Ewe Paipel a affata ngenikich met Jiowa me Néún we, Jesus Kraist, repwe féri ngeni ewe riáfféú Satan ewe Tefil a efisatá. Ewe Paipel a erá: “Iei popun pwe Nöün Kot a war an epwe atala än Tefil angang.” (1 Johannes 3:8) Ei ótót mi ngaw mi uren tipemmóng, koput, me féffér mi ngaw epwe móróló. Jesus a pwonei pwe ewe “samolun ei fanüfan,” Satan ewe Tefil, “epwe koturula.” (Johannes 12:31) Iwe, pokiten Satan esap chúen etipetipa aramas, epwe fis eú ótót sefé mi pwúng me ei fénúfan epwe wiliti eú leeni mi kinamwe.​—2 Petrus 3:13.

Met epwe fis ngeni chókkewe rese fókkun mochen siwili manawer, me ra chék sópweló le féfféri minne mi ngaw? Ekieki án Kot ei pwon mi fataffatéch: “Ekewe chon pwüng repwe fanüeni ewe fanü, pwal ekewe aramas mi wenechar repwe nonom lon. Nge ekewe aramasangau repwe kärila seni ewe fanü, pwal chokewe resap allükülük repwe üttütä seni me lon, usun irä ra üttütä seni pwül.” (Än Salomon Fos 2:21, 22) Esap chúen wor etipetip seni aramas mi ngaw. Lón ena ótót mi kinamwe, ekis me ekis chókkewe mi álleasochis repwe ngase seni ewe tipis ra álemwiri.​—Rom 6:17, 18; 8:21.

Lón ena ótót sefé, ifa usun Kot epwe amóeló minne mi ngaw? Esap ren an epwe féri aramas pwe repwe usun mwesin, me angei seniir ar tufichin pwisin filatá met ra mochen féri. Nge epwe fen áiti ngeni ekkewe aramas mi álleasochis an kewe allúk, me álisiir le kul seni ar ekiek me féffér mi ngaw.

Met Kot epwe féri ngeni ekkewe feiengaw watte mi weiweitá? A pwonei pwe ekiseló chék an we Mwú epwe nemeni fénúfan. Jesus Kraist, ewe mi filitá me ren Kot an epwe wisen Kingen ena Mwú, a wor an manaman le echikaraatá ekkewe mi semmwen. (Mateus 14:14) A pwal tongeni nemeni ásepwál, mataw, me metakkan. (Markus 4:35-41) Ina minne, pokiten epwele móróló ekkewe riáfféú mi weiweitá mi kan fiffis ngenikich ikenái, iwe aramas resap chúen usun ‘machang mi tup lon eu sär.’ (Än Salomon Afalafal 9:12) Fán án Kraist nemenem, esap chúen wor feiengaw watte epwe tori aramas.​—Än Salomon Fos 1:33.

Met epwe fis ngeni ekkewe fite fite million aramas mi pwúng ra fen máló? Iei met Jesus a erá me mwen chék an epwele amanawasefáli chienan we Lasarus: “Ngang ewe manausefäl me ewe manau.” (Johannes 11:25) Ewer, a wor án Jesus manaman le amanawasefálietá ekkewe mi máló!

Ika ka pwapwaiti ewe pwóróus óm kopwe nónnóm lón eú fénúfan ikewe mettóch mi ngaw resap chúen fis ngeni aramas mi múrinné, pwata kese achocho le káé Paipel me alapaaló óm silei usun ewe Kot mi enlet me minne a tipeni? Ekkewe Chón Pwáraatá Jiowa lón leeniom we repwe pwapwa le álisuk. Aua fókkun etiwok óm kopwe chuuriir, are mak taropwe ngeni ekkewe chón féri ei puk.