Niadtong Dominggo sa gabii, Pebrero 24, 1924, nagsugod pag-broadcast ang estasyon sa radyo sa mga Estudyante sa Bibliya, a ang WBBR. Unsay nahitabo sa unang broadcast? Kinsay nakadungog niini? Sa unsang paagi ang mga Saksi ni Jehova padayong naggamit sa kinabag-ohang teknolohiya aron isangyaw ang “maayong balita sa Gingharian . . . sa tibuok yuta”?—Mateo 24:14.

 Ang unang broadcast nagsugod sa alas 8:30 sa gabii ug miabot nig duha ka oras. Ang programa gihimo didto sa bag-ong gitukod nga studio sa Staten Island, New York. Nahinumdom ang sound engineer nga si Brader Ralph Leffler nga ang tanang tua didto sa studio eksayted ug gikulbaan. Nakapangutana siya, “Naa kahay makadungog nato?” Dayon siya miingon: “Gipaandar nako ang control panel, gisugdan namo ang programa, ug nanghinaot mi nga molampos ra ang tanan.”

 Ang announcer niini nga makasaysayanhong broadcast mao si Brader Victor Schmidt, ang manedyer sa estasyon. Gisugdan niya ang programa pinaagi sa pagpaila sa pipila ka musikero ug tigkanta, nga ang tanan mga Estudyante sa Bibliya. Una, naay usa ka brader nga nagtugtog ug klasikal nga musika diha sa piano. Dayon, gikanta ni Cora Wellman ang “The Ninety and Nine,” nga gibase sa ilustrasyon ni Jesus bahin sa nawala nga karnero. (Lucas 15:4-7) Naa pay daghang misunod, apil niana ang pagkanta ni Frederick W. Franz sa “The Penitent,” usa ka awit bahin sa mausikong anak.—Lucas 15:11-25.

 Si Joseph F. Rutherford, nga nanguna sa mga Estudyante sa Bibliya niadtong panahona, naghatag ug pakigpulong nga naghisgot nga ang maong estasyon gihimo “para sa intereses sa gingharian sa Mesiyas.” Siya miingon: “Kay gitugotan man sa Diyos nga maimbento ang radyo, segurado nga kabubut-on Niya nga ato ning gamiton sa pagtudlo sa mga tawo bahin sa katumanan sa Iyang makapahinganghang mga tagna.”

 Daghan sa northeastern United States ang nakadungog sa unang broadcast. Usa ka mamiminaw sa Morrisville, Vermont, nga kapig 320 ka kilometro (200 ka milya) ang gilay-on, miingon: “Nalipay gyod ko kay nadunggan nako pag-ayo ang broadcast. . . . Klaro kaayo ang tingog ni Brader Rutherford. . . . Nadunggan gyod ang matag pulong nga iyang gisulti.” Bisan kadtong naa sa Monticello, Florida, nakapaminaw pod niini! Milampos gyod ang bag-ong estasyon sa radyo ug daghang tawo ang nagpadalag sulat kay mapasalamaton sila niini.

 Ang estasyon nagpadayon sa pag-broadcast sa mensahe sa Gingharian sulod sa 33 ka tuig, b sagad sa mga lugar sa northeastern United States. Pero dihay mga higayon nga ang WBBR mikonektar sa ubang estasyon, maong minilyon ang nakapaminaw sa United States, Canada, ug sa mas layo pang mga lugar. Gani ang 1975 Tinuig nga Basahon sa mga Saksi ni Jehova, nag-ingon: “Ang 1933 mao ang tuig nga na-broadcast ang estasyon sa kinadaghanang tawo, diin 408 ka estasyon ang gigamit ngadto sa unom ka kontinente, ug naa poy 23,783 ka lainlaing pakigpulong nga binase sa Bibliya nga na-broadcast . . . Niadtong panahona, ang broadcast sa Watch Tower dungan nga madungog sa lainlaing estasyon sa radyo. Ang mga tawo nga tigpaminaw ug radyo nakadungog gyod sa kamatuoran nga nagdayeg sa Diyos.”

 Dihang gisugdan sa mga Estudyante sa Bibliya ang WBBR, naa ray mga 1,064 ka magwawali sa Gingharian sa United States. Nakatabang gyod nila ang estasyon aron mas daghan ang makadungog sa maayong balita. Pero pagka-1957, naa nay mga 187,762 ka magwawali sa Gingharian sa United States ug 653,273 sa tibuok kalibotan. Tungod sa pagbansay diha sa mga tigom, ang maong madasigong mga igsoon nahimong mas epektibo sa pagpamalaybalay ug sa ubang paagi sa pagsangyaw

 Tungod sa pag-uswag nga resulta sa pagpamalaybalay, gimitingan sa responsableng mga brader nga nanguna sa organisasyon kon padayon pa bang gamiton ang WBBR. Unsay resulta? Nadesisyonan nila nga ibaligya ang WBBR, ang estasyon nga gipanag-iya ug gigamit sa Watchtower Society. Nabaligya ni niadtong Abril 15, 1957. Sa adlaw una pa ana, sa kataposang broadcast, gipangutana si Nathan H. Knorr kon nganong ibaligya ang estasyon. Gipatin-aw niya nga ang pangunang rason sa pag-uswag sa gidaghanon sa mga Saksi ni Jehova mao ang pagsangyaw sa balay ug balay. Siya miingon: “Daghan gyod ang natabangan sa mga broadcast sa WBBR.” Siya midugang: “Pero ang pag-uswag sa gidaghanon sa mga Saksi ni Jehova sa mga lugar nga madunggan ang WBBR parehas ra niadtong mga lugar nga dili ni madunggan.” Nakita sa mga brader nga mas epektibo ang pagsangyaw sa balay ug balay sa pagtabang sa mga tawo nga makadungog sa maayong balita. Pero wala to magpasabot nga dili na gyod mag-broadcast ang mga Saksi ni Jehova. Human sa daghang tuig, nag-broadcast ta pag-usab, pero sa lahi na nga paagi.

 Niadtong Oktubre 6, 2014, naay nindot kaayong gihimo ang organisasyon ni Jehova—ang estasyon sa telebisyon diha sa Internet nga gitawag ug JW Broadcasting. Ang mga Saksi ni Jehova ug ubang tawo motan-aw ug maminaw sa binulan nga programa gamit ang Internet, JW Library nga app, pang-streaming nga mga gadyet, o satellite receiver. c Pero sa ubang bahin sa kalibotan, ang katawhan ni Jehova naggamit gihapog radyo ug telebisyon sa pagsangyaw. Sa unsang paagi?

 Di pa dugay, gigamit sa organisasyon ni Jehova ang lainlaing estasyon sa radyo ug telebisyon sa pag-broadcast sa atong mga tigom ug kombensiyon ngadto sa mga lugar nga hinayg Internet. Daghan kaayong dili Saksi ang nakapaminaw ug nakakita ani nga mga programa, apil ang mga interesado nga mokat-on bahin sa Bibliya. Pananglitan, sa tuig 2021 ug 2022, ang mga manedyer sa estasyon sa radyo miingon sa sangang buhatan sa East Africa nga daghang dili Saksi ang nakaapresyar sa atong mga tigom. Gani, daghan sa Kenya, South Sudan, ug Tanzania ang gustong magpa-Bible study.

 Pero ang pagsangyaw pinaagi sa pagpamalaybalay, cart, ug ang paggamit sa website nga jw.org mao gihapon ang pangunang paagi sa mga Saksi ni Jehova sa pagsangyaw sa mensahe sa Gingharian sa tibuok kalibotan. Ang atong website makatabang sa mga interesado nga mabasa ang Bibliya ug binase sa Bibliya nga mga publikasyon sa kapig 1,080 ka pinulongan, ug kining tanan walay bayad. Makita pod nila dinhi ang tubag sa ilang mga pangutana bahin sa Bibliya ug kon asa ginahimo ang mga tigom. Tungod ani nga mga pamaagi, nasangyaw sa mga Saksi ni Jehova ang maayong balita bahin sa Gingharian sa Diyos sa mas daghang tawo sukad masukad! Natuman gyod ang tagna sa Bibliya nga ang “maayong balita sa Gingharian isangyaw sa tibuok yuta.”—Mateo 24:14.