Lón ewe lesen mwen ei, sia fen fós usun án Jesus akkomwa lón manawan ewe angangen “afalafala ewe Pworausen Manau usun Mwün Kot.” (Lukas 8:1) A achocho le fetál fitepúkú mwail lón fénúen Israel pwe epwe afalafala ngeni aramas pwóróusen án Kot we Mwú. A mak pwóróusen án Jesus angangen afalafal lón ekkewe rúáánú Puken Kapas Allim lón Paipel. Ekkena puk ra fós usun án Kot we Mwú arapakkan fán 100, nge lón lap ngeniir pwisin Jesus ewe a fós usun. Ese mwáál ikkena ekkóch chék me lein met Jesus a apasa usun ewe Mwúún Kot atun a nónnóm wóón fénúfan.​—Johannes 21:25.

Pwata Jesus a fókkun aúcheani án Kot we Mwú atun a nóm wóón fénúfan? Eú popun, pún a silei pwe Kot a filatá i an epwe wisen Sou Nemenemen ena Mwú. (Aisea 9:6; Lukas 22:28-30) Nge i ese ekilapei an epwe angei pwisin an manaman me lingan. (Mateus 11:29; Markus 10:17, 18) I a álisatá angangen ewe Mwú esap fán iten pwisin feiéchún. Nge seni me lóóm tori iei a ákkáeúin aúcheani án Kot we Mwú * ren met epwe atoto ngeni chókkewe i a tongeer, weween Seman we mi nóm láng me ekkewe chón tapweló mwirin mi tuppwél.

Jesus a fókkun tongei Seman we mi nóm láng. (Än Salomon Fos 8:30; Johannes 14:31) A mwaar ren napanapen Seman we, áwewe chék An tong, An kirekiréch, me An pwúng. (Tuteronomi 32:4; Aisea 49:15; 1 Johannes 4:8) Ese mwáál Jesus a oput le rongorong ekkewe kapas chofona mi chéúfetál usun Seman we. Áwewe chék, ra erá pwe Kot ese áfánni riáfféún aramas me letipan ach sipwe riáfféú. Ina eú popun pwata Jesus a mwétéres le esilefeili “ewe Pworaus Allim usun ewe Mwün Kot,” pún a silei pwe ekiseló chék ena Mwú epwe amóeló ewe itengaw mi tori iten Seman we. (Mateus 4:23; 6:9, 10) Ifa usun ena Mwú epwe féri ena?

Ren ewe Mwú, Jiowa epwe féri watteen siwil fán iten feiéchún aramas. I “epwe talüpwasei chönün mas” seni wóón mesen ekkewe aramas mi tuppwél. Epwe pwal amóeló ekkewe mettóch mi efisi súrún mesen aramas, epwe féri pwe “esap chüen wor mäla ika letipeta ika kechü ika cheuch.” (Pwärätä 21:3, 4) Ren ewe Mwú, Kot epwe amóeló meinisin ekkewe riáfféú mi tottori aramas. *

 Ina popun, sise máirú ren án Jesus mwasangasang le afalafala ngeni aramas pwóróusen ewe Mwú! A silei pwe ena Mwú epwe pwáraatá wesewesen úkúkún watteen án Seman we manaman me alóllóólun an tong. (James 5:11) A pwal silei pwe ewe Mwú epwe atoto feiéch ngeni chókkewe a tongeer, ikkena iir ekkewe aramas mi tuppwél.

Jesus a nónnóm ren Seman we lón láng fite fite ier me mwen an feito fénúfan. Ena Sam a néúnéú Néún na le féri mettóch meinisin, kapachelong ekkewe láng mi lingemwarar, ekkewe fúú me mwichen fúú rese lea ren aramas, ach ei fénúfan mi lingéch, me ekkewe man mi nónnóm wóón. (Kolose 1:15, 16) Iwe nge me lein ekkena mettóch meinisin, Jesus a ákkáeúin “pwapwa ren ekewe aramasen fanüfan.”​—Än Salomon Fos 8:31.

Án Jesus tong ngeni aramas a fókkun pwáló lón an angangen afalafal. Seni lepoputáán an féri ei angang, a affata pwe a feito fénúfan ren an epwe afalafala ewe pwóróus allim ngeni ekkewe mi osupwang. (Lukas 4:18) Nge Jesus ese chék fós usun an epwe álisi aramas. Fán chómmóng a pwáraatá an tong ngeniir. Áwewe chék, lupwen eú mwichemmongun aramas a chuto ren Jesus pwe epwe rongorong an afalafal, i a “fokun tongeer o a apöchökülätä ekewe chon samau me leir.” (Mateus 14:14) Lupwen emén mwán mi úri eú watteen semmwen a apasaatá an lúkúlúk wóón án Jesus tufichin echikaraatá i ika pwe a chék mochen, iwe Jesus a fókkun tongei. Fán an kirekiréch a echikaraatá ena mwán me ereni: “Ngang üa mochen, kopwe limöch.” (Lukas 5:12, 13) Lupwen Jesus a kúna án chienan we Maria kechiw ren málóón mwongean we Lasarus, “letipan a fokun mwökütüküt o weires,” iwe a pwal “kechü.” (Johannes 11:32-36) Mwirin, a féri eú mettóch mi ámáirú, a amanawasefáli Lasarus inaamwo ika a fen rúáánú ránin an máló!​—Johannes 11:38-44.

Pwúngún, Jesus a silei pwe ewe álillis a awora lón ena atun esap nómoffóch. A mirititi pwe mwirin och fansoun, meinisin chókkewe a echikareretá repwe pwal semmwen sefál, me ekkewe a amanawasefáliir repwe pwal máló sefál. Iwe nge, Jesus a pwal silei pwe án Kot we Mwú epwe amóeló ekkena esin osukosuk feilfeiló. Ina ewe popun Jesus ese chék féri ekkewe manaman nge a pwal afalafala “ewe Pworaus Allim usun ewe Mwün Kot” fán tinikken. (Mateus 9:35) An kewe manaman a usun eú lios ren met ewe Mwúún Kot epwe féri wóón unusen fénúfan ekiseló chék. Nengeni ekkeei mettóch Paipel a apasa repwe fis lón ena atun.

•  Esap chúen wor samau me terin inis.

  “Mesen chon mesechun repwe nela, nge selingen chon selingepüng repwe sukula, chon pechemä repwe mwetemwet usun eman chia, nge ekewe chon awemwöch repwe köl fän mweireir.” Pwal och, “esap wor eman chon ewe fanü epwe apasa pwe a samau.”​—Aisea 33:24; 35:5, 6.

• Esap chúen wor máló.

  “Ekewe chon pwüng repwe fanüeni ewe fanü o nonom won tori feilfeilachök.”​—Kölfel 37:29.

  “Kot ewe Samol mi Lapalap epwe aükätiu mäla, pwe esap chüen wor tori feilfeilachök. Epwe talü chönün mas seni won mesen aramas meinisin.”​—Aisea 25:8.

• Chókkewe ra fen máló repwe manawsefál.

  “Ekewe sotup meinisin repwe rong mwelian o towu seni peiaser.”​—Johannes 5:28, 29.

  “Aramas . . . repwe manausefäl seni mäla.”​—Föför 24:15.

• Aramas resap chúen osupwangen leenier me angangen atufichin manawer.

  “Repwe aüetä imwer o nonom lon, repwe pwal fotuki irän wain o ochei uan. Esap fis pwe repwe aüetä imwer, nge eman lükür epwe nom lon. Esap pwal fis pwe repwe fotuki irä, nge eman lükür epwe mongö seni. . . . Nei chon fil repwe pwapwaiti feiöchün angangen pöür fansoun langatam.”​—Aisea 65:21, 22.

•  Esap chúen wor maun.

  “A aükätiu maun won unusen fanüfan.”​—Kölfel 46:9.

  “Ekewe mwü resap chüen maunfengen, resap pwal chüen kaiö maun.”​—Aisea 2:4.

• Esap chúen wor osupwangen mwéngé.

  “Fanüfan a awora räs, Kot ach Kot a afeiöchükich.”​—Kölfel 67:6.

  “Sokkun mongo mi chommong epwe nonnom lon ewe fonu; epwe paepaefeil won ekkewe chukuchukuta.”​—Kölfel 72:16, Testament Mi Fö.

• Esap chúen wor mwelele.

  “Kot esap manlükala ekewe chon mwelele tori feilfeilachök.”​—Kölfel 9:18.

  “A angasa ekewe chon osupwang, lupwen ra kökköri, pwal ekewe mi mwelele me chokewe esap wor ar chon alilis. Iwe, a tongei chokewe mi apwangapwang me wöüngau, a pwal amanaua ekewe mi osupwang.”​—Kölfel 72:12, 13.

Lupwen ka ekieki usun ekkena pwon mi weneiti án Kot we Mwú, ka tongeni kúna ika pwata Jesus a fókkun aúcheani ewe Mwú? Atun a nónnóm wóón ei fénúfan a mwasangasang le afalafala pwóróusen án Kot we Mwú ngeni chókkewe mi mochen aúseling ngeni pokiten a silei pwe ena Mwú epwe amóeló meinisin ekkewe osukosuk sia kúkkúna ikenái.

Ka pwapwaiti met ewe Paipel a pwonei usun ewe Mwú? Ika ina, ifa usun kopwe alapaaló óm káé pwóróusen ena Mwú? Me met kopwe féri pwe kopwe tongeni kúna feiéch seni? Ewe lesen mwirin ei epwe pélúweni ekkena kapas eis.