Rese Chüen Niuokkusiti ewe Sopwoloon

ORUN ewe ier 1977, Gary me Karen ra fokkun lükü pwe sopwoloon ei fönüfan a arapoto. Ina popun, ra lo seni lein telinimw me nonnom towau seni. Ra ekiekin pwisin atufichi manauer me lükün än aramas älillis. Ra mochen föri met repwe manau ren.

Ren ar repwe lipwäköch le awora tufichin manauer, ra kamö puk, fiti sukul me fos ngeni chommong aramas. Ra föri eü atake me fotuki nime irä mi uwa nge ra chök mwoch. Ra isoni chommong fotar föün irä me pisekin angang. Ra käeö le ämääri me isoni möngö an esap ngawolo. Emön chiener a äitiir kaweten man me angangen sonnei are äpwesa futuker. Karen a käeö le esilla ekkewe irä me waren irä repwe tongeni möngö ika a itelo ener. Gary a käeö förün oil seni corn, förün sitoof mechä mi äeä amüch, me aüetä ewe sokkun imw ese äeä fiifi me metakan.

Iei alon Karen: “Pokiten ngawoloon napanapen fönüfan lon ewe atun, ua lükü pwe epwe sopwolo ei otot.” Gary a apasa: “Usun chök chommong säräfö, ua achocho le aükatiw aapap, ewe maun lon Vietnam, me föfför ese pwüng. Nge ua mwittir lichippüng pun usun itä chon fönüfan repwe pwisin aroserelo.”

 Gary a pwal apasa: “Eü pwiin esor met u föri, ua angei ewe Paipel me älleani Mattu tori Pwäratä. Lon ekkewe rüanü pwiin mwirin, ua älleasefäli. Iwe, sorotä, enimuen rän, ua ereni Karen: ‘Iei sia nom lon ekkewe ränin le sopwoloon. Ekiselo chök Kot epwele limeti ei fönüfan. A lamot sipwe kütta iö kewe repwe küna manau.’” Gary me Karen ra poputä le fiti sokkopaten lamalam, me kükkütta ekkewe aramas ra ammolnatä fän iten ewe sopwoloon.

Ekiselo mwirin, emön Chon Pwäratä Jiowa a chuuriir me poputä le käeö ngeniir Paipel. Karen a chechchemeni: “Ua fokkun pwapwa pun ra äweweöchü ngeniei masouen Paipel. Ua kükkütta pworaus mi enlet usun ewe sopwoloon nge iei ua kerän küna. Mei wor äpilükülük mi nüküchar fän iten mwach kan. Nge a lamot seni ena ai poputä le chiechiöch ngeni Semei we lon läng, ewe Chon Föratä me Koten mettoch meinisin.”

Gary a apasa: “Ua kerän küna aüchean manauei. Lupwen ua poputä le käeö, use tongeni kaülo. Ua älleani än Paipel kewe oesini, etittina ekkewe pisekin ännet pwe ra pwöppwönütä, iwe ua fokkun lükü pwe Kot epwele mwöküt. Ua ekieki, ‘Itä aramas resap ammolnatä fän iten mettoch mi efeiengaw, nge fen ewe manau Kot a mochen ach sipwe manaueni.’” Gary me Karen ra äpilükülüköch usun mwachkkan. Rese chüen lolileniesini sopwoloon ei fönüfan nge ra lükü pwe Kot epwe amoielo mettoch meinisin mi eriäfföü aramas me eliwinisefälieto paratis woon fönüfan.

Ra fet Gary me Karen iei, murin rüwe me nimu som ier ra lo? Karen a apasa: “Ua achocho le apöchökküla ai lükü me tong ngeni Jiowa me älisi ekkoch ar repwe pwal ina usun. Äm me Gary aua älillisfengen pwe äm famili epwe tipeeüfengen me pöchökkül le fel ngeni Kot. Aua pwal akkotaöchü me ämecheresi nonnomun manauem pwe aupwe tongeni älisi ekkewe ekkoch.”

Gary a pwal apasa:“Ua kan iotek pwe Mwuun Kot epwe war me angasalo aramas. Iteiten ai afalafala ewe kapas allim, ua iotek pwe amwo itä mwaren emön epwe küna äpilükülük seni pworausen Mwuun Kot lon Paipel. Ren lap seni rüwe me nimu ier, Jiowa a fen kirekiröch le pölüweni ai iotek. Äua lükü pwe ekiselo chök Jiowa epwele efisi eü watteen siwil ngeni ei fönüfan, nge iei äm ause chüen niuokkusiti ewe sopwoloon.”​—Mattu 6:9, 10; 2 Piter 3:11, 12.

[Sasing lon pekin taropwe 9]

Iei Gary me Karen ra pwapwa le älisi aramas ar repwe pwal küna äpilükülüköch seni ewe pworaus lon Paipel