Ka tipeeú ngeni ena? Fán ekkóch kich meinisin sia usun Samantha le kúna sóssót mi áweires. Napanapen ach ataweei ekkewe osukosuk a áweiresikich pwe sipwe tunosolá, epwe pwári minne sia kan aúcheani. Áwewe chék, ika sise mochen ach sipwe sáw, ese mwáál sipwe ekieki pwe alen an epwe tawe ewe osukosuk sipwe tunosolá. Nge atun a pwá enletin ewe pwóróus, lape ngeni ewe angangen tunosolá a wor pwúnúngawan. Ekieki ekkeei pwóróus fan.

Ekkewe riri ra ffér a lóngólóng wóón lúkúlúk. Atun rúúemén ra lúkúlúkfengen lefiler, ra meefi núkúnúkéch me kinamwe. Nge a lamot watteen fansoun pwe epwe wor lúkúlúk. Lúkúlúk a poputá atun aramas ra awora fansoun lefiler, pwóróusfengen fán wenechar, nge resap chék ekieki pwisin feiéchúúr. Iwe nge, lúkúlúk a tongeni ta ren eú chék féffér mi tunosolá. Me atun ewe lúkúlúk a ta, epwe fókkun weires an epwe fférsefál.

Ka fen piin tupuló ren emén ka ekieki pwe chiechiom? Ika ewer, iwe met ka meefi? Ese mwáál ka meefi metek me pwal mwo nge meefi pwe a rawangaweok. Nge itá pwata esap ina meefiom. Ese wor tipemwaramwar pwe tunosolá a tongeni atai lóngólóngun ekkewe riri mi aúchea.

Robert Innes, emén sense lón University of California, a kúna lón an we káé pwe “tunosolá a chéú.” Ina popun, tunosolá a usun chék paiking, ewin óm chiechi ngeni emén mi tunosolá ewin epwe “toruk” ena paiking tunosolá.

Ifa usun kopwe ttii sonuk ena ssáren tunosolá? Ewe Paipel a tongeni álisuk. Kese mochen ekieki ekkeei ekkóch kapasen emmwen seni Paipel.