Dihang natapos ang Gubat sa Kalibotan II niadtong 1945, dakong bahin sa Germany ang nagun-ob. Ang mga siyudad nagun-ob, ang mga eskuwelahan wala nay tawo, ang mga ospital dili na magamit, ug ang mga bomba nga wala pa mobuto makita bisan asa. Dugang pa, kulang ang suplay sa pagkaon, maong mahal kaayo ni. Pananglitan, sa black market, diin ilegal nga gibaligya ang mga produkto, ang tunga sa kilong mantekilya (butter) mokantidad ug katumbas sa unom ka semana nga suweldo!

 Apil niadtong mga naapektohan mao ang gatosan ka Saksi ni Jehova nga nabilanggo sa daghang katuigan diha sa mga prisohan ug kampo konsentrasyon tungod sa ilang pagtuo. Pagka-1945, gibuhian sila nga tapot sa lawas ray dala. Ang ubang Saksi nawad-an sa ilang mga propidad ug kabtangan. Ang pipila nag-antos sa grabeng kagutom nga makuyapan sila panahon sa Kristohanong mga tigom.

 Ang mga Saksi ni Jehova sa lainlaing dapit sa kalibotan milihok dayon aron matagan-an ang dakong panginahanglan sa pagkaon ug sinina. Ang mga igsoon sa hedkuwarter sa United States mihangyo sa sangang buhatan sa Bern, Switzerland, nga tabangan ang mga igsoon sa Germany. Si Nathan H. Knorr, representante sa hedkuwarter, mibisita sa Europe aron ma-coordinate ug mapadali ang pagpanghatag ug hinabang.

 Ang mga Saksi sa Switzerland nanghatag ug daghan kaayong pagkaon, sinina, ug kuwarta. Ang mga donasyon gipadala una ngadto sa Bern, diin kini gilainlain ug gipamutos ayha ipadala ngadto sa Germany. Ang mga Saksi sa laing dapit, apil na sa Sweden, Canada, ug United States, nagpadala sab ug hinabang, ug nakabenepisyo niini ang katawhan ni Jehova dili lang sa Germany kondili sa daghang nasod sa Europe ug Asia nga naapektohan sa gubat.

 Sulod sa pipila ka bulan, ang sangang buhatan sa Switzerland nagpadalag kape, gatas, asukar, cereal, gipaugang prutas, utanon, ug delata nga karne ug isda. Nagpadala sab silag kuwarta.

 Dugang pa, ang mga Saksi sa Switzerland nagpadalag lima ka toneladang sinina, apil ang mga kapote, sinina sa babaye, ug amerkana. Ang Enero 15, 1946 nga isyu sa The Watchtower nag-ingon: “Ang mga igsoon naghatag, dili sa ilang kinabatian, kondili sa ilang kinanindotan. Nagsakripisyo gyod sila aron matabangan ang ilang mga igsoon sa Germany.”

 Ang mga Saksi sa Switzerland nagpadala sab ug halos 1,000 ka paris sa sapatos, ug ilang seguroon nga maayo nig kondisyon sa dili pa ipadala. Ang mga igsoon sa Wiesbaden, Germany, nga maoy nag-abli sa mga hinabang, nahingangha sa kalidad ug kadaghan niini. “Wala gyoy tindahan sa Germany nga nagbaligyag ingon anig kalidad nga sinina ug sapatos,” miingon ang usa ka Saksi.

 Ang pagpadalag mga hinabang nagpadayon hangtod sa Agosto 1948. Tanantanan, ang mga igsoon sa Switzerland nagpadala sa ilang mga igsoon sa Germany ug 444 ka dagkong kahon sa hinabang nga mitimbang ug 25 ka tonelada. Sa nahisgotan na, dili lang ang mga Saksi sa Switzerland ang nanghatag ug hinabang. Pero apil sila sa kinagamyang mga grupo nga nanghatag. Niadtong panahona, 1,600 lang ang Saksi sa Switzerland!

 Si Jesu-Kristo miingon: “Kon kamo dunay gugma sa usag usa, ang tanan makaila nga kamo akong mga tinun-an.” (Juan 13:34, 35) Ang gugma nagpalihok sa katawhan ni Jehova sa paghatag, dili sa ilang sobra, kondili sa ilang kinamaayohan. (2 Corinto 8:1-4) Ang usa ka sulat gikan sa Zurich nag-ingon nga “daghang igsoon nga pobre, pero gustong motabang, ang naghatag sa [ilang] mga ration card ug kuwarta.”

 Ang katawhan ni Jehova sa Germany nakarekober dayon sa mga resulta sa paglutos ug sa gubat. Ang usa ka rason mao ang organisado ug daghan kaayong tabang nga gihatag sa ilang mga isigkamagtutuo nga nagpakitag tinuod, nagsakripisyo sa kaugalingon nga gugma.