JISES a apöchökküla pwäratä süföl ngeni än Kot we Kapas, ewe Paipel. A affata ei ren napanapen an pölüweni ewe sossot me ren ewe Tefil. (Mattu 4:4-11) Ren chök äwewe, met Jises a apasa lupwen Setan a sotuni i le ewini ekkewe faü ngeni föün pilawa? Jises a pöönalo ewe sossot ren an aloni alon Moses kewe fän emmwenien ewe ngün mi fel, kopwe tongeni älleani lon Tuteronomi 8:3. Nge lupwen ewe Tefil a mochen ngeni nemenemen mwuun fönüfan meinisin fän iten chök eü föfförün fel, ifa usun Jises a pölüweni? A pwal pöönalo ena ren an apasa eü kapasen emmwen seni Paipel, kopwe tongeni älleani lon Tuteronomi 6:13.

Ekieki mwo! Inaamwo ika Jises nöün Kot we, nge a lükülük woon ewe Paipel pwe ina longolongun an kewe afalafal. Ese fokkun tunalo än Kot we Kapas ren än aramas kewe afalafal are eöreni. (Jon 7:16-18) Iwe nge, chommong nöüwisen lamalam lon ena atun rese usun Jises lon an süföliti än Kot Kapas. Pwata? Pun ra akkomwa eörenien aramas lap seni ekkewe Kapas mi Fel. Jises a tuwenewen ngeniir, iei alon: “Iwe, oua chok amoilo ewe kapasen Kot fan iten ami kapasen lom. Likotuputup ami! Aisea a fen oesiniochu usumi lupwen a apasa, ‘kkeei aramas ra asamoluei ren tinauer chok, nge letiper a touau seniei; nge esor lamoten ar fel ngeniei, pun kapasen ar afalafal mi kapasen aramas chok.’”​—Mattu 15:6-9, Testament Mi Fö Pwal Kol Fel.

Chommong me lein ekkewe lamalam woon fönüfan, ra apasa pwe ra süföliti ewe Paipel. Nge fitu lamalam ka silei pwe ra tunalo afalafal are eörenien aramas lupwen äitien Paipel a affata pwe ese tipeeü ngeni? Ekieki ekkeei ruu kapas äwewe.

 ITELAP: Nöüwisen lamalam ra eäni och sokkun itelap mi pwäralo pwe iir mi tekia seni meinisin.

MET EWE PAIPEL A WESEWESEN APASA: Jises a apwüngü ekkewe nöüwisen lamalam pokiten ra sani än aramas kör ngeniir ekkewe it mi lap me ar mochen ar repwe tekia. Iei alon Jises usur pwe ra sani “ekkewe leenien motun mi lap lon ekkewe kametip, pwal usun chok lon ar kewe sinakok. Ra pwal efich kapong seni aramas lon ekkewe leenien chulap, o ra pwal tipeni pwe aramas repwe eiten ngenir Rappai.” Mwirin Jises a ereni nöün kewe chon käeö: “Nge ami ousap eiten ngenikemi Rappai, pun mi wor emon chok noumi sense, nge ami meinisin pwipwi eu chok. Ousap pwal eiten ngeni emon Sam me won fonufan, pun mi wor emon chok Sememi, ewe lon lang.”​—Mattu 23:1-10, TF.

KAPAS EIS: Nöüwisen ei lamalam ra sani än aramas repwe kör ngeniir ekkewe it mi lap me kütta iter me lon leenier, are ra älleasochisi än Jises allük pwe resap föri ena?

ITELAP: Än aramas nöünöü ekkewe ululun lon ar fel.

MET EWE PAIPEL A WESEWESEN APASA: “Kosap föri uluulun anümwäl fän itom, kosap pwal alapalapa och mettochun pekitä lon läng are och mettochun pekitiw won fanüfan are och mettochun lon lölön failol. Kosap chapetiw ngeniir are fel ngeniir.”​—Ekistos 20:4, 5, Paipel are Testamentin Lom me Testament Söfö.

Iei makkeien ewe aposel Jon ngeni ekkewe chon Kraist: “Oupwe püsin tümwünükemi seni ekewe uluulun anümwäl.”​—1 Jon 5:21, PT.

KAPAS EIS: Ei lamalam a älleasochisi än Paipel allük mi fataffatöch ar resap nöünöü ekkewe lios me ululun lon ar fel ngeni Kot?

Ka Tongeni Küna ewe Al mi Pwüng

Inaamwo ika a kon chommong lamalam ikenäi mi sokkopat ar afalafal mi aosukosukok nge kopwe tongeni küna ewe efoch al mi feil ngeni manau. Ka tongeni esilla ewe “lamalam mi limöch o esap wor limengawan mi tiw me mwen mesen ewe Kot” pun a chommong esissillan kewe. (Jemes 1:27, Paipel: Än Kot Kapas Testament Söfö) Ekkewe wokisin lon ei lesen ra usun ekkewe esissil pen al ra emmwenuk ngeni ewe lamalam mi mürinnö.

Pwata kese tingorei emön chon Pwäratä Jiowa an epwe äwewe ngonuk pölüwen ekkeei kapas eis me rer, lon ekkeei lesen. Lupwen ka ekieki met ra apasa, kese mochen kopwe äppirü än chon Perea leenien äppirü mi mürinnö lon fansoun ewe aposel Paul. Mwirin chök ar rongorong än Paul afalafal, “ra kaeo ngeni ewe Pukepin pwe repwe nengeni ika pwe minne Paul a apasa mi fokkun pung.” (Fofor 17:11, Ewe Kapasen God) Ika kopwe usun ekkewe chon Perea le süföliti ewe Kapasen Kot me tinikken le käeö, kopwe küna ewe al mi feil ngeni manau. Iwe, epwe pwal pwisin filiom ika kopwe fetäl woon ewe al mi enlet.

[Ekis Pworous lon pekin taropwe 9]

Menni lamalam a apöchökküla aramas le käeö ewe Paipel me etittina ika met ra käeö mi wesewesen pwüng?