Don me Margaret * ra pwapwaiti án néúr we nengngin me an we famili etto kunou rer. Lón ar we sáingoon mwéngéfengen, Margaret, i emén chón kuk lón an leenien angang nge iei a retire, a wisen kuku ener we macaroni mi nofit cheese, ina ewe mwéngé ekkewe rúúemén át néún néúr we nengngin ra fókkun sani.

Atun iir meinisin ra mómmóót, Margaret a ekieto ewe mwéngé me onómu lukanapen ewe cheepel. Atun a sárifatá apwélún we, a máirú atun a kúna pwe a chék wor cheese mi pwichikkar lón! Margaret a ménúki le waalong ewe mettóch mi lamot lón ena mwéngé, ina ewe macaroni!

Ese lifilifil fite ierich, are met sia silei me met a fisi ngeni manawach, nge kich meinisin sia kan mwámmwáálliló. Neman sia eáni kapas mi ámmetek, are féri mettóch mi múrinné nge esap lón fansoun mi fich, are neman sia chék túmúnúngaw are ménúkaaló och mettóch. Pwata sia kan mwámmwáálliló? Met sipwe féri atun sia mwáálliló? Mi tufich ach sipwe túmúnúkich pwe sisap mwáálliló? Ach eáni ekiek mi pwúng usun ach kewe mwáál, epwe álisikich le pélúweni ekkena kapas eis.

Atun sia sópwéch le féri och mettóch, sia pwapwa le etiwa án aramas kapasen mwareitikich pún sia meefi pwe mi fichiitikich. Atun sia mwáálliló, inaamwo ika sise tepereni are aramas rese kúna, iwe met, itá sisap pwári? Ren ach sipwe féri ena, a lamot ngenikich tipetekison.

Ika sia kon nefotofot wóón meefiach, neman sipwe sótun ekisikisaaló mwáállich kewe, tipimwáál ngeni ekkóch, are pwal mwo nge fen chofona. Lap ngeni ekkena sókkun féffér epwe chék ngaw sópwólóór. Iwe esap tongeni tawe ewe osukosuk me ekkewe ekkóch ra tongeni kúna pwúnúngawan. Inaamwo ika ese fis ngenikich och mettóch mi ngaw mwirin chék ach mwáálliló, nge mi lamot sipwe chechchemeni pwe ló, ló, ló, “kich meinisin sipwe en me püsin pwärätä föförün lon manauan ngeni Kot.”​—Rom 14:12.

Kot a eáni ekiek mi pwúng usun ewe mettóch mwáálliló. Ewe puken Kölfel a apasa pwe Kot i emén mi “lukpwetete o kirikiröch,” i “esap apwüngü aramas fansoun meinisin, esap pwal amwöchü an song tori feilfeilachök.” Kot a silei pwe aramas rese unuséch me a weweiti apwangapwangach seni leuputiwach, “a chemeni pwe kich pwül echök.”​—Kölfel 103:8, 9, 14.

Pwal och, Kot a usun emén sam mi kirekiréch, a mochen kich néún kewe sipwe eáni an ekiek usun ewe mettóch mwáálliló. (Kölfel 130:3) An we Kapas a awora chómmóng kapasen éúréúr me emmwen repwe álisikich atun sia mwáálliló me pwal atun ekkewe ekkóch ra mwáálliló.

Fán chómmóng, atun a fis och mwáál, emén a kon áeá an fansoun me péchékkúl le etipisi emén are ánneta pwe mi pwúng met i pwisin a féri are apasa. Nge ewe a fen éch seni ena, ika ka asonga emén ren met ka apasa kopwe fen chék omusomus  ngeni, áwena ewe mwáál, me achocho pwe ámi chiechi esap ta. Ka fen féri och mettóch ese pwúng mi efisi osukosuk me a pwal mwo nge aosukosukok are pwal emén? Pwata kese achocho úkúkún óm tongeni le áwena ewe mwáál nge kosap fen pwisin song ngonuk are etipisi ekkewe ekkóch? Óm péchéúló le erá pwe esap tipisum minne a fis, esap ataweei ewe osukosuk nge epwe fen alapaaló. Iwe, kopwe fen káé lesen seni, áwena, me áppirú án Kot tong me an tipemecheresin omusaaló tipis.

Iwe nge, atun emén a mwáálliló, a mmen mecheres ach sipwe pwáraatá pwe sise sani met a féri. Nge a fen éch ach sipwe álleasochisi án Jesus Kraist ei kapasen fén, a erá: “Oupwe föri ngeni aramas usun mine oua mochen repwe föri ngenikemi.” (Mateus 7:12) Lupwen ka féri och mwáál, pwal mwo nge eú mi chék kúkkún, ese mwáál ka mochen ekkewe ekkóch repwe kirekiréch ngonuk are pwal mwo nge unusen tunaló minne ka mwáálliló wóón. Iwe pwata kese fókkun achocho ngeni óm kopwe pwári ena esin kirekiréch ngeni ekkewe ekkóch?​—Efisos 4:32.

Eú dictionary a áweweei pwe a kan fis mwáálliló pokiten “ekiek ese pwúng, nafangawen sile, are túmúnúngaw.” A lamot sipwe chechchemeni pwe kich meinisin sia féri eú ekkena mettóch are fen lap seni. Nge a tongeni chókúkkúnúló met sipwe mwáálliló wóón ika sipwe ekiekifichi ekkóch ekkewe kapasen emmwen lón Paipel.

Eú me lein ekkena kapasen emmwen a mak lón Än Salomon Fos 18:13, a erá: “Are eman aramas a pälüeni mwen esamwo rongorong, ina an tiparoch epwe pwal säw.” Ewer, óm awora fansoun le rongorong ngeni ewe pwóróus me ekieki met kopwe pélúwen ngeni, epwe wesewesen álisuk óm kosap mwittir apasa are féri och mettóch mi mwáál. Ena sile ka angei seni óm aúselingéch ngeni ewe pwóróus epwe fókkun álisuk le eáni ekiek pwúng, ewe epwe túmúnuk pwe kosap mwáálliló.

Pwal eú kapasen emmwen a apasa: “Oupwe föri mine oupwe kinamwefengen me aramas meinisin ren ükükün ämi tongeni.” (Rom 12:18) Achocho úkúkún óm tongeni le awora kinamwe me tipeeú. Atun ámi angangfengen me ekkewe ekkóch, kopwe kirekiréch ngeniir me súfélitiir me achocho le apúnger me apéchékkúler. Ika a wor ekkena esin napanap lefilach, iwe ach kewe kapas me féffér mi eletipengaw repwe mecheresin musoló are ménúkúló, me ekkewe watteen mwáál ra tongeni tawe fán kinamwe.

Ppii ika mi wor met mi múrinné ka tongeni káé seni óm mwáál. A múrinné óm ekieki pwe fen iei eú fansoun fich kopwe ámááraatá napanap mi múrinné lón manawom lap seni óm kopwe kan kúnetipingen ren met ka apasa are féri. Ka meefi pwe a lamot ngonuk óm kopwe alapaaló óm pwáraatá mosonottam, kirekiréch, me nemeniéchú pwisin mochenum? Nge ifa usun ren tipetekison, kinamwe, me tong? (Kalatia 5:22, 23) Ekkena napanap ra tongeni álisuk le silei met kosap chúen féri lón en. Sótuni óm kosap kon nefotofot wóón pwisin meefiom atun ka pwákini minne ka mwáálliló wóón. Óm eáni ekkóch minen atakirikir epwe ekisikisaaló ewe osukosuk.

Ach eáni ekiek mi pwúng usun mwáálliló epwe álisikich le angang wóón atun a ppiitá. Ach meefi kinamwe epwe lapóló me pwal ach kinamwe ngeni ekkewe ekkóch. Ika sipwe achocho le káé seni met sia mwáál wóón, sipwe tipachemeló me kúna chen. Sisap chúen kon lichippúng me eáni ekiek mi ngaw usun pwisinkich. Ach silei pwe ekkewe ekkóch ra pwal angang wóón minne ra mwáálliló wóón epwe álisikich le pacheéch ngeniir. Nge ewe a kon aúchea, sia tongeni kúna feiéch ren ach káé le áppirú án Kot tong me tipemecheres le omusaaló tipis.​—Kolose 3:13.

Met, mwáállilóón Margaret we, ewe sia fen pwóróusan, mi angawaló ar we fansoun mwéngéfengen? Aapw. Meinisin iir, nge kon lien Margaret, ra chék nefotofot wóón ewe mi atakirikir me ra pwapwaiti ener we mwéngé inaamwo ika ese chúen nofit macaroni! Lón ekkewe ier mwirin, ekkewe rúúemén át ra apwóróusa ngeni néúr kewe ena pwóróus mi apwapwa usun semer kewe me iner chinnap. Ina chék eú mwáálliló!