Jises​—Popun An Mälo

‘Nöün Aramas . . . a feito pwe epwe fangala manauan fänäsengesiir pwe möön manauer.’​—MARK 10:45.

JISES a silei met epwe fis ngeni. A weweiti pwe nonnomun manauan esap kinamwe. A silei pwe manauan epwe chök mwochomwoch pun epwe ninilo orun 30 ierin, iwe a fokkun mmolnetä fän iten met epwe fis ngeni.

Ewe Paipel a pwäratä watteen lamoten än Jises mälo. Eü puken äwewe a apasa pwe a mak fän 175 pworausen än Jises mälo lon ewe Tesin Krik are Testament Sefö. Nge met popun Jises epwe küna riäfföü me mälo? Mi lamot sipwe silei pun an mälo a tongeni wesewesen kküü manauach.

▪ Met Jises a silei. Lon ewe säingoon ierin manauan, fän fitu a ereni nöün kewe chon käeö pwe epwe küna riäfföü me mälo. Lon säingoon an lo fiti ewe Pasofer lon Jerusalem, a ereni nöün kewe 12 aposel pwe ewe “Nöün Aramas epwe tolong le pöün  ekewe souasor mi lap me ekewe Sensen Allük. Repwe atipisi pwe epwe mäla, nge repwe atolonga lepöün ekewe chon lükün Israel. Ir repwe urumwotei o atufa, repwe wichi o niela.” * (Mark 10:33, 34) Pwata a wesewesen silei met epwe fis ngeni? 

Jises a silei usun ekkewe oesini ewe Tesin Ipru a kapas usun ren ifa usun epwe muchulo manauan. (Luk 18:31-33) Nengeni ekkoch ekkewe oesini me ekkewe wokisin lon Paipel mi äwewetiw pwönüetään.

Minne ewe Messaia epwe küna . . .

▪ Emön epwe afangemä i ren ükükün 30 föün moni silifer.​—SEKARAIA 11:12; MATTU 26:14-16.

▪ Repwe awata me attufeiti.​—AISEA 50:6; MATTU 26:67; 27:26, 30.

▪ Ra eitiwatä woon efoch irään ninni.​—KÖLFEL 22:16; FÖFÖR 5:30, TF.

▪ A peias lon peiasen emön chon pisekisek.​—AISEA 53:9; MATTU 27:57-60.

▪ A ninniilo nge esap mwo nge efoch chüün e kup.​—KÖLFEL 34:20; JON 19:33, 36.

A fen pwönütä ekkeei ren Jises me pwal chommong oesini. Ese fokkun tufich pwe Jises epwe nemeni ekkeei napanap ren an epwe pwisin apwönüetä ekkewe oesini. Ina popun, pwönüetään ekkeei oesini ra änneta pwe Kot a tinato. *

Nge met popun a lamot än Jises epwe küna riäfföü me mälo?

▪ Jises a mälo pwe epwe letelo ekkoch pworaus mi lamot. Jises a silei usun ewe popun alongolongun kapwüng mi piitä lon tänipiin Ichen. Atam me If ra filatä le älleasolap ngeni Kot ren etipetipaen ewe chonläng mi ü ngeni i. Pokiten ena föfförün ü ngeni a piitä tipemwaramwar usun än Kot pwüngün nemenem. Ar tipis a pwal efisi tipemwaramwar ika aramas repwe tufichin tuppwöl ngeni Kot fän sossot.​—Keneses 3:1-6; Hiop 2:1-5.

 Jises a ännetaöchü pölüwen ekkewe ruu mettoch mi lamot Setan a epiietä, ina än Kot pwüngün nemenem me än aramas tuppwöl ngeni Kot. Ren an unusen “aleasochis tori mäla” a ännetatä än Kot pwüngün nemenem. (Filipai 2:8) A pwal ännetatä pwe emön mwän mi unusöch a tongeni amwöchü unusen an tuppwöl ngeni Jiowa fän sossot mi fokkun äweires.

▪ Jises a mälo pwe epwe angasaalo aramas seni tipis me mälo. Ewe soufos Aisea a oesini pwe än ewe Messaia mi pwonetiw riäfföü me mälo epwe atoto omusomusen tipisin aramas. (Aisea 53:5, 10) Jises a wesewesen weweiti ena, me a tipemecheres le fangolo “manauan fänäsengesin chomong aramas pwe möön manauer.” (Mattu 20:28) An mälo a suuki alen än aramas repwe ririöch ngeni Jiowa me ngaselo seni tipis me mälo. An mälo a pwal eniwili minne a pöüt seni Atam me If ina ewe äpilükülükün manau esemuch woon fönüfan. *​—Pwarata 21:3, 4.

▪ Met kopwe tongeni föri? Seni ekkeei pworaus, sia etittina alon ewe Paipel usun Jises, ia a feito me ia, ifa usun manauan, me popun an mälo. Ach silei ekkewe pworaus mi enlet usun Jises ese chök äwena ekkewe wewengaw usun i. Nge ach etipeeüfengeni manauach me ena sile epwe atoto feiöchün manau mi mürinnö iei me manau esemuch lon mwach kan. Paipel a äiti ngenikich met a lamot sipwe föri pwe sipwe küna ekkena feiöch.

▪ Alapaalo om sile usun Jises Kraist me wisan lon än Jiowa kokkot.​—JON 17:3.

▪ Anganga om lükü Jises ren om eäni ewe sokkun manau mi pwäratä pwe ka etiwa i pwe epwe om Chon Amanau.​—JON 3:36; FÖFÖR 5:31.

Chon Pwäratä Jiowa ra pwapwa le älisuk le alapaalo om sile usun Jises Kraist, ‘Nöün [Kot] Aleman,’ ewe a atufichi ach sipwe tongeni küna ewe liffangen “manau esemüch.”​—Jon 3:16.

[Ekkewe Pwóróus fan]