Mei Wor Emön Mi Efisi Föfföringaw Meinisin?

“U SUN itä ua küna ewe tefil.” Ina alon ewe meilapen sounfiun United Nations lon Rwanda atun a chechchemeni ar sopwongaw le eppeti ninniiloon einangen aramas lon ena fönü, atun ewe ier 1994. Pwal iei alon emön mi küna ena föfföringaw lon ena atun: “Ika emön a pwal apasa pwe esor Setan, iwe, epwe lo pwe aupwe chufengen le katol ekkewe peiasen aramas lon Rwanda, mi affata pwe ina angangen Setan.” Itä wesewesen angangen ewe Tefil ekkena mettoch mi fokkun ngaw?

Lap ngeni aramas rese ekieki pwe efisien emön chon läng mi fokkun ngaw ekkena ssenükün nni manau me kirikiringaw. Chommong ra ekieki pwe ekkena mettoch ra fis pokiten a pwisin nom rech minne mi ngaw. Ekkoch ra ekieki pwe eü mwichen aramas mi wöüöch me pöchökkül nemenier ra kan angang le monomon le amwökütü aramas seni loom ar repwe nemeni fönüfan. Iwe, a pwal wor ekkoch ra tipi ngeni mwu me sou nemenem pwe efisier meinisin ekkewe pwüngüngaw me riäfföü ra kükküna.

Met om lükü? Pwata ekkena föfföringaw, kirikiringaw, me riäfföü ra chüen chöüfetäl woon unusen fönüfan inaamwo ika aramas ra achocho le pwäkiniir? Pwata usun itä aramas ra pwisin uweiirelong lon efeiengaw me rese äteneki ekkewe kapasen öüröür ra piin rong? Mi wor emön a efisi ekkena mettoch? Iö a wesewesen nemeni fönüfan? Eli kopwe mäirü ren pölüwer.