Jises Emon Kot Are Emon Aramas?

“N GANG saramen fonufan. Are emon epwe feito mwiri, esap mo fetal lon rochopwak, pun epwe wor ewe saramen manau ren.” (Jon 8:12) Jises Kraist ewe emon a apasawu ekkena kapas. Iei met emon mwan mi tipatchem a apasa ussun Jises: “Pun sokkun tipatchem me sineilap mi auchea meinisin ra op lon i.” (Kolose 2:3) A pwal mak ekkeei kapas lon ewe Paipel: “Iwe, iei ewe manau esemuch, pwe repwe sinei en, ewe emon chok Kot mi enlet, pwal Jises Kraist ewe ka akunooto.” (Jon 17:3) Sile mi enlet a fokkun lamot ren ach sipwe pochokkul lon pekin ngun.

Aramas won unusen fonufan ra fen rongorong porausen Jises Kraist. Uruwoon fonufan a fokkun siwil pokiten Jises. Iwe, ewe pwinin maram fan iten lap ngeni ekkewe chon fonufan a alongolong won ineet aramas ra ekieki pwe Jises a fen uputiu. Alon eu puken awewe, “chommong aramas ra kan makkei B.C., fan iten eu fansoun mwen Kraist. Ra apasa A.D., are anno Domini (ierin ach Samol), fan iten eu fansoun mwirin uputiuan.” (The World Book Encyclopedia)

Iwe nge, ekkoch ekiekin aramas ussun Jises ra ufengenniir. Me ren ekkoch aramas, Jises emon mwan mi itefoulo me murinno. Nge pwal ekkoch ra apasa pwe Jises ewe Kot mi Lapalap. Ekkoch nouwisin ewe lamalamen Hindu ra apasa pwe Jises ewe Kot Krishna mi aramaselo. Iwe, Jises emon aramas chok, are emon sipwe fel ngeni? Ia a feito me ie? Ifa lapalapan kewe? Ia a nonnom ie iei mwo? Sipwe kuna lon ewe lesen mwirin ei pwe ewe Paipel a awora chommong poraus ussun Jises mi alisikich ach sipwe polueni ekkena kapas eis.