Pwata Chommong Pwüpwülü Ra Sopwongaw?

“Ekoch Farisi ra feito ren [Jises] o sotuni ar repwe särei ren ar ais ngeni: ‘Ifa usun, a pwüng ngeni allükün ach lamalam pwe eman mwän epwe mwü seni pwülüan fän iten ekoch popun esap lifilifil?’”​—Mattu 19:3.

EKKOCH aramas lon fansoun Jises we ra eis ika pwüpwülü epwe tongeni nomofoch. Jises a ereniir: “Ousap aleani mine a mak lon ekewe Taropwe mi Pin, pwe seni lepoputän ewe mi föri aramas a föri mwän me fefin? Iwe, Kot a apasa, ‘Iei mine eman aramas epwe likitala saman me inan o pach ngeni pwülüan, iwe, ekewe ruoman repwe wiliti eu chök inis.’ Iei mine resap chüen ruoman, pwe eman chök. Mine Kot a rifengeni esap wor eman aramas epwe mwütifeseni.” * (Mattu 19:4-6) A ffat pwe Kot a mochen pwe ekkewe pwüpwülü repwe pwüpwülü tori mälo.

Lon chommong fönü ikenäi, arapakkan esopwun chochoon ekkewe mi pwüpwülü ra mufesen. Itä än Paipel emmwen fän iten pwüpwülü ese chüen lamot ikenäi? Pwüpwülü ra sopwongaw pokiten mi wor och mwäällin lon ena kokkot?

Nengeni ei kapas äwewe: Ruu pea pwüpwülü ra mööni taraku mi chök löllö. Eü pea ra tümünüöchü waar na me wawa öch ngeni. Iwe, war na ese ta. Nge ewe eü pea ra tümününgaw me wawa ngaw ngeni waar we. Iwe a ta me ra pöütalo. Pwata a ta, tipisin iö? Tipisin ewe waa are ewe minne waan? A ffat pwe tipisin minne waan.

Pwal usun chök, sopwongawen chommong pwüpwülü esap weween pwe mi wor mwäällin lon ena kokkotun pwüpwülü. Pun fite million pwüpwülü ra sopwöch. Ekkena pwüpwülü ra atoto pwapwa me nükünüköch ngeni famili, emön me emön me ngeni chon sopwur. Nge, pwüpwülü a usun chök efoch taraku, a lamot minne waan epwe tümünüöchü me lilimeti pwe epwe manauattam.

Ese lifilifil ika ka kerän pwüpwülü are a fen fansoun langattam, nge än Paipel öüröür fän iten nükücharen pwüpwülü a wesewesen älillisöch. Nengeni ekkeei pworaus mwirin ei.

[Pwóróus fan]