EKICWEKA CA KANA
Yesu Kristo ni oha?
1, 2. (a) Mbehi kumanya izina ry’omuntu ruranganwa nikimanyisa ngu nomumanya bumanya? Shoborora. (b) Ni enki eki abantu bari kugamba ahari Yesu?
HARIHO ba ruranganwa bingi omu nsi. Nobasa n’okuba hine owu ori kumanya izina. Konka kumanya izina tikiri kumanyisa ngu nomumanya ge. Tikiri kumanyisa ngu nomanya byona aha magara geye n’owu ari we mazima.
2 Nihabasa kuba hine ebi wahurire ahari Yesu Kristo, n’obu hahwire emyaka eri kuhika aha 2,000 arugire omu nsi. Konka abantu bingi tibari kumanya owu Yesu yabire ari we. Bamwe nibagira ngu akaba ari omuntu murungi, abandi ngu akaba ari omuhanuzi, konka abandi bagira ngu ni Ruhanga. Kandi shi iwe?—Reba Enyongezo ya 12.
3. Ahabw’enki oshemerire kumanya ge Yehova na Yesu?
3 Ni ec’omugasho ahari iwe okumanya Yesu. Ahabw’enki? Bibuli netugambira ngu: ‘Aga ni go magara agatahwaho, okumanya Iwe Ruhanga omwe ow’amazima, n’ogo owu watumire, Yesu Kristo.’ (Yohaana 17:3) Wamanya amazima agari kukwata ahari Yehova na Yesu, noyija kubaho ebiro byona omuri paradiso omu nsi. (Yohaana 14:6) Kandi, kumanya Yesu nikija kukukwasa aha kuba ni ecokureberaho kirungi ekiri kutwereka oku tushemerire kutura n’abandi omu businge. (Yohaana 13:34, 35) Omu Kicweka ca 1, tukega amazima agari kugamba ahari Ruhanga. Hati twaza kwega eki Bibuli eri kwegesa ahari Yesu.
TWABONA MESIA!
4. Amazina “Mesia” na “Kristo” nigamanyisa ki?
4 Yesu atakazirwe, Yehova akaba yaraganisize omuri Bibuli ku yabire arije kutuma Mesia ninga shi Kristo omu nsi. Ekigambo “Mesia” nikiruga omu Ruheburayo, kandi ekigambo “Kristo” nikiruga omu Rugurika. Aga mazina gombi nigamanyisa ku Ruhanga yabire arije kutorana Mesia owaraganisibwe akamuha omwanya mukuru. Mesia nayija kutuha emigisha yona eyi Ruhanga yaturaganisize. Nambwenu Yesu nayenda kukuyamba hati. Konka Yesu atakazirwe, abantu bakaba bari kwebuza ngu: ‘Ni oha orije kuba Mesia?’
5. Mbehi abegi ba Yesu bakaba bari kwikiriza ngu akaba ari Mesia?
5 Abegi ba Yesu bakaba batari kubanganisa ku yabire ari we Mesia owaraganisibwe. (Yohaana 1:41) Ecokureberaho: Simooni Petero akagambira Yesu ngu: “Ori Kristo, Omwana wa Ruhanga.” (Matayo 16:16) Mbwenu shi tukahamya tuta ku Yesu ari we Mesia?
6. Ni bata oku Yehova yakwasize abantu b’abacurezi kumanya Mesia?
6 Kare Yesu atakazirwe, abahanuzi ba Ruhanga bakaba bahandikire byingi ebyabire nibiza kukwasa abantu kumanya Mesia. Bata shi? Reka tugire ngu washabwa kuza ahu basi ziri kwemerera kubugana omuntu owu otari kumanya. Hagira owakushobororera oku ari kushusha nobasa kumubona. Ni co kimwe, Yehova akakoresa abahanuzi batugambira ebi Mesia yabire arije kukora n’ebyabire birije kumubaho. Obwo buhanuzi bwona ku bwahikirire, bukakwasa abantu b’abacurezi kumanya ku Yesu yabire ari we Mesia.
7. Ni buha buhanuzi bubiri obwahamize ku Yesu ari we Mesia?
7 Reka turebe obuhanuzi bubiri omuri bwo. Obw’okubanza: Hari kuburayo emyaka 700 ngu Yesu azarwe, Miika akahanura ku Mesia yabire arazarirwe omuri tawuni nce ya Betelehemu. (Miika 5:2) Kandi aho ni ho Yesu yazarirwe! (Matayo 2:1, 3-9) Obwa kabiri: Danieli akahanura ku Mesia yabire arije kurebeka omu mwaka gwa 29 B.Y. (Danieli 9:25) Obwo ni bumwe omu buhanuzi bwingi obwahamize ku Yesu ari we Mesia owaraganisibwe.—Reba Enyongezo ya 13.
Yesu ku yamazire kubatizibwa, akaba Mesia, ninga Kristo
8, 9. Ni enki ecabireho Yesu ari kubatizibwa kikereka ku ni we Mesia?
8 Yehova akamanyisa ge ku Yesu ari we Mesia. Ruhanga akagambira Yohaana Omubatizi akamanyiso akabire karije kumanyisa Mesia. Yesu ku yashangire Yohaana Omubatizi aha mugera gwa Yorudani omu mwaka gwa 29 B.Y. ngu amubatize, Yohaana akareba ako kamanyiso. Bibuli netugambira ecabireho: ‘Yesu ku yaherize kubatizibwa, yaruga omu mizi, reba, iguru ryakinguka, yareba [omwika] gwa Ruhanga nigumushumaho nk’enkombe, yahurira iraka niriruga omu iguru, nirigira riti: “Ogu ni Omwana wange owu nkunda, kandi owu nshemerererwa munonga.”’ (Matayo 3:16, 17) Yohaana ku yarebire ako kamanyiso akahurira n’iraka, akahika ari kumanya ku Yesu ari we Mesia. (Yohaana 1:32-34) Eryo zoba, Yehova akashuka ahari Yesu omwika oguri kwera, yaba Mesia. Ni we Yehova yatorine kuba Omutegeki n’Omugabe.—Isaaya 55:4.
9 Obuhanuzi bwa Bibuli, ebi Yehova yagambire hamwe n’akamanyiso aku yayerekire Yesu ari kubatizibwa, byona nibihamya ku Yesu ari we Mesia. Konka shi Yesu akaruga nkahe, kandi akaba ayine eha mitwarize? Twaza kureba eki Bibuli eri kubigambaho.
YESU AKARUGA NKAHE?
10. Ni enki eki Bibuli eri kugamba ahari Yesu mbere y’okwija omu nsi?
10 Bibuli negamba ku Yesu yabire ari omu iguru mbere y’okwija omu nsi. Miika akagamba ku obukomoko bwa Mesia ‘ari obwa ira n’ira.’ (Miika 5:2) Yesu na we akagamba emirundi myingi ku yabire atwire omu iguru atakazirwe nk’omuntu. (Shoma omuri Yohaana 3:13; 6:38, 62; 17:4, 5.) Yesu atakizire omu nsi, nabwo akaba ayine obunywani bw’omutano na Yehova.
11. Ahabw’enki Yesu ari ow’omuhendo ahari Yehova?
11 Yesu ni ow’omuhendo ahari Yehova. Ahabw’enki? Ahabw’okuba Ruhanga akamuhanga atakahangire ebintu byona, eby’omu iguru n’omu nsi. Ni ahabw’eco Yesu nayetwa ‘omujigijo omu byahangirwe byona.’ * (Abakolosai 1:15) Nambwenu Yesu ni ow’omuhendo ahabw’okuba ni we owu Yehova yayehangire. Ni yo nshonga ari kwetwa ‘Omwana omwe nyamunegere.’ (Yohaana 3:16) Yesu ni we wenka owu Yehova yakoresize omu kuhanga ebindi bintu byona. (Abakolosai 1:16) Kandi Yesu nayetwa “Kigambo” ahabw’okuba Yehova akamukoresa omu kuhisya obutumwa n’obuhabuzi ahari ba marayika n’ah’abantu.—Yohaana 1:14.
12. Nitumanya tuta ku Yesu na Ruhanga batari omuntu omwe?
12 Hariho abantu abari kwikiriza ngu Yesu nayingana na Ruhanga. Konka eco ti co Bibuli eri kwegesa. Bibuli negamba ku Yesu yahangirwe, ekiri kumanyisa ngu Yesu ayine entandikiro. Konka Yehova, owahangire ebintu byona, we tayine ntandikiro. (Zaaburi 90:2) Ahabw’okuba Yesu ari Omwana wa Ruhanga, taratekatekire kugezaho kuba Ruhanga. Bibuli nekishoborora ge ku Tata ari kukira Omwana. (Shoma omuri Yohaana 14:28; 1 Abakorinso 11:3.) Yehova ni we wenka ori kwetwa ‘Owobushoborozi bwona.’ (Okutandika 17:1) Ni we Rukirabona kandi oyine amani mingi omu nsi n’omu iguru.—Reba Enyongezo ya 14.
13. Ahabw’enki Bibuli eri kweta Yesu ‘ekishushani ca Ruhanga otari kurebwa’?
13 Yehova n’Omwana weye Yesu, bakamara emyaka myingi bari kukora hamwe, iguru n’ensi bitakahangirwe. Eco kikatuma baba abanywani b’amani! (Yohaana 3:35; 14:31) Yesu akatoreza emitwarize y’Ishe omu bwijwire, ni yo nshonga Bibuli eri kumweta ‘ekishushani ca Ruhanga otari kurebwa.’—Abakolosai 1:15.
14. Ni enki ecabireho ngu Omwana wa Yehova azarwe ari omuntu?
14 Omwana wa Yehova ow’omuhendo akikiriza kuruga omu iguru yazarirwa omu nsi ari omuntu. Eco kikabasika kita? Yehova akakora ecokutangaza, yafurura amagara g’Omwana weye, yamwiha omu iguru yamuta omu nda y’omuhara ori kwetwa Maria, owabire atakanyamagaho n’omushija. Omu buryo nk’obwo, Yesu taragizire ishe w’omuntu. Ni ahabw’eco Maria akazara omwana ohikirire, yamweta Yesu.—Luka 1:30-35.
YESU AKABA AYINE EHA MITWARIZE?
15. Ni bata oku ori kubasa kumanya Yehova kurungarungi?
15 Nobasa kwega byingi ahari Yesu, ebi yakozire n’emitwarize yeye, washoma ebi bitabo bya Bibuli: Eca Matayo, Mako, Luka, na Yohaana. Ebyo bitabo nibyetwa Engiri. Ahabw’okuba Yesu ayine emitwarize nk’eya Ishe, ebi orashome nibyija kukukwasa kumanya ge Yehova. Ni yo nshonga eyatumire Yesu yagira ngu: ‘Ondebire buri arebire Tata.’—Yohaana 14:9.
16. Ni enki eki Yesu yayegesize abantu? Ebi Yesu yabire nayegesa bikaruga nkahe?
16 Abantu bingi bakaba nibeta Yesu ‘Omwegesa.’ (Yohaana 1:38; 13:13) Ekintu c’okubanza kikuru eki yayegesize abantu ni Obutumwa burungi bw’Obukama. Obwo Bukama ni enki? Ni obutegeki bwa Ruhanga bw’omu iguru oburije kutegeka ensi yona kandi bukaretera emigisha abantu abari korobera Ruhanga. (Matayo 4:23) Ebi Yesu yabire nayegesa byona bikaruga ahari Yehova. Yesu akagira ngu: ‘Okwegesa oku nyegesa ti kwange, ni okw’ogo owantumire.’ (Yohaana 7:16) Yesu akaba namanya ku Yehova ari kwenda ngu abantu bahurire obutumwa burungi oburi kugamba ku Obukama bwa Ruhanga burije kutegeka ensi yona.
17. Yesu akaba naburira nkahe? Ahabw’enki yatiremu amani mingi omu kwegesa abantu?
17 Yesu akaba nayegeseza nkahe? Ahantu hona ahu yabire nashanga abantu. Akaba nayegeseza omu byaro, omu matawuni, omu butare, omu maju g’okushabiramu n’omu maka g’abantu. Akaba atari kutegereza ngu abantu babe ni bo bamushanga ahu ari. Akaba nabashanga ahu bari. (Mako 6:56; Luka 19:5, 6) Yesu akakoresa amani mingi kandi yamara obwire bweye ari kwegesa abantu. Ahabw’enki? Ahabw’okuba akaba namanya ku eco ari co Ruhanga yabire ari kwenda ngu akore, kandi akaba nayoboreba Ishe omuri byona. (Yohaana 8:28, 29) Nambwenu Yesu akaba naburira ahabw’okuba akaba nagirira abantu esasi. (Shoma omuri Matayo 9:35, 36.) Akashanga abebembezi b’amadini barekire kwegesa abantu amazima agari kugamba ahari Ruhanga n’Obukama bweye. Ni ahabw’eco akaba nayenda kukwasa abantu bingi ngu bahurire obutumwa burungi.
18. Ni eha mitwarize ya Yesu eyi ori kukunda munonga?
18 Yesu akaba ari omuntu ori kukunda abantu kandi ori kubafaho. Akaba ari omunyambabazi kandi ari kwehisya abantu. Nangwa n’abana bakaba nibakunda kuba na we. (Mako 10:13-16) Yesu akaba ayine emitwarize mirungi. Akaba nayanga kureba abantu bari kutwarizibwa kubi. (Matayo 21:12, 13) Akabaho omu bwire obu abakazi babire bari kurebwa nk’abatine mugasho kandi bari kutwarizibwa kubi. Konka Yesu we burijo akaba natwariza ge abakazi kandi abaha ekitinisa. (Yohaana 4:9, 27) Nambwenu Yesu akaba ari omucurezi. Ecokureberaho: Omwebazyo gumwe, akanabisa entumwa zeye ebigeri, kandi ogo gukaba guri omurimo gw’abagaragwa.—Yohaana 13:2-5, 12-17.
Yesu akaba naburira hona ahu yabire nashanga abantu
19. Ni kiha cokureberaho ekiri koreka ku Yesu yabire namanya ebi abantu bari kwetenga, kandi ku yabire nayenda kubayamba?
19 Yesu akaba namanya ebi abantu bari kwetenga, kandi akaba ari kwenda kubakwasa. Eki kikarebeka obu yakoresize amani ga Ruhanga akakiza abarwire. (Matayo 14:14) Ecokureberaho: Omushija owabire arwire ebibembe akija ahari Yesu yamugira ngu: ‘Ku orabe nokunda, nobasa kunshemeza.’ Yesu akashasha n’ogo mushija omu busasi obu yabire ayine. Akamugirira esasi yahurira yayenda kumuyamba. Ni ahabw’eco akareta omukono gweye yamukoraho, yagira ati: “Ninkunda. Shemera!” Ogo mushija owabire arwire akahika nakira! (Mako 1:40-42) Tekateka oku ogo mushija yayehurire!
AKAGUMA ARI OMWESIGWA AHARI ISHE
20, 21. Ni bata oku Yesu yatuhire ecokureberaho kirungi omu koroberera Ruhanga?
20 Yesu akatuha ecokureberaho kirungi omu korobera Ruhanga. Ebyamuhikireho byona n’eby’abazigu beye bamukorire, tibiramuzibire kuguma ari omwesigwa ahari Ishe. Ecokureberaho: Yesu tarakozire ekibi n’obu Sitaane yagerizeho kumugeza. (Matayo 4:1-11) Benenyina ba Yesu tibarikirize ku yabire ari Mesia kandi bakagamba ngu ashazire, konka Yesu akagumizamu kukora omurimo gwa Yehova. (Mako 3:21) Abazigu ba Yesu ku bagerizeho kumukora kubi, akaguma ari omwesigwa ahari Ruhanga kandi tarabagarurire.—1 Petero 2:21-23.
21 N’omu bwire obu Yesu yabire ari omu busasi bwingi kandi bwanyima akitwa, akaguma ari omwesigwa ahari Yehova. (Shoma omu Bafilipi 2:8.) Tekateka aha busasi obwamuhikiriho. Bakamukwata, abahamya b’ebishuba bamubeherera ngu najuma Ruhanga, abacwamanja abatahikire bamucwera orw’okumwita, emburamukoro zamushecerera, kandi abasirikare bamwita kubi bwanyima bamuhanika aha kiti. Ku yagire kufa, akagira ngu: ‘Cahwa!’ (Yohaana 19:30) Bwanyima y’ebiro bishatu Yesu afire, Yehova akamuzora yamuha omubiri g’omwika. (1 Petero 3:18) Bwanyima, Yesu akagaruka omu iguru, “yashutama aha rubaju rwa buryo rwa Ruhanga,” kandi yategereza Ruhanga ngu amugire Omugabe.—Abaheburaayo 10:12, 13.
22. Ni guha mugisha ogu twine ahabw’okuba Yesu yagumire ari omwesigwa ahari Ishe?
22 Ahabw’okuba Yesu yagumire ari omwesigwa ahari Ishe, hati twine omugisha g’okubaho ebiro byona omuri paradiso omu nsi, nk’oku Yehova yabire ari kwenda. Omu kicweka ekiri kukurataho, nitwija kwega oku okufa kwa Yesu kuritubasisa kubaho ebiro byona.
^ par. 11 Yehova nayetwa Tata ahabw’okuba ni Omuhangi. (Isaaya 64:8) Yesu nayetwa Omwana wa Ruhanga ahabw’okuba Yehova akamuhanga. Ba marayika hamwe na Adamu na bo nibetwa abana ba Ruhanga.—Yobu 1:6; Luka 3:38.
