Met ewe Kapas Allim?

“Ei kapas allim . . . ”​—MATTU 24:14, TF.

CHON KRAIST repwe afalafala ewe “kapas allim usun ewe mu,” me äwewe ngeni aramas pwe ena Mwu epwe nemeni fönüfan lon mwach kan fän pwüng. Nge ewe Paipel a pwal nöünöü ei fos “kapas allim” lon pwal ekkoch itiitin. Äwewe chök a fos usun “ewe kapas allim pwe i epwe amanaua kich” (Kölfel 96:2, Ewe Kapasen God); “ewe kapas allimen Kot” (Rom 15:16, TF); me “ewe kapas allim usun Jises Kraist.”​—Mark 1:1, TF.

Weween, ewe kapas allim a weneiti meinisin ekkewe pworaus mi enlet Jises me nöün kewe chon käeö ra mak usun. Mwen än Jises liwiniti läng a ereni nöün kewe chon käeö: ‘Oupwe feinno ren aramas meinisin won fonufan o oupwe ewinireno pwe repwe nei chon kaeo: oupwe papataisir fan iten ewe Sam, ewe Nau me än Kot we manaman, iwe oupwe afanafaner pwe repwe anneasosichi mettoch meinisin mine ua fen annuk ngeni kemi.’ (Mattu 28:19, 20, KG) Ina minne, Chon Kraist mi enlet rese chök afalafala aramas usun ewe Mwu nge mi lamot repwe pwal achocho le föralo chon käeö.

Nge ifa usun ekkewe ekkoch lamalam? Chommong rese weweiti weween ewe Mwu, iwe, rese tongeni asukula aramas usun. Ra chök eäni afalafal mi ekinamwei aramas äwewe chök usun musoloon tipis me lükü Jises. Ra pwal sotun luki aramas ren ar älisiir le amürinnölo manauer are aüetä pioing, sukul, me awora imw fän iten mi osupwang. Eli epwe chommongolo chon fiti ar lamalam ren ekkena sokkun feiöch, nge rese föraalo Chon Kraist mi enlet mi enletin mochen etipeeü manauer ngeni äitien Jises kewe.

Emön sou käeö usun lamalam a makkeei: “Chommong sou käeö Paipel me sou emmwen ra tipeeü ngeni pwe itä sipwe föralo nöün Jises chon käeö me asukuler le föri meinisin minne Jises a apasa. . . . A fen fataffatöch alon Jises usun ena angang. Nge sise chök föri, me unusen achocho ngeni. Pwal ren enletin, sise sile le föri.”

Pwal eü repot usun pworausen chon Katolik lon Merika a erä pwe lap ngeniir ra tipeeü ngeni pwe itä chon ar lamalam repwe afalafala ewe kapas allim. Nge lap ngeniir ra meefi pwe epwe fen öch repwe chök eäni manau mürinnö pwe epwe eü leenien äppirü ngeni ekkoch lap seni ar kapas usun. Meefien emön lon ewe repot a erä: “Angangen afalafal esap ren chök kakkapas. Nge mi lamot sipwe wiliti ewe Kapas Allim.” Ewe puk U.S. Catholic, förier ena repot, a erä chommong ra pireir le kapas usun ar lükü pokiten “itengawen ar lamalam ren än nöür kewe nöüwis kirikiringaw ngeni semirit me fataffatangawen äitier kewe.”

Emön bishop lon ewe lamalamen Methodist a erä chon an na lamalam ra tipefesen me osukosuk, rese pwora le apwönüetä wiser, me föfförür a pwal usun chök föfförün ekkewe chon lükün. Fän an letipechou a eäni ei kapas eis: “Itä wisen iö le esilefeili ewe kapas allim usun ewe Mwu?”

Ena bishop ese tongeni pwisin pölüweni an na kapas eis. Nge mi wor pölüwan. Kopwe tongeni küna pölüwan me lon ena lesen mwirin.

[Ekis Pwóróus lón pekin taropwe 6]

Ewe kapas allim a weneiti ewe Mwuun Kot me än aramas küna manau ren ar lükü Jises Kraist