Ebiragiro bya Ruhanga by’obuyonjo bikaba nibibarinda
Hahwire ebinyigana 35 Abaisraeli batakagarukire omu ihanga eryaraganisibwe, Ruhanga akaba yabaraganisize ku aribarinda ‘endwara zona’ ezi babire bamanyirire omuri Misri. (Bir 7:15) Oburyo bumwe obu yakikoziremu ni okubaha obuhabuzi aha by’obuyonjo n’okwerinda kuturiza endwara. Ecokureberaho:
Omu biragiro ebi bahirwe hakaba harimu ec’okunaba n’okoza ebijwaro.—Lev 15:4-27.
Ebikwatirine n’okuza omu ekihoroni, Ruhanga akaba yagambire ngu: ‘Kandi muryagira omwanya aheru y’orusisira ahu muriguma nimushohorera. Omu by’okurwanisa byanyu muryagiramu ekihosho. Omuntu ku arishohora kuza ah’ishazi, akitimbise ekina; yaza kurugaho, ashweke’ amazi geye.—Bir 23:12, 13.
Omuntu owabire ari kutekateka ku arwire endwara eri kuturira akaba asisikire, akaba ashemerire kwerinda kuhika abandi. Okizire endwara atakagarukire omu bandi, akaba ashemerire koza ebijwaro byeye kandi anaba kugira ngu kirebeke ku ‘ashemire.’—Lev 14:8, 9.
Omuntu owabire ari kukwata aha mutumbi akaba ari kusisikara.—Lev 5:2, 3; Kub 19:16.
Ebiragiro by’Abaisraeli bikaba nibyereka ku hariho oburyo bw’okutambirwa kandi ku habire hariho n’abari kushwijuma yaba abantu bakizire.
Konka, emisinge ekwatirine n’obuyonjo bakayehuzya. Ecokureberaho:
Ebisingwe bakaba nibabinaga omu mihanda. Bashisha amizi, ebyokurya ebisigire, hamwe n’ebindi bintu ebyabire biri kutuma abantu barwara kandi bituma aberere bingi bafa.
Abadokita ba kare bakaba bine obumanyi buce ninga shi batari kumanya oku bari kubasa kutamba endwara zitari zimwe. Abanyamisri bakaba nibakoresa eshagama y’omusherebanganya, amashe, embeba efire, enkari, n’omugati guhumbire. Nk’oku kiri aha mashe g’enyamishwa n’amazi g’omuntu gakaba nigakoresibwa omu kutambira abantu.
Abanyamisri ba kare bakaba bari kubasa kurwara ahabw’okukoresa amizi g’omugera Nailo n’agandi mizi ag’endijo migera. Abana bingi omuri misri bakaba nibafa ahabw’okucugura n’ezindi ndwara ezabire ziri kuretwa n’ebyokurya birimu oburofa.
Abisraeli ku babire bari kukuratiza emisinge eri omu biragiro bya Ruhanga bakaba nibagira amagara marungi.
