Än Jiowa we Kapas Mi Manau

Menlapen Pworaus Seni ewe Puken Än Salomon Fos

KING SOLOMON lon Israel a “föri ülüngeröü mwiitun.” (1 King 4:32) Sia tongeni älleaniir? Ewer. Chommong lein än Solomon kewe mwiitun ra makketiu lon ewe puken Än Salomon Fos. Ena puk a wes orun 717 B.C.E. Pwal ekkoch aramas ra makkei ekkewe ruu säingoon sopwun, Akur nöün Jake, me Lemuel ewe King. Iwe nge, ekkoch ra lükü pwe Lemuel pwal eü iten Solomon.

Ei puk mi pop seni ngünün Kot a kawor pwe “aramas repwe tipachem o silei öüröürer.” (An Salomon Fos 1:2) Ekkewe mwiitun ra älisatä tipatchem. Tipatchem a wewe ngeni ewe tufichin weweiti met a fiffis pwal ewe tufichin äeä ach sile ren ach sipwe pwäkini sokkopaten osukosuk. Ekkewe mwiitun ra pwal emiriitikich me äiti ngenikich ussun pwüng me mwääl. Ach äfänni ekkeei mwiitun me ach lefäreni ar we fön a tongeni achüngü letipach, älisatä ach pwapwa, me emmwen ngenikich manau mi sopwöch.​—Ipru 4:12.

‘KOPWE KÜTTA TIPATCHEM PWAL KAMWÖCHUNNUK WON EKEWE KAPASEN ÖÜRÖÜR’

(Än Salomon Fos 1:1–9:18)

Solomon a apasa, “Tipachem a osomong le kökkö lon ewe al.” (An Salomon Fos 1:20) Met popun sipwe aüseling ngeni tipatchem? Sopwun 2 a affata ekkewe feiöchün tipatchem. Sopwun 3 a awewei ussun ach chiechiöch ngeni Jiowa. Solomon a apasa: “Kopwe tiliken le kütta tipachem pun iei ewe aeuin ipw kopwe angei tipachem ren. Nge ren om tipachem kopwe alapala om mirit me weweöch. Kopwe kamwöchünnük won ekewe kapasen öüröür, nge kosap mwüt ngeniir repwe feil senuk.”​—An Salomon Fos 4:7, 13.

Met epwe apöchökkülakich pwe sisap kkuf ren lisowu mwääl? Ewe alimuen sopwun a pölüeni: Ren om tufichin ekiek, kopwe suuki mesom pwe kopwe küna ekkewe mettochun fönüfan mi ekketipetipa me okkotupu aramas. Kopwe pwal chechchemeni watteen ewe feiengaü seni lisowu mwääl. Sopwun 6 a öüröürakich ussun ekkewe föfför me ekiek ra efeiengaüa ewe riri lefilach  me Jiowa. Sopwun 7 a pwäratä mwökütükütün aramas mi achocho ngeni lisowu mwääl. Lon sopwun 8 sia küna aüchean me öchün tipatchem. Sopwun 9 ewe kapasen le muchuloon ekkewe mwiitun lon ekkewe walu sopwun akkom. A wor eü kapas awewe lon ei sopwun mi amwökütükich le kütta tipatchem.

Pölüen Kapas Eis Seni Ekkeei Wökisin:

1:7; 9:10​—Met popun ach niueiti Jiowa “iei popun silelap”? Ika aramas rese niueiti Jiowa, esap wor ar sile pokiten Jiowa ewe Chon Föratä mettoch meinisin. A pwal ngenikich ewe Paipel. (Rom 1:20; 2 Timoti 3:16, 17) Jiowa ewe popun sile mi enlet meinisin. Ina popun ach sile a poputä ren ach niueiti Jiowa. Tipatchem a pwal pop seni ach niueiti Kot, pokiten tipatchem a alongolong won sile. Pwal och, lupwen emön ese niueiti Jiowa, esap äeä an sile ren an epwe alingalo ewe chon Föratä.

5:3​—Met popun emön fin lisowu a iteni emön “fin ekis”? Lon Än Salomon Fos 2:16, 17, emön “fin ekis” a “manlukala ewe pwon a eäni ngeni Kot.” Aramas mi fel ngeni ekkewe kot chofona are tunalo ewe Allükün Moses, ra ussun chök emön chon ekis.​—Jeremaia 2:25; 3:13.

7:1, 2​—Met a kapachelong lon “ai kewe allük”? Afalafal lon Paipel pwal ekkewe allük sam me in ra apasawu fän iten efeiöchün meinisin lon ewe famili ra kapachelong lon ekkeei allük. A lamot pwe ekkewe kükkün repwe aüseling ngeni afalafal lon Paipel pwal ekkewe pworaus mi alongolong won Paipel seni semer kewe me iner.

8:30​—Iö ewe “sousile angang”? Lon ei kapas awewe, tipatchem a ussun chök aramas, emön sousile angang. Saminne ewe kapas awewe a chök älisikich le silei lapalapen tipatchem. Ewe sousile angang a wewe ngeni nöün Kot mwänichi, Jises Kraist, mwen an a feitiu fönüfan. “Lepoputän an angang ewe Samol mi Lapalap a föriei.” (An Salomon Fos 8:22) Ren fansoun langattam mwen an uputiu won fönüfan, Jises, ewe “sousile angang,” a angangfengen me Seman atun förütään mettoch meinisin.​—Kolose 1:15-17.

9:17​—Ifa ewe “koluk eman a soläni,” iwe, met popun a fokkun “annö”? Lon ewe Paipel, föfför lefilen mwän me fefin mi pwüpwülü a ussun chök ach ünümi konik mi mürinnö seni eü ito. Iwe, ewe konik emön a soläni a wewe ngeni ewe lisowu mwääl aramas ra föri le monomon. (An Salomon Fos 5:15-17) Pokiten aramas ra ekieki pwe met ra föri a monomonolo, iwe, ekiekir pwe ewe konik mi annö.

Ekkewe Lesen Fän Itach:

1:10-14. Sipwe mammasa pwe sisap tupulo ren ach föri och mettoch mi mwääl pokiten emön a erenikich pwe sipwe wöüöch.

3:3. Sipwe aücheani kirökiröch mi tong pwal enlet. Aramas repwe mwittir küna pwe ir lapalapach, ussun chök repwe mwittir küna epa mwaramwar mi fokkun aüchea sia mwareni. Repwe ussun itä makketiu lon lelukach, weween pwe ekkewe ruu lapalap wesewesen lapalapach.

4:18. Sile lon pekin ngün a feffeitä. Ika sipwe nonnom lon ewe saram, sipwe tipetekison me mosonoson.

5:8. Sipwe atowauakich seni köl, kachito, iternet, puk, me chassi meinisin mi etipetipakich ngeni lisowu mwääl.

5:21. Emön mi tongei Jiowa epwe ataielo an chiechiöch me Kot ren an epwe pwapwa fitu chök minich? Aapwi! Jiowa a küna met sia föri. Epwe kütta senikich liwinin ach tipis. Ina eü popun mi pöchökkül fän iten ach sipwe amwöchü limelimöch.

6:1-5. Fön mi mürinnö a kawor lon ekkeei wökisin. Ika sia fen eäni eü pwon pwe sipwe mööni an chienach liwinimmang, are wattiu moni fän iten ach sipwe mwittir wöüöchülo, nge mwirin ach ekieksefäl, sia meefi pwe ewe kokkot ese öch, sipwe ‘müttir feila ren chon  aruch o tüngormau’ ngeni pwe epwe angasakich.

6:16-19. Arapakkan sokkun föfföringaü meinisin ra kapachelong lon ekkewe fisu föfför lon ekkeei wökisin. Sipwe oputeer meinisin.

6:20-24. Käit seni Paipel seni le kükkünün a tongeni tümünü emön seni ewe ssärin lisowu mwäal. Sam me in repwe achocho le awora ena esin käit.

7:4. Sipwe amäri tong lon letipach fän iten tipatchem me weweöch.

EKKEWE MWIITUN MI EMMWENIKICH

(An Salomon Fos 10:1–29:27)

Ekkewe lusun mwiitun ra awewei pworaus ren kapas mi titchik me mwochomwoch. Ra awora chommong lesen ussun föfför, fos, me ekiek. Ekkewe mwiitun ra tongeni affata mwäälfesennin ruu mettoch are ra alöllöfengenniir.

Sopwun 10 tori 24 ra menlapei aüchean ach niueiti Jiowa. ‘Nöün Hiskia ewe kingen Juta chon angang’ ra makkei sopwun 25 tori 29. (An Salomon Fos 25:1) Ekkeei mwiitun ra äiti ngenikich chommong lesen mi lamot, kapachelong ewe lamoten ach sipwe lükülük won Jiowa.

Pölüen Kapas Eis Seni Ekkeei Wökisin:

10:6, Ewe Kapasen Kot​—Ifa ussun “an emon aramas mi ngaw kapas a amonano pwe i emon mi afeiengaw”? Aramas mi ngaü ra amonalo ar mochen le efeieingaüa aramas ren kapas mi ngar. Are eli repwe fanafanelo chök pokiten aramas ra songeitiir.

10:10​—Ifa ussun “eman mi ächiki mesan a afisätä osukosuk”? Eli “eman aramasangau” esap chök eäni “kapas rikirik” nge a pwal aopalo met a mochen föri ren pwomwen inisin, ussun chök ren an “ächiki mesan.” (An Salomon Fos 6:12, 13) Ei sokkun otupotup a tongeni eriäfföü letipen aramas.

11:31​—Met popun ekkewe aramasingaü repwe fokkun angei liwinin ar föfför? Ewe liwin lon ei mwiitun a wewe ngeni kapwüng. Lupwen emön mi pwüng a mwäällilo, eli liwinin an mwääl emirit chök. Nge lupwen emön mi ngaü a pukun tipis, pwal ese mochen kul seni, iwe, a fich ngeni liwinin an tipis mi fokkun chou.

12:23​—Ifa ussun emön a ‘tukumano sile’? Saminne sipwe unusen aopalo met sia silei. Nge, sipwe tipetekison, sisap sikasik ussun ach tipatchem.

18:19​—Ifa ussun emön ‘pwipwi mi fön letipan’ a ussun chök ‘eü telinimw mi pöchökkül’? Letipen emön a tongeni pöchökkülelo lupwen a fön letipan lupwen chienan a tipis ngeni. Letipan epwe pöchökkül ussun chök eü telinimw mi ttitilo lupwen sounfiu ra maunei. Eli esap mochen fang are omusalo ewe tipis. Kapasen anini lefiler epwe ussun chök “lokkun asamen imwen king,” mi eppeti ar pwäkini ewe osukosuk.

Ekkewe Lesen Fän Itach:

10:11-14. Ach kapas epwe apöchökküla aramas lupwen a wor sile mi pwüng lon tupuwach, letipach a mwöküt fän tong, me tipatchem a nemeni met a towu sen auach.

 10:19; 12:18; 13:3; 15:28; 17:28. Sisap kapas chommong. Sipwe ekiek mwen sipwe fos.

11:1; 16:11; 20:10, 23. Jiowa a mochen pwe sipwe wenechar lon business.

11:4. Ese öch ika sia achocho ngeni wöü me pisek nge pöütalo käeö lon ewe Paipel, fiffiti mwich, iotek, me afalafal.

13:4, Ewe Kapasen Kot. Ese naf ach “mochen” wiseni wisach lon ewe mwichefel are “mochen” manau esemuch lon ewe fönüfan sefö. Iwe, sipwe fokkun achocho le föri met Kot a kütta senikich.

13:24; 29:15, 21. Sam me in mi tongei nöür we resap chök mut ngeni an epwe föri met a mochen are tunalo mwäällin kewe. Iwe, ra apwüngü i ren ar repwe wietä minne mi mwääl seni lon letipan mwen ewe mwääl a kon pöchökkül.

14:10. Mi aükük ewe aurur sia tongeni awora fän iten osukosuk lon pekin memmeef pokiten a weires än aramas titchikin pwäralo meefien letiper, iwe, a pwal weires än aramas weweiti met a pwälo. Fän ekkoch sia wisen likiitu fän ewe osukosuk me kütta älillis seni Jiowa.

15:7. Sisap mwittir apasawu mettoch meinisin sia silei, ussun chök emön chon atake esap watiu unusen ewe pwikil lon eü chök leeni. Emön mi tipatchem epwe ussun itä amorafeili an silei ekis me ekis lon ewe fansoun mi fich ngeni.

15:15; 18:14. Ach ekieköch epwe atoto ngenikich chengel, pwal mwo nge fän osukosuk watte.

17:24. Sisap appirü aramas mi “tiparoch.” Meser ra nerikirikfetäl me rese ekkekieki minne mi lamot. Iwe, kich sipwe kütta weweöch pwe sia tongeni fetäl fän tipatchem.

23:6-8. Sisap awasölaöchü aramas pokiten sia mochen pwe epwe wor winnach.

27:21. A tongeni pwälo lapalapach lupwen aramas ra mwareitikich. A pwälo ach tipetekison lupwen sia chechchemeni pwe ach tufich a pop seni Jiowa, are lupwen ewe kapasen mwareiti a pesekich le likiitu lon ach angang ngeni i. Nge nafangaüen tipetekison a pwälo ika sia tipetekia lupwen aramas ra mwareitikich.

27:23-27. Ekkeei mwiitun ussun atake me maan fesir ra menlapei aüchean ewe kinamwe a pop seni kkotöchun manauach me tinikken lon angang. Ra pwal menlapei ewe lamoten ach sipwe lükülük won Jiowa. a

28:5. Ika ach ‘niuokusiti’ Jiowa a pwälo ren ach iotek me ach käeö ewe Paipel, sia tongeni “unusen weweiti” minne mi lamot pwe Kot epwe mut ngeni ach sipwe angang fän itan.

PWORAUS MI LAMOT

(An Salomon Fos 30:1–31:31)

Ewe kapasen le muchuloon ewe puk a kapachelong ruu pworaus mi lamot. (An Salomon Fos 30:1; 31:1) Ren an alöllöfengenni sokkopaten mettoch, Akur a affata pwe tipemmong ese tongeni mötulo. A pwal pwäri lapalapen än emön mi tipatchem solä michi nengngin. b A pwal öüröürakich ussun lamalam tekia pwal ussun ach fos lupwen sia song.

A wor fön mi aüchea lon ewe pworaus Lemuel a fen angei seni inan ussun wain me sakau pwal ussun an apwüngü aramas fän pwüng. A much ewe kapasen mwareiti fän iten emön fin pwüpwülü mi mürinnö ren ei pworaus: “Oupwe ngeni neminewe liwinin an angang. A fich ngeni pwe aramas meinisin repwe meniniti.”—An Salomon Fos 31:31.

Kütta tipatchem, etiwa emirit, alapalo om niueiti Kot, lükülük won Jiowa. A ifa me aüchean ekkewe lesen seni ekkeei mwiitun Kot a awora! Amwo sipwe apwönüetä alon ewe fön. Iei ussun sipwe meefi pwapwa pokiten sia “niuokusiti” Jiowa.—Kol Fel 112:1.

[Footnote]

[Sasing lon pekin taropwe 28]

Jiowa ewe Popun sile mi enlet meinisin

[Sasing lon pekin taropwe 30]

Met weween ‘achöfetalei silelap’?