1-2. (a) Pwata ewe aposel Paul a tongeni erá pwe tong ina ewe napanap mi lap seni meinisin? (b) Ikkefa ekkewe kapas eis sipwele pwóróus wóór?

 ATUN ewe aposel Paul a fósun lúkú, ápilúkúlúk, me tong, a apasa pwe tong are “chen a lapalap seniir.” (1 Kor. 13:13) Pwata Paul a apasa ena? Lón fansoun mwach, ese chúen lamot ach sipwe lúkú án Kot kewe pwon ussun ewe fénúfan séfé pokiten ekkena mettóch sia ápilúkúlúkú ra fen pwénútá. Nge fansoun meinisin a lamot ach sipwe tongei Jiowa me aramas. Ren enletin ach tongeer epwe chék lallapoló tori feilfeiló.

² Pokiten a lamot ach sipwe pwáppwári tong, iwe sipwele pwóróus wóón ekkeei úlúngát kapas eis. Áeúin, pwata a lamot ach sipwe tongfengen? Oruuan, ifa ussun sipwe pwáári tong lefilach? Aúlúngátin, ifa ussun sipwe akkapéchékkúla ach tongfengen?

3. Ikkefa ekkewe popun a lamot ach sipwe tongfengen lefilach?

³ Pwata a lamot ach sipwe tongfengen lefilach? Atun sia pwáári ach tong ngeni pwiich kewe sia ánnetatá pwe kich Chón Kraist mi enlet. Jises a ereni néún kewe aposel: “Are  oupwe echenifengenikemi, aramas meinisin repwe silei, pwe ämi nei chon kaiö.” (Joh. 13:35) Pwal och, ach tongfengen a etipeeúfengenikich. Paul a erá pwe tong “a enletin etipeeúfengeni aramas.” (Kol. 3:​14, NW) Iwe nge, a chúen wor pwal eú popun mi lamot ach sipwe tongfengen lefilach. Ewe aposel Jon a mak ngeni chienan kewe chón lúkú: “Eman mi echeni Kot epwe pwal fokun echeni pwiin.” (1 Joh. 4:21) Atun sia pwáári ach tongfengen lefilach, sia pwáári ach tongei Kot.

4-5. Áweweei ifa ussun ach tongei Kot a riri ngeni ach tongfengen lefilach.

⁴ Ifa ussun ach tong ngeni Kot a riri ngeni ach tong ngeni pwiich kewe? Áwewe chék, ren ewe riri lefilen ngasangasach ngeni ekkóch kifetin inisich. Atun emén tokter a cheki pichipichin waan kumwuchún péúch iká a péchékkúl are apwangapwang, iwe a tongeni silei iká mi fet ngasangasach. Met sia tongeni káé seni ei pwóróus?

⁵ Atun ewe tokter a cheki pichipichin waan kumwuchún péúch, a tongeni silei úkúúkún péchékkúlen ngasangasach. Pwal ina chék ussun, sia tongeni silei úkúúkún péchékkúlen ach tongei Kot iká sia etittina ifa úkúúkún péchékkúlen ach tongei aramas. Iká sia kúna pwe ach tongei pwiich kewe a kisikisiló, iwe a pwáári pwe ach tongei Kot a pwal kisikisiló. Nge iká sia pwáppwári ach tongei pwiich kewe iteitan, iwe a esissillatá pwe ach tongei Kot a péchékkúl.

6. Pwata a alólilen iká ach tongei pwiich kewe a kisikisiló? (1 Johannes 4:​7-9, 11)

⁶ A alólilen iká ach tongei pwiich kewe a kisikisiló. Pwata? Pún weween ach riri ngeni Jiowa a apwangapwangoló. Ewe aposel Jon a affata ena atun a áchchema ngenikich ei: “Epwe ifa usun an [eman] epwe echeni Kot, ewe esap küna, nge ese fen echeni pwiin we mi küna?” (1 Joh. 4:20) Ifa ewe lesen fán itach? Jiowa epwe chék pwapwa rech iká sia “echenifengenikich lefilach.”—Álleani 1 Johannes 4:​7-9, 11.

7-8. Ifa ussun sipwe pwáári pwe sia tongefengenikich?

⁷ Fán chómmóng án Kot we Kapas a allúkú ngenikich ach sipwe “tongfengen lefilach.” (1 Joh. 4:​11, Testament mi Fö; Joh. 15:​12, 17; Rom 13:8; 1 Tes. 4:9; 1 Pet. 1:22) Iwe nge, tong ina eú memmeef lón letipach ese wor emén a tongeni kúna. Iwe, ifa ussun sia tongeni pwáári ach tongei pwiich kewe? Ren ach kapas me féffér.

⁸ A wor chómmóng alen ach sipwe tongeni pwáári ach tongei pwiich kewe. Áwewe chék: “Oupwe kapas wenechar lefilemi.” (Sek. 8:16) “Oupwe pwal afisätä kinamwe lefilemi.” (Mark 9:50) “Oupwe fokun asamolufengenikemi lefilemi.” (Rom 12:10) “Oupwe etiwafengenikemi lefilemi.” (Rom 15:7) “Oupwe . . . amusamusfengen.” (Kol. 3:13) “Oupwe mwärelong fän wosen chiechiemi wosochou.” (Kal. 6:2) “Oupwe echipafengenikemi.” (1 Tes. 4:18) “Oupwe apöchökülafengenikemi.” (1 Tes. 5:11) ‘Oupwe iotekifengenikemi.’—Jas. 5:16.

9. Pwata ach oururu pwiich kewe a mmen aúchea lón ach pwáári pwe sia tongeer? (Pwal ppii ewe sasing.)

⁹ Sipwele etittina eú me lein ekkewe alen ach sipwe pwáári pwe sia tongei pwiich kewe. Paul a apasa: “Oupwe echipafengenikemi.” Pwata ach oururu pwiich kewe a mmen aúchea lón ach pwáári pwe sia tongeer? Me ren eú puken áweween Paipel, ewe kapas “ourur” Paul a néúnéú a wewe ngeni “án emén úkkúútá únúkkún emén pwe epwe apéchékkúla atun a nóm fán watteen  riáfféú.” Ina popun, atun sia oururu emén pwiich mi riáfféú, sia álisi an epwe sópweeló le angang ngeni Jiowa fán túppwél. Me iteiten sia oururu, sia pwáári pwe sia tongei.—2 Kor. 7:​6, 7, 13.

10. Ifa ussun ach tongei me weweiti meefien aramas a riri ngeni ach oururuur?

¹⁰ Ach tongei me weweiti meefien aramas a riri ngeni ach oururuur. Ifa ussun? Emén mi tongei aramas me weweiti meefian epwe mochen oururu me ekisikisaaló an weires. Ina popun iká sia tongei me weweiti meefien emén, epwe amwékútúkich ach sipwe oururu. Paul a áweweei pwe án Jiowa tongei aramas me weweiti meefier a amwékútú le oururuur. A erá pwe Jiowa i “ewe Sam mi eäni tong me ewe Kot mi echipakich lon mettoch meinisin.” (2 Kor. 1:3) Lón ei wokisin Paul a néúnéú ewe kapas “tong” le áweweei ewe memmeefin tongei me weweiti meefien aramas. Ina minne, Kot a iteni Semen tong are Populapen tong, pokiten a fókkun tongei me weweiti meefien aramas. Me ena esin tong a amwékútú le oururukich “lon sokopaten riaföü meinisin.” (2 Kor. 1:4) Jiowa a ekinamwei me oururu chókkewe mi nóm lón riáfféú, ussun chék án ewe puwachen konik mi limeliméch ekinamwei chókkewe mi kaka. Ifa ussun sipwe tongeni áppirú Jiowa lón ach tongei aramas me weweiti meefier me oururuur? Sia tongeni ámááraatá ekkewe napanap mi riri ngeni ach sipwe oururu aramas. Ikkefa ekkóch me lein ekkena napanap?

11. Me ren Kolose 3:12 me 1 Petrus 3:​8, ikkefa pwal ekkóch napanap epwe álisikich le tongei me oururu aramas?

¹¹ Met epwe álisikich le pwáppwári ewe tong mi lamot pwe sipwe sópweeló le ‘echipafengenikich’ iteiten rán? A lamot sipwe ámááraatá ekkewe napanap áwewe chék ren tongen pwipwi, ach meefieni meefien aramas, me kirekiréch. (Álleani Kolose 3:12; 1 Petrus 3:8.) Ifa ussun ekkena napanap repwe álisikich? Lupwen sia tongei aramas me weweiti meefier me eáni pwal ekkewe ekkóch napanap, iwe epwe amwékútúkich le oururu chókkewe mi nóm lón riáfféú. Jises a apasa, “ekewe kapas ra towu seni awemi iei somwen lelukemi. Eman aramas mi mürina a atowu mettoch mi mürina seni lon an lenien iseis mi mürina.” (Mat. 12:​34, 35) Ren ach sipwe pwáári ach tongei pwiich kewe iir mi osupwangen álillis a mmen lamot ach sipwe oururuur.

12. (a) Pwata a lamot ach sipwe túmúnúéch? (b) Ifa ewe kapas eis sipwele pwóróus wóón?

¹² Oukich meinisin sia mochen ach sipwe sópweeló le “echenifengenikich lefilach.” (1 Joh. 4:7) Iwe nge, a lamot ach sipwe chechchemeni pwe Jises a éúréúrakich pwe “epwe patapatala ewe chen lefilen aramas.” (Mat. 24:12) Jises ese apasa pwe lape ngeni néún kewe chón káé repwe úkútiw le pwáppwári tong lefiler. Nge a lamot sipwe túmúnúéch ach sisap tipetipeló ren án chón ei fénúfan rese kan pwáppwári tong. Iká ina, sipwele pwóróus wóón ei kapas eis mi lamot: Met epwe álisikich le silei úkúúkún péchékkúlen ach tongei pwiich kewe?

13. Met a tongeni álisikich le silei iká a péchékkúl ach tongei pwiich kewe?

¹³ Eú alen ach sipwe silei úkúúkún péchékkúlen ach tong, ina ren ach etittina met sia kan féri atun a ppiitá och mettóch lón manawach. (2 Kor. 8:8) Áwewe chék ren met ei aposel Piter a erá: “Nge lap seni meinisin,  oupwe fókkun tongfengen lefilemi, pún tong a pwélúoló chómmóng tipis.” (1 Pet. 4:​8, NW) Iwe minne sia féri atun pwiich kewe ra mwáálliló are ra féri och mettóch mi ámetekikich a tongeni álisikich le silei úkúúkún péchékkúlen ach tongeer.

14. Met sókkun tong a lamot sipwe pwáári me ren 1 Petrus 4:8? Áweweei.

¹⁴ Iei sipwele etittinafichi alon Piter we. Lón ewe áeúin kinikinin ewe wokisin 8, Piter a erá pwe a lamot ach sipwe “fókkun tongfengen.” Ewe popun kapas Piter a néúnéú fán iten “fókkun tongfengen,” a weneiti “emeialó.” Ewe oruuen kinikinin ena wokisin a áweweei met sia tongeni féri iká sia fókkun tongei aramas. Ach fókkun tongeer a pwélúoló tipisiir kewe. Áwewe chék, anchangei eú cheepel mi mwéchúló chómmóng limengaw wóón. Ka angei och mangaku me emeialó an epwe pwélúoló ekkena limengaw a mwéchúló, esap chék ekkóch nge chómmóng me leir. Pwal ina chék ussun, iká sia fókkun tongei pwiich kewe, sia tongeni pwélúoló are omusaaló esap chék eú are ruu met ekkewe ra mwáálliló wóón, nge “chómmóng [ar] tipis.”

15. Met sia tongeni féri iká a péchékkúl ach tongei pwiich kewe? (Kolose 3:13)

 ¹⁵ A lamot ach tong epwe fókkun péchékkúl pwe sipwe tongeni omusaaló tipisin pwiich kewe inaamwo iká a weires ngenikich. (Álleani Kolose 3:13.) Atun sia omusaaló tipisin ekkewe ekkóch, sia pwáári pwe a péchékkúl ach tong me sia mochen apwapwaai Jiowa. Met epwe pwal tongeni álisikich le omusaaló tipisin ekkewe ekkóch me túmúnú ach sisap mwittir mángaw ren ekkewe mettóch ra kan féri?

16-17. Met epwe álisikich le likitaaló mwáállilóón ekkewe ekkóch? Áweweei. (Pwal ppii ewe sasing.)

¹⁶ Sipwe nefótófót wóón án pwiich kewe napanap mi múrinné, nge esap wóón ar kewe apwangapwang. Ekieki mwo ei. Anchangei pwe ka fiti eú pari me chienom kewe lón óm we mwichefel. Ka pwapwa ren óm nónnóm rer, nge atun epwele wes ena pari ámi meinisin oua fichfengen sasing. Kese chék fichi eché sasingimi, nge fen pwal rúúaché, assoun iká ewe áechéén ese éch. Iwe iei a wor úlúché noum sasing. Nge eché me leir, ka kúna pwe emén chienom ese emelimel. Iwe met kopwe féri ngeni ena sasing? Ka télú pokiten a pwal wor rúúaché noum sasing nge meinisin ra emelimel lón, kapachelong chienom we.

¹⁷ Sia tongeni aléllééi ekkewe sasing sia isoni ngeni ekkewe fansoun sia mochen chechchemeniir. Lape ngeni sia chechchemeni  ekkewe fansoun mi apwapwa ren ach chiechifengen me pwiich kewe, nge eli lón eú atun emén pwiich a féri are apasa och mettóch mi ámmetek. Sia mochen chechchemeni ena fansoun? Sipwe achocho le namanaaló ena fansoun, ussun chék ach télú eché me lein ekkewe sasing. (SalF. 19:11; Ef. 4:32) Sisap chúen ekieki án chienach na mwáálliló pokiten a chómmóng ekkewe fansoun mi apwapwa sia chechchemeni lón ach chiechifengen. Ikkena ekkewe fansoun sia mochen chechchemeniir me aúcheaniir.

18. Met sia káé lón ei lesen ussun tong?

¹⁸ Pwata sia mochen an epwe chék péppéchékkúl ach tongfengen? Sia fen káé lón ei lesen pwe atun sia pwáári ach tongei pwiich kewe sia pwáári ach tongei Jiowa. Ifa ussun sipwe pwáári ach tongeer? Ren ach oururuur. Sia tongeni ‘echipafengenikich’ iká sia tongei me weweiti meefien pwiich kewe. Ifa ussun sipwe akkapéchékkúla ach tongfengen? Ren ach achocho úkúúkún ach tufich le omusaaló mwáállin pwiich kewe.

19. Pwata a lamot ákkáeúin lón ei fansoun ach sipwe tongefengenikich?

¹⁹ Pwata a lamot ákkáeúin lón ei fansoun ach sipwe tongefengenikich? Iei met Piter a erá: “A arapoto sopolan mettoch meinisin. Iei mine . . . oupwe tupwöl le echenifengenikemi lefilemi.” (1 Pet. 4:​7, 8) Met sia tongeni ekieki an epwe fis lón ei fansoun a arapoto sópwólóón ei ótót? Iei met Jises a ereni néún kewe chón káé: “Aramas meinisin repwe oputakemi pokiten itei.” (Mat. 24:9) Ren ach sipwe tongeni likiitú fán ena esin koput, a lamot ach sipwe akkamwéchú ach tipeeúfengen. Atun sia féri ena, Setan esap fókkun tongeni etipefesenikich, pún tong a eririfengenikich, ina ewe sókkun “tong a enletin etipeeúfengeni aramas.”—Kol. 3:​14, NW; Fil. 2:​1, 2.