Daghang turista ang tig-adtoan sa iladong busay duol sa lungsod sa Pagsanjan sa Pilipinas. Didto nagdako nga pobre ang akong amahan nga si Nardo Leron. Tungod sa korapsiyon sa gobyerno, sa kapolisan, ug sa iyang trabahoan, suko kaayo siya.

 Naningkamot pag-ayo ang akong ginikanan sa pagbuhi sa ilang walo ka anak. Tagdugay silang wala sa balay kay mag-atiman sa mga tanom sa bukid. Sagad kami ra sa akong igsoong si Rodelio ang mag-atiman sa among kaugalingon, ug pirme ming magutman. Tagsa ra pod kaayo ming makaduladula. Pag-edad ug siyete, kaming tanang magsoon kinahanglang manarbaho sa plantasyon. Bug-at kaayo ang mga lubi nga among pas-anon samtang magbaktas sa bakilid nga agianan sa bukid. Kon bug-at kaayo among dala, amo na lang ning guyoron.

 Giagwanta namo ang pagpangulata ni Papa, pero mas sakit nga makita nga ginakulata niya si Mama. Gipugngan namo siya, pero wala miy mahimo. Nagsabot pa gani mi ni Rodelio nga patyon si Papa inigdako namo. Nangandoy gyod kog amahan nga magmahal namo!

 Suko kaayo ko sa akong bayolenteng amahan, maong nilayas ko pag-edad ug 14. Niadtong mga panahona, sa karsada ra ko nagpuyo ug nagsugod kog gamit ug marijuana. Sa ulahi nagtrabaho ko ingong bangkero nga magdalag mga turista sa busay.

 Paglabayg pipila ka tuig, mieskuyla ko sa usa ka unibersidad sa Manila. Pero dili kaayo ko makatuon kay kada Sabadog Dominggo, mobalik ko sa Pagsanjan aron magtrabaho. Lisod ug morag way katuyoan ang akong kinabuhi, ug dili na mamenosan sa marijuana ang akong kaguol. Misulay kog shabu, cocaine, ug heroin. Apil sa pagdroga ang seksuwal nga imoralidad. Nakita nako sa palibot ang sobrang kalisod, inhustisya, ug pag-antos. Suko kaayo ko sa gobyerno kay mao niy hinungdan niana. Nakapangutana ko sa Diyos, “Nganong ingon ani ang kinabuhi?” Pero wala kana matubag sa lainlaing relihiyon nga akong gisusi. Gidugangan pa nako ang akong pagdroga aron matago ang akong kaguol.

 Niadtong 1972, ang mga estudyante sa Pilipinas nag-organisar ug mga protesta batok sa gobyerno. Miapil ko, pero miresulta nig kapintasan. Daghan ang gidakop, ug paglabay sa pipila ka bulan, gideklarar ang martial law sa tibuok nasod.

 Nagpuyo na pod kog balik sa karsada, ug niadtong panahona nahadlok ko sa awtoridad kay miapil ko sa rebelyon. Aron suportahan ang akong pagdroga, nangawat ko ug mihimog imoral nga mga serbisyo para sa mga dato ug langyaw. Dili na importante nako kon mabuhi ko o mamatay.

 Niadtong panahona, ang akong mama ug manghod nga lalaki nagtuon sa Bibliya uban sa mga Saksi ni Jehova. Suko kaayo si Papa, ug gisunog niya ang ilang mga basahon nga binase sa Bibliya. Pero wala sila moundang ug nabawtismohan silang duha ingong mga Saksi.

 Usa ka adlaw, dihay Saksi nga nakig-estorya kang Papa bahin sa saad sa Bibliya, nga sa umaabot duna nay tinuod nga hustisya sa tibuok yuta. (Salmo 72:12-​14) Giganahan kaayo si Papa sa maong saad maong nagbasa siyag Bibliya. Dili lang saad sa Diyos bahin sa patas nga gobyerno ang iyang nakita, nabasa sab niya ang gisugo sa Diyos sa mga bana ug amahan. (Efeso 5:​28; 6:4) Wala madugay, siya ug ang tanan nakong igsoon nahimong Saksi. Kay naa man ko sa layo, wala ko mahibalo niini.

 Mibalhin ko sa Australia niadtong 1978. Pero bisag malinawon ug dato kini nga nasod, wala koy kalinaw sa hunahuna. Nagpadayon ang akong pag-inom ug pagdroga. Sa hinapos nianang tuiga, gibisita kog mga Saksi ni Jehova. Ganahan ko sa ilang gipakita sa Bibliya bahin sa malinawong yuta, pero nagduhaduha ko nga malangkit nila.

 Wala madugay human niini, mibakasyon ko sa Pilipinas sa pipila ka semana. Giingnan ko sa akong mga igsoon nga naningkamot pag-ayo si Papa aron mahimong maayong tawo. Pero suko gihapon kaayo ko niya maong gilikayan nako siya.

 Ang among kinamanghorang igsoong babaye nagpatin-aw nako gikan sa Bibliya kon nganong ang kinabuhi punog pag-antos ug inhustisya. Nahingangha ko kay bisag batan-on pa ug wala kaayoy eksperyensiya, matubag niya ang akong mga pangutana. Una ko mibiya, gihatagan ko ni Papa ug librong Ikaw Mabuhing Walay Kataposan sa Paraiso sa Yuta. a Matod niya: “Dong, hunong na sa imong bisyo. Kini nga libro motabang nimo nga makit-an ang imong gipangita.” Gidasig ko niya nga mangitag mga Saksi ni Jehova inigbalik nako sa Australia.

 Akong gisunod ang tambag ni Papa ug nakakita kog Kingdom Hall sa mga Saksi ni Jehova duol sa akong gipuy-an sa Brisbane. Nagpa-Bible study ko. Ang mga tagna sa Bibliya sama sa narekord sa Daniel kapitulo 7 ug Isaias kapitulo 9 nagtudlo nako nga ang gobyerno sa Diyos, nga wala gyoy korapsiyon, magmando kanato sa umaabot. Akong nakat-onan nga magmalipayon ta sa Paraisong yuta. Gusto nakong uyonan ko sa Diyos, pero nakaamgo ko nga kinahanglan nakong kontrolon ang akong emosyon, undangon ang pagdroga ug pag-inom, ug biyaan ang imoral nga kinabuhi. Gibulagan nako ang akong puyopuyo, ug miundang ko sa akong mga bisyo. Samtang midako ang akong pagsalig kang Jehova, nag-ampo ko nga tabangan ko niya nga mahimo ang uban pang kausaban nga angay nakong himoon.

 Anam-anam nakong naamgohan nga puwedeng magbag-o ang usa ka tawo tungod sa iyang nakat-onan sa Bibliya. Ang Bibliya nag-ingon nga kon maningkamot ta, masul-ob nato ang “bag-ong pagkatawo.” (Colosas 3:​9, 10) Samtang naningkamot ko sa paghimo niini, nakahunahuna ko nga tinuod gyod tingali nga nagbag-o si Papa. Imbes padayong masuko niya, gusto na kong makig-uli niya. Sa kataposan, gipasaylo nako si Papa ug gikalimtan ang tanang kasuko nga akong gihambin sukad sa pagkabata.

 Sa batabata pa ko, sagad mosundog dayon ko sa makadaot nga binuhatan sa uban. Tinuod gyod ang pasidaan sa Bibliya kay nadaot ko tungod sa daotang mga kauban. (1 Corinto 15:33) Pero nakakita kog kasaligang mga higala diha sa mga Saksi ni Jehova, ug gitabangan ko nila nga mahimong mas maayong tawo. Nakaila sab nako ang akong buotang asawa, si Loretta. Magkauban na mi sa pagtudlo sa uban kon sa unsang paagi ang Bibliya makatabang nila.

 Nagpasalamat gyod ko sa Bibliya kay nabag-o si Papa. Siya mahigugmaon na nga bana sa akong inahan ug mapaubsanon ug makigdaiton nga Kristohanon. Human ko mabawtismohi ingong Saksi ni Jehova niadtong 1987, nagkita mi ni Papa ug iya kong gigakos sa unang higayon sa akong kinabuhi!

 Sulod sa kapig 35 ka tuig, magkauban si Papa ug Mama sa pagpaambit sa uban sa paglaom nga gitudlo sa Bibliya. Siya nahimong kugihan ug mahunahunaong tawo, gani nailhan siya nga matinabangon sa uban. Nianang mga tuiga, nakakat-on ko sa pagtahod ug paghigugma niya. Proud ko nga mailhang anak niya! Namatay siya niadtong 2016, pero malipay ko nga mahinumdom niya, kay parehas mi nga naghimog dagkong kausaban sa among personalidad samtang gipadapat ang mga gitudlo sa Bibliya. Wala na koy bisan gamayng pagdumot niya. Ug mapasalamaton kaayo ko nga nailhan nako ang akong langitnong Amahan, si Jehova nga Diyos, kinsa nagsaad nga taposon ang tanang hinungdan sa kasakit sa mga pamilya bisan asa.