Ika pwe ese pop seni Kot ach kewe riáfféú, iwe pwata chék a wor ekkewe watteen lengita, nafangawen mwéngé ese úkútiw, maun mi fókkun efeiengaw, semmwen mi kon ssenúk ngawan, me feiengaw watte? Án Kot we Kapas, ewe Paipel a pwári úlúngát ákkáeúin popun án aramas kúna riáfféú:

1. Aramas Ra Ekieki Chék Pwisin Iir, Tipemmóng, me Oput Aramas. “Eman aramas a nemeni aramas o ariaföüür.” (Än Salomon Afalafal 8:9) Lape ngeni aramas ra nóm fán riáfféú seni pwúngúngawen chókkewe mi ekieki chék pwisin iir, chókkewe rese unuséch, are chókkewe mi kirikiringaw.

2. A Tongeni Chék Weiweitá. Aramas ra nóm fán riáfféú, pokiten ‘rese fen mwo nge silei met epwe fis ngeni manauer lesor.’ (James 4:14) Weween, fán ekkóch aramas ra chék nóm lón eú leeni lón ewe fansoun rese tepereni pwe epwe fis och feiengaw, ákseten, are aramas rese túmúnúéch are ra mwáálliló.

3. Ewe Sounemenemen ei Fénúfan mi Fókkun Ngaw. Ewe Paipel a affata ié ewe populapen án aramas kewe riáfféú. A erá: “Unusen fanüfan a nom fän nemenien Ewe mi Ngau.” (1 Johannes 5:19) ‘Ewe mi ngau,’ ina i Satan ewe Tefil, emén chónláng mi ngaw me mi fókkun péchékkúl. A piin angang ngeni Kot nge ese “fokun nom won pekin let.” (Johannes 8:44) Pwal ekkóch chónláng ra fiti Satan me ú ngeni Kot pwe repwe tongeni kútta pwisin mocheniir, iwe ra pwisin ewiliir ngeni chónláng mi ngaw. (Keneses 6:1-5) Seni ewe fansoun Satan me néún kewe chónláng mi ngaw ra ú ngeni Kot, a mmen péchékkúl me fókkun ngaw ar nemenem wóón mwékútúkútún ei fénúfan. A kon chéú ar nemenem lón ach ei fansoun. Iei, Satan a fókkun song me a “atupu unusen chon fanüfan,” iwe a efisi “feiengau ngeni fanüfan.” (Pwärätä 12:9, 12) Ren enletin, Satan i emén sounemenem mi kirikiringaw. Atun aramas ra nóm lón riáfféú, a atoto ngeni i ewe esin pwapwa mi kkóló ngawan. Iwe fen Satan ewe a efisi án aramas riáfféú, nge esap Kot.

EKIEKI EI: Emén ese sile tong me mi unusen ngaw, i chék a tongeni efisi án aramas riáfféú. Nge ewe Paipel a affata sókkofesenin ren an erá pwe: “Kot mi tong.” (1 Johannes 4:8, TF) A tipeeú ngeni napanapen Kot kewe mi fiti tong pwe, “ese fokun tufich ngeni Kot pwe epwe föri föför mi ngau, ese fokun tufich ngeni Ewe mi Unusen Manaman pwe epwe föri mine a mwäl.”​—Hiop 34:10.

Iwe nge, ese mwáál ka piin eáni ei ekiek, ‘Epwe ifa úkúkún ttamen án Kot Ewe mi Unusen Manaman epwe mut ngeni Satan an epwe sópweló an nemenem mi fókkun ngaw?’ Usun met sia fen kúna pwe Kot a fókkun oput minne mi ngaw me a wesewesen metek lupwen a kúna ach kewe riáfféú. Pwal och, an we Kapas a pesekich ach sipwe ‘likiti ngeni Kot ach öürek meinisin, pun i a ekieki met sipwe feiöch ren.’ (1 Petrus 5:7) Kot a tongekich me a nóm ren ewe manaman le áwesaaló riáfféú me pwúngúngaw, ina met ewe lesen mwirin ei epwe fós usun. *