Yesu nataana n’abandi bantu ahabw’okuba we akaba natura omu iguru ari marayika, rero bwanyima yija yazarirwa hanu omu nsi. (Yohaana 8:23) Ni we Ruhanga yatandikireho kuhanga, kandi bwanyima na we akakoresibwa omu kuhanga ebindi bintu byona. Ni we wenka owu Yehova yahangire n’emikono yeye; ni ahabw’eco nayetwa ‘Omwana omwe nyamunegere.’ (Yohaana 1:14) Nambwenu Yesu nayetwa “Kigambo” aha kuba akaba entumwa ya Ruhanga.​—Shoma omu Nfumu 8:22, 23, 30; Abakolosai 1:15, 16.

Ruhanga akakwata amagara g’Omwana weye yagata omu nda y’Omuyudayakazi ori kwetwa Mariya, niko kuzarirwa hanu omu nsi. Ni ahabw’eco, Yesu taragizire ishe w’omuntu. (Luka 1:30-35) Yesu akija omu nsi (1) kwegesa amazima ga Ruhanga, (2) kutuha ecokureberaho omu kukora ebi Ruhanga ari kwenda n’obu twakuba turi omu mbera zigumire, na (3) okuha amagara ge ngu ‘atucungure.’​—Shoma omuri Matayo 20:28.

Ekitambo ni nk’esente ezi bari kushashura ngu barekure omuntu owaba yaza kwitwa. (Okuruga 21:29, 30) Ruhanga tarahangire abantu ari kwenda ngu bagume kukura ninga ngu bafe. Nitukimanya tuta? Ruhanga akarabura omuntu w’okubanza, Adamu, ngu ku arakore eki Bibuli eri kweta “ekibi,” akaba naza kufa. Kuri Adamu atarashishire, akaba atarije kufa. (Okutandika 2:16, 17; 5:5) Bibuli netugambira ku okufa ‘kwizire’ omu nsi ahabw’okugoma kwa Adamu. Okwe niko Adamu yaragire abijukuru beye ekibi n’okufa.  Nitwenda munonga ekitambo kugira ngu kitukize orufu orwaresirwe Adamu.​—Shoma omu Barooma 5:12; 6:23.

Mbwenu shi ni oha owabire nabasa kutufera ngu atwihe omu rufu? Ku turi kufa nituba twashashura ibanja ry’ekibi kitu. Tihine omuntu otahikirire ori kubasa kushashurira abandi ebibi byabo.​—Shoma omuri Zaaburi 49:7-9.

Yesu tari nk’itwe, ahabw’okuba we ahikirire. Ni ahabw’eco we tarafire ahabw’ebibi byeye; tarakozire kibi. Ahobwe, Yesu akafa ahabw’ebibi byitu. Ruhanga akakunda abantu munonga rero yatwoherereza Omwana weye ngu atufere. Yesu na we akatukunda yayorobera Ishe kandi yayikiriza kufa ahabw’ebibi byitu.​—Shoma omuri Yohaana 3:16; Abarooma 5:18, 19.

Obu Yesu yabire ari omu nsi, akakiza abarwire, yazora abafire kandi yiha abantu omu kubonabona. Omuri obwo buryo, akereka ebi arije kukorera abantu abari korobera Ruhanga. (Matayo 15:30, 31; Yohaana 5:28) Yesu ku yafire, Ruhanga akamuzora yamuhindura omuntu w’omwika. (1 Petero 3:18) Kwiha obwe Yesu akasitama aha rubaju rwa buryo rwa Ruhanga, yategereza obwire obu Yehova yabire araze kumugira Omugabe w’ensi yona. (Abaheburaayo 10:12, 13) Hati Yesu ni Omugabe ori kutegekera omu iguru, kandi abakurasi beye nibaburira obwo butumwa burungi omu nsi yona.​—Shoma omuri Danieli 7:13, 14; Matayo 24:14.

Juba aha, Yesu nayija kukoresa amani geye ari Omugabe, ayiheho okubonabona n’abari kutubonabonesa. Abantu bona bari kwikiriza Yesu kandi bakamworobera nibija kubaho ebiro byona bashemerirwe omuri paradiso omu nsi.​—Shoma omuri Zaaburi 37:9-11.