Wala ko magdahom nga grabe diay kaayo ang injury sa akong sparring partner. Nasipaan nako ang iyang ilong. Nakonsensiya ko ug naghunahuna kon ipadayon pa ba nako ang martial arts. Ganahan kaayo ko ani nga sport sa daghan nang katuigan. Pero nganong kadtong akong nahimo nakapahunahuna man nako nga moundang? Sa di pa nako na tubagon, paasoya sa ko kon nganong nahilig kog martial arts.

 Nagdako ko duol sa Buffalo, New York, U.S.A. Ang among pamilya malipayon ug debotadong Katoliko. Mieskuwela ko sa Katolikong mga eskuwelahan ug sakristan pod ko. Gusto sa akong mga ginikanan nga kami sa akong ate magmalamposon sa kinabuhi. Mao nga mosugot sila nga moapil kog sport human sa klase o motrabahog partaym, basta taas lang kog grado sa eskuwelahan. Mao nga nabansay ko nga mahimong disiplinado bisag bata pa.

 Pag-edad nakog 17, nagtuon kog martial arts. Sa daghang katuigan, magpraktis kog tulo ka oras kada adlaw, unom ka adlaw kada semana. Mogahin pod kog daghang oras kada semana sa paghunahunag mga teknik ug pagtan-awg mga video aron mas mohawod pa gyod ko. Ganahan kong magpraktis nga gitaptapan ang mata, bisan dihang mogamit kog hinagiban. Makabuak kog board o brick sa usa lang ka hapak. Maayo kaayo ko ani nga sport ug nakadaog kog mga trophy sa mga kompetisyon. Ang martial arts nahimong pinakaimportante sa akong kinabuhi.

 Nagtuo ko nga malamposon ko. Mi-graduate ko sa unibersidad nga may taas nga academic honors. Nagtrabaho ko sa dakong kompaniya ingong computer systems engineer. Daghan kog benepisyo sa kompaniya, naa koy balay, ug naa koy uyab. Morag malipayon ko tan-awon, pero daghan kog pangutana bahin sa kinabuhi.

 Aron matubag ang akong mga pangutana, kaduha ko mosimba kada semana ug moampo ko sa Diyos para sa tabang. Usa ka adlaw niana, naa mi giestoryahan sa akong amigo nga nakapausab sa akong kinabuhi. Gipangutana nako siya: “Nakahunahuna ba ka kon unsay katuyoan sa kinabuhi?” Unya miingon ko: “Daghan kaayog problema, ug grabe kaayo ang inhustisya.” Giingnan ko niya nga naa pod siyay ingon ana nga pangutana sa una, ug nakit-an niya ang makapatagbaw nga tubag diha sa Bibliya. Gihatagan ko niyag libro nga Ikaw Mabuhing Walay Kataposan sa Paraiso sa Yuta. a Miingon siya nga nagtuon siyag Bibliya uban sa mga Saksi ni Jehova. Sa primero, nagduhaduha ko kay naghunahuna ko nga dili ko angayng mobasag libro sa laing relihiyon. Pero kay gusto man nakong matubag ang akong mga pangutana, interesado kong mahibalo kon katuohan ba ang gitudlo sa mga Saksi.

 Giganahan kaayo ko sa akong nakat-onan sa Bibliya. Nakat-onan nako nga katuyoan sa Diyos nga ang mga tawo mabuhi sa walay kataposan sa paraiso sa yuta ug kana nga katuyoan wala mausab. (Genesis 1:28) Nalipay kaayo ko nga makita ang ngalan sa Diyos nga Jehova sa akong Bibliya nga King James version, ug nalipay ko nga mao diay nang ngalana ang ginatumong dihang moampo kog Amahan Namo. (Salmo 83:18; Mateo 6:9) Ug nasabtan na gyod nako kon nganong temporaryong gitugotan sa Diyos ang pag-antos. Nakombinsir ko sa tanan nakong nakat-onan! Ug nalipay kaayo ko.

 Dili gyod ko malimot sa una nakong pagtambong sa tigom sa mga Saksi ni Jehova. Ang tanan mahigalaon ug gustong makig-ilaila nako. Sa una nakong tambong, dihay espesyal nga pakigpulong bahin sa mga pag-ampo nga dunggon sa Diyos. Nainteres ko ana nga tema kay nagsige kog ampo sa Diyos nga iya kong tabangan. Unya mitambong pod ko sa Memoryal sa kamatayon ni Jesus. Mibilib kaayo ko sa maong mga tigom kay bisan ang mga bata nagsunod sa gibasang mga teksto sa Bibliya. Sa primero, di ko kamao moukab ug Bibliya. Pero buotan kaayo ang mga Saksi kay gitudloan ko nila kon unsaon.

 Sa pagsige nakog tambong, mas milawom ang akong apresasyon sa nindot kaayong mga pagtulon-an nga gitudlo sa mga Saksi. Daghan kog makat-onan sa matag tigom, ug madasig kaayo ko sa akong madunggan. Unya gitanyagan kog pagtuon sa Bibliya.

 Ang akong nakita sa mga Saksi ni Jehova lahi kaayo sa akong nakita sa among simbahan. Nakita nako nga ang mga Saksi nagkahiusa ug sinsero, ug naningkamot sila sa pagpahimuot sa Diyos. Mas nakombinsir ko nga naa nila ang ilhanan sa tinuod nga mga Kristohanon, nga mao, ang gugma sa usag usa.—Juan 13:35.

 Samtang nagpadayon ko sa pagtuon sa Bibliya, nagpadayon sab ko sa paghimog kausaban aron masunod nako ang mga sukdanan sa Bibliya. Pero di gyod nako mabiyaan ang martial arts. Ganahan kaayo kong magpraktis ug moapil ug kompetisyon. Dihang gisulti nako ni sa Saksi nga nag-Bible study nako, gipasaligan ko niya, “Padayon lang sa pagtuon, kay kabalo ko nga makahimo unya kag saktong desisyon.” Mao gyod nay kinahanglan nakong madungog. Samtang nagpadayon ko sa pagtuon, mas milawom ang akong tinguha nga pahimut-an si Jehova nga Diyos.

 Nausab ang tanan tungod sa hitabo nga akong gihisgotan sa sinugdan, dihang nasipaan nako ang ilong sa akong sparring partner. Tungod nianang hitaboa, naghunahuna ko pag-ayo kon mahimo ba kong makigdaitong sumusunod sa Kristo kon di ko moundang sa martial arts. Nakat-onan nako ang tagna sa Isaias 2:3, 4 nga kadtong nagsunod sa mga sugo ni Jehova “dili na magkat-on sa pagpakiggubat.” Ug gitudloan ni Jesus ang uban nga dili mahimong bayolente, bisag makasinati silag inhustisya. (Mateo 26:52) Maong gibiyaan nako ang paborito kaayo nakong sport.

 Dayon, akong gisunod ang tambag sa Bibliya nga ‘bansayon ang kaugalingon nga ang tumong mao ang pagpakitag debosyon sa Diyos.’ (1 Timoteo 4:7) Imbes gamiton ang akong panahon ug kusog sa martial arts, ako na ning gigamit sa espirituwal nga mga buluhaton. Ang akong uyab dili uyon sa akong mga nakat-onan sa Bibliya, maong nagbulag mi. Nabawtismohan ko ingong Saksi ni Jehova niadtong Enero 24, 1987. Wala madugay, nag-alagad ko ingong bug-os panahong ministro, nga nagboluntaryo sa pagtudlo sa Bibliya ngadto sa uban. Sukad niadto, nagpadayon ko sa bug-os panahong ministeryo ug nakaalagad ko sa tibuok kalibotang hedkuwarter sa mga Saksi ni Jehova sa New York, U.S.A.

 Dihang nahibaloan nako ang kamatuoran bahin sa Diyos, nakita nako kon unsay kulang sa akong kinabuhi. Dili na haw-ang ang akong kinabuhi. Hinuon, naa nay direksiyon ang akong kinabuhi ug naa na koy tinuod nga paglaom, ug malipayon kaayo ko. Ganahan gihapon kong mag-exercise pirme, pero ang pagbansay sa lawas dili na mao ang pinakaimportante para nako. Ang akong prayoridad mao ang pag-alagad kang Jehova nga Diyos.

 Dihang nag-martial arts pa ko, pirme kong alerto sa mga tawo sa akong palibot ug kanunay ko maghunahuna kon unsaon pagdepensa ang akong kaugalingon kon dunay moatake nako. Karon, alerto gihapon ko sa mga tawo sa akong palibot, pero sa lahi na nga rason—aron tabangan sila. Ang Bibliya nakatabang nako nga mahimong mahinatagon ug maayong bana sa akong buotang asawa, si Brenda.

 Ganahan kaayo kog martial arts sa una. Pero naa koy gipuli ana nga mas maayo. Nindot kaayo ang pagkasulti sa Bibliya bahin ana: “Ang pagbansay sa lawas naay gamayng kaayohan, apan ang debosyon ngadto sa Diyos mapuslanon sa tanang butang, kay nalangkit niini ang saad sa kinabuhi karon ug sa umaabot.”—1 Timoteo 4:8.