Omu myaka ya za 1920 abazire bange batakatasine bakega amazima. Nkazarwa omu ntandikiro y’omwaka gwa 1939. Obu nabire ncari muto turi omuri Bungereza, nkagenda n’abazire bange omu nterane rero bwanyima nayekwatanisa omu Ishomero rya Kitewokurasi. N’erizoba ncayijuka oku nayemerire aha kabokisi kugira ngu mbe muringwa rero mpikane na pulatifomu, mbase kuhayo toku yange y’okubanza. Nkaba nyine emyaka mukaga konka nkaba nyine obwoba munonga bw’okureba abantu abakuzire ababire bampurikize.

Tata akampandikira ebigambo aha kakadi, kugira ngu ngume mbyekwasise omu murimo g’okuburira. Nkaba nyine emyaka munana obu nagire kuburira aha nju n’enju aha murundi g’okubanza ndi nyenka. Nkashemererwa munonga obu nyinenka yashomire aha kakadi kange, kandi akahika ari kwikiriza n’ekitabo ekiri kugira ngu, “Reka Ruhanga abe ow’amazima”! (Let God Be True!) Nkahika ninza kukigambira tata. Omurimo g’okuburira n’enterane bikaba nibituma nashemererwa kandi binkwasa kukizaho kugira ecetengo c’okuhereza Yehova omu murimo g’obwire bwona.

Tata ku yamazire kumpandikisa ngu ngume ndi kutunga Omunara g’Omurinzi ogwange nkakizaho kukunda Bibuli. Ku gwabire nigwija nkaba nimpika ndi kugushoma. Nkakizaho kwesiga Yehova rero catuma namweha.

Omu mwaka gwa 1950 ab’omu ka yitu twena tukaza omu kiterane kihango omuri New York. Aha Rwakana, 3 Okwamunana omutwe gw’eryo izoba gukaba nigugira ngu, “Izoba ry’abamishonari.” Eryo izoba mwenetata Carey, Barber, owizire kuza omu Kakiko k’Abarisa akahereza toku y’okubatizibwa. Aha muheru gwa toku yeye akabuza ababire barabatizibwe ebibuzo  bibiri, rero nanye nayemerera nagarukamu ngu, “Yego!” Nkaba nyine emyaka 11, kandi nkaba nimanya ku natera entambwe y’omugasho. Konka nkatina kuza omu mizi ahakuba nkaba ntari kumanya koga. Marume akanshendekeza ahu babire bari kubatiriza yampumuriza. Bakahika bari kumbatiza kandi tindasibire ndi kuhika n’omu mizi ahagati. Mwenetata omwe akahika nambatiza ondijo yanyiha omu mizi. Kwiha ahari eri izoba ry’omugasho Yehova akagumizamu kutebekanisa emihanda yange yona.

Ku naherize kwega nkaba ndi kwenda kuba omupayoniya, konka abashomesa bange bakampiga kwega yunivasiti. Ahabw’okungema nkikiriza naza kwega yunivasiti; konka ku hahwire obwire buce nkerebera ku nabire ntari kubasa kuguma mpamire omu mazima, kandi ntire n’omutima aha mashomo ag’omuri yunivasiti. Obwe rero nkasharamu kurugayo. Nkagambira Yehova byona omu shara kandi nahandikira abashomesa bange ebaruha ndi kubashobororera ecatuma nagenda, kandi nkahika ningenda omuri ogo mwaka. Nkesiga Yehova munonga nahika ndi kutandika obupayoniya.

Nkatandika omurimo omurimo g’obwire bwona omu tawuni ya Wellingborough omu Kwamushanju, 1957. Nkashaba benetata ab’ahari Beteri y’omuri London kugira ngu bandondere omupayoniya omanyirire ow’okukora na we. Mwenetata Bert Vaisey akanyegesa ebintu byingi kandi ecokureberaho ceye kikankwasa kugira entebekanisa ndungi omu murimo gwange. Ekibina kikaba kirimu abanyanyazi mukaga abakuzire na mwenetata Vaisey, nanye. Okutebekanisa enterane zona n’okuzekwatanisamu kikatuma nakizaho kwesiga Yehova n’okwereka okwikiriza kwange.

Bwanyima nkanga kuza omu kisirikare rero banta omu kihome. Ku hahwireho obwire buce ndugire omu kihome, nkabugana omunyanyazi w’omupayoniya w’omutano ori kwetwa Barbara. Tukagitwa omuri 1959, kandi tukaba twetegwire kuza kukorera hona ahu batwohereza. Omu kubanza, tukaza kukorera omuri Lancashire omu matemba g’oburengerwizoba ga Bungereza. Omu Kokubanza, 1961, bakanyeta kwekwatanisa omu ishomero ry’Obukama ry’okwezi kumwe eryaberire omuri Beteli ya London. Ecantangarize, aha muheru gw’amashomo nkahebwa omurimo g’okutayayira ebibina. Omureberezi ori kutayayira ebibina omanyirire akamanyiza omu sande ibiri, obu twabire turi omuri Birmingham, kandi na Barbara akikirizibwa kwekwatanisa nanye. Bwanyima tukagaruka aha buhereza bwitu obu twabire turimu kare omuri Lancashire na Cheshire.

Obu twabire turi omu kihumuro omu Kwamunana omuri 1962, tukatunga ebaruha erugire ahari ofisi yitu. Ekaba eri hamwe na fomu y’Ishomero rya Gileyadi! Ku twaherize kushaba Yehova, nyowe na Barbara tukijuza ezo fomu, rero twahika turi kuzisindika ahari ofisi nk’oku babire babitushabire. Bwanyima y’amezi atano tukaza omuri Brooklyn, New York, kwega ishomero rya Gileyadi rya 38, eryabire riri kumara amezi ikumi.

 Omuri Gileyadi tituregire aha Kigambo ca Ruhanga n’ekitongore ceye kusha ahobwe nambwenu tukamanyana na benetata na banyanyazi. N’obu twabire twine emyaka omuri za 20, tukegera byingi aha bandi begi abu twayegine. Gukaba guri omugisha kukora na mwenetata Fred Rusk buri izoba, owabire ari omwe omu bashomesa bitu. Ishomo ry’omugasho eri yayegesizeho munonga ni eryabire riri kugira ngu, tushemerire kuha obuhabuzi, turi kukoresa Bibuli kugira ngu tworeke ku obwo buhabuzi buri kuba bwegamire aha Byahandikirwe. Abatuhire za toku omu ishomero harimu benetata abamanyirire, nka Nathan Knorr, Frederick Franz, na Karl Klein. Abegi bona bakegera aha cokureberaho c’obucurezi ca mwenetata A. H. Macmillan, owatuhire toku eyabire erimu obuhabuzi obwabire buratukwase omu bwire bw’ebigezo kwiha omu mwaka gwa 1914 kuhisya omu ntandikiro y’ogwa 1919!

Turi hihi kuhendera ishomero, mwenetata Knorr akagambira Barbara nanye ku turaze kuhereza omuri Burundi omuri Afurika. Tukaza omu ishomero rya Beteli, kureba omu bitabo bya buri mwaka, kugira ngu tumanye ababurizi ababire bari omuri Burundi omuri obwo bwire. Konka ecatutangarize, tihine ahu twabwine omubaro gw’ababurizi b’omuri Burundi! Mazima tukaba twaza omuri teritori etakakorirwemu omurimo g’okuburira, ahu twabire tutari kumanya ge. Tukagira obwoba munonga! Eshara ekatuma twatuza.

Omu murimo musya ogu twahibwe, embera zikaba zihindukire munonga, harimu ekirere, omucwe n’orurimi. Tukatandika kwega kugamba Orufurenci. Nambwenu tukatunga ekizibu c’okubura ah’okutura. Ku twamazire ebiro bibiri tuhikireyo, omwe omuri benetata abu twayegire hamwe Ishomero rya Gileyadi ori kwetwa Harry Arnott, akatutayayira ari kugaruka ahu yabire nakorera omurimo omuri Zambiya. Akatukwasa kubona ah’okutura, kandi niho habire eka y’abamishonari y’okubanza. Ku hahwireho obwire buce abategeki b’omuri ako kacweka, bakatandika kutuhiganisa ahabw’okuba bakaba batari kumanya Abahamya ba Yehova. Ku twabire twatandika kumanyira omurimo, abategeki bakatugambira ku tutari kubasa kuguma omuri ako kacweka tutine oruhusya. Ec’obusaasi, tukarugayo twaza omuri Uganda.

Tukaba twine obwoba bw’okuza omuri Uganda tutine Visa konka ahabw’okwesiga  Yehova tukazayo. Mwenetata w’omuri Kanada owabire ari kukorera ahabire hari kwetengwa obuyambi omuri Uganda, akatushobororera embera za ofisi y’eby’emipaka, rero batwikiriza kutura amezi make kugira ngu tubone oruhusya. Ebyo byona ni ebihamya ebyabire biri kutwereka ku Yehova yabire ari kutukwasa.

Embera ezi twabire turimu omuri Uganda zikaba nizitanira kimwe n’ezi twabire turimu omuri Burundi. Omurimo g’okuburira gukaba gwatandikire omuri Uganda, konka hakaba hariyo ababurizi 28 kusha omu ihanga ryona. Tukashangayo abantu bingi bari kugamba Orungereza. Bwanyima y’obwire buce, tukareba ku kugira ngu tukwase abantu kugira entunguka omu by‘omwika twabire tushemerire kwega rumwe omu ndimi ezabire ziri kugambwa omuri eryo ihanga. Tukatandika kuburira omuri Kampala ahabire hari kugambwa Oluganda, obwe rero tukatandika kurwega. Tukamara emyaka myingi kugira ngu tugambe ge Oluganda kandi amani agu twatireho gakarugamu ebirungi byingi! Kikatuma twamanya ge ebi abegi ba Bibuli babire bari kwenda kwega. Kandi na bo bakatugambira byona batari kutushereka.

Tukashemererwa munonga ku twabire turi kukwasa abantu ababire bari kwenda kwega amazima, konka nambwenu, tukashuba twatunga okushemererwa kwingi ku twatungire omurimo g’okutayayayira ebibina omu ihanga ryona. Ofisi ya Kenya ekatushaba kutambura omu ihanga ryona turi kuronda obucweka bubonire obu abapayoniya b’omutano babire barakoreremu. Abantu ababire batari kumanya Abahamya ba Yehova bakatwakira ge bashemerirwe. Bakatushemerererwa kandi batuha n’ebyokurya.

Tukatunga orundi rugendo. Nkatambura ebiro bibiri ndi kuruga Kampala kuhika aha cambu ca Mombasa omuri Kenya nkoresize gari ya moshi kandi nakoresa obwato kugira ngu mpike omu birwa bya Seyisheli biri omu Nyanja mpango y’Abahindi. Bwanyima, kwiha omuri 1965 kuhisa omuri 1972, Barbara akankwasa kutayayira Seyisheli burijo. Omuri obwo bwire ababurizi babiri ababire bari kuruga omu bucweka bwa hare bakarugamu omutwe bwanyima baba ekibina. Nambwenu nkaza kutayayira benetata b’omuri Eritereya, Esiyopiya, na Sudani.

Ku twagarukire omuri Uganda embera z’eby’obutegeki zikahika nizihinduka ahabw’okuba abasirikare bakaba bamara kuhirika obutegeki. Embera ezigumire ezakuratireho, zikanyegesa korobera obuhabuzi, bw’‘okuha Kayisari ebya Kayisari.’ (Mak 12:17) Abanyamahanga bona bakaragirwa kwehandikisa ahari ofisi y’abapolisi ebari hihi. Tukahika turi korobera eco kiragiro. Bwanyima y’obwire buce, ku twabire turi omu motoka omuri Kampala, abapolisi bakatwemereza nyowe n’ondijo mumishonari owabire ari nanye. Ekitima kikaba kiri kuhuragura! Bakaba bari kuturega ku turi entasi rero batutwara ahari ofisi y’abapolisi, ahu twabashobororire ku turi abamishonari abatine enshonga yona. N’obu twabashobororire ku twabire twayehandikisize ahari ofisi y’abapolisi tibarabihurire. Bakatutwara batusibira ahari ofisi y’abapolisi, eyabire eri hihi y’eka y’abamishonari. Ecatugarwiremu amani, ni oku omukuru w’abapolisi yamanyire ku twabire twayehandikisize, rero akaragira abarinzi b’ekihome kuturekura!

Omuri obwo bwire, tukaba nitubonabona munonga ahabw’okushanga abasirikare bafungire omuhanda bakatwemereza, na munonga obu  twayemerezibwe n’ababire basinzire. Konka ku byabire nibibaho tukaba nitushaba Yehova atuha kutuza rero batwikiriza kurabaho omu businge. Ec’obusaasi, omuri 1973, abamishonari b’abanyamahanga bona bakaragirwa kuruga omuri Uganda.

Nambwenu tukatunga omugisha g’okukorera omuri Côte d’Ivoire, omu burengerwizoba bwa Afurika. Eco kikatuma embera zahindukira kimwe, nk’okwega omucwe musya, twashuba twatandika kugamba Orufurenci obwire bwona, kandi twamanyira kukora n’abandi bamishonari abakurire omu mbera ezitari kushushana! Nambwenu tukerebera ku Yehova yabire ari kutukwasa, ahakuba abantu ababire bine emitima mirungi bakahika bari kwikiriza obutumwa burungi. Twena tukerebera ku kwesiga Yehova, kiri kutuma yatebekanisa emihanda yitu yona.

Omu bwire obu twabire tutetegwire, Barbara akarwara kansa. N’obu twabire nitukira kugaruka omu ka omuri Buraya kugira ngu atunge obujanjabi, omuri 1983 tukareba ku twabire tushemerire kwemereza omurimo omuri Afurika. Mazima eco kikatushasha munonga!

Kansa ya Barbara ekeyongera obu twabire turi kukorera ahari Beteli y’omuri London, kandi bwanyima yafa. Ab’omu ka ya Beteli bakampuriza. Hine omushija n’omukazi abankwasize kumanyira embera, n’okugumizamu kwesiga Yehova. Bwanyima nkabugana munyanyazi Ann, owabire ari kukora ahari Beteli ari kutaha kandi owabire yabireho omupayoniya w’omutano, ori kukunda Yehova kandi akuzire omu by’omwika. Nyowe na Ann tukagitwa omuri 1989 kandi kuruga obwe tutwire turi kukorera ahari Beteli y’omuri London.

Kwiha omuri 1995 kuhisa omu 2018, nkatunga omugisha g’okuhereza ndi entumwa ya ofisi nkuru yitu, ndi kutayayira amahanga agari kuhika ahari 60. Omuri obwo bwire nkerebera ku Yehova, ari kuha abahereza beye emigisha omu bwire bw’ebizibu.

Omu 2017, nkaza kutayaya omuri Afurika. Nkashemererwa munonga ku natwire Ann omuri Burundi, kandi twena tukatangara, ahabw’oku habire hatungukire omu by’omwika! Omu kacweka aku twabire turi kuburiramu aha nju n’enju omu mwaka gwa 1964, hati harimu ebyombeko bya Beteli, ebiri kukoreramu ababurizi abari kurenga aha 15,500.

Nkashemererwa ku natungire engendo z’okutayayira amahanga mingi omu 2018. Omuri ago mahanga hakaba harimu na Côte d’Ivoire. Ku twahikire omu tawuni mpango ya Abidjan, nkahurira ndi nk’owahika omu ka. Ku narebire omu namba z’amasimu, nkarebamu izina rya mwenetata owabire atwire hihi n’ekishenge c’abagenyi eki nabire ndimu, owabire ari kwetwa Sossou nayenda nk’okumumanya. Nkijuka ku yabire ari omureberezi w’etawuni, obu nabire ntwire omuri Abidjan. Konka nkaba ndi kwebiha. Akaba ari ondijo Sossou, ni okugamba mutabani weye.

Yehova nagumizamu kuhikiriza ebi ari kuraganisa. N’obu nabire ndi omu bigezo, nkega ku twayesiga Yehova ari kutebekanisa emihanda yitu yona. Hati nitwenda kugumizamu kugendera omuhanda ogurije kukizaho kwaka okuhisa omu nsi ensya.—Enf 4:18.