A Pwälo ewe Samolun Ei Fönüfan
A Pwälo ewe Samolun Ei Fönüfan
IEI alon Jises ngeni ekkewe aramas lon eü atun: “Ewe samolun ei fanüfan epwe koturula.” Mwirin, a pwal era pwe, ‘esap wor an nemenem won’ me “ewe samolun ei fanüfan a fen küna apwüng.” (Jon 12:31; 14:30; 16:11) Iö ei Jises a fos usun?
Ren ach ekieki alon Jises kena usun ewe “samolun ei fanüfan,” a ffat pwe ese fos usun Jiowa Kot, Seman we. Nge iö ena ewe “samolun ei fanüfan”? Ifa usun epwe “koturula,” me ifa usun a fen küna “apwüng”?
“Ewe Samolun Ei Fanüfan” a Pwisin Pwäraalo
Fän chommong, emön meilapen furio a pwisin apaetääi usun an angang, pwal ina chök usun ewe Tefil atun a sotuni nöün Kot we Jises. Mwirin än Setan pwär ngeni Jises “mwün fanüfan meinisin” a ereni: “Ngang üpwe ngonuk ar kewe nemenem meinisin pwal wöür kewe, pun ra nom fän nemeniei, nge ngang üa tongeni ngeni iö üa mochen ngeni. Iei mine are kopwe fel ngeniei, üpwe mwüt ngonuk pwe kopwe eäniir meinisin.”—Luk 4:5-7.
Ifa usun sipwe äweweei ewe sossot mi fis ngeni Jises ika pwe ekkoch ra apasa pwe ewe Tefil esap wesewesen emön nge eü chök napanap mi ngaw? Itä Jises a küna sossot seni och ekiek mi ngaw are a pwisin osukosuk le möküran mwirin an we papatais? Ika ina, nge pwata chök Paipel a apasa pwe “esap wor an tipis”? (1 Jon 3:5) Jises a änneta usun än ewe Tefil nemenem woon chon fönüfan ren an apasa pwe Tefil i “ewe samolun ei fanüfan,” “eman chon niela aramas” me “eman chon chofona.”—Jon 14:30; 8:44.
Arapakkan 70 ier mwirin än ewe Tefil sotuni Kraist, ewe aposel Jon a ächema ngeni Chon Kraist usun än ewe Tefil watteen etipetip, ren an erä pwe ‘unusen fanüfan a nom fän nemenien ewe mi ngau.’ Jon a pwal apasa pwe Setan a “atupu unusen chon fanüfan.” (1 Jon 5:19; Pwarata 12:9) A ffat pwe Paipel a fos usun “ewe samolun ei fanüfan” ewe sise tongeni küna. Nge, ifa ükükün an etipetipa chon fönüfan?
Ewe Samolun Fönüfan A Ewisa Ngeni Chienan kewe Wiser
Atun ewe Aposel Paul a mak usun än Chon Kraist fiu fän iten ar lükü, a affata ngeniir usun ewe chon oput iir. A ereniir: ‘Pun saminne sipwe maun ngeni fituk me cha, pwe ngeni ekkewe mu, are ekkewe nemenem, are ngeni ekkewe chon nemeni rochopwak won ei fonufan, pwal ngeni ekkewe chommong sokkun chonläng mi ngau.’ (Efisus 6:12, TF) Ina minne, ena maun esap chök ngeni “fituk me cha,” are aramas, nge ‘ngeni ekkewe chommong sokkun chonläng mi ngau.’
Ekkoch mineföön Paipel ra afföüni pwe, “ekkewe chonläng mi ngau” ra wesewesen wewe ngeni iir kewe mi ngaw nge rese chök wewe ngeni föfföringaw. Ina minne, ewe Tefil a äeä an nemenem ren an nöünöü chienan kewe chonläng mi ngaw mi likitalo “wesewesen lenier” we lon läng.—Juta 6.
Ewe puken oesini lon Paipel itan Taniel a pwäraalo ifa usun ‘ekkewe chon nemeni ei fonufan’ ra achocho le nemenem seni loom. Taniel a chchüngü chienan kewe chon Jus mi liwiniti Jerusalem seni ar eolo lon Papilon lon ewe 537 B.C.E. ina popun a iotekiir lon ükükün ülüngät wiik. Kot a tiinaalo emön chonläng pwe epwe alükülükü ena soufos me ereni popun an a mmangoto. A erä: “Ewe meinapen chon nangin muun Persia a eppeti ei non ukukun ruwe-me-ew ran.”—Taniel 10:2, 13, Ewe Kapasen God.
Iö ena ‘meinapen Persia’? Ena chonläng ese fos usun Sirus ewe Kingen Persia, ewe mi kirekiröch ngeni Taniel me chon fönüan we lon ena atun. Pwal eü, epwe ifa usun än emön aramas mi wisen king epwe tongeni eppeti emön chonläng lon ükükün ülüngät wiik? Nge, chechchemeni pwe emön chonläng a nielo ükükün 185,000 sounfiu mi pöchökkül lon eü chök pwiin. (Aisea 37:36) Ei ‘meinapen Persia’ mi kirikiringaw a weneiti nöün ewe Tefil chon angang mi wor an nemenem woon fönüen Persia. Nöün Kot na chonläng a apasa pwe i epwe fiusefäl ngeni ‘ewe meinapen Persia’ me pwal emön chonläng mi ngaw, ‘ewe meinapen Kris.’—Taniel 10:20.
Met weween ena? Weween, a ffat pwe mi wor ‘chon nemeni ei fanüfan,’ chokkewe sise tongeni küner, iir, ekkewe chonläng mi ngaw mi angangfengen me Setan ewe Tefil le nemeni fönüfan. Iwe nge, met ra achocho ngeni tori iei?
Ewe Samolun Fönüfan A Pwäri Enletin Napanapan
Lon ewe säingoon puk lon Paipel, itan Pwäratä, ewe aposel Jon a apworausa ifa usun Jises, ewe meilapen chonläng mi iteni Mikael, a akkufu ewe Tefil me chienan kewe chonläng mi ngaw. A pwal erä usun pwününgawen ar koturutiw me läng: “Feiengau ngeni fanüfan . . . pun Satan a feitiu remi o a fokun lingeringer pokiten an silei pwe a mochomoch chök an fansoun.”—Pwarata 12:9, 12.
Ifa usun ewe Tefil a pwäratä an song mi lap? Ewe Tefil me nöün kewe chonläng mi ngaw ra öttüres le atai fönüfan me masouan fengen me iir. Ra usun chök ekkewe furio mi rukoruk ra eäni ewe ekiek pwe repwe chök föri met epwe fis ren mocheniir. Pokiten ewe Tefil a silei pwe a chök mwochomwoch an fansoun, iwe, a äeä pekin sopai le akkalapalo mochenian aramas, ewe mi eingawalo fönü me kataloon masouan, me asopwalo manauen aramas.—Pwarata 11:18; 18:11-17.
Seni le poputään uruwoon aramas, a fen pwäpwäälo lon mwökütükütün mwuun fönüfan me lamalam än ewe Tefil mochen nemenem. Ewe manmwocho lon ewe puken Pwarata a liosuetä ekkewe nöüwisin mwu, chokkewe Setan a ngeniir “watten nemenem.” A pwal äweweei pwe ekkewe lamalam ra chiechi ngeni ekkewe mwökütükütün mwuun fönüfan nge ar chiechi mi annou. (Pwarata 13:2; 17:1, 2) Ekieki mwo eriäfföüün angangen slave, nemenemengaw, maun me osukosuk lefilen ekkewe einang mi fis lon ekkewe fitepükü ier ra lo, iwe, a efisi ninniiloon fitu million aramas. Itä emön a tongeni erä pwe ekkena mettoch mi eniuokkus mi fis lon uruwoon aramas, efisien chök aramas are ra fis pokiten amwökütüen emön chonläng mi ngaw?
Ewe Paipel a affata iö ewe mi amwökütü ekkewe sou nemenemen mwuun aramas. Aramas ra chök napanapeni napanapen ewe samolun ei fönüfan inaamwo ika rese tepereni. Me ra pwal eäni an we ekiek pwe repwe chök föri met epwe fis ren mocheniir. Nge epwe ifa ttamen än aramas küna riäfföü fän nemenien ewe Tefil?
Än ewe Tefil Ninniilo Fochofoch
Än Kraist angang atun a nonnom woon fönüfan, ina esissillen ninniiloon ewe Tefil me nöün kewe chonläng mi ngaw. Lupwen nöün Jises kewe chon käeö ra apworausa ar asüolo ekkewe chonläng mi ngaw, Jises a ereniir: “Üa küna Satan pwe a turutiu seni läng usun chök fifi.” (Luk 10:18) Alon Jises kana ra pwäratä an pwapwa atun epwe akkufu samolun ei fönüfan lupwen a liwiniti läng lon wisan we, meilapen ekkewe chonläng itan Mikael. (Pwarata 12:7-9) Eü käeö mi alollool usun ekkewe oesini lon Paipel a pwäratä pwe Jises a akkufu Setan lon läng lon 1914 are ekiselo mwirin. *
Seni ena atun, ewe Tefil a silei pwe a chök mwochomwoch an fansoun me mwen an epwe ninniilo. Inaamwo ika ‘unusen fanüfan a nom fän nemenian,’ nge fitu million aramas rese tup ren an kewe minen otuputup. Popun pun ewe Paipel a äiti ngeniir napanapen Setan me an kewe angang. (2 Korint 2:11) Ra lükülük woon alon Paul keei ngeni chienan kewe Chon Kraist: “Kot, i popun ach kinamwe, epwe müttir apachacha Satan fän pechemi.” *—Rom 16:20.
Ekiselo chök ewe Tefil epwele ninniilo fochofoch! Fän än Kraist nemenem fän tong, aramas mi pwüng repwe ewili fönüfan ngeni eü paratis. Föfförün mwänesol, koput, me tipemmong repwe morofochofocholo. Iei alon Paipel: “Esap chüen wor eman epwe chechemeni ekewe mettochun lom o ekieki usun.” (Aisea 65:17) A ifa me apwapwaan ngeni meinisin atun repwe ngase seni nemenien ewe samolun ei fönüfan mi monomonolo!
[Ekkewe Pwóróus fan]
^ par. 20 Ren pwal ekkoch pworaus ppii ewe puk Met ewe Paipel A Wesewesen Apasa? lon pekin taropwe 247-249, förien Chon Pwäratä Jiowa.
^ par. 21 Alon Paul na a tipeeü ngeni ewe äeüin oesini lon Keneses 3:15 usun än ewe Tefil ninniilo fochofoch. Paul a äweweei met epwe fis ngeni ewe Tefil ren an nöünöü eü kapasen Krik mi wewe ngeni “atatakkisi, aterechechechi, me kupukupukisi.”—Vine’s Complete Expository Dictionary of Old and New Testament Words.
[Ekis Pwóróus lón pekin taropwe 9]
Fän än Kraist nemenem fän tong, aramas mi pwüng repwe ewili fönüfan ngeni eü paratis
