Met Jises A Apasa Usun Kot

“Esap pwal wor eman a silei ewe Sam, pwe ewe Nau chök me chokewe ewe Nau a filiiretä pwe epwe pwäri i ngeniir.”​—LUKAS 10:22.

LUPWEN Nöün Kot we mwänichi a nom läng mwen an a wiliti emön aramas, ra chiechiöch me angangfengen me Seman we fansoun langattam. (Kolose 1:15) Ina minne, ewe Nau a sileöchü ekiekin, meefien, me föfförün Seman. Mwirin, lupwen a feitiw fönüfan usun emön mwän itan Jises, a mwasangasang le asukula aramas ewe enlet usun Seman. Sia tongeni käeö chommong pworaus usun Kot ren ach aüselinga met ewe Nau a apasa.

Iten Kot A fokkun lamot ngeni Jises iten Kot we mi pin, Jiowa. Ewe Nau mi ächengicheng a mochen aramas repwe silei me paani iten Seman we. Pwal mwo pwisin itan we Jises a wewe ngeni “Jiowa i ewe Chon Amanau.” Iei alon Jises ngeni Jiowa lon iotek lon ewe pwinin me mwen epwele mälo: “Ngang üa asile ngeniir itom.” (Jon 17:26) Sisap mäirü pwe Jises a paani me pwäratä iten Kot ngeni aramas. Ekieki mwo, epwe ifa usun chon aüselinga Jises repwe weweiti ewe enlet usun Jiowa ika resaamwo fen silei itan we me weweiti weween? *

Än Kot tong mi lap Fän eü, Jises a apasa lon an iotek: “Semei, . . . ka echeniei mwen fanüfan esamwo wor.” (Jon 17:24) Atun a nonnom läng, Jises a meefi än Kot tongei, ina minne, lupwen a nom woon fönüfan a pwäri sokkopaten napanapöchün än Kot tong.

Jises a pwäratä pwe än Jiowa tong a lapalap. Jises a erä: “Pun iei usun Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Jon 3:16) Pwüngün, Kot a tongei chon fönüfan meinisin. A fokkun lap än Kot tongei chon fönüfan, ina popun, a fangolo Nöün we mi ächengicheng pwe aramas mi tuppwöl repwe ngas seni fötekin tipis me mälo me küna manau esemuch. A fokkun alollool än Jiowa we tong, esor aükükün.​—Rom 8:38, 39.

Jises a alükülükükich pwe Jiowa a fokkun tongei emön me emön chon fel ngeni. A apasa pwe Jiowa a usun chök emön chon masen siip mi aücheani emön me emön nöün siip. (Mattu 18:12-14) Jises a erä pwe ese mwo nge wor emön litchok epwe turutiw le pwül lükün tipen Jiowa. Pwal iei alon: “Meten möküremi kewe mwo nge ra lea meinisin.” (Mattu 10:29-31) Ika Jiowa a äfänni emön litchok ese nom lon fasan, epwe fen ifa me än Jiowa äfänni me tümünü emön me emön chon fel ngeni? Ika Jiowa a älleani me silei fitefoch meten mökürach, iwe itä pwata esap pwal silei titchikin pworausen manauach, äwewe chök, ach kewe osupwang, ach achocho fän weires, me ach kewe lolilen?

Semach lon Läng Lon ewe lesen mwen ei, sia küna pwe Jises i Nöün Kot äläemön. Sisap mäirü pwe lupwen ewe Nau mi ächengicheng a foffos ngeni Jiowa, a kan kör ngeni “Semei.” Enlet, ewe äkkäeüin kapas Jises a erä mi makketiw lon Paipel, ina an kör ngeni Jiowa “Semei,” lupwen a nom lon ewe imwen fel atun a 12 ierin. (Luk 2:49) Arapakkan fän 190, ewe kapas “Sam” a mak lon puken Mattu, Mark, Luk, me Jon. Jises a kan kör  ngeni Jiowa “Sememi,” “Semem,” me “Semei.” (Mattu 5:16; 6:9; 7:21) Än Jises nönnöünöü ekkeei kapas a pwäratä pwe mi tufich ngeni aramas mi tipis ar repwe chiechiöch ngeni Jiowa.

Ümöümöch me Okkomusalo Tipis Jises a silei pwe a lamot än Jiowa ümöümöch mi lapalap ngeni aramas rese unusöch. Lon an we kapas äwewe usun ewe nöün mwälechelo, Jises a alöllööü Jiowa ngeni emön sam mi tong a mwittir etiwasefäli me omusalo tipisin nöün we mi aiersefäl. (Luk 15:11-32) Alon Jises ei a alükülükükich pwe Jiowa a etittina ika a siwil letipen emön chon tipis pwe epwe tongeni pwäratä ümöümöch ngeni. Jiowa a pwapwa le omusalo tipisin emön mi aier. Jises a äweweei: “Ngang üpwe ürenikemi, ina chök usun epwe wor watten pwapwa lon läng fän iten eman chon tipis mi aier, lap seni ekewe tiwe me tiweman aramas mi pwüng, ra ekieki pwe esap wor lomoten ar repwe aier.” (Luk 15:7) Iwe, itä iö esap mochen arap ngeni ena sokkun Kot mi ümöümöch?

Chon Aüselinga iotek Me mwen än Jises feitiw fönüfan seni läng, a pwisin küna pwe Jiowa i ewe Chon “aüselinga iotek” me a pwapwaiti än nöün kewe mi tuppwöl iotek. (Kölfel 65:2) Ina popun, lupwen a afalafal woon fönüfan, Jises a äiti ngeni aramas ifa usun repwe iotek me met repwe iotek usun. A fönör, “Ousap apiapini.” A peseer ar repwe iotek pwe letipen Kot “epwe fis won fanüfan usun chök lon läng.” Sia pwal tongeni iotek iteiten rän ren anach möngö, omusomusen ach kewe tipis, me ach pworacho ngeni sossot. (Mattu 6:5-13) Jises a äweweei pwe Jiowa a usun chök emön sam mi aüselinga än nöün kewe chon angang iotekin tingor fän lükülük me letip wenechar.​—Mattu 7:7-11.

A ffat pwe Jises a achocho le äiti ngeni aramas ewe enlet usun Jiowa me i met sokkun Kot. Nge Jises a pwal mochen äiti ngeni aramas usun ewe mettoch Jiowa epwe äeä le siwili unusen fönüfan pwe epwe pwönütä met a fen aotalo ngeni fönüfan me aramas. Enlet, ina itelapen än Jises afalafal.

[Pwóróus fan]