Ka Unusen Tattapwelo Mwirin Kraist?

“Usun chok oua fen kaeo senikem, . . . oupwe pwal achocho ngeni.”​—1 TES. 4:1, TF.

1, 2. (a) Ikkefa ekkewe mettoch mi wesewesen amwarar chommong aramas ra küna lon ränin Jises we? (b) Pwata a pwal fokkun amwarar ach ei fansoun?

 KA FEN ekieki amwararen ika ka nom atun än Jises nonnom woon fönüfan? Eli ka ekieki än Jises echikarakichetä pwe sisap küna riäfföün semwen. Are, eli ka ekieki usun om pwapwa le küna me aüseling ngeni Jises pwe kopwe tongeni käeö seni are küna an föri ekkoch manaman. (Mark 4:1, 2; Luk 5:3-9; 9:11) A ifa me watteen feiöchüch ika sia nom atun än Jises föri ekkena angang! (Luk 19:37) Seni ena fansoun tori ikenäi, ese chüen wor eü täppin aramas a küna ena sokkun mettoch, iwe, minne Jises a föri woon fönüfan “ren an asor püsin inisin” esap chüen fissefäl.​—Ipru 9:26; Jon 14:19.

² Iwe nge, a pwal fokkun amwarar ach ei fansoun. Pwata? Pun sia nonnom lon ewe fansoun Paipel a eita ngeni “fansoun sopolan fanüfan” me “ekewe ränin lesopolan.” (Tan. 12:1-4, 9; 2 Tim. 3:1) Lon ena atun, Setan a koturutiw me läng. Ekiselo chök, epwele föfö me koturulong “lon Apis.” (Pwar. 12:7-9, 12; 20:1-3 TF.) Lon ei atun, a pwal wor wisach mi amwarar ach sipwe esilefeili ewe “kapas allim usun ewe mu” woon unusen fönüfan, me ereni aramas  usun ewe äpilükülükün manau lon ewe Paratis epwele feito, iwe, ei angang esap chüen fissefäl.​—Mt. 24:14, TF.

3. Mwen chök än Jises epwele feitä läng, met a ereni nöün kewe chon käeö ar repwe föri? Met a kapachelong lon ena angang?

³ Mwen än Jises epwele feitä läng, a ereni nöün kewe chon äppirü: “Oupwe chon pwarata usi lon Jerusalem, lon Jutia me Sameria, o pwal lon unusen fonufan meinisin.” (Fof. 1:8, TF) Repwe föri eü angangen asukul woon unusen fönüfan. Met popun? Pun repwe föralo chon käeö, pwal ekkoch chon tapwelo mwirin Kraist, me mwen an epwe war ewe sopwoloon. (Mt. 28:19, 20) Iwe, met sipwe föri ika sia mochen apwönüetäöchü än Kraist na allük?

4. (a) Met än Piter kapasen pesepes lon 2 Piter 3:11, 12 a menlapei? (b) Met sipwe tümünükich seni?

⁴ Nengeni mwo alon ewe aposel Piter ei: “Met sokun aramas oupwe usuni? Oupwe manaueni eu manau mi pin mi nonom fän nemenien Kot, lupwen oua witiwiti ewe Ränin Kot.” (2 Pit. 3:11, 12) Alon Piter kana ra menlapei lamoten ach mammasafichi pwe sipwe manaueni ewe manau mi fich ngeni Kot lon ekkeei ränin lesopwoloon. A kapachelong ach sipwe afalafala ewe kapas allim. Ina minne, a ifa me apwapwaan ach küna tinikkenin pwich kewe woon unusen fönüfan le apwönüetä än Jises we allük le afalafal! Nge sipwe pwal tüttümünü pwe än Setan kewe sossot rän me rän me pwisin ach kewe apwangapwang sia älemwiri rete ekisaalo ach tinikken le angang ngeni Kot. Ina minne, sipwe ppii ifa usun sipwe tongeni tattapwelo mwirin ewe Kraist.

Etiwa Wisom Kewe me ren Kot

5, 6. (a) Pwata Paul a mwareiti chienan kewe chon lükü lon Jerusalem, me met a öüröüra ngeniir? (b) Pwata sisap chipwang are tinikkop le apwönüetä wisach kewe me ren Kot?

⁵ Lon nöün ewe aposel Paul we taropwe ngeni ekkewe chon Kraist lon Jerusalem, a mwareitiir ren tuppwölür fän riäfföü. A apasa: “Oupwe chechemeni mine a fis ngenikemi me lom. Lon ekewe rän, mürin än Kot saram a tin lomi, oua küna chomong sokun riaföü, nge ousap kuf lon ekewe weires oua tolong lon.” Ewer, Jiowa a chechchemeni ar tuppwöl. (Ipru 6:10; 10:32-34) Ese mwääl, alon Paul kana ra wesewesen apöchökküla ekkena chon Ipru Chon Kraist. Iwe nge, lon chök ena taropwe, Paul a pwal öüröürer usun och mettoch mi tongeni ekisaalo ar tinikken lon än Kot angang ika rese nemenifichi. A apasa pwe Chon Kraist repwe tümünü pwe resap chipwang are künetipingen le apwönüetä än Kot allük.​—Ipru 12:25, TF.

⁶ Ena kapasen öüröür pwe sisap chipwang le apwönüetä angangen Kot kewe a pwal weneiti Chon Kraist ikenäi. Sia mirititi lamoten ach sisap fokkun aücheangawei wisach kewe, wisen Chon Kraist, are tinikkopulo lon ach angang ngeni Kot. (Ipru 10:39) Ach föri ena angang mi fel a tongeni atoto manau.​—1 Tim. 4:16.

7, 8. (a) Met epwe älisikich le akkamwöchü ach tinikken lon än Kot angang? (b) Ika sia tinikkopulo, iwe, met sipwe chechchemeni usun Jiowa me Jises?

⁷ Met epwe älisikich pwe sisap künetipingen le apwönüetä wisach ngeni Kot? Sipwe tongeni fiu ngeni ena apwangapwang ren ach ekkekilonei weween ach pwonen fangolo manauach. Sia fen pwon ngeni Jiowa pwe sipwe akkomwa ach föri letipan lon manauach, iwe, sia mochen apwönüetä ach na pwon. (Mattu 16:24) Ina minne, fän ekkoch sipwe eisini pwisin kich: ‘Ua chüen tipeppos le apwönüetä ai pwonen fangolo manauei ngeni Kot usun chök lon ewe atun ua kerän papatais? Are ua tinikkopulo seni ena atun?’

⁸ Ika ach etittina pwisin kich a affata pwe sia tinikkopulo lon ach angang ngeni Jiowa, iwe, mi mürinnö sipwe chechchemeni alon Sefanaia we mi apöchökkül. A erä: “Kosap  aitietiu poum. Ewe Samol mi Lapalap om we Kot a nom reöm, a wor an manamanen amanaua aramas. Epwe meseik reöm fän pwapwa.” (Sef. 3:16, 17) Ei kapasen alükülük a akkomw weneiti ekkewe chon Israel loom mi liwiniti Jerusalem seni ar eolo lon Papilon. Iwe nge, a pwal chüen weneiti nöün Kot aramas ikenäi. Pokiten än Jiowa ei angang sia föri, iwe, sipwe chechchemeni pwe iir me nöün we ra kan älisi me apöchökkülakich le apwönüetä wisach kewe. (Mt. 28:20; 2 Kor. 4:7) Ika sia sopwelo le föri än Kot angang fän tinikken, iwe, epwe efeiöchükich me älisikich le feffeitä lon ach lükü.

Tinikken Le “Kuttafichi Lom an Mu”

9, 10. Ifa menlapen än Jises we kapas monomon usun ewe watteen kametip, me ifa ewe lesen sia tongeni käeö seni?

⁹ Atun Jises a möngö lon imwen emön samolun Farisi, a eäni eü kapas äwewe usun eü watteen kametip. A äweweei pwe a suuk ngeni ekkoch ewe äpilükülükün tolong lon Mwuun läng. A pwal äweweei weween “künetipingen.” (Älleani Luk 14:16-21.) Ekkewe chon kökköto ngeni ewe kametip lon än Jises we kapas äwewe ra künetipingen pwe rese tongeni fiti. Ewe äemönün a erä pwe a kerän moni eü fönü, nge mi lamot epwe feilo me katol. Ewe arüüemönün a erä pwe a fen moni ekkoch nöün kow, nge a mochen sotuniir. Nge pwal emön a apasa, ‘Üa kärän angei eman pwülüei, iei mine üsap tongeni feila.’ Ese öch ekkena künetipingen. Emön mi kamö fönüan are nöün man a fen etittiner me mwan, ina pwata, ese pwal kon atapwalapwal an epwe lo etittiner. Iwe, pwata a pinepin ngeni emön mi kerän pwüpwülü an epwe etiwa ena etiwetiw mi aüchea? Esap pwata iwe ewe chon etiwetiw a fokkun song!

¹⁰ Meinisin nöün Kot aramas ra tongeni käeö eü lesen seni än Jises we kapas monomon. Ifa ena lesen? Sisap fokkun mut ngeni mettochun aion an epwe kon aüchea me rech pwe ete akukumwiri ach angang ngeni Jiowa, usun chök chokkewe lon än Jises we kapas äwewe. Ika emön Chon Kraist ese akkotaöchü mettoch lon manauan, iwe, ekis me ekis, epwe tinikkopulo lon ewe angangen afalafal. (Älleani Luk 8:14.) Ren an esap fis ena, sipwe apwönüetä än Jises ei fön: “Oupwe kuttafichi lom an mu o an pung.” (Mt. 6:33 TF) Sia pöchökkületä ren ach küna nöün Kot kewe chon angang, kükkün me watte, ar apwönüetä ena fön mi aüchea! Ina popun, chommong ra fen ekisaalo osukosuken manauer pwe repwe tongeni alapalo ar fansoun lon ewe angangen afalafal. Ra pwisin küna pwe ar tinikken le “kuttafichi lom an mu” a atoto pwapwa mi enlet me menemenöch chapur.

11. Ifa ewe pworaus lon Paipel a äweweei aüchean ach tinikken me angang ngeni Kot ren unusen letipach?

¹¹ Ren ach sipwe äweweei aüchean ach tinikken lon än Kot angang, sipwe ppii ei pworaus mi fis lon manauen King Jehoas seni Israel. Jehoas a kechiw ngeni Elisa pokiten a lolileniesini än Israel epwe kkuf ren Siria. Ena soufos a ereni an epwe nikäpichielo efoch siles awenewenen Siria, weween, Jiowa epwe awinna Israel. Itä ürürün, ewe king epwe mwasangasang ren ena pworaus. Iwe, Elisa a pwal ereni Jehoas pwe epwe kumwuchü me opunatiw ekkewe siles woon pwül. Jehoas a opuni ewe pwül fän ülüngät. Elisa a fokkun song, pun ika Jehoas a opuni ewe pwül fän nimu ika wonu, epwe wewe ngeni an epwe “akufu chon Siria tori repwe rosola.” Nge iei, Jehoas epwe chök akkufu chon Siria fän ülüngät nge esap unusen aroserelo. Jehoas ese unusen win pokiten a tinikkop. (2 King 13:14-19) Ifa ewe lesen sia käeö seni ei pworaus? Jiowa epwe chök wesewesen  efeiöchükich ika sia föri an angang ren unusen letipach fän tinikken.

12. (a) Met epwe älisikich le amwöchü ach tinikken lon än Kot angang atun sia likitü fän weiresin manauach? (b) Apworausa ifa usun ka feiöch seni om achocho lon ewe angangen afalafal?

¹² Weiresin manauach ra kan sotuni ach tinikken me tuppwöl ngeni än Kot angang. Chommong pwich kewe ra küna weires lon pekin moni. Ekkoch ra letipengaw ren ar samau mi aükü minne ra tufichin föri lon än Jiowa angang. Iwe nge, emön me emön leich mei wor met sipwe föri le amwöchü ach tinikken me sopwelo ach unusen tattapwelo mwirin Kraist. Ouse mochen katolöch ekkeei kapasen emmwen me wokisin mi makketiw lon ei pwoor itelapan “Met Epwe Älisuk Le Tattapwelo Mwirin Kraist?” Ekiekifichi ifa usun kopwe tongeni unusen apwönüretä. Ika ka föri ena, epwe enletin atoto feiöch ngonuk. Ach achocho lon ewe angangen afalafal a anükücharakich, efeiöchü manauach, me alapalo ach kinamwe me pwapwa. (1 Kor. 15:58) Pwal och, ach angang ngeni Jiowa ren unusen manauach a älisikich ‘lupwen sia witiwiti ewe Ränin Kot.’​—2 Pit. 3:12.

Kopwe Wenechar le Etittina Nonnomum

13. Ifa usun sipwe silei weween an epwe unus ach angang ngeni Kot?

¹³ Iwe nge, sipwe chechchemeni pwe ach angang ren unusen ach tufich ese alongolong woon ewe ükükün fansoun sia äeä le afalafal. A sokkofesen nonnomun emön me emön. Emön mi chök nöüni eü are ruu awa le afalafal iteiten maram a fokkun apwapwaai Jiowa ika ina chök ükükün an tufich pokiten apwangapwangen inisin. (Apöpö ngeni Mark 12:41-44.) Emön me emön epwe pwisin etittina nonnomun me an kewe tufich pwe epwe silei ika a unus an angang ngeni Kot. Kich chon äppirü Kraist sipwe etipeeü ekiekich ngeni ekiekin. (Älleani Rom 15:5; 1 Kor. 2:16) Met Jises a kon akkomwa lon manauan? A ereni ewe mwichen aramas seni Kapernaum: “Upwe fokun afalafala ewe Pworausen Manau usun Mwün Kot lon pwal ekoch telinimw, pun iei popun Kot a tinieito.” (Luk 4:43; Jon 18:37) Iwe, ekieki usun tinikkenin Jises le afalafal, me etittina  nonnomun manauom le ppii ika kopwe tongeni alapalo are amürinnölo om angangen afalafal.​—1 Kor. 11:1.

14. Ifa usun sipwe tongeni alapalo ach angangen afalafal?

¹⁴ Eli ach etittinafichi nonnomuch epwe affata pwe sia tongeni alapalo ach fansoun le afalafal. (Mt. 9:37, 38) Äwewe chök, chommong säräfö mi kerän sochungio ra alapalo ar afalafal, iwe, iei ra pwapwa le pioneer fän tinikken. Ka mochen kopwe eäni ena sokkun pwapwa? Ekkoch pwich ra fen etittina nonnomur me filatä ika ra tongeni mwöküt ngeni eü leeni lon fönüer we, are fen mwöküt ngeni ikewe mi osupwangen älillisin chon afalafal ie. Ekkoch ra käeö fosun eü fönü pwe repwe älisi aramas mi eäni ena fos. Inaamwo ika ach alapalo ach afalafal ese mecheres, nge a atoto chommong feiöch, iwe, eli sia tongeni älisi chommong pwe “repwe pwal silei ewe let.”​—1 Tim. 2:3, 4; 2 Kor. 9:6.

Leenien Äppirü lon Paipel

15, 16. Iö kewe sia tongeni äppirüür lon ar tinikken le tattapwelo mwirin Kraist?

¹⁵ Ifa usun chokkewe mi wiliti aposel ra pölüweni Jises atun a etiwer pwe repwe tapwelo mwirin? Äwewe chök, iei met Paipel a apasa usun Mattu: “A likitala meinisin o tapwela mürin.” (Luk 5:27, 28) Ekkewe chon attau, Piter me Antru, ra mwittir “likitala nöür kewe chew o tapwela mürin Jesus.” Mwirin, Jises a pwal küna James me Jon ra fiti semer we Sepeti le wonefi nöür kewe chew. Iwe, met ra föri ren än Jises etiwer? “Lon ewe chök otun ra likitala waar we me semer we o tapwela mürin.”​—Mt. 4:18-22.

¹⁶ Saul, ewe a wiliti aposel Paul, a pwal isetiw eü leenien äppirü mi mürinnö. Inaamwo ika a fen piin eriäfföü ekkewe chon tapwelo mwirin Kraist, nge a siwil me wiliti emön ‘mwän mi filitä’ pwe epwe esilei iten Kraist. “A müttir feila lon ekewe imwen felikis o a popuetä le afalafal pwe Jesus i ewe Nöün Kot.” (Fof. 9:3-22) Inaamwo ika Paul a weires me riäfföü, nge ese fokkun pöüt seni an tinikken.​—2 Kor. 11:23-29; 12:15.

17. (a) Met sia mochen föri ren ewe etiwetiw pwe sipwe tapwelo mwirin Kraist? (b) Ikkefa ekkewe feiöch sia pwapwaiti seni ach föri letipen Jiowa ren unusen letipach me pöchökkülach?

¹⁷ Sia fokkun mochen äppirü ekkena chon käeö mi mürinnö me mwittir etiwa än Jises etiwetiw nge sisap tipemwaramwar. (Ip. 6:11, 12) Ikkefa ekkewe feiöch sipwe pwapwaiti ren ach unusen tattapwelo mwirin Kraist fän tinikken? Sia küna pwapwa enlet seni ach föri letipen Kot me etiwa pwal ekkoch wis me angang mi aüchea lon ewe mwichefel. (Kölf. 40:8; älleani 1 Tesalonika 4:1.) Ikkeei ekkoch feiöch sipwe küna seni ach achocho ükükün ach tufich le tattapwelo mwirin Kraist: kinamween ekiekich me letipach, pwapwa, än Kot chen, me ewe äpilükülükün manau esemuch.​—1 Tim. 4:10.

Ka Chechchemeni?

• Ifa ewe angang mi aüchea fän itach, me met ekiekich usun?

• Ifa än aramas we apwangapwang sipwe tümünükich seni, me pwata?

• Met sipwe etittina fän wenecharen letipach?

• Met epwe älisikich le tattapwelo mwirin Kraist?

[Ekkewe Kapas Eis Fan Iten Ewe Lesen]

[Pwóór/​Sasing lón pekin taropwe 31]

Met Epwe Älisuk le Tattapwelo Mwirin Kraist?

▪ Äkkälleani än Kot Kapas iteitan, me ekilonei met ka älleani.​—1 Tim. 4:13; Kölf. 1:1-3.

▪ Iotek fansoun meinisin ren än Kot älillis me emmwen seni an we ngün mi fel.​—Sek. 4:6; Luk 11:9, 13.

▪ Chiechi ngeni chokkewe mi pwäratä ar tinikken seni letiper lon ewe angangen afalafal.​—SalF. 13:20; Ipr. 10:24, 25.

▪ Mirititi atapwalapwalen ei fansoun sia nonnom lon.​—Ef. 5:15, 16.

▪ Mirititi pwününgawen kunetipengen.​—Luk 9:59-62.

▪ Ekkekieki om pwonen fangolo manauom me somwoloon feiöchum ren om angang ngeni Jiowa me tattapwelo mwirin Kraist ren unusen letipom.​—Kölf. 116:12-14; 133:3; SalF. 10:22.