“Sa dili madugay, moabot ang grabeng mga kalamidad sa atong planeta. Ang dagkong siyudad matabonag tubig. Mograbe ang kainit. Mas mokusog ang mga bagyo. Monihit ang tubig sa daghang bahin sa kalibotan. Mapuo ang minilyong klase sa tanom ug hayop. Dili ni hinimohimo lang o pagpanghinobra. Mao gyod ni ang giingon sa siyensiya nga mahitabo kon dili usbon sa mga gobyerno ang ilang mga polisiya sa paggamit ug enerhiya.”—Matod ni António Guterres, secretary-general sa United Nations, bahin sa Intergovernmental Panel on Climate Change nga report niadtong Abril 4, 2022.

 “Ang mga siyentista nagpasidaan nga sa dili madugay, maapektohan sa climate change ang halos 423 ka national park [sa United States], ilabina kay kining mga lugara dakog purohan nga madaot tungod sa nagkainit nga klima. Ang mga kadaot nga puwedeng mahitabo morag susama nianang mabasa nato nga mga kalamidad diha sa Bibliya: mga sunog ug baha, pagkatunaw sa mga yelo, pagtaas sa lebel sa dagat ug mga heatwave.”—“Flooding Chaos in Yellowstone, a Sign of Crises to Come,” The New York Times, Hunyo 15, 2022.

 Masulbad ba ang mga problema sa atong planeta bahin sa pagkadaot sa kinaiyahan? Kon oo, kinsay mosulbad niini? Konsideraha kon unsa gyoy giingon sa Bibliya.

 Ang Bibliya nag-ingon nga ang Diyos ‘maglaglag sa mga nagadaot sa yuta.’ (Pinadayag 11:18, footnote) Kini nga teksto nagtudlo natog tulo ka butang:

1.  1. Ang mga ginahimo sa mga tawo magpahinabog grabeng kadaot sa yuta.

2.  2. Ang pagdaot sa yuta matapos ra.

3.  3. Ang Diyos, dili mga tawo, ang mosulbad sa mga problema sa atong planeta bahin sa pagkadaot sa kinaiyahan.

 Ang Bibliya nag-ingon nga “ang yuta magpabilin hangtod sa hangtod.” (Ecclesiastes 1:4) Puy-an ni sa walay kataposan.

•   “Ang mga matarong manag-iya sa yuta, ug sila magpuyo niini hangtod sa hangtod.”—Salmo 37:29.

 Ang atong planeta bug-os nga mabalik sa maayong kahimtang.

•   “Ang kamingawan ug ang umaw nga yuta magsadya, ug ang desyertong kapatagan magkalipay ug mamulak sama sa safron.”—Isaias 35:1.