk. Nge ekkóch aramas ra meefi pwe ese fókkun chúen wor ar ápilúkúlúk, usun itá nge ra nóm lón eú pwang mi rochopwak. A pwal ina usun meefiom? Ika pwe ina, kopwe lúkúlúk pwe ewe Paipel a awora ápilúkúlúk mi enlet, esap fán itom chék nge fán iten aramas meinisin. Áwewe chék:

• Ewe Paipel a áiti ngenikich pwe Jiowa Kot a tipeni seni lepoputáán mettóch mi wesewesen múrinné fán itach.​—Keneses 1:28.

• Jiowa Kot a pwonei pwe ach ei fénúfan epwe eú paratis.​—Aisea 65:21-25.

• Epwe fókkun pwénúetá ena pwon. Pwärätä 21:3, 4 a apasa:

  “Imwen Kot a nom lein aramas! Iwe, Kot epwe nonom lefiler o ir repwe aramasan, nge püsin Kot epwe etiir pwe epwe ar Kot. Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”

Ena ápilúkúlúk esap chék eú áneán. Jiowa Kot epwe wesewesen apwénúetá, me a nóm ren ewe manaman me mochen an epwe féri. Ewe ápilúkúlúk ewe Paipel a kapas usun mi núkúchar, me a pélúwenéchú ei kapas eis “Met lamoten ai upwe chúen manaw?”

CHECHCHEMENI EI: Inaamwo ika meefiom a usun efóch mwoota mi nupolup nge ewe pwóróusen ápilúkúlúk lón Paipel a tongeni usun efóch angké epwe anúkúcharóketiw.

MET KA TONGENI FÉRI IEI: Poputá le kúkkútta lón ewe Paipel met a apasa usun ach we enletin ápilúkúlúk fán iten mwachkkan. Ekkewe Chón Pwáraatá Jiowa repwe pwapwa le álisuk. Ka tongeni chuuriir lón pwisin leeniom are katol ekkewe pwóróus mi álilliséch wóón ar Web site, jw.org. *