Ewe Paipel A Pop Seni Kot?

“Iwe, kapasen lon ekewe Toropwe mi Pin meinisin ra pop seni Ngünün Kot, ra aüchea fän iten afalafala ewe kapas mi let, ra amiritikich, ra apwüngükich o aiti ngenikich usun ach sipwe manau fän pwüng, pwe ewe aramas mi angang ngeni Kot epwe fokun tufich o lipwäköch ngeni sokun angang mürina meinisin.”​—2 TIMOTY 3:16, 17.

A IFA me manamanen alon ewe aposel Paul usun aüchean ewe Paipel! Pwüngün pwe a fos usun kinikinin ewe Paipel mi kawor lon na fansoun aramas ra eita ngeni ewe Tesin Loom. Nge ren enletin, a weneiti ekkewe wone me wonu puk meinisin lon Paipel, kapachelong ekkewe puk nöün Jises kewe chon käeö ra makkeei.

Ka aücheani ewe Paipel usun chök Paul? Ka ekieki pwe ekkewe chon makkeei Paipel ra wesewesen mak fän emmwenien än Kot we ngün mi Fel? Ina lüküen ekkewe popun Chon Kraist, iwe, ese siwil ena lükü lon ekkewe fitepükü ier mwirin. Äwewe chök, 1,300 som ier mwirin fansoun ekkewe aposel, ewe nöüwis itan John Wycliffe a lükü pwe Paipel eü “puken enlet, ese wor mwäällin.” Iei met eü puk a apasa usun alon Paul kana asan, pokiten Paipel “a feito seni Kot, ina minne, a alükülükükich pwe mi enlet äitian meinisin.” (The New Bible Dictionary)

A Sissiwil Ekiekin Aramas Usun Paipel

Iwe nge, lon ekkewe ier ra lo, a kisikisilo än aramas lükülük woon Paipel. Eü puk a apasa pwe “meinisin Chon Kraist ra [chüen] lükü met Paipel a apasa me a kan emmweni ar kewe ekiek me föfför.” (The World’s Religions) Nge, ren enletin, ese chüen ina usun.  Chommong aramas ikenäi ra lükü pwe Paipel a chök masou ren “än aramas kewe eöreni mi lükülüküngaw.” Inaamwo ika ra weweiti pwe a watte lüküen ekkewe sou makkeei Paipel, nge ra ekieki pwe a weires än ekkena sou mak rese unusöch äweweei pworaus mi alollool lon Paipel me ese nom rer ewe tipatchem a nom rech ikenäi.

Ren enletin, a chök chokükkün ekkewe aramas mi mut ngeni Paipel an epwe emmweni ar ekiek me föfför. Äwewe chök, esap pwe chommong aramas ra kan erä pwe allükün Paipel usun minne mi pwüng me mwääl a minen loom me ese chüen lamot? Chommong ra chök afalafala ekkewe allükün Paipel aramas ra pwapwaiti, are ra fen tunalo än Paipel emmwen ika mi weires ar repwe apwönüretä. Ekkoch mi kan apasa pwe iir Chon Kraist ra unusen tunalo met Paipel a apasa usun lisowumwääl, föfför mi pwor, me ünnüpuch.​—1 Korint 6:9, 10.

Pwata a ina usun? Ipükü ier loom, Sir Charles Marston, emön sou käeö pisekin loom, a äweweei ewe popun lon nöün we puk itelapan The Bible Is True (Ewe Paipel Mi Enlet, esor lon fosun Chuuk). A erä pwe aramas ra kon mwittir “etiwa ekiekin ekkewe sou mak lon ei fansoun nge rese akkomw küttafichi ika mi pwüng alor” pwe masouen ewe Paipel ese lüküchar. Aramas ra pwal eäni ena ekiek ikenäi? Epwe ifa ekiekich usun meefien ekkewe sou käeö mi appölüwa pwüngün enletin ewe Paipel? Nengeni ewe pworaus epwe tapwoto mwirin ei.